Moi…moi ..chyi nma pri n pra prat hta hpat wat Ganghkau kata hpa mung n nga, hpa mung n pra, zim she zam, hprim she hpram, rai nga yang gumhpan wa ningsang, ninggawn wa machyang ngu ai shawng nga ai da. Shaloi bungshi ngu ai hpan, Mungga ngu ai shaman di nu ai da. Gumhpan wa ningsang hpe gaw myi hte n mu, nsen sha na lu ai ayi mung rai, ala mung nawng ai re da.
Shing rai nga yang summwi zawn re ai mi yang, myi hprap zawn re ai mi pyang di nu ai da. Dai myi hprap gaw jan tai wa nna dai summwi gaw hka hte aga tai wa sai da. Gumhpan wa ningsang gaw ajan hpe gyin, aga hpe tarin ai shaloi hkrat wa ai ahkyep ahkap ni gaw gintawng shagan (stars) ni tai wa sai da.
Dai hpang dai ni hpe yu na matu chyanun num-ang hte woi shun hpunggam yan hpe shaprat nu ai da. Shing rai chyanun num-ang gaw hkrung mahkrung hpe shangai hkrai shangai, Woi shun hpunggam gaw tu matu hpe chyinghkai hkrai chyinghkai manu ai da. Hpang jahtum e chyanum numang gaw shinggyim mung rai, mashang mung tai ai Ja Nyi (Num) hte Ja nga (La) yan hpe shaprat nu ai da…. Dai shaloi gaw sak hkrung mahkrung mung ring, nga manga tu matu mung chying sai da.
Raitim mungkan ga gaw n ru n ra, hka hku hka nam ngu ai mi n nga, jai lang masha kata, law hkrai law, shachyaw hkrai shacyaw, ing hkrai ing, hpring hkrai hpring rai nga sai da. Dai ninghkaw hte yang e Ja Nyi yan Ja Nga gaw htinggaw rawn, dinghku prawn rai nna shadang sha Ningawn Wa Magam hpe shangai shaprat manu ai da. Dai Ninggawn Wa Magam gaw hkri-tung kaw nna wa tu, n shangai shi yang myi mu, garai n pra ai ten kaw nna mungga pru ai wa re ai da.
Shing rai Ningawn Magam aprat asak ram, ning-tsu atsam ningtam wa ai hte nru nra aku aka, ung-ang ginchya nga ai mungkan ga hpe dup shara shatsawm na matu sinpraw sinna ginrat, dingdung dingda kagat, hka hku hka nam masat, nga dang-hta hpe amying shingteng hkringdat hkawm wa sai da.
Mali hpunggam, gyi gaw hkrun lam hku hkan lung wa yang singgun hkindang (hka gyip) kaw du ai shaloi la law ma (Nat Ma) ni e hkap tsun ai gaw, na ningnu si sai da ngu hkap tsun ai da. Shaloi Ningawn Magam gaw …E…maroi nni masin gaw n si, kaning n chye di sa…Gaw yi malai gaw nga, gaw la malai she n nga ai da, nga nna lamu ga matut dup shara hkawm wa sai da…shing rai chying hkrung mahtan, wa ra yan malan kaw du yang la law ma ni bai hkap tsun ai gaw ning wa si sai da ngu yang, a ga.. gaw-la malai gaw n nga ai da, wa ra sa, nga, magam yi -ngam garai n hpra, matawn hpunda hpe n nga raitim shi lang ai lamu ga dup sumdu hpe kabai rap di kau da nna majoi shing ra, ji woi hpunda de wa mat sai da.
Ninggawn Magam e kabai dat ai lamu dup sumdu gaw, dan yang akye ngu ai shara e wa hkrat nna ya du hkra lunghkrung tai nna hkrawn taw nga ai re da. Ninggawn Magam gaw majoi shing-ra, mungsang hpun da de du wa jang hpungtsin kase ngu ai Numraw ja sahte jan ( ja hte mawn sumli da ai tsