SHARE SHAGAN MASAT NHTOI AUGUST 10 A SHINGDU LABAU

GOC Zau Seng mungkan mung masa mahkrun de chya lung wa ai lam

GOC Zau Seng hte hpung ni gaw Thai mung de pru hkawm sa na matu 1964 ning hta Mung Myit Sinli ga Kutkai, Kawnghka hte kade n tsan ai Loi Yawp Bum kaw buga shagu na hpyen la ni hpe kahyin nga ma ai. Loi Yawp bum kaw Shanglawt ni masha kahkyin nga ai lam Myen ni chye kau nna dai shara de man yawng htu lung wa ma ai. Myen ni lung wa sai lam shiga na ai hte shana de hkying mali daram hta pru hkawm mat wa ai masai. Shawng nnan e, moi na Miwa hpraw ni a hpyendap hte nbungli Pa du hkra nga ai, Golden Triangle ngu ai Thai, Laos, Myanmar jarit ginra kaw hpyendap jung na matu yaw shada ai. Myen ni hte hkrum ai majaw, lam kaw shata mali daram na mat ai.

Wa ginra kaw chyat rawng nga ai ten, Miwa hpraw ni bai tau la nna Thai Mung de shang wa lu. Miwa hpraw ni dap jung da ai shara kaw shawng hkring sa la ma ai hte labu hpun palawng, lu sha ni mung karum ya ai hte Htam Ngawq Bum de matut lai nna dap jung hpang sai re. GOC Zau Seng mung hpyen ma ni hpe shara jahkrat da nna Chingmai de bai yu wa mat ai. GOC Zau Seng gaw Rawt Malan ai bungli hta sanat laknak hte gasat yang dang yang mung dang na; sum yang mung sum na. Dai majaw, mungkan mung masa mahkrun hku nna Anhte Wunpawng sha ni mung Awmdawm Shanglawt lu gying ai amyu re ngu ai masa hpe mungkan de shana, ga saw na matu Thai mung de pru hkawm sa wa ai re. Mungkan kaw na gaw kadai mung kadai chye ai hku laknak lang rawt malan ai gaw tang n du ai.

Dap Hpawm langai hpaw mu ngu nna GOC Zau Seng hpe lit shatsam ai. Kaga hpunau rawt malan hpung ni hpe mung zinlum nna, shanhte mung Thai mung kaw hpyen dap sa jung nna nga ma ai. Dai ten hta Rawt malan hpung law law a ningbaw ni kaw na Mungkan de hkrang ai gaw GOC Zau Seng re. Dai ten, Myen mungdan de communist shang wa ai ten re majaw, Mungdan 70 jan pawng hpawm da ai Mungkan a communist ninghkap Hpung de lu shang hkra shakut ai. 1971 ning hta dai zuphpawng hta dung lahkum langai mi lu na matu ahkang hpyi ai shaloi, kaga mungdan yawng myithkrum sai raitim, India na Kala la langai gaw, “Ndai hpung hta lawm ai ni gaw mungdan lu ai ni hkrai re, ndai Jinghpaw La wa gaw mungdan n lu shi ai.

Dung lahkum langai jaw yang htuk manu na ni?” ngu san dat ai shaloi, kaga mungdan dat kasa ni mung myit hkawn hkrang wa ai hte dai shaning dung lahkum n lu shi ai hku re. Tim, mungdan kata de communist shang nga sai ten re majaw, GOC Zau Seng gaw, ngai mung communist ninghkap ai wa re ngu tsun nna shanglawm shakut nga ai. Shan lahkawng galoi mung matut mahkai nga ai. GOC Zau Seng gaw maigan hte matut mahkai bungli galaw ai lam ni hpe tinang a magam dap de galoi mung shana ai. Mung masa hte seng ai lam ni hpe gaw Ginjaw de dingyang jak hte shiga shana ai. Ginjaw kaw na shamu shamawt nga ai lam ni hpe mung Shi hpe dingyang shana ma ai.

