LU BAN A MAUMWI
SAWK KA AI: GARENG MA MUN
Lu Ban gaw Lugaw Aru Arat masha (Ya na Shandung Hkyubu masha, Shandung Htinchyu masha mung nga ma ai), mying danhkung ai ta sama masha, htawm prat na ta sama masha ni shi hpe "Jiwoi jiwa sara" nga shagrau shamying ma ai. Shi gaw mungkan shaning shawng 507 ning hta sa pra ai rai nna, mungkan shaning shawng 444 ning hta si mat sai, Chunkyu Aru Arat htum wa daw hte Jan- gaw Aru Arat hpang wa ai ten na masha rai nga ai. Lu Ban gaw naw kaji kaw nna grai shakut ai masha re majaw, hpaji gan sharin la na matu grai lawan dik nga ai. Kawa sadek kaba langai galaw jang, shi mung sadek kaji langai hkan galaw, kawa lahkum kaba langai galaw jang, shi mung lahkum kaji langai kan galaw rai u ai. Asak 10 ning sha naw du yang, Lu Ban pa galaw yang hpa raw raw re chye galaw shapraw dan sai. Dai zawn re hpe ganu kawa grai yu kabu ma ai hta n-ga, htingbu htingpyen ni mung grai shakawn ma ai. Shing rai, htingbu masha langai kawa hpe: "Lu Ban ndai daram laram ai wa, na a hpang hkan shangun nna garum shingtau ma di woi hkawm yang, shi a ta sama hpaji pyi grau chye la na wa!" Nga abawk tsu u ai. Kawa loi hkring mi myit yu nna: "Nye a ta sama hpaji shi hpe ndep ai, dai majaw shi shinggan de pru hkawm nna sara kaba ni kaw she sa sharin u ga." Nga htan u ai. Lu Ban sak 12 ning ai dai shaning na lani mi hta, kawa gumra langai dun shapraw tawn, gumhpraw makai mi la ya rai nna, Lu Ban hpe: "Ma e, wa prat daw mi pu ba yang, gumhpraw loi lu mahkawng tawn nga ai.
Nang ndai hpe lam shabrai di nna, gumra jawn nhtawm Chyung-nan shan de sa nna, dai shara na lak sama sara kaba ni kaw ta sama hpaji sa sharin la su!" nga u ai. Hpang shani, shi gaw hpun nba re ni hkyem gun nna, gumra jawn kau rai, matut manoi aten 99 ya ting hkawm kau u ai. Shi bum kaba 99 hpe tawt kau, hka kaba 99 hpe rap kau rai yang she Chyung-nan shan kaw sa hkawm du nga ai. Shi bum pungding kaw wa lung du ai hte, shingngu nta masum wa mu hkrup nna, shi chyinghka ahtu hpaw shang wa yang, ningwa re lang rai amyu myu ga kaw ndi nda rai taw nga ai hpe wa mu nu ai. Bai nna nhku gata na yupku kaw gaw punghpraw punglaw re dingla langai yup nga nna, yup gawk gawk ai gaw amu gung ai pyi hpang lam she rai nga ai. Dai zawn re kumla hpe sa mu ai hte Lu Ban gaw: "Ndai gaw teng sha lak sama sara kaba rai jaw sai." Nga myit u ai. Dai htawm, Lu Ban ga hkan taw ai lang rai re ni hpe hta lajang kau, nhku gata asan aseng di ye jasan kau rai, sara kaba wa yup hprang wa na hpe la nga ai. Rai yang shi bungli dai ni ma hkra galaw ngut kau tim, dingla dai yup nhprang nga ai. Jan lau shang hkra la nga jang she, dingla dai yup rawt nu ai.
