Shawng de Manmaw Ginwang, Manje Ninghtawng, Shawnghtawk mare hta nga lai wa nna, ya Myitkyina Ginwang Janmai Buga, Hpung lawk (8) kaw shanu nga ai. (Hpt. Manam Naw + Jan Lahpai Bawk) yan a kasha (DKB Manam Brang Tawng + Jan Nhkum Ja Mai), (Slg Manam Awng) + Jan Nbrang Lu ni a kana/kaning (Slg. Manam Noa), Slg Manam La Nu + Srn Chang Swe, Jan Manam Nem Bawk + Slg Manam La Tawng, Slg. Manam Tu Shan + Jan Nang Zing Htang Htu, (Manam Tang Neng), (Manam Doi Ra), ni a Karat/kaning, kana kaba Slg. Dingrin Kum San + Jan Hpaudut Ji Awng, Jan Dingrin Din Dim + (Slg. Dumhpau La Zan) ni a Chyinghkai Kanu, Kashu (3) a kawoi hkai (Slg. Dingrin Dum Ja) a tsawra dik ai ningrum ningtau Srn Kaba Manam Ah Nan (Shawnghtawk Tsing Pan) asak (68) ning gaw, n’htoi (26.10.2016) bat (3) ya, aten hkying 3:00Am aten hta Madu Yesu kaw yup pyaw wa sai.
Shangai Chyinghkai Wa Ai Lam
Shawng de Mungmyit Kudawng ga, Dumbuk Kawng Sung mare kaw nga lai wa sai, Slg. Manam Naw hte Jan. Lahpai Bawk yan kaw nna, 1949 ning May shata (13) ya shani Manmaw Ginwang, Sinlum Ninghtawn, Gauri Krung, Lamai Bang Kahtawng kaw Shayi Manam Ah Nan hpe shangai chyinghkai wa sai.
Chyurum Ai Kahpu Kanau Ni -
Manam Brang Tawng (n nga mat)
Manam Awng (n nga mat)
Sarama Manam Ah Nan
Manam Noa (n nga mat)
Manam La Nu
Manam Nem Bawk
Manam Tu Shan
Manam Tang Neng ( n nga mat)
Manam Doi Ra ( n nga mat) ni re.
Ma Prat Hte Jawng Lung Wa Ai Lam
Manmaw Ginwang, Manje Ninghtawn Shawnghtawk mare kaw ma prat ten nga lai wa sai. Kawa Slg. Manam Naw gaw 3rd Kachin Hpyen Dap kaw hpyen magam bungli galaw let Kuthkai de htawt mat wa ai. Shingrai 1955 ning hta ding dung Sam Mung Kuthkai mare kaw lawu tsang hte lapran tsang jawng ni hta grai ningtawn ai hte awng la lu nu ai. Dai hpang Myitkyina A-Hta-Ka (4) kaw tsang (10) hpe (A) list hte awng la nna, Dakkasu jawng matut lung let, B.A (History) janmau hpe Mandalay kaw gup la lu nu ai. Dai hpang Sara tai jawng T.TS lung la nna, Manmaw A-La-Ka (Kan Htawng) jawng kaw jawng Sara magam bungli hpe shawng nnan gunhpai hpang wa sai re.
Dinghku De Ai Lam
Sarama Kaba Manam Ah Nan gaw 1966 ning Manmaw Roberts Church kaw Sara Rev. Maran Yaw a lata hta Hkalup hkam la sai. 1975 ning March shata (22) ya shani Manmaw kaw nga ai Hpt. Dingrin Naw La hte Jan. Maran Kaw Lum yan a kasha Shd. Dingrin Gum Ja hte Manmaw Roberts Nawku Jawng kaw Sara Rev. Laimaw Gam a lata hta hkungran ga shaka la Hkristan dinghku de la manu ai.
Nshang Hkrat Kasha Ni
Dingrin Kum San
Dingrin Din Dim
Kasha (2) a kanu, kashu (3) a kawoi hkai re.
Magam Bungli Galaw Ai Lam Ni
Sarama Kaba Manam Ah Nan gaw 1972 ning kaw na, 1993 ning du hkra shaning (21) ning jawng sarama magam bungli galaw gunhpai lai wa sai. Dai hpang ေဆးပင္စင္ la nna, Insein English Chyum Jawng kaw B.D Janmau gup la ai hpang, Htingnai Ginwang ting a Num Hpung Hpa-awn, Laili Laika Hpa-awn bungli ni hpe tam (3) htum hkra kangka ai hte, shi a atsam nga ai hte,magam gunhpai lai wa sai.
