ALAW BUM

Wunpawng Mungdan kata na mying kaba danhkung ai Alaw Bum hpe hpyen gumshem a lata na Wunpawng Amyu sha ni a lata de zing madu la lu ai ( 2 ) lang rai sai. Dai majaw labau bai gayin jahkum shatsup ai shaning ngu tim n shut nga sai.

Ndai Alaw Bum gaw English British Asuya prat hta lamu ga jarit makawp na matu Alaw Bum Wang galaw da ai shara rai nga ai. Bum ntsa lamu ga pa dam nna nbungli hte lu sha Ration ni wa jahkrat ya mai ai shara mung rai nga ai.

Myen mung shanglawt lu ai hpang ndai shara hta jarit sin hpyen dap ni hpung hte hpung nga lai wa sai. Wunpawng Mungdan Shanglawt Hpyen Dap (K.I.A) Rawt Malan wa ai ten Sam Mung kaw nna Kanu Mungdan Man Maw Ginwang wa hpaw let Ga Sadi Maw Hke Hka ai lam ( 1961, December ) hta Amyusha Dawnghkawn sharawt hpang ai lam (1962, December 24 ya ) ni galaw ngut ai hpang, Man Maw Ginwang kata Myen Hpyen Dap ni nau wa shamu shamawt shatsang, chying lau wa ai majaw hpyen man gayin ai hte hpawn Dingdung maga de majen je lung wa ai ten rai nga ai.

Woi awn ai ni gaw Col. Lahtaw Zau Tu, Cpt.Dumhpau Gawng, 2nd.Lt. Namsu Zau Tawng, Bn. S.O 2nd.Lt Galau Hkun Chio, No.2 Column Commonder W.O II Zau Shan ni rai nga ai.

Ndai hpung ni gaw Hka Mut Hka ( Ta Hkaw Hka ) hpe Gumdi mahkrai hkraidun hku rap di nna Alaw Bum kaw nga ai Hkang Dap ni a hpyen n-gun hpe wa maram sagawn la ai. Alaw Bum kaw Canteen gat seng dut ai Lama Tang hpe shaga woi la nna bungli masing ni hpe jahkrup la sai. 10-4-1963 ya shana Alaw Bum Post hpe wa wang da sai.

Shara la ai lam hta Guard Section ni sinpraw maga shara jahkrat nna No.2 Column ni Kum Bau Mai Chyen lam de shara la ngut sai. 1963 April shata (11) ya jahpawt myi mu n mu nga wa yang lahkawng maga de na shada marawn jahtau shama hkat nna jahkrup da sai hte maren Sgt, Lonely shawng Dap kata shang nna hpyen la ni hpe shaga mahkawng tawn kau ai. Marai langai naw makoi nga ai hpe mung tam shaga woi da lu sai. Shingrai shanhte hpe Dkb. Zau Tu kaw na ra ai lam tsun ngut jang nta de wa lam shabrai jaw nna shabra kau dat lu sai. Post hpe mung hpyen hpung rawt wa na mahka nat kau da sai.

Ndai mabyin gaw Wunpawng Mungdan Shanglawt labau hta Sinat n shangoi ai sha shawng nnan Padang dip ai awng dang lam rai sai. Alaw Bum hpya ai kaw padang dip la lu ai gaw Bren Gun-2, MK-II sten -1, Rifile-9, yawng lau ( 12 ) hte machyu pala, Bawm ni hpe zing magawn la lu sai. Dai hpang 1987 ning hta n myit mada ai sha tai hpyen a lata de bai du mat ai gaw ( 34 ) ning na mat ai hpang she tinang lata de padang bai dip la lu ai lam rai saga ai.

Ndai lang mung Myitrum ni ram ram shakut ai majaw 24.3.2021 5:30 Pm kaw nna 25.3.2021 1:30 Am du hkra hkying hkum ( 8 ) tup agying agang shakut shaja nna lu la ai padang ninglaw rai sai. N bung li, Tank Modo n lang tim, ga lam hku sha byin mai ai ladat hte lu hkra shakut la ai lam rai sai. Sai Salat, myit marai atsam law law arang bang da sai re majaw matut nna n mat n hten hkra hkang zing makawp maga sa wa na gaw anhte yawng a lit rai saga ai ngu Alaw Bum a lam arawng la let labau kadun ka tang dat nngai.

Ref. Du Jum Usa Gaidaw Zau Bawk Hte
Interview (13-4-2009)

Dakkasu Tsa Dim