Manghkang byin wa ai lam

Ndai ten, ningmu shai wa ai lam gaw, GOC Zau Seng Thai kaw nga ai ten, Taiwan hte matut mahkai ra ai. Shanglawt ni lang ai ga shaga jak ma hkra gaw Thaiwan Asuya karum ya ai re. Taiwan kaw na lu la ai Ga shaga jak ni hpe Ginjaw, Dap Ba, Dap Dung shagu de sa ya nna shada da matut mahkai ai re. GOC Zau Seng a masing gaw, Mungdan ndau wa ai shaloi, Mungkan mungdan ni a madi shadaw ai lam lu na matu, ga saw hkawm ai re. Raitim, 1967-1968 kaw nna, Nahpaw Ginjaw hku nna gaw, Mungdan gap di la na matu, dai daram tsan ai shara kaw na laknak htaw la na gaw n loi ai. Anhte hte ni dik ai Miwa Communist ni hte matut mahkai nna dai kaw na lu la ai laknak hte gap di la yang lu na re ngu myit ma ai. GOC Zau Seng a masa mung, communist hpe n ra sharawng nna galaw ai n re; Mungkan mung masa kaw hkridun lu na matu shakut ai lam re. Hpa majaw, nga yang, dai ten hta Naw Seng mung Wa mung kaw du nga sai. Naw Seng hte GOC Zau Seng gaw dingyang matut mahkai ai lam nga ai.

GOC Zau Seng a Taiwan hte matu ai lam gaw, ra ai jak rung jak rai lu na matu re. Dai hpe Miwa ni gaw, GOC Zau Seng gaw Taiwan ni hte pawng nna Miwa mung hpe bai shang gasat wa na re ngu nna Ginjaw de latung bang dat ma ai. Dai ten hta Myen ni mung, ဇော်သုံးဇော် sha anga nga yang gaw, lani mi hta Jinghpaw mung jaw nan jaw kau ra na re ngu myit lu ai hte maren Rawt malan woi hpang wa ai Zau Seng, Zau Dan hte Zau Tu hkannau ni hpe gyam sat na masing jahkrat hpang wa sai. Dai ten kaw nna, Ginjaw de nbung shang sai. Ginjaw salang ni a lapran amyu sha mung masa ningmu shai wa ai hte Myen ni hku nna mung ဇော်သုံးဇော် hpe pawt kaw nna gawng kau na masing hkyen sai.

Dai majaw, GOC Zau Seng gaw shi galaw ai mung masa mahkrun hte seng nna message laika shana htai lai jahpra nga ai. Tim, Ginjaw kaw na gaw, “laika message hte sha shana ai gaw, Ginjaw salang ni hpe hkang n dang wa sai. Nang nan Ginjaw de wa nna sang lang dan rit” ngu atik anang shaga ai. Masa lam ni hpe maram yu yang, GOC Zau Seng gaw dum wa sai. Shannau ni shara mi hta sha nga taw nga yang, lama ma byin wa na re hpe myit sawn lu nu ai. Dai majaw, kanau lahkawng hpe shana ai. VCS Zau Tu hpe gaw Ginjaw kaw nga nna Jinghpaw Mung hpe yu na hte Zau Dan hpe gaw Sam Mung kaw nga ai kahpu kanau ni hpe yu lakawn na matu zai ladat hte shana da rai sai. Dai ten, hta Thai mung kaw sa nga ai hpyen hpung hta Du Kaba Major lahkawng lawm ai.

Du Kaba Zau Ung ngu ai Du Kaba Brang Tawng ngu ai re. Shan lahkawn gaw Camp Commander kashun ma ai. Du Kaba Zau Ung mung Camp Commander galaw mayu, Du Kaba Brang Tawng mung galaw mayu rai nna GOC Zau Seng hpe shawk ma ai. GOC Zau Seng gaw dap de lung wa nna, “Myit su na yan, myit n su madai, nan gaw,” ngu nna shan hpe shabyi kalang lang bye ya ai. Dai shaloi, shan lahkawng gaw asak kaba sai wa shabyi bye katut ai ngu myit n-gut ma ai. Shan lahkawng kaw na marai langai Ginjaw de bai du mat wa ai. Ginjaw kaw mung GOC Zau Seng a lam garu nga sai.

