SARA KABA SAU KA MAI
Hpan Ja
Sau Ka Mai hte chye hkat ai gaw, kalang mi na Yinkyang ginwang Jaiwa buga-Shadan wa-lawng Hpuntai yang manau hta rai nga ai. Jahpawt shat sha ten hta, hpum hpum dut dut re Jinghpaw la langai mi, shan hpraw masha ni hte Inglik ga shaga ai are nga ai madat let, nhpa tsun ai gaw n chye madat rai naw mau dung nga yang, Dingga Tang anhte hpang de du hkrat wa nna shachyan dan ai: "Ndai gaw le Jinghpaw mungdaw de nna lung wa ai, laika ka mying kaba dik ai sara kaba Sau Ka Mai wa re, Maran gasha re, nanhte shada jaw ang ai hku shachyan shaga la hkat mu e." Nga nna shachyan ya u ai. Mying kaba gaw na ga sai, n mu yu ai sha re ngu shakram hkat let, shi a Inglik ga ga kre ai shaloi, shi hpe Inglik ga shade chye ai gaw, gara jawng kaba kaw nna pru wa ai re ni ngu san yang, shi mani sai rai tsun ai: "Moi shanglawt hpyen la la yang, maling sin ai utu chyangngau ni hte rau nga let, nsen rim jak kaw sharin la ai wa re." Nga nna tsun dat jang she, ngai mung nsen rim hta Inglik ga grai hkan sharin yu nna, ram ram pyi chye sai wa mi, ya gaw hpa rai malap sha kau ai mi rai wa sa ngu, ngai hkum ngai hpe mau mat ai hku rai nga ai.
Mau hpa, masha ngu ai gaw shakut ai wa tsi gut lu ai nga ai hte maren, matut n di shakut ai ni sha, nhpa bungli galaw tim, awngdang nna pa wa lu nga ai re. Dai shani kawn Sau Ka Mai hte chye hkat ai kaw nna, Wunpawng Jinghpaw sha hte seng hkat ai, laika hpaji hte seng hkat ai zuphpawng kaba shagu hta, ayan mu hkrum hkat saga ai. Grau ganawn na ai gaw, sut du Yup Zau Hkawng gumhpraw shaw nna, ma kaji jawng tan laika galaw ai shaloi yang rai nga ai. Dai ten hta, sara kaba Sau Ka Mai, sara kaba Bum Shang Hkawng, sara kaba Mala Naw Ja, sara kaba Alat Gun AWng anhte manga gaw, Yup wa a Jade lungseng hpaga seng na, anhte hpe san da ya ai mu htam gawk kaw, mungdan lahkawng na ma ni hti chye na matu, sharin laika galaw ai ten rai nga ai. Dai ten yang anhte mu galaw tsu wa jang sagoi ga ni tsun chyai rai, mu jawm galaw ai shaloi, shi mung mani sha sai sai rai nna, sagoi ga rai marai nga ai ni tsun let, hpawng shalum, mani ga saw re ni hpe dum dat yang, mani mana e sha byin ai zawn nan naw nga nga ai.
Dai hpang kaw nna gaw, Mangshi, Shwili, Yinkyang, Laiza, Nabang hkan na htunghking hte seng nna hpaw ai zuphpawng shagu hta, shi gaw datnu hpaw tawn nna, zuphpawng punra de kadai du wa, salang kaba, lauban launa ni hkaw tsun ai mungga ma hkra hpe, matsing ai gaw, ta latsang ni pyi ningna n-gau na marang si hkrat gaprawk ai zawn gamang ai sha mu ai. Shi masha ni tsun ai ga matsing la a ten hta, ga shaga ai ni a ga sha n ngut ngut gaw, du pyi n gayin hkra nan matsing taw nga lu nu ai. Zuphpawng ngut ai hte, laika naw rin shapraw dat na tai nga ai nga nna, laika mai dip shapraw ai shara tam mat wa, lu rin shapraw la n dawt, ga shaga ai sara kaba ni hpe bai hkan la ya rai nna, shi sha lawm ai zuphpawng gaw, ga shaga ai ni myit n pu ra nga ma ai. Shawng daw hkan shi hte chye hkat tim, shada hkungga hkat ai majaw, hkrum tim shakram hkat ngut jang, law wa n shaga hkat gwi nga ai. Kalang mi na Jade hpaga rung hta htunghking hte seng nna zuphpawng galaw ai shaloi, shi yawng a man e ngai hpe shachyan ya ai ga gaw ning nga tsun u ai: "Sara ma Hpan Ja a laika hpe, ngai sha mu hti ai gaw ma hkra hti yu ni ai.
