WUNPAWNG MYUSHA NINGBAW NI A MAHKU MAHKAU

Du Kaba Lahpai Naw Seng gaw, 1949 February 16 ya shani Toungoo kaw nna Kayin rawtmalan hpu nau ni hte pawnghpawm nhtawm, U Nu shadip magam hpe ninghkap gasat hpang wa sai. Nhtoi 6 ya laman Maymyo du hkra myihprap zawn lawan ai hte zing lung wa lu sai. Raitimung, Namhkam du ai shaloi tinggyeng lu lawm lam hta myit marin ai tinang myusha salang nkau a majaw awmdawm ahkaw ahkang lu ai mungdan gawgap na matu asak apnawng let shakut wa ai Du Kaba Naw Seng hte shi a hpang hkan myutsaw mungtsaw ni gaw, kaga lata na mahkrun n nga sai majaw, Miwa Gumsan mungdan de yen shang mat wa masai. 1967 November shata hta KIO Ningbaw Malai, Brig. Lahtaw Zau Tu woi awn ai KIO kasa hpung kaba langai gaw, Kunning, Peking, Shanghai, Chan Cha mare kaba ni kaw hkan du nhtawm, Miwa Gumsan Mungdan ningbaw ningla ni hte nachying manu rawng ai kasi hku nna masat masa mahku mahkau hpe shangang shakang wa sai.

Wunpawng Mungdan Shanglawt Hpung (KIO) gaw, dam lada ai hkam la lam hpe manu tawn nhtawm, mahku mahkau lam hta democracy lam yan hkan ai sinna mungdan ni hte kanawn mazum ai zawn, socialist maga de shanang ai mungdan ni hte mung, kanawn mazum wa sai. Tatut kaw, woi ahpun lakung magra shamat ai lam n byin hkra mung jahtuk kanawn wa masai. GOC Lahtaw Zau Seng gaw mungkan ting na Communist ni hpe ninghkap ai World AntiCommunist mungdan ni hpawngchyawm ai mungkan zuphpawng kaba kaw shang lawm wa ai zawn, Ningbaw Kaba Maran Brang Seng yan Ningbaw Kaba Lanyaw Zawng Hra, Howa Du Maran Ja La, JJ Lum Dau ni gaw, Karachi mare kaba kaw galaw ai World Muslim Congress Conference kaw sa shang lawm ai hta n ga, mungkan kaw Christian myusha ni hpe ninghkap nga ai Aghanistan mungdan kaw galaw ai Muslim myusha Mujarhidden rawtmalan hpung 13 a kasa marai 140,000 (sen langai mun mali tup) zaibru jang kaw galaw ai zuphpawng kaba hta mung sa shang lawm wa ai gaw, anhte Wunpawng Myusha a kasa ni sha rai wa sai. Jahkrit shagu hpe n hkrit ya ai sha, hkan shadik shatup ging ai hpe mungkan a man kaw myusha lam yan hta sari sadang mi arawng rai kasi woi madun wa ai KIO ningbaw yan hpe nachying shakawn arawng la hpa rai nga ai. Ningbaw Kaba Maran Brang Seng gaw mungkan mungmasa lam hte seng nna tinggyeng hkam la ai masing kaw hkamdahka myit rawng ai zawn, tinang wuhpung a dawdan ai ntsa kaw mung ngangkang ai myit hte hkam la chye ai rai nna, shi a hpang hkan ni hte, grup-yin na ni mung, shi woi dawdan sa ai a ntsa kaw jawm kamhpa ai hte hkan shadik shatup sa wa ai hpe mu wa saga ai. Shingrai CPB ningbaw Thakhin Ba Thein Tin daru magam nem hkrat wa magang sai lam, Peking salang ni kaw na shiga soisam na lu ai shaloi, mahku mahkau lam hta kayin gaye jahtuk chye na matu tengman ai lam hkaja ra sai, nga nna hkam la let, shi nan shata langai grup-yin aten la nna CPB ginjaw Pang Sang kaw sa du let woi hkaja ai hkrun lam hta, JJ Lum Dau hpe mung woi shalawm ai. Gen. Kyaw Zaw gaw BSPP ginjaw kaw nna CPB ginjaw de nnan sa du ai ten rai nna, BSPP kaw magam gun kau da ai JJ Lum Dau hte Gen. Kyaw Zaw yan gaw BSPP hpe woi awn wa ai Ne Win a ntsa shana shagu ningmu garan kachyan hkat ai kaw na, Gen. Aung San a tinggyeng sha-ip tawn ai Panglung myit hkrum lam hte seng ai lawng lam nkau mung Gen. Kyaw Zaw kaw na hkaja la lu ai lam nga wa sai. Ningbaw Kaba Brang Seng gaw, Ne Win galaw sa wa nga ai hkam la lam Peking kaw na seng ang ai masha kaba ni hpe chye shangun mayu ai rai nna, Hong Kong na Salang Cheung Chikeung hpe ga byan shatai let, JJ Lum Dau hpe Peking de shangun dat ai. Shing re ai mahku mahkau lam hta hkan nna htawm e, KIO kasa hku Moscow de sa du n htawm, Krimlin hkawhkam wang kaw galaw ai World Anti-Communist League Conference kaw sa lawm let, KIO a kasa hku nna Russia President, Gobershev a nta kaw mung sa du kau da ai lam nga wa sai. Krimlin hkawhkam wang kaw galaw ai WACL zuphpawng hpe woi awn ai Dr. Allexander htawn tsun ai mungga hta: “Mungkan kaw shawng nnan Communist masing hpe hkam la ai gaw, anhte Russia mungdan rai nna, tinnang a yawshada ai masing awngdang wa ai hte mungkan kaw shawng nnan Communist hpe ninghkap ai mungkan zuphpawng galaw ai mung, anhte Russia mungdan rai sai. Madung gaw, tinang a myusha hpe kaga myusha ni sa dang sha nga ai kaw na lawt lu na matu htaphtuk ai ladat gaw, Communist ladat nan rai sai. Dai ladat hpe n ra timung sharang let tinang a yawshada ai kaw du ai shaloi, dai masing hpe gumlang kau nna tinang a myusha ni ra sharawng awng ai policy hpe lata lang wa saga ai. Madung gaw tinang hkam sha nga ai ana ahkya mai tsai wa lu na matu, tinang n sha mayu ai tsi hpe sha ai marang e, mai tsai wa lu ai masing rai wa sai,” nga ai.