VCS Zau Tu Thai mung de hkan nang sa wa ai lam

GOC Zau Seng a masing Ginjaw kaw n chye na, n hkawn hkrang ai lam ni nga wa sai majaw, Zau Tu gaw, “Hpami rai rai nye kahpu re. Ari jaw ang yang mung ngai sa jaw na. Woi wa ang yang mung ngai woi wa na,” ngu ai. Kahpu Zau Seng hpe mung Thai de hkan yu wa na ngu ahkang hpyi wu ai. Zau Seng gaw, ‘hkum yu wa, Sam Mung de pyi hkum yu wa’ ngu matsun tik tik rai nga ai. Zau Tu gaw GOC n hkraw tim, Ginjaw kaw na pru wa sai. Sam Mung kaw du jang she kahpu hpe shi yu wa sai lam shana dat u ai. Shaloi gaw, GOC Zau Seng mung, hpyenla 60 dat nna Sam Mung kaw Zau Tu hpe hkrum ai shara kaw nna hkum shalai, bai nhtang shangun na matu shangun dat ai. Yu wa ai hte lung wa ai ni lam kaw n hkrum mat ai.

Zau Tu hte rau Seng Tu ngu ai wa mung lawm nang wa ai. Lam kaw Myen ni grai hkap taw nga ai. Shara mi hta Seng Tu wa gaw Myen nga n nga ngai naw sa lagyim yu na ngu nna shi hkrai sa mada yu ai. Hpyenla langai hte sa u ngu tim n hkraw ai; shi hkrai sa mat wa ai. Gaja wa teng teng sa yu n yu gaw n chye ai. Bai nhtang wa nna, “Myen n nga sai, mai lai sai,” ngu woi rawt ai. Laiwa ai lam hkan Myen ni dung kau da ai namlap ni yup taw ai pi n rawt shi ai hpe mu lu ai. Zau Dan gaw dai hpe hpang kaw na hkan chye mat ai majaw, myit n pyaw ai. 1975 ning April shata hta Myen Communist hpung hte byin ai majan, hta hkrat sum mat ai. Hpang e sagawn yu ai shaloi, Zau Dan hpe hkra ai pala gaw Ka Bai pala rai taw nga ai. Communist ni Ka Bai sinat n lang ai.

Zau Tu hpung ni gaw Saphkung hka du ai hte dap de na ni hpe sa tau la na matu shana dat ai. Dai shaloi, Jak Jum Kareng Hkawng Hawng gaw hpyenla section mi hte sa tau la ai. Thai du ai hte kahpu Zau Seng hpa baw galaw nga ai hpe atsawm chye sai. Raitim, Zau Tu gaw shi hkrai sa mat wa ai majaw, Ginjaw kaw nna gaw, ndai yannau hpa baw lagu bawng ma ai kun? ngu n tsen nna, Ninggawn Amu Madu Pungshwi Zau Seng hpe bai dat dat sai. Pungshwi Zau Seng du ai hte shi mung GOC Zau Seng hpa baw galaw nga ai hpe atsawm sha chye sai. Sanak laknak ni mung tsawmra mi hkum sai. Dai ten hta, Zau Tu yan Zau Seng hpe Thai balik ni kalang rim da ga sai. Myen ni gaw Zau Seng yan Zau Tu htawng kaw na pru wa ai shaloi, shanhte hpe ap ya na matu hpyi ma ai. Zau Seng gaw Thai Hpyendap Dap Awn Daju hte kahku kanau zawn kanawn ai grai hkuhkau ma ai. Shan hpe rim da ai shiga na ai hte, Thai Hpyendu kaba wa gaw Zau Seng yan Zau Tu hpe htawng kaw na sa woi la nna hpyendap bum de bai wa sa ya ai. Hpang shani hkan e Chingmai bai yu nna amyu sha a matu ra ai magam bungli matut shakut nga lu ai.