Shi ka ai laika gaw, tsun ra ai mu hpe n magap hkra nan ka lu ai, la myit rawng ai jan she rai nga ai, anhte gaw ka n dang sai, kumhpa grai jaw ram ai re wa, hpa kumhpa n lu jaw ai, Myitkyina du jang, anhte yawng nang hpe hkap ba la na ga ai yaw." Nga nna tsun ai shingran pa pa naw mu nga nngai. Teng sha anhte Jinghpaw ni gaw, ma ni hpe shakawn mayu jang, hta pawn, hta ba rai nna n-gun jaw ga ai. Shi dai zawn nga nna tsun ai majaw, ngai mung laika ka ai lam de, grau htuk, grau hti pyaw ai law law ka nna bai hti shangun na ngu ai myit grai rawt ni ai. Dai shani grau nna shanhte ra sharawng ai sumrai "Sut su htingnu» ngu ai laika hpe mu hti ai ni bai hkan tsun hpa-ra dat ai gaw, "Sut su htingnu» hpe sumla hkrung dem jang, anhte hpe saw, anhte gaw laika hta rawng ai la ni a hkrang malai pya na ga ai nga nna, myit mi alawm sha nga tsun ai ga ni wa mung, ngai hpe laika ka n-gun jaw ai hkrai rai nga ma ai ngu nna, myit n-gun grau rawt wa ni ai. Shi hte hkau hkat wa magang, ngai shi hpe «Wunpawng» hkum hpa laika buk hta laika ngau ka shalai jaw marit, kumhpa jaw ga ai ngu hkra hpyi dat jang, teng sha shi kaw nna laika ngau amyu myu ka bang nu ai.
Shi ka bang ai laika ngau ni hta na, ngai hpe grau n malap kau shangun lu ai gaw, "Wa a hkra ta" ngu ai ga baw hku nna ka ai laika rai nga ai. Laika dai Emei hku shalai ai shaloi, ngai na Emei gaw Miwa hku hpaw tawn, shi na gaw Inglik hku hpaw tawn re a jaw e, lahkawng masum lang chye-nan hte ganing ning di dat jang lu na re ngu, jawm tsun htailai hkat nna, tsawm mari lu shalai dat ai rai nga ai. N myit madawm ai gaw, dai shaloi na lang shi hte shaga hkat ai chye-nan ni, jahtum na lang shi hte shaga hkat ai ga tai mat sai. Raitim, shi a moimang n mu ai majaw, zuphpawng hkan datnu hta laika gayat ai ta latsang gamawng ai shingran pra pra wa naw rai nga ai. Laika dai hti dat yang, ka ai wa a myit jasat ni mala la sung ai panglai hka hta, tinang hkrai tsim shang mat wa ai shingran nan hkan mu ya lu ai.
Dai majaw shi hpa majaw laika ning nga ai ka shalat ai kun ngu, Bawk Tawng hte an pyi naw mau nga yang, lani mi sara kaba Bum Shang Hkawng chye-nan gayat dat ai: Sau Ka Mai n nga mat sai, mawdaw buk jawn nna lam hkawm nga ai kaw, nga wunawng mi kagat wa nna n lu yan mat ai majaw, mawdaw buk kaw nna hkrat yu wa ai, n lu hkye la nna, nsoi nsa htum mat wa nu ai. Nga ai mi tsun dat nna, kalang ta ningshung si hprwi nga ai ja, shi a laika hta: Gawa a hkra ta hte hkap gang la kau sam sai ngu myit du ai. Ganing n chye di, lahpu hpu sa na mung lam bai galu re majaw, Bum Shang Hkawng hpe, anhte (Wunpawng" ka shinggyin hpung hte htunghking labau sawk sagawn hpung ni a hkum malai hku, yawnhkyen lasu ga naw ka la nna, makoi mayang poi shani sa hti ya marit ngu htet dat ni ai.
Prat madang lani hte lani rawt mat wa, mungdan lani hte lani pyaw wa ai ten hta, kam hpawang a majaw, sara kaba gaw Karai Kasang a lahpyen hta yup pyaw mat wa nu ai. Raitim shi anhte hpe tawn da ya ai tsam marai gaw, maling gata e nga let, mungkan hpaji hka-ja, utu chyangngau hpe manang shatai nna, mungkan ting ga ra ai ga hte laika ni sharin la, sak kaba wa sai nga nna, salang hpai n hpai ai sha, ra ang ai bungli hpe, manang ni kam sham hkra galaw, bum ga masha re nga nna, myit n shanu, n shabu nga ai sha, mungkan madang dep dep lu hkawm ai kasi kanan ni yawng, anhte sharin la n ma rai nga ai.
