MAJOI SHINGRA JA NYI YAN JA NGA A PYAW LEN GINRA
BUM SHANGHKAWNG
Moi chyaloi nhkoi prat hta majoi shingra bum mayan na Pungwa jaw dan mung ngu ai kaw, Ja Nyi yan Ja Nga ngu ai nga ma ai da. Ja Nyi ngu ai gaw shayi sha rai nna, Ja Nga ngu ai gaw shadang sha rai nga ai. Shan gaw shada da teng man hpraw san ai tsawra myit hpring tsup nna, n di n hka sadi dung ai kraw sha- wang sindun sumtsaw yan mung rai nga ma ai. Lani mi hta Pungwa jawdan mung e shanu nga ai Daru Gumrawng Magam Sindawng ngu ai shinggyim masha shazai amyu ni hpe up hkang sha nga ai Daru Mangdang ( Daru Hkawhkam) wa gaw, shi a hkringmang ni hpe mungdan ap da nna, buhpun palawng kalai la rai nhtawm, ashu ashan gyam na lak nak ni hta hpai let, jau gawng gawng hkawm na matu, Ma- joi shingra bum mayan de pru hkawm mat wa sai. Majoi shingra bum ginra de du ai shaloi, shan gap, nga hkwi sha, hka shi hka san ni sha ja lu rai pyaw hkawm nga ai. Kade ram pyaw ngawn simsa lam hpe lu la nga ai gaw, shi a hkawhkam hkaw( Mang- dang htingnu) hte madu jan, salung sala ni hpe pyi n dum hkra rai nga lu ai.
Pungwa jawdan ga e nga ai n hkru n shawp ai Daru Gumrawng Magam sindawng masha ni a hpyen hpe hkrit nna, Majoi shingra bum mayan ni kaw sa du shanu pyaw nga ai Ja Nyi yan Ja Nga gaw, simsa katsi pyaw la ai hka shi makau hkan manam pyaw nampu nampan sama ni hpe ladi hku she kaji dum hkra hkra marawp la, dwi sau ai nampan pu ningmwi ni hpe di sha, nam- pan nampu jahku ntsin hpe chyup lu rai nna, tsit tsawm maling kata katsi bungli ni hte rau nampan nep ai sumtsaw hkrun- lam hta pyaw chyai n law, tsawra ningja jah- paw nga ma ai. Shayi Ja Nyi gaw, Shadang Ja Nga kalaw ya ai singgoi hta noi goiwat nga ai hpe yu let, yu ngwi mahkawn hte tsawra nshat jaw ya nga ai. Ja Nga singgoi bai galai goi ai shaloi mung, Ja Nyi gaw, ningtsing yu hku hte yu ngwi nsen shaw, salum mungga shapraw dan rai nga ma ai. Sumru singgoi kaw nna, Ja Nga yu ai hte Ja Nyi lajang satsawm da ai nampan manep ntsa kaw dung dat ai hte rau, Ja Nga gaw, tsit tsawm hpawgoi lap hte layit yit ya nga ai. Ja Nyi yan Ja Nga gaw, katsi pyaw tsit lali tsawm ai nam maling kata, myit ru myit tsang lam nnga ai sha, sim- sa shimlum shawang tsaw myit hkrum let, shada tsawra shingjawng shada n ju n dawng myit n rawng ai sha, mani sum sai shada makrai, jahta n ma, tsun n hpra rai shingni mahkawn hte pyaw len nga ma ai. Pyaw dik htum ai sumtsaw hkrun lam hta rau hkawm nga ma ai rai. Lani mi hta, hkawhkam htingnu hpe kau da nna, nam de jau gawng gawng hkawm ai Daru Mangdang wa gaw, n tau ai sha, Ja Nyi yan Ja Nga ningtsing yu hku hte shingni ningtam mahkawn let, pyaw chyai nga ai shara de du sa wa u ai.