Mi shawng de gaw, sinat laknak matu na matu Ka-ni htaw yu wa nna dut la ra ai. Gumhpraw lu jang sinat laknak mari ai. Gun rai n lu ai. Sinat mari ai shaloi mung, sumpum dut ai shara n nga ai. Wo.. ra kaw.. lau 4/5, le.. ra kaw.. lau 2/3 rai nna aten la mari mahkawng la ra ai. Laknak masing hte seng nna, langai mi gaw, dai ten hta, Vietnam majan sum na aten rai wa sai. Dai majaw, American shanhpraw ni hku nna gaw, Jinghpaw ni gaw shanhte hpe laiwa sai mungkan majan hta grai karum sai majaw, shanhte a laknak ni hpe Jinghpaw ni hpe kumhpa jaw da mayu ai. Thai nbungli dap kaw na nbungli hte nan Laos lamu ga jarit kaw na laknak ni hpe htaw la lu sai. Nbungli langai hpring tup re. Chingmai nbungli pa kaw jahkrat ai. Chingmai hpyendap nbungli dap kaw na GMC mawdaw kaba hte htaw la ai. Mawdaw kaba shi lahkawng (12) hpring re. Pa kaw rai bang sum kaba galaw nna bang tawn da sai. Bum de na shanglawt hpyenla ni 100 jan, bat mi daram sa hpai kahkrang la ra ai.

GOC Zau Seng gaw ndai zawn rai laknak ni hpe n hkrit n tsang, matut mahkai, kahkyin taw nga ai. Laknak gaw ndai hte sha n re; Sanghpaw hte mung naw sa dat ai. Sanghpaw hte gaw Thai Panglai hku nna Myen mung Panglai de shang rai, India lamu ga jarit hku shalai nhtawm, Yahkaine hte Hkang lamu ga de jashawn na matu re. GOC Zau Seng gaw Thai kaw Rehkaine Hpyen Dap (AIA) hte Hkang hpyendap (CIA) hpe mung hpaw da ya let, masing kaba galaw hkyen nga ai. Kaga laknak lang rawt malan hpung ni hpe mung ra ai laknak jaw garan shagreng tawn ai hpang she mung masa shaga na ngu ai masing re. Maga mi de, Mungkan a madi shadaw lam mung lu hkra shakut nga ai. Raitim, Thai kaichyan hte Miwa kaichyan ni chye kau nna rim kau ya ai. Ndai zawn rai nna shakut nga ai hpe VCS Zau Tu hte Ninggawn Amu Madu sa mu nna atsawm sha chye na mat sai. Mi shawng daw lam amyu myu hku mahkawng da lu sai laknak ni hpe hpai nna Kanu mungdan de bai lung wa na matu hkyen sai.

Lam kaw Myen ni htap hte htap hkap taw nga ai shiga hpe na ai majaw, shata mi daram jahkring da ai. Hpang kalang bai hkyen ai shaloi mung, Myen ni bai hkap nga ai nga shiga na ai. Lahkawng lang hkyen shut kau ai. Thai mung Htam Ngaw Bum kaw Shanglawt Hpyendap Dap Jung da ai. Dai makau grupyin kaw, Kokang hte Miwa hpyendap mung nga ai. Ndai hpyendap lahkawng kaw nna Myen ni hpe shiga jaw sam ai ngu nnan e sawn la ma ai. Hpang e gaw anhte a kata kaw na shiga jaw ai rai taw nga ai. Masum lang ngu na hta gaw, gap di nna lai na, si yang si, lu lai hkra lai na ngu dawdan let, hpyen la yawng hpe mung sinat htuk jaw sai. Aten gaw 1975 August shata kaw re. Hpyenla langai mi sinat lau lahkawng, pala masum tsa, n-gu bye mi htuk ya sai. Shain tawn da sai. Dai ten hta, Zau Seng, Zau Tu, yannau gaw Chingmai pa kaw re. Hotel kaw hkring sa ai.