Dai hpang 2007 ning kaw nna, 2014 ning du hkra, Ginjaw amyu shayi Hpung Laiza kaw Wunpawng sha ni a Laili Laika Htunghking, Labau, ni hte seng nna, grai shakut shaja shang lawm lai wa sai.
Wunpawng Amyu sha ni a matu 1972 ning kaw nna, laika ka hpang wa nna, Jinghpaw Wunpawng Magazin laika shagu hta hpaji jaw, myi jahpaw yaw a sai re. Laika ka ai ni hta sumrai, sumroi, maumwi, labau, shagun laika, ga shagawp, video sumla hkrung, hkrang shala, matsun, hkrang pan, sumrai ni law law, ndang matsing hkra ka shabra hpaji jaw shadum, jahpaw, lai wa sai.
Video hkrang shala matsun ka nna, video dem shapraw lai wa sai ni-
Nu e sha e
Nu hkum hkrap sa
Chyahkrai matsan
Ndai mungkan grin nga ding sa
Galoi mi she
Kalang sha pu ai salum pan
Salum e hkru ai wan ni re.
Laika Buk galaw shapraw da lu ai laika ni gaw –
Shawnghtawk Tsing Pan a sumrai kahkin Vol I + II
Chyum laika ga san latsa Vol I + II + III
Ga shagawp laika buk I
KWA amyu shayi Magazin Vol I + II + III
KWA masha hpaga ninghkap hpaji jaw laika buk “ Na yang na ngawn, sa yang sa yawn ” buk I
KWAT ni galaw shapraw ai hkrang pan sumrai Vol II + III + IV
Ga shagawp Ga Baw (560) ka shapraw sai re.
Laili Laika hpe nden marai, myit marai kaba hte ka shakut ai majaw –
1997 ning May-August shata hta “ Galoi Me She” ngu ai Video sumla hkrung a majaw, Insein nsin htawng hta zingri sharen da hkrum lai wa sai.
2009 ning October shata (30) ya shani KIO Ningbaw Kaba Maran Brang Seng a labau hpe grai shakut shaja let ka shangut da lu sai.
Amyu sha ni a magam hta Laili Laika hte grai shakut ap nawng daw jau wa sai rai nna, 2014 ning September kaw na, ndai labau ka ai aten du hkra Kachin Land School of Arts and Seiences (KSAS) jawng kaw Jinghpaw laika shingni hpaji sharin Sara galaw nga nu ai.
Hkam Ja Lam Ningra Wa Ai Lam
Sarama Kaba Manam Ah Nan gaw 2016 ning August shata kaw nna, hkamja lam ningra wa ai majaw, Mali Zup Tsi Rung kaw tsi tsi hkam la sai. September shata kaw na, laja lana machyi wa ai majaw, Myitkyina tsi rung, Mandalay tsi rung ni de sa du tsi tsi la sai. October shata praw (3) ya shani Myitkyina nta de bai du wa nna, tsi tsi nga yang, (26.10.2016) bat (3) ya jahpawt hkying (3:00) Am aten hta amyu sha ni hpe tsawra ai, Sarama Kaba Manam Ah Nan Shawnghtawk Tsing Pan gaw asak (68) ning hta Madu Yesu hta yup pyaw mat wa sai re.
Sarama Kaba Manam Ah Nan a laika ka mying( kalawng mying) mying ni gaw –
Shawnghtawk Tsing Pan, Shanglawt Tsing, Manaw Mye Sein, Dawt,Manam Kaw, ngu ai mying law law hte laika ka shalat lai wa sai re.
Kasi Yu La Mai Ai Lam
(1) Wunpawng amyu sha lam hta grai myit lawm, myit raw tai hte atsam htum hkra shakut lai wa nu ai.
(2) Asak (30) ning daram kaw nna, “Gaida” mat ai raitim, Num bai nhtawt wa ai sha kasha lahkawng hpe grai tsawra myit kaba ai hte woi zinlum bau maka lai wa sai.
(3) Yak hkak lam kade law tim Karai Kasang hpe kamhpa manoi manat let nga wa sai.
(4) Manaw manang jinghku jingyu kahpu kanau ni hpe grai chye zinlum tsawra chye ai.
(5) Amyu sha ni a matu sumroi, sumrai, Labau laika law law ka shalat ai sha n ga, Video Director, script writer, actor ni galaw nna mung, amyu sha lam hpe grai galaw shakut lai wa sai re.
(6) Shachyoi hpa (mani hpa) mung grai chye tsun ai re.
Ndai labau hpe ka mazing ai,
Nta masha ni.
