Gidon Post hpe amying shingteng daidaw wa ai lam

Ndai Gidon Post “Bum” ngu nna amying shingteng garai n daidaw lu yang Gidon Post Bum gaw Nhkram lamu ga kata na bum langai hku sha naw rai nga ai. Raitim, Karai Kasang a yawshada ai lam hpe kadai mung n mu n chye da ai lam, makoi magap da ai lam hpe “Gidon” majan ngut ai hpang she grau chye na wa ai. “Gidon” ngu nna amying daidaw ya ai gaw nhtoi 25-11-2014 ya jahpawt 7:00 am hta daidaw ya sai.

Shawng kaw nna nga taw sai “Gi- don” ngu nna, amying garai n lu ai Bum a tawtap shara hta Simsa Post ngu ai dinghkrai post mi nga ai. Dai Simsa Post gaw tai hpyen ni dap jung shara Nhkram Post hte grai ni kahtep dik ai post rai nga ai. Ndai Post hpe tai hpyen ni nhtoi 17-8-2016 ya shani htim gasat zing madu la kau sai.

Tai hpyen ni ndai Simsa Post hpe garai n zing madu la ai ten, Masat (253) Dap Nawng Dap Dung ni a makawp maga ginra naw rai nga yang, dai Simsa Post kaw lit la woi awn nga ai Du Lawawm Naw Tawng hte (253) Dap Nawng Dap Dung Up, Du Jum Labang La Sam, hte (253) Dap Reng Du Jum Myitung Hkaw Lang ni myit woi jasat ai hte chyeju dum kyu hpyi poi hpe Simsa Post kaw galaw ga ai.

Dai majaw Hpyen magam gun Jan ni hte Maga Yang Hpyen Yen Mung Shawa nkau mi mung chyeju dum poi de nhtoi 24- 11-2014 ya shana dai Simsa Post kaw du lung wa saga ai. Dai shana gaw Simsa Post kaw yup hkring sa la ga ai. Shana hkringsa nga yang Masat (253) Dap Reng Du Jum, Myitung Hkaw Lang kaw nna, hpawtde chyeju dum poi nawku lamang garai n hpang lu yang, post nnan a matu akyu hpyi la mayu ai lam tsun ai. Jahpawt du ai hte rau anhte marai (7) shatup la nhtawm Bum dai de lung mat wa ga ai. Bum dai hpe wa mu dat ai hte maren, Wunpawng sha ni a makawp maga ninggang tai ya lu ai maka hkrang pru nga ai hpe wa mu dat ai hte rau anhte yawng marai (7) gaw –

1.  Rev. Pawm San Grawng (Sama Buga Hpung Up)

2.  Du Jum. Myitung Hkaw Lang (253 Dap Reng)

3.  Du. Maru Gam Nan (253 Bawm Hpareng)

4.  Lat Gyi. Lama Sa (253 Dap Nawng Dap Dung )

5.  Slg. Dumhpya Naw Ja (Ginra Madu )

6.  Hpt. Nhkum Awng La (Hpa Lap Mare Hpung Amu Madu )

7.  Sara. Labang Myu Shawng (Gara Yang Buga Apnawng Sara & Gumlau Mare, Sinpraw hkran)

ni hku nna, Wunpawng Amyu lakung (7) a gawng malai lata gindun shinggrup let, langai hpang langai akyu hpyi ngut ai hte “ Daini kaw na gaw Wunpawng myusha ni a makawp ninggang tai ya lu ai Gidon Post “Bum rai wa nu ga law” ngu nna amying shingteng daidaw masat hpundung jun da saga ai rai.

Gidon Post “Bum” a Yaw Shada ai Lam

Karai Kasang hpe kamsham ai hpung masha shagu gaw Gidon ngu ai Hpyen Jau Bu a lam hpe chye na ai ni nga ai zawn, ntsa lam sha chyena ai ni mung nga na ga ai. Shi a lam hpe atsawm sha chyena lachyum shapraw ai lam n nga yang gaw ntsa lam chyena hkap la da ai wa hte sha bung nga ai. Shi a lam hpe chyena hkap la lachyum shapraw let, ta-tut magam bungli galaw sa wa ai lam gaw Gidon a Ntawng Nhtu Nsam hte bung nga ai.

Nsam ngu ai ga si hpe Wun- pawng Jet ai ni yawng chyena da chyalu rai ga ai. Nsam ngu ai hpe lachyum shapraw ga nga yang grai, dam lada nga ai. Lachyum la ai Chyumdaw – Tara Agyi 6:14, Pru 3:19

Ga Shadawn –

1. Karai Kasang a Mungga Ntawng Nhtu Nsam

Karai Kasang a Ntawng Nhtu Nsam hpe kadai n mu lu ai raitim lam magup hpe dang kau lu ai atsam (Power) rawng nga ai.

2. Hpaji byeng-ya Nsam

Hkawhkam Shawlamun gaw Karai Kasang kaw nna n mu mada lu ai (Wisdom Power) hpe lu la ai wa rai nga ai. Shi a mungdan hpe (Wisdom Power) hte woi awn uphkang lai wa sai.

Dai hte maren, Anhte Wunpawng sha ni mung (Unity Power) ngu ai myit hkrum mangrum ai Nsam hpe lu la ai rai yang, Wunpawng sha ni myit mada nga ai Pandung de teng sha du wa lu na rai nga ai.

Myit hkrum mang rum ai nsam hpe mu lu na matu, nhtoi – 25-11-2014 ya shani Gidon Post “Bum” e Karai Kasang a mying ningsang hta anhte marai (7) a lata matut n di akyu hpyi ai lam gaw Wunpawng amyu lakung (7) a gawng malai tai let Gidon Post “Bum” hpe Karai makawp maga ya ai, Padang lam hpe jaw ya na matu, hkrang shapraw akyu hpyi majai da ga ai.

Nanhte Wunpawng Sha ni myit hkrum yang Hkawhkam lu ai amyu rai na re nga nna sasana sara kaba Dr. Ola Hanson tsun da ai ga hta dik tup la lu na Unity Power Nsam kumla hpe Karai Kasang nan mu chye hkap la hkrang shapraw ya nga sai.

Nanhte myit mang ai lam hta Ngai myit mang ai lam gaw grau tsaw nga ai nga nna madu Yehowa tsun ai lam hta hkawn- hkrang na, dik tup na, byin tai wa na lam hpe teng tup kamsham ai lam gaw shingran magam bungli hpe hkrang shapraw lu ai lam de shadu ya dat ai mabyin lam ni rai nga ai.

Ga Shadawn – Marai Masum (3) myit hkrum yang Panglai Nawng Htawk Dang ai zawn, n mai byin ai n dang di n dang dep lu ai hpe shabyin dat lu ai Karai Kasang a makawp maga garum shingtau la ai nsam hpe shadan shadawng ai lam rai nga ai.

Dai majaw Gidon Post “Bum”, Gidon majan gaw Wunpawng sha ni a (Unity Power) hpe sakse kumla madun ya lu ai image hku nna yaw shada let, amying shingteng shamying da ai lam rai nga ai law.

Ndai laika ngau hpe 2018 ning March shata shapraw ai Hparat Panglai Journal Vol.4 No.1 kaw nna shaw la ai re.

By, Pawm San Grawng