GOC Zau Seng gaw Shanglawt gumhpraw hpe kade daram sadi jai a ni? nga yang, dai ten hta, Zau Seng, Taiwan Hpyen Du, Mawdaw gawt ai sara hte Jak Jum Kareng Hkawng Hawng shanhte marai mali hte hpe Hotel gawk langai kaw sha woi yup ai. August shata praw 6 ya shani shannau gaw Hpyendap nga ai bum de arau lung wa na hkyen da ai. Du ai hte Zau Tu, Pungshwi Zau Seng ni gaw, laknak hpai na matu shajin da sai, hpyen hpung hte rau Buga de bai wa na masing rai nga ai. August praw 3 ya shani, Bangkok kaw na Thai Hpyen Du Kaba wa gaw grai ahkyak ai lam jahta ra ai nna shaga dat ai majaw, GOC Zau Seng gaw Bangkok de yu mat wa ai. Nbungli lekmat n lu mat ai majaw, mawdaw texi hte shi hkrai yu mat wa nu ai. Kaga ni hpe gaw Chingmai Hotel gawk kaw sha la tawn shangun ai. 3/4 ya na na re ngu nna htet da ai.

Seng Tu a mahkyen

Seng Tu gaw shi a masing awngdang na matu zai ladat hte hkyen ra ai hpe hkyen magang nga sai. Thai mung de du ai ten hta, Kayin hpunau ni hpe zinlum na matu, GOC Zau Seng gaw shi hpe Kayin hpunau ni hpang de sa shangun ai. Dai shaloi, Kayin ni hpang de n sa ai sha Bankok de yu mat wa ai. Ang sha-a, GOC Zau Seng mung arai lama mi mari ra ai majaw, Bankok de yu wa nna ra ai arung arai mari hkawm let, Myen Sumtsan Salang Rung shawng hku hkawm lai wa yang, Seng Tu gaw dai rung kaw na pru wa ai hpe mu dat nu ai. Dai shaloi, GOC Zau Seng gaw Seng Tu hpe, “Kayin ni hpang de she sa shangun yang, hpa rai na ndai hkan n wan hkawm nga ta? ngu jawp kau dat yu sai. Zau Seng mung Seng Tu hpe ntsen wa ai majaw, Seng Tu hpe dap de shaga la nna jep yu na matu kanau Zau Tu hpe shadum ai shaloi, shannau pi shada da tsawmra mi shaga hkat ra mat ma ai. Hpa majaw nga yang, Seng Tu gaw VCS Zau Tu grai kam ai masha hku rai nga ai majaw, shi masha hpe ntsen ya ai majaw, kahpu Zau Seng hpe pyi pawt kau hkra rai nu ai.

Ndai kalang Thai Hpyendu kaba wa shaga ai majaw, GOC Zau Seng gaw Bankok de yu mat wa ai ten, Jak Jum Hkawng Hawng hte Miwa la gaw, sinat lau 19 dut na shara nga ai majaw, mari da lu na matu sahpaw da masai. Miwa la wa gaw nta lu ai majaw, shi nta kaw shat sha la, Jak Jum Hkawng Hawng mung shanglawt ni a laknak bang ai ginsum kaba kaw shani shat sha la rai nna, arau bai sinat dut ai shara de pru hkawm sa na matu hkyen da ma ai. Jak Jum Hkawng Hawng gaw Sinat Ginsum de du ai shaloi, shanglawt hpyenla marai 10 jan sin taw ai hpe mu nna myit ung-ang mat ai. Tim, shi gaw, Zau Seng, Zau Tu ni bum de lung wa hkyen ai majaw, sa tau la ai hpyen hpung rai sam ai ngu nna sha myit la nu ai. Sin nga ai hpyenla ni gaw Seng Tu hpe Hkawng Hawng du sai lam shana dat ma ai.