Shaloi Lu Ban tin shapun rai shi kaw sa wa nna, ga kaw hput di rai: "Ngai gaw Lu Ban ngu ai re, nye a myit hta lak sama hpaji sha sharin la mayu ai, sara kaba nang ngai hpe nang a sharin shatai la rit." nga hpyi lajin nga u ai. Dingla wa madat la ngut ai hte, n-gup she mahka hkra nsen aja awa nga manyi let: "Nang hpaji sharin la nna, nhpa wa di na re ta?" nga san dat nu ai. Lu Ban: "Mung shawa masha ni hpe mahkrai hkrai ya, dum nta galaw ya na." nga htan u ai. Dingla wa san san seng seng di lajang tawn ai nhku gata hpe yu nna: "Nang gaw shakut chye ai ma re, dai majaw ngai shawoi na hta lai nna nye a sharin ma di woi la na. Rai yang, ya nang ningwa, wukawn, htwibau re ni naw shawng garang shatai ra nga ai." nga bungli galaw shangun hpang wa sai. Dingla wa ga tsun ngut ai hte, Lu Ban lawngta shalun kau rai, ningwa wukawn re garang bang wa nu ai. Shi gaw shani shana nhkring nsa rai, matut manoi sanit ya sanit na shakut yang she ningwa, htwibau, wukawn dai ni garang shatai ma lu nga ai. Dai htawm sara wa bai tsun ai: "Nang le chyinghka lam shawng na hpun kaba hpe naw bai sa ret galau kau u." nga mu lit bai ap ya nu ai.
Lu Ban hpun dai hpe sa yu dat yang, hpun dai kaba dik nga ai, marai lahkawng ahpum tim pyi n hkap ai hta n-ga, hpun ningdung gaw lamu hpe pyi achyaw hkra na zawn rai galu dik nga ai. Raitim shi gaw myit ndaw ai sha, hpun hpang makau kaw dung nga nna ret hpang wa nu ai, matut manoi nhtoi 12 ya 12 na ret jang she, hpun dai hpe lu ret daw galau tawn nu ai. Hpun dai ret galau tawn ai hpang sara wa: "Nang hpun ndai hpe nta ngau langai mi grai manyen tsawm hkra hprang shapraw dat u." nga mu lit bai ap ya sai. Lu Ban ningwa hpai lang rai, Matut manoi nhtoi 12 ya 12 na bai sa hprang shakut jang, manyen tsawm ai hta n-ga din pri tsawm dik ai nta ngau langai hprang ngut tawn sai. Shaloi, sara wa bai tsun ai: "Ngau dai kaw ahku 2400 tawk waw nna, ahku dai ni hta 600 gaw din din re, 600 gaw jut mali re, 600 gaw pyet pyet re, 600 gaw jut masum re tawk shapraw dat u." nga mu lit bai galaw hparan ap ya nu ai. Lu Ban matut manoi nhtoi 12 ya 12 na, hpun hkyep hte mang rai bai tawk shakut sa wa jang she, sara tsun ai hte hkrak tup re ahku 2400 ma hkra tawk waw ngut da sai.
Mu bungli dai ni galaw ngut ai htawm, sara shi hpe: "Gaja dik sai, n hpa mung nang hpe n lu shayak sai, nang gaw gaja dik ai lak sama hpaji masha nan byin lu sai." nga tsun shagrau u ai. Ga tsun ngut ai hte, shi gaw Lu Ban hpe sinna maga na nta kaw woi sa u ai. Nhku gata kaw rung rai hkrang amyu myu tawn shajang da nga ai, ga shadawn hkrang amyu myu re nta, mahkrai, gawngngu, saboi, lahkum, sadek re galaw sama grai tsawm ai rung rai ni hpe sa mu nna, Lu Ban myi maka pyi ka mat sai. Yu nga ninglen sara: "Nang rung rai hkrang ndai ni hpe langai hte langai di hpya kau nhtawm, langai hte langai di bai shachyaw tawn u." nga tsun da nna, shinggan de pru mat wa nu ai. Ndum shamyi aten masum ning lai mat wa sai hte maren, Lu Ban a myit hta mung rung rai hkrang ndai ni kaning di galaw ai lam hpe yawng matsing chye la sai. Sara wa Lu Ban marai rawng nrawng chyam yu na matu, rung rai hkrang dai ni yawng galang ta nat gamawng kau nna, Lu Ban pe bai gahtap galaw shapraw shangun u ai. Lu Ban myit pyi gade n myit sumru ra ai, aten gade ya nrai yang rung rai hkrang dai ni yawng bai galaw shapraw tawn lu sai. Sara wa shi a sharin ma a magam nsi hpe grai yu kabu nna: "Nye a hpaji nang yawng sharin la ma sai, ya gaw hpawng shingra kaw ta- tut nan sa galaw na sha ra sai. Nang daini jang hkawm mai sai." Nga ahkaw ahkang jaw nu ai. Shing rai, Lu Ban gaw chyeju madu sara hpe marit myiprwi hte hka kau da nna, hpawng shingra kaw mungchying sha ni hpe mahkrai hkrai ya, gawngngu nta re galaw ya rai nga hkawm mat wa nu ai.