Shing-rai matut manoi, Miwa, Laos, Cambodia, Vietnam zawn re ai mungdan ni hte kaga mungdan ni mung, Russia mungdan galaw awngdang wa ai hpe kasi jawm la nhtawm, aten langai laman yak-hkak ai hpe hkam sharang let shakut wa ma ai rai yang, daini na ten hta shanhte raq sharawng ai mungdan ni hpe gawgap la lu shajang masai. 1976 May 31 shani, Salang Kaba Maran Brang Seng woi awn ai KIO Ginjaw Komiti a dat kasa malawm (1) Col. Zau Mai, (2) Capt. Tang Gun, (3) Capt. Tu Htang, (4) Slg. Tang Nyeng, (5) Slg. Kaba Maran Brang Seng jan Kaw Mai ni marai 6 gaw, Miwa mungdan shadip magam hte hkrum bawngban nna, CPB datkasa hpung hte : (1) KIO Ginjaw tsang, (2) Ginwang Ginjaw Tsang, (3) Ginwang tsang, nga nna, tsang masum a hpu-awn jawng hte hpyenhpung a matu Company Tsang Training jawng ni hpaw sharin na lam, kaga matut ra wa ai arung arai ni hpe ra wa ai hta hkan nna garum shingtau wa na lam bawng jahkrup myit hkrum la lu masai. Shing-rai bawngban myit hkrum ngut ai hpang, laknak myu hkum 300 hte hpawn, 12 September 1976 shani tinang a mungdan de apyaw sha, bai du wa masai Ndai shiga hpe Ne Win na dat ai shani kaw nna yup n pyaw, shah n mu, KIO hte CPB a lapran na myit hkrum lam hpe gara hku jahten ya lu na lam ladat shaw nga nu ai.