Seng Tu wa gaw Hkawng Hawng hpe bum de lung wa na matu htet dat ai. Seng Tu gaw Hkawng Hawng hpe hkrum ai hte VCS ni, Ningbaw kaba ni galoi lung wa na ma ta? ngu san yang, Hkawng Hawng mung ma hkra tsun dan kau ai. Dai shani gaw August praw 5 ya shani re. VCS Zau Tu ni gaw praw 6 ya shani lung wa na hte Ningbaw kaba gaw Bankok de naw yu wa sai lam Seng Tu wa chye sai. Dai shana kaw na, Jak Jum Hkawng Hawng hpe shinggan n pru shangun sai. Hpyenla lahkawng dingyang zawng kau masai. VCS Zau Tu a hpyen hpung guard ni hpe mung Seng Tu gaw zinlum hkalum la kau sai. Gara hku zinlum la a ta ngu yang, Seng Tu gaw kalang lang Chingmai de Zau Tu ni hte rau hkan nang ai. Bum de nga dat, pa de yu dat rai nga ai. Kalang lang Hotel kaw yup ai ten, Bum de lung wa hkyen ai shaloi, gawk jasan jaseng ai num kasha ni hpe shaga la nna, Zau Tu hpe shadun tawn let num sha ni hte sumla အမှတ်တရ dem ya ai. Dai sumla ni hpe shi tau hkrau lajang tawn da ngut sai. Zau Tu a hpyenla ni hpe madun nna, “Nanhte a ningbaw ni gaw Hotel hkan ndai hku she pyaw hkawm nga ai,” ngu masu zinlum la kau sai. Hpyenla nkau mi hpe gaw shara mi hta kahkyin tawn kau ai. Shi lu zinlum la ai hpyenla yawng hpe gaw hpyendap ting sin kau shangun sai. Ningbaw ni hte grau ni htep ai hku nga ai Du ni, Du Kaba ni hpe gaw dap kaw azim sha naw tawn da ma ai.

Dai shana de, Jak Jum Hkawng Hawng hpe mung, Seng Tu wa gaw ndai hku masu da ai. GOC Zau Seng hku nna maigan mungdan ni hpe madun na matu Jinghpaw Mung sumla atsawm chye ka ai masha dat ya na matu tsun ai. Dai shaloi, Hkawng Hawng mung lamu ga sumla ka sara lahkawng dat ya nna shana tup ka ya sai. Hpang jahpawt hkying 7am ten August praw 6 ya shani, Chingmai bai yu wa na hkyen ai shaloi, Seng Tu wa gaw, Hkawng Hawng hpe mana na Jinghpaw mung lamu ga sumla n jaw shi ai, hkashi, hkahpawk, hkanu, bum marawn, lam ni atsawm hkrak jaw hkra naw ka ra ai. Dai ngut nna shana de daw she pa de bai yu wa na matsun ai. Hkawng Hawng mung sumla ka sara yan hte shani tup lamu ga sumla ka ma ai. Shana de hkying 3pm daram hta Hpyenla yawng hpe Rihkaw shaga ai. Hkying 4pm daram hta hpyenla yawng Rihkaw pa de rai sai.

VCS Zau Tu hte hpung ni mung hpyendap de lung dingyang rai nga ma ai. Sa tau shangun ai ni hte dingyang matut nna gara kaw du nga sai lam atsawm chye lu ma ai. Sa tau shangun hkrum ai ni mung Seng Tu a masha re. Sa tau shangun ai ni hpe n kam ai majaw, lam kaw nkau mi hpe ambush naw hkap da shangun ai. Sa tau ai ni n gap tim, ambush hkap ai ni lu gap hkra gap na matu re. Zau Tu ni hpyendap de ni wa ai ten, hpyenla ni yawng mung, Rihkaw pa de yawng du nga sai. Mungga tsun ai wa mung shawoi na hta grau ja nna marawn tsun ai. Hpyen la ni mung mungga hpe myit maju jung madat nga ai majaw, makau grupyin hpa byin nga ai hpe n chye ma ai. Sinat nsen ngoi ai mung n na ai. VCS Zau Tu hpe shawng gap kau sai. Dai shaloi, GS Pungshwi Zau Seng gaw gumra kaw na lahkan yu nna sinat kadun hte bai nhtang gap ai. 2/LT Duk Zau Hkawng mung hpun pawt langai mi de kagat shingbyi nna nhtang gap ai. Dai shaloi shanhte hpe sa tau ai hpyenla ni shingdu kaw na gap sat kau ai.