Da- ru Mangdang wa gaw, Ja Nyi a shingngawn yu ngwi nsen hpe na dat ai hte rau, ndai ram pyaw ngawn ai nsen gaw, kara kawn pru wa ai rai kun? Nga nna, nam sumwum kaw nna, marim yu let, madat nga u ai. Ja Nyi hpe mu ai shaloi, shi a myit hta Ja Nyi hpe ra marin law hpa ni pru wa ai majaw, ndan hpe shachyen la nna, Ja Nyi hte rau run dung nga ai Ja Nga hpe gap dat u ai. Ja Nga gaw ndan pala hkra ai majaw, kadang mat wa sai. Ja Nyi gaw, Ja Nga pala hkra ai hpe n chye ai majaw, mahkawn hpe matut shapyaw taw nga ai. Ja Nga hkam ja n lu na zawn nga ai machyi tsin- yam hpe hkam sha let; "Ngai tsaw dik ai Ja Nyi, ngai hta ndan pala hkrum hkra sai majaw, si wa na zawn nga ai, nsa mung sa chyat la wa sai, grai ba kalawp la wa sai. Ngai hpe naw hkye la rit." Nga nna hkrap dat yang she, mahkawn hkawn nga ai Ja Nyi gaw na dat nu ai. Ja Nyi lawan ladan kayin yu dat yang, ningdan pala langai mi, Ja Nga kaw jung taw nga ai hpe mu dat ai hte rau, gang baw kau dat ya u ai. Hkrap shut ns- en hte Ja Nga bai tsun wa ai gaw: "Ya ngai hkrap nga ai gaw, ndan pala hkra machyi nna hkrap ai n re.
Ngai hkrap ai gaw, ngai n nga mat ai shaloi, tsawra ai Ja Nyi langai sha ndai maling dinggram ka- ta hta manang n lu ai shingtai jahkrai, marit maroi, matsan mayan rai, myit ru yawn hkyen hkam sha, ningtsang tsin - yam hte garen nga na hpe tsang en hkrap ai re. Ngai hta hkam sha ai tsin-yam hta Ja Nyi hkrai n nyi n kri garen gari rai ngam taw nga na hpe grau myit n dik gahtet la nna hkrap ai she re. Kaga lam hta myit n dik hkrit tsang na lam ngai hta n nga ai. Nye a myiprwi ni bum lagaw na hka shi hka hpawk hpungpun zawn lwi pru n hkring let hpring kaprat wa nga ai. Tsaw dik ai Ja Nyi hte tut tut rau nga lu na hpe sha myit mada ai..." Nga tsun let, nampan panep ntsa e n dum n dam n chyi n mu rai malap galeng taw mat sai rai. Ja Nyi gaw, malap galeng taw mat wa ai ja nga hpe alawan hta pawn la nna, shi a lahpyen ntsa kaw mara pawn ahpum let, masin n si maroi n ni la ai hkam sha lam hta marawn hkrap jahtau taw nga sai. Kadai hkye mawai tsi shamai ya lu sana rai nga a ta? Daru Mangdang wa gaw, Ja Nga teng sha si ang sai ngu shadu nna, ma- koi nga ai sumwum kawn pru wa u ai. Daru Mangdang wa hpe mu dat ai sha- loi: "Nye a tsawra dik ai Ja Nga hpe sat ai ndai wa sha rai na re. Shi hpe sha gap sat ai hpe yu yang, ndai wa gaw, Ja Nga n nga jang, ngai hpe jahkrit shama la na ngu sawn ai lam rai na re.
Ngai hpe ra nna Ja Nga hpe sat ai nan rai na re." Ngu myit sawn la lu ai hte rau bum n tsa de gat lung mat wa sai. Bum ntsa kaw nna Ja Nyi gaw: "He! Sa numdan ai Mangdang Hkawhkam! Gwi daram pyi tsang madang n nga ai ai Mangdang an- gawk! Ngai gaida tai hkra ngu, Nang! Nye a sumtsaw wa hpe sat ya sai. Ya! Nye tsawra wa, nang gap ai pala hte tsin -yam hkrum galau taw mat sai. Nang gaw ginyuk ginma, n hkru n kaja ai yuk jahtuk masha nan she rai nga a hka i? Ya ngai hkrum sha ai yawn ningtsang tsin -yam hpan, na a Nnu mung hkam sha u ga, ngai hpe ra nna, mara kata ai Ja Nga hpe gap sat ya ai re majaw, na a Nnu mung, madu wa, kasha ni hte hka bra gaida tai ra u ga. Na a madu jan mung, madu wa, kasha ni hte hka bra ra ai yu bak tsin-yam hkrum sha u ga. " Ngu n hkring n sa matsa maraw n bun u ai hta n -ga, n hkru n kaja ai ni hpe yu bak tsin -yam jaw nna teng man sadi dung, sum- nung shingdi mara n lu ai ni gaw, lam shagu hta awngdang asak hkrung nga lu na matu mung, gumgun gumhpai hpan ningsang hpang de hpyi lajin jahtau u ai rai. Mangdang hkawhkam wa gaw, matsa marawn nga ai Ja Nyi hpe masit npawt ai sha, sumtsaw pala gap jung yang lu na shadu nga u ai. Dai majaw, Mangdang wa Ja Nyi hpe amyu myu ngu nna asaw ahpyawp yu nga ai: "AWh! Tsawm dik shayi, ningtsing Ja Nyi e hkum hkrap nga sa ayaw, hkrap nga tim gaman sha rai sai. Nang myit n pyaw hkum rai u, na a matu grau nga pyaw na lam hpe ngai lajang ai she re.
