KINDU NAN A MAUMUI

KINDU NAN A MAUMUI

MARU GAWNG

Moi matsaw ningtsang hpan wa ningsang chye wa ningchyang gaw, nhprang galang ngu ai hte nhprang u hka ngu ai hpe, mungkan ntsa maza mala jasan jaseng seng kau na matu ndai yan hpe shawng hpan da sai da! Dai hpang Kindu nan ngu ai hpe bai hpan ai da, dai Kinu nan hpe gaw, galang langda uhka ni hpe gawn na matu, shana e pyen na, shani e pyen na singkaw, shani shana mu na myi, manam shagram na na matu ladi nrung, lunghpra nhkap n gam lung na lagaw chyinghkyi hkum tsup jahkum ya sai da! Shingrai shi hpe gaw, dai galang langda uhka ni a du kaba ngu nna shingteng amying jaw nna mungkan ga de shayu dat sai da. Ndai ten hta mungkan ntsa shinggyim masha mayat maya nau wa hpring chyat wa, nsan nseng maza mala amyu myu byin wa magang ra ai. Shada da kashun lu kashun sha, mawp lu mawp sha, nsha lawa kan kaba ngu ai mung paw pru, ana zinli kaba ngu ai kaw mung si ru. Dai majaw mungkan ntsa jasan jaseng na matu gala langda u hka ni lagawng ndang pu ba mat ma rai nna, shanhte a du kaba Kindu nan hpe mabyin masa lam ni yawng sa tsun hkai dan masai da. Shingrai Kindu nan mung shi dung ai ja lahkum kaw dung nga nna du du di di ngu madat she madat rai nga yang she, shi ndaw kaw na jawm hkinri kaw uhka langai bai pyen sa wa nna she, san ga hku myen au mye au ngu shaloi dai shi hpe shi sa tsun dan ai galang langda langai mi mung, diri gaw diri dara gaw dara ndang sai ndang sai ngu bai tsun ai hpang, Kindu nan mung di di du du ngu nna matsaw ningtsang ga de shi dung ai ja lahkum kaw nna pyen rawt mat wa sai da.

Shingrai Kindu nan gaw ntsa malen yawn ginding aga de, sinpraw sinna dingdung dingda pyen kawan mada mat wa yang, gaja wa sha mazang nrin re hpe mu mada sai da. Dai kaw nna shi gaw nhkring ai sha, matsaw ningtsang ga de awyen du nna, matsaw ningtsang ga kaw hpanwa ningsang hpe, nungkan ntsa shinggyim masha ni a mabyin masa hpe nshut shai hkra wa tsun dan nu ai. Shaloi dai hpanwa ningsang gaw, dai daram wa byin na zawn nawn ai myit hte, shi lawu na amu kasa ni hpe ginding aga le sa jep maram yu shanggun /ang she, gaja wa du kaba Kindu nan tsun ai ga hte wa gachyi mi mung nhai rai nna lamu kasa ni mung sumsing lamu matsaw ningtsang hpan ningsang htingnu de bai nhtang lung wa nna, hpanwa ningsang hpe wa tsun dan masai da. Shaloi hpan wa ningsang chyewa ningchyang gaw, tsun sai da, mungkan ntsa shinggyim masha ni nsha lawa kan kaba nau law mat re sai. Nhprang wan sam she naw nat, kagyin kaya du naw sat, ngu nna nhprang wan ngu ai nat kau dat sai da.

Dai hpang, ya nhprang wan wa mi nau wa lai sai ngu nna, mungkan shawu hte she naw gashin shatsai, ngam ai shinggyim nli hpe naw mayat maya mung awai nna she sha-u sha-ing ngu nna nhtoi mali shi ya, mali shi na asin nbung laru marang kaba htu shangun sai da. Dai hpang matsaw ningtsang hpanwa ningsang gaw kindu nan hpe du kaba ahkang aya nraw, moi na hkringhtawng naw dagraw ngu nna, kinding aga bai shayu dat nu ai. Ndai lang shinggyim masha ni hpe wa tsun dan su, moi na zawn nsha lawa kan kaba, nsan nseng maza mala re shum galaw. Ja hka-wan lang ja hkoi ze lakung lang, masum ya hta shat galang mi sha, ngu wa tsun su ngu sai da.

Htawm e kindu nan gaw, du kaba langai mi mung rai, shi a du mying hpe mung marit gumrawng dum re ai myit hte, lam mung nau tsan rai nna, matsaw ning tsa na ni tsun ai masum ya hta shat lang mi sha nga jang gaw, shinggyim masha ni sharang ndang na re ngu nna, bai ngai na matu mung arawng n nga mat na re ngu myit la nna she. Matsaw ningtsang ga hpe nyet ningnhkap di nna, shinggyim masha ni hpe shinggyim masha ni e, matsaw ningtsang na ni tsun sai. Daini kaw nna gaw lani mi shat masum lang sha, ga hka wan lang, hpun, kawa, hkoize lakung lang, ngu tsun sai da. Shing ngu tsun kau ai htawm, Kindu nan hpe matsaw ningtsang na ni bai shaga la nna, ya shinggyim masha ni hpe tup hkrak gaw wa tsun dan sa ni? ngu san jang, hpanwa ningsang chyewa ningchyang a man kaw lagaw hte rawng ta hte mawng rai. dan dan tawk tawk lani mi shat masum lang sha, ga hka-wan lang, hpun kawa hkoize lang mu ngu tsun sai.

Shaloi karai wa gaw, masin na pawt ai hte na manai di kau ya, shingrai ya du hkra Kin du nan na ntu myi hte nrung sha tu ai da. Dai shadu lawa marit ngu nna, Kindu nan a n gup mung adup apet kau ya. Moi mung shinggyim masha ni shat nau sha nna she nsan nseng maza mala re ngu yang mi, daini kaw nna nang du nmai galaw sai, dai manam shagram, hkyi gaw nang she wa hte lup kau nu, ngu nna zen di ai ladi shakap dat ya sai da. Dai re majaw kindu nan gaw shani shana hkyi gumdin la nna lup shakut si nga ai da.! Dai kindu nan gaw, du mying lu nna gumrawng gumra ntsa tara hpe nyet kau ya ai majaw, du aya mung nlu mat, hkyi hte shakut nga lu ai.