Seng Tu matsun ai gaw Zau Tu hpe gaw gap na, Pungshwi Zau Seng hpe gaw n gap na lam re. Zau Tu, Pungshwi Zau Seng hte Duk Zau Hkawng ni a mang hpe lam makau hkaraw kaw garawt bang da nna hpang shani hyenla ni hpe sa nat kau shangun ai. Zau Tu hpung ni hpe gap kau sai nga shiga lu ai hte dinggren tsap nga ai hpyenla ni hpe laika langai hti dan ma ai. Dai laika hta “Ningbaw ni gaw Jinghpaw mung na lungseng dut sha nna, maigan de hprawng hkyen ai. Dai majaw, Ginjaw kaw nna, ndai ningbaw hkannau ni hpe sat kau na matu matsun da ai Ginjaw Aming re” ngu tsun ai. Ngut ai hte minute 5 laman kadai mung kade sum ginra de du hkra wa na, langai hte langai ga n shaga lu, zim sha nga na lam Martial law matsun dat masai. Shat sha ten hta mung kadai n shaga mat, zim rai nna hpa byin ai re mung n chye rai hpyenla ni mau ung-ang ma ai. GOC Zau Seng a masha Jak Jum Kareng Hkawng Hawng hte Du kaba ni, du ni marai jahku hpe hpyenla ni zawng kau sai. GOC hpe sat kau ai shani du hkra langai hte langai ga n mai shaga ai. Dai marai jahku kaw na Du La Tawng ngu ai wa hpe gaw gyit tawn da ai.

Dai Du La Tawng gaw Zau Seng, Zau Tu ni a kahkau majing re. Kajan hpundim Jan Lahtaw Nang Yin a madu wa rai nga ai. Dai shana de Du La Tawng tsun ai gaw, Zau Tu hpung ni hpe gap kau sai hte GOC Zau Seng hpe mung Chingmai Hkrangleng daru makau kaw masha shap nna August 6 ya jahpawt hkying 9am hta gap kau sai nga tsun ai. Dai shaloi, GOC Zau Seng gaw 6 ya shani Chingmai n du lu shi ai. Du yang praw 8-9 hkan she du mai ai; dai majaw, GOC n si shi ai; naw hkrung nga ai, ngu Jak Jum Kareng Hkawng Hawng gaw myit dum dat u ai. Dai majaw, Kareng Hkawng Hawng gaw shi hpe sin ai hpyenla masum hpe Kokang ni nga ai hkran de ‘tsa’ sa mari lu ga ngu sahpaw la nna GOC hpang de shiga shana lu na matu maisau pa kasha langai hta laika ka, kayawp makoi gun da u ai. Raitim, Kokang hte Shanglawt ni nga ai jarit Gate kaw shanhte hpe n shalai ma ai. Dai shana de, Seng Tu gaw lahta e tsun ai marai jahku hpe laksan shaga la ai. Shi hta grau kaba ai Du Kaba ni mung shi hpe sa salam ra ai. Bai nna, Seng Tu gaw, “Gai.. nanhte gara hku? Moi na ningbaw ni a hpang hkan na i? Ya woi awn nga ai ni a ga madat na i? ngu nna san ai. Shaloi shanhte gaw, “Ginjaw masing hta hkan na ga ai,” ngu mahtai jaw ma ai.

Ya August shata 10 ya shani, GOC Zau Seng gaw hpyendap bum de lung wa ra ai. GOC lung wa shagu Jak Jum Kareng Hkawng Hawng gaw galoi mung sa tau la ai. Dai shana de gaw GOC hpe sa tau la ai hpung hta Hkawng Hawng n lawm ai. Dai majaw, GOC Zau Seng gaw, Hkawng Hawng gaw taw? ngu san ai. Sa tau la ai ni gaw, “Hkawng Hawng lagaw machyi ai,” ngu htai tsun dan ma ai. Gaja wa gaw, sa tau ai hpyen hpung hpe praw 6 ya shana de Zau Tu ni hpe gap ai shara kaw du jang she gap na matu matsun da ai. Raitim, GOC Zau Seng gaw aw.. ra.. san.. le.. ra.. san.. rai wa ai majaw, lama mi ntsen wa sam ai ngu shadu nhtawm, Zau Tu ni hpe gap kau ai shara n du shi yang gap sat kau masai. GOC Zau Seng a mang hpe mung wansau ru jaw nna dai shana de hpyenla ni nat kau sai.