Ngai hpang de hkan wa rit. Mangdang htingnu kata hta ali ama, shingnan num ahkum ara hte hte hkawh- kam jan nga nna wa ningngai nga na hku she galaw saga. Lawan yu wa rit. Ngai hte rau run wa mat saga. " Ngu tsun shapyaw u ai. Dai ga na ai hte Ja Nyi gaw, grau grau masin pawt kari wa let: "He! Ginyuk ginma! Ngai hpe ra nna nye a sumtsaw hpe nang sat ya sai. Ngai salum kapaw nna si na sha rai sai. Na madu jan galoi ntai ya ai, na madu jan tai na ma- daw gaw, si mat ai wa kaja dik ai re. Nang zawn re ai sa numdan masha hpe kadai wa ra na hkum shadu, ndai shara kaw matut nna naw nga taw yang, nang gaw sa wa tai sa ra na re hpe dum nga nni? Ndai bum marawn nam mali kata na matse labye ni a lu sha tai mat nna, na a madu jan kasha ni jahkrai gaida n byin shangun mayu yang, lawan wa mat u. N kaja ai masha a matu shara shagu hta hpyen nga ai hpe dum u--htwi! Nang zawn re ai masha an- gawk hpe n kam yu sai." Ngu laja lana tsun matsut jaw dat lu ai. Mangdang wa gaw, dai ga na ai hte shi a n hkru n kaja ai lai nsam ni hpe dum wa ai sha n-ga, Ja Nyi a ngang kang ai myit masin hte teng man ai hku tsun shaga, nten marai rawng ai re ai lam hpe mu nna" Ngai gunglau yu nna sha gaw byin ai baw num n rai sai. " Ngu masin kata myit la u ai hte kaya pawt pawt let: "He! Ja Nyi ngu ai num sha nang gaw, nam kaw sha nga ging ai num sha rai nga ndai, hkawhkam jan tai na gaw n-ging n dan rai nga ndai hte maren, ndai Majoi shingra bum kaw, nam na matse labye du sat ni zawn, namlaw namlap sha di sha nna nga nga sanu.
Nang gaw lani mi hta mat- se labye ni a sha hpa tai mat na sha rai nit dai, grai gaw lahpawt dum de ai yaw, ..." Nga masin pawt ka- un la ai nsam hte shingdu kayin mat wa sai rai. Ja Nyi yan Ja Nga a hpyen rai nga ai Daru Mangdang hkawhkam hkaw wa pru mat wa ai hpe hkan yu dat yang, ram ram tsan ai de du mat wa sai hpang, Ja Nyi gaw bum ntsa kaw na yu wa nhtawm, Ja Nga a moimang nga ai de yu du ai hte rau, moimang hpe hta pawn ba la nna, bum ntsa de lung mat wa sai. Bum ntsa du ai hte Ja Nyi gaw Ja Nga a hkumtsawp hpe ahpum nna, masin salum gapaw ga ayai mat wa na daram nni nkri tsin-yam hkam sha let, lawu de na hte maren hkrap ngu hkrap ngwi yuhku hte matan ga hpe sharung shayawt ningtam dat nga u ai : Ngai tsaw dik ai Ja Nga, nam maling bum jinghkang hte lungpu ni mung shi sa ra hte shi grin nga ding yang rai nga ai. Nang nnga yang nye a matu kaman lila rai mat sai. Ngai tsaw dik ai Ja Nga! Moi an pyaw len ginra, nampan nep ai yup ra ni mung grin nga ding yang rai nga ai. Nang n nga yang nye a matu hpa di sa- na. Ngai tsaw dik ai Ja Nga! Katsi hpun ndung na nampan ni yu wanna, hpung yawt yawng ginsup sup ai katsi san tsawm hkanu hkashi ni mung lwi nga ding yang rai nga ai. Nang n nga yang, nye matu gaman li la rai mat sai. Ngai tsaw dik ai Ja Nga! Majoi shin- gra bum na ja lungseng prang sut rai hkumtsup na, marit maroi pyaw len bum ni mung grin nga ding yang rai nga ai. Nang n nga yang nye matu lachyum n pru sai.
