Du wa Zanhta Sin

Du wa Zanhta Sin gaw Jinghpaw Wunpawng sha ni tsawra hkungga kasi tawn da hkrum ai ningbaw ningla langai mi re. Du wa Du wa Zanhta Sin gaw 1920 ning May 21 ya shani Putao mare Buga hta shangai wa ai. Kawa Zanhta Hpung hte kanu Zi Nem yan a kasha re. Kaji ai aten hta Putao mare Nawnghkai kaw ABM jawng hta laika hpaji hpe hkaja la sai. 1936 ning hta Myitkyina mare e tsang 7 awng la sai. 1939 ning hta Sagai mare kaw tsang 9 san poi hpe awng la nhtawm 1940 ning hta Mandalay  kaw tsang 10 san poi hpe awng la nu ai. Dai shaning sara tai lakmat lu nu ai re.

1942-1947 ning hta Putao hte Sumpra Bum Mare hta Bumdu Rung kaw magam bungli gun hpai ai. 1942 ning May 28 ya shani Jinghpaw Levi dap hta shang lawm nna hpyen ma, laknak, lu sha mahkawng shinggyin ai hta lit hkam re. 1947 ning hta K.N.C (Kachin National Congress) hpe woi awn hpaw hpang sai. 1951 ning hta Myitkyina dingdung daw hku nna ra lata poi shang let Amat tai sai. 1953-1956 ning du hkra Jinghpaw Mungdaw a Hkringmang Rung a Atwi-wun lit hpe galaw gun hpai sai. 1956 ning hta Rapdaw Amat bai lata san hkrum nna dai shaning July 16 ya shani Jinghpaw Mungdaw Hkringmang hte Jinghpaw Mung Ningbaw lit hpe gun hpai sai.

Du wa Zanhta Sin mungdaw ningbaw tai nga ai aten hta Wunpawng sha ni a dai lup dai hpang ga rai nga ai Hpimaw, Gawlam, Kang Hpang lamu ga manghkang byin pru wa ai.

Dai lamu ga hpe U Nu hte Hp.S.P.L Asuya gaw Miwa ni hpe dut sha kau ya sai. Ndai lam hpe Mungchying sha, grau nna Wunpawng sha ni kachyi mi pyi myit n hkrum ai majaw manghkang kaba pru sai. 1956 ning October shata hta U Nu hte Hp.S.P.L ningbaw ni Miwa mung Pekin mare de sa ma sai.

Dai hpang sumtsan salang U Hla Maung, Hkyin Nyut ni hte rau Jinghpaw Mung Ningbaw Duwa Zanhta Sin, Sama Duwa, DuwaZau Lawn ni 30.10.1956 ya shani bai hkan sa ma ai.

Miwa mung Pekin de du ai shaloi Hpimaw, Gawlam, Kanghpang mare hte seng nna myit hkrum lawm na matu U Nu wa aja awa Duwa Zanhta Sin hpe tsun wu ai. Dai shaloi Duwa Zanhta Sin gaw Jinghpaw Mungchying sha ni a ra sharawng ai lam n lawm ai sha Ngai hkrai kachyi mi pyi n mai daw dan ai, ngu gwi gwi tsun wu ai. Ndai lamu ga jarit hte seng nna hpaji chye ai Wunpawng jawng ma Du salang ni yawng myit n hkrum ma ai. Dai majaw Jinghpaw Mung shara shagu hta myit n hkrum ai lam n-gun madun shamu shamawt ai lam amyu myu galaw lai wa sai. Ndai zawn madun shamu shamawt ai lam gaw Shanglawt lu ai hpang Jinghpaw Wunpawng Ramma ni a mung masa shamu shamawt ai lam byin tai wa sai.

12.12.1956 ya shani U Nu, Sama Duwa hte Wabaw Zau Rip hpe shaga la nna miwa ni hpe lamu ga jaw na matu myit hkrum ai lam ta masat wa ka mahkret let Miwa ni hpe anhte a dai daw dai hpang ga hpe dut sha sai re. Ndai lamu ga hte seng nna U Nu gaw Jinghpaw salang ni hpe shaga la let woi bawng ban ai, raitim kadai myit n hkrum lawm ai majaw Hopeless Leader akyu n rawng ai ningbaw ni ngu, shat sha jaw sha rai shakre wu ai. Dai zawn re ai manghkang ni a majaw 1958 ning June 4 ya shani Mungdaw Ningbaw magam lit kaw na pru nu ai. 1960 ning hta ngang grin Hp.S.P.L Hpung hku nna ra lata poi shang let Amat bai tai sai. San seng Hp.S.P.L a Bukda makam masham hpe Myen mungdan a makam masham galaw na hte seng nna grai ninghkap ai wa re.

Duwa Zanhta Sin gaw tinang a myu tinang a Buga myu tsaw share shagan re. Masha hte tsun shaga ai lam hta mung grai pri-nem hkra tsun shaga chye ai hte myit grai galu gaba ai. Shi a mung masa hte seng nna hkam la ai lam gaw shi a prat hta nga ai ningbaw ni hte shai ai. Mung shawa hpe grai tsaw ra let mungchying sha ni maga gwi gwi tsap ai ningbaw re. Magam  bubgli ni hte grai sadi dung let, grai myit kup ai. Shi gaw Hkalup Hpung rai nna makam masham lam hta grai shakut ai wa re. Shi hte hku hkau ai ni yawng shi hpe grai tsawra ai. Daru ahkre jahkrit shama ai lam n nga ai sha myit galu let pawt sindawng ai lam n nga ai. Ndai zawn re ai myit masa a majaw, masha law law wa, grai tsawra hkungga ai Jinghpaw Wunpawng sha ni a ningbaw langai mi re.

Duwa Zanhta Sin gaw tinang a akyu n tam ai sha myu hte mungdan a matu masa lam hta san san seng seng galaw lai wa sai. Jinghpaw Mung Ningbaw ni hta Duwa Zanhta Sin gaw matsan dik re. Gade mi jam jau hkrum tim shi a myi man gaw galoi mung mani sum sai rai nga ai. Shi galaw lai wa sai magam bungli shi madun da ai kasi ningli ni gaw anhte ka n ma, shagawp n ma rai nga ai law.