Hpang shani, August 11 ya jahpawt, Seng Tu gaw Jak Jum Kareng Hkawng Hawng kaw lung wa ai; jak sum de n shang ai sha, lam kaw na shaga la nna, “Ndai laika hpe ga makoi gale nna sa u; record hkum galaw da. Gale ngut jang nat kau u,” ngu matsun ai. Dai kaw ga tawn da ai laika gaw, “Anhte bawngban jahkrup tawn da ai bungli mahkra tsepkawp awngdang sai; tinang a masha du daw sai hkaw lam n nga ai,” ngu ai re. Ndai laika gabaw madi tawn ai masha marai mali manga daram re. Ndai Martial law shapraw da ai ten naw rai nga ai August 11 ya shani, Seng Tu a guard kaw na hpyenla Gam Ba ngu ai wa gaw sinat gap dumhpran dat nna agyi langai a lagaw gap hkra kau ya ai. Gam Ba gaw manghkang pru sai majaw, myo pa de hprawng yu mat wa nna lahta e tsun lai wa sai Jak Jum Kareng Hkawng Hawng hte sinat mari na sahpaw da ai Miwa hpyen du hpe sa tsun dan kau sai. Dai Miwa hpyendu wa mung GOC Zau Seng a ningrum ningrau Jan Tangbau Nang Bawk hte nta masha, jinghku ni yawng hpe tsun shana ya ai. Yawng gaw aten dep hprawng makoi lu sai. Daini hpe du hkra naw hkan sa tam ma ai raitim, n lu tam sagawn la ma ai.

Dai hpang hpyendap bum kaw shata mi dang nga nna Seng Tu gaw Chingmai de bai yu wa ai shaloi, Thai Balik ni hkap rim kau sai. Seng Tu hpe rim kau ai hpang, dap de mung mi na GOC a masing hkan ai Du kaba ni bai uphkang ai hte Seng Tu hpe Balik ni a lata kaw na hpyendap bum de du hkra bai woi lung wa ma ai. Hpyen dap kaw Seng Tu hpe jep yu ai shaloi, laiwa sai ten, Myen ni shi hpe gumhpraw lap sen kru (600000/-) jaw nna ဇော်သုံးဇော် hpe gyam sat na matu shatsam ai lam tsun pru wa ai. Lap sen kru kaw na sen mali hpe dum nta masha ni hpe jaw da nna sen lahkawng hpe gaw hpyendap de la sa ai ngu yin la sai. Ginjaw de mung, tengman ai mabyin masa ni hpe chye na mat sai rai nna, Seng Tu hte shi a hpang hkan ai ni rai nga ai Du Grwang Li, Zazen Zau Shan, Zazen Maran Bawk Chyang hte Zau Jum ni hpe je yang na matsun dat ai. Dai matsun ga gaw, “Pala langai mi mung hkum shama; Adup sat kau mu! ngu ai re. Amyu a ntsa sadi hpyan ai shingnan hpyen marai manga hpe hpuntawng hte adup sat nna gyit da sumri pi n raw ai sha wan nat kau masai rai.

Amyu sha ni yawng a gawng malai tai let rawt malan ai, Wunpang Mungdan Shanglawt Hpung a Ningbaw Kaba GOC Lahtaw Zau Seng hpe Seng Tu hpung ni sat kau ai ninghtoi 1975 August shata 10 shani hpe mahta let, Amyu hte mungdan a matu asak apnawng mat wa sai ningbaw ningla, share shagan yawng hpe myit dum nga na matu shaning shagu August shata 10 ya shani hpe Amyu sha ni a Share Shagan Masat Nhtoi ngu shagrin da ai lam re.

Htawm de hpang de, ndai zawn re amyu sha ni a lapran n hpru n mai, awu asin re ai lam galoi mung n byin, n pru wa sanu ga law!

Chyeju kaba sai!

Njung Tu Hkawng