Ngai tsaw dik ai Ja Nga! Nam nga dusat ni pyaw len nga pyaw ginra tsit tsawm tsingdu pan ni mung grin nga ding yang rai nga ai. Nang nnga yang nye a matu kaman li la rai mat sai. Ngai tsaw dik ai Ja Nga! Majoi Shingra bum kaw mahtum mahta ni sin makawp maga da ai tsi hkrung tsi nan ni tu nga ding yang rai nga ai. Nang nnga yang nye a matu akyu n pru nga sai. Ngai tsaw dik ai Ja Nga! Atsam rawng ai tsi hkrung tsi nan ninghkring ni hpring tsup ai ndai bum ntsa, nang hpe n mu, n lu shaga ai rai yang nye a matu hpa lachyum pru sana. Nang nnga yang ka- man sha rai mat sai. Matsaw ningtsang hpan ningsang ni e, ngai tsaw dik ai Ja Nga hte rau n rai yang, ngai kaning rai nga na, matsan dum la mi law. Mahtum mahta, gumgun gumhpai ni e, ngai tsaw dik ai Ja Nga hte rau n rai yang, ngai kaning rai sana, matsan dum la mi law. Ngai tsaw dik ai Ja Nga e! Nang ngai hpe kaja wa kau da sana i! Ngai kaning rai nga na rai ta? Ja Nyi gaw matan ga tsun let, Ja Nga hpe ahpum da nga ai kaw na atsawm shama sawp jahproi yu ai shaloi, hkum ni loi naw lum nga ai hpe chye lu wu ai. "AWh! Nye a tsaw dik ai Ja Nga! Garai n si shi ai, nsa naw rawng ai, myit mada shara, nye a matu myit mada lam nhtum sai. Mahtum mahta, gumgun gumhpai ni hpe hpyi sha- li na lam she ahkyak sai." Ngu myit dum wa wu ai. Ja Nyi gaw: "Mungkan nga yawng nga pra, tu matu, ru maru, sak hkrung yawng hpe makawp maga bau sin nga ai mahtum mahta asak madu ni e, nye a tsawra dik ai Ja Nga gaw, n tara ai zingri zingrat gap sat hkrum ai majaw, nni nkri tsinyam hte si malap mat ai gaw ya du hkra naw rai nga ai.
Madu mahtum mahta ni nhkye mawai la ya yang, kaning n chye di mat sai. Shi gaw hpa mara n nga ai gaw teng sha re. Matsan dum ai hte makawp maga hkye mawai la ya na hpe hpyi lajin ding nyawm dat nga nngai law. " Ngu hpyi shali, hkrap lanyi, lajin jahtau dat nu ai rai. Ja Nyi a masin gahtet kamawt la ai tsinyam hkam sha let, hpyi nem lajin ai matan ga gaw, tengman dinghpring sadi dung ai ga re majaw, matsaw ningtsang na mahtum mahta hte gumgun gumhpai ni hpang de krang du wa sai. Dai nsen hpe na ai matsaw ningtsa hpan sagya ni gaw, shinggyim mungkan de hpa byin wa sai kun? Ngu mada dat ai shaloi, Daru gumrawng magam gumdawng masha ni a nhkrun krang ai laisat laisa maka kumla hte bung pre ai Daru Mangdang wa a majaw, nni nkri hkam sha nga ai sumtsaw wa Ja Nga a matu matsan mayan rai yawn ningtsang hkrum nga ai Ja Nyi hpe mu dat nga mu ai. Ja Nyi ngu ai shayi gaw, sumnung shingdi ai. Nammak law hpa myit n rawng ai, gumrawng gumtawng se le se ge re ai Mangdang hkawhkam wa shi a hkawhkam hkaw e hkawhkam jan shatai na ngu alau ai raitim, shi a tsawra dik ai Ja Nga a ntsa sadi n rum ai sha sadi dung ai shayi rai nga ai. Tengman dinghpring sari rawng ai Ja Nyi hpe mahtum mahta hpan sagya ni matsan n dum ai n nga lu nga sai. Dai majaw, Ja Nga hpe hkye la na matu shinggyim masha jahpai nna yu sa wa yang, sari rawng ai Ja Nyi gaw, nsa hkyet wa hkyen nna malap taw nga ai, Ja Nga hpe lahpyen ntsa pawn da let, n-gaw nwai myit hte azi yu nga ai hpe mu ma ai. Dai shaloi, masha jahpai nna sa ai mahtum mahta ni gaw, mabyin masa ni hpe atsawm sha san la nna, hka san lwi ai hkashi de wa sai.