Madung gaw, British hte American ni India kaw na bai n htang wa nna, Japan hpe gasat nga ai Kachin hpyenhpung hpe aten kadun laman hpyendap langai hpra hpaw ya let prat dep laknak garan ya dat ai hte aten kadun laman Japan ni hpe Myenmung kaw nna tsepkawp shachyut shapraw kau lu ai hpe myit dum dat ai shaloi, ya kalang mi KIO hpe Miwa kaw na ra n rawng hkra laknak jaw dat ai rai yang, Myen hpyendap gaw hprawng lawt na matu pyi hkyen la n jin na sai lam myit dum dat ai hte, hkye la she laja rai mat manu ai. Ndai lam hte seng nna aten galu la let sung sung myit sumru yu ai shaloi, CPB hpe gasat nga na malai, Miwa hte pawng nna ahkyak la ai hte sha awngdang wa mai na lam myit hprang wa nu ai. Miwa gaw rawtmalan lam awngdang wa ai shani kaw nna super power lu ai mungdan byin wa na re. Dai shaloi Arab mungdan ni kaw pru ai sau ni hpe mari la ai shaloi, sanghpawli langai hte Singapore hku htaw shalai la na matu aten grai na na hta n ga, Malacca hkan laidi ai shaloi, shim lam tsang ra ai lam amyu myu nga wa mai ai.

Raitimung, Arab ginra kaw nna Myenmung du hkra sanghpawli kaba hte htaw du ai shaloi, Yunnan du hkra prat dep lam kaba waw la ai marang e, aloi sha matut htaw la mai na re. Shing-re ai masing wanglu wanglang galaw lu na matu lapran kaw dutdang nga ai CBP hpe simani ai mahkrun hku sengyeng kau mai na lam, Myen gaw, seng ang ai ni myit hkawn hkrang hkra mahkrun tam ya ai. Dai hta hkan nna, CPB hpe simani ai mahkrun hte sengyeng kau lu ai hpang kade nna ai laman Kyaukphyu masing galaw hpang wa masai lam, htawm e, dai masing hpe grau damlada ai hku matut maden shangun lu na matu, Myitsung dam hpe galaw hpang wa masai. Ndai grupyin ginra kaw masing kaba ni n dut n dang galaw lu na matu Myenmung hte matut nga ai htingbu mungdan hkan na rawtmalan hpung ni hpe seng-yeng kau lu na matu, “One Belt One Road” ngu ai masing hpe grup-yin mungdan shadip magam ni jawm madi shadaw wa na matu shalat wa masai lam, npawt nhpang mu chye ai salang nkau tsun wa masai. Shut ai, jaw ai hpe dinglik chyai ai hte 1967 ning kaw nna daini du hkra aten lahpawt lama myit chyai na malai, lai wa sai ten na mahkrum madup hpe akyu jashawn la ai masing gaw, myusha ni yawng a matu awngdang ai maga de gale wa shangun mai na re.

Ningmu langai a ntsa kaw shut ai, jaw ai hpe dawdan na matu gaw, myusha ni shakut wa ai mahkrum madup hte akyu ara hpe asung jashawn chye ai mahkrun rai na re. Lama dai ten hta Du Kaba Naw Seng a ningmu hpe Wunpawng Myusha ni hkan madi shadaw ai rai yang, awmdawm ahkaw ahkang lu ai mungdan hpe gawgap lu ai gaw, shaning kaba rai wa na sai. Matut nna hkinjang tek jum ai hta ningra mat ai rai yang, Anoratha lajang tawn magang ai mahkam kaw ginchyum dat hkrum wa na re. Myenmung a shingdu lam hpe maram yu yang, mungdan madu ni gaw, Myen amyu n re ai bumnga masha ni rai nna, shanhte gaw daini na ten hta pratdep hpaji chye, ningmu dam lada ai myusha madang kaw du nga shajang sai. Karai Kasang jaw da ya ai mungdan hpe uphkang na matu yawng yawshada wa ai pandung de ahkum ara shang lawm let, n shut n shai ginchyum jawm dat la saga law.

JJ Lum Dau