Kawa dinghkru hta hka ja la nna Ja Nga a hpadip kaw na ndan pala hkang hta ru jaw bun ya mu ai. Nten hkan ntsin hte madit ya nna n-gup de mung ntsin kahte bang ya ma ai. Kade nna yang, Ja Nga gaw ndan pala nt- uk hkoi mat wa nna, Ja Nyi a lahpyen kaw na mau mau rai rawt dung wa sai. Ja Nyi gaw nchye tsun hkra kabu ai myiman hte lata lahkawng hkayawm hkum- ba dung let: " Matsaw ningtsa mahtum mahta asak madu ni hte tsihkrung tsinan madu e, garum gahtau la na kadai n nga, jinghku jing-yu hte tsan gang la ai maling kata hta tsinyam hkrum nga ai nye a tsawra nja Ja Nga hpe tsi tsi shamai ya ai majaw ndang tsun hkra chyeju dum nngai. Ndai chyeju hpe galoi mung mal- ap lu na n rai saga ai. " Ngu chyeju dum hkungga jaw u ai. Tsi sara wa mung: "Daini daina kaw nna gaw, nhtum nwai, mani sumsai rai prat tup jaw lup, rau nga rau pra, galu kaba mayat maya nna nga lu myit ga law. Bai nna daini kaw nna gaw rau dung rau nga tsawra mahku mahkau n chye, kahpu kanau shada da share, lagu lagut lam hkrai myit, mahtum mahta hpe mung n hkrit, gashun gashe, masu lale, ga li ga law shawang myit magaw ai Daru Gumrawng Magam Sindawng ni hkrai nga ai Pungwa jawdan ga de hkum sa hkum nga sa.
Ndai Majoi shingra bum mayan hta sha shanu shatam nga mu yaw." Nga numhtet ga tsun nna mye rai mat sai. Ja Nyi yan Ja Nga gaw mau nma rai mat nga ma ai. Ja Nyi yan Ja Nga moi na hta grau grau tsawra nja nhpra rai Majoi shingra bum mayan na tsit lali tsawm ai maling shingnip kata nampan nep ai sumtsaw hk- run lam hta ta gindun let hkawm sa lu ai gaw, shani kaw nna shata, shata kaw nna shaning de du mat wa masai. Dai aten hta Majoi shingra bum hte Pungwa jawdan mung ni hta lamu marang gaw, n hkring n sa, shani shana zim ngu ai n nga, htu shaya hkrat abya bang wa sai. Kade nna yang, Majoi shingra bum lagaw hkan na hkashi hkanu ni gaw kaba she kaba nam- muk dara panglai, hka hpunggawn hpung- dan tai nna nawng ing mungkan byin mat sai. Ndai zawn byin ai hpe "Majoi Sha-u ing ai . "nga ma ai. Ndai zawn Majoi sha-u ing wa ai shaloi, n hkru n kaja ai Daru Gumrawng Magam Sindawng masha ni hte Daru mungdang hkawhkam ni gaw, Majoi sha-u hta lim marit si mat ma nna, Ja Nyi yan Ja Nga shayi yan shadang ala gaw, Majoi shingra bum pungding kaw rau run dung jahta, mauhpa mabyin masa hpe hkrit gahpra let, Majoi sha-u ing ai kaw na lawt lu sai nga gabu nga ma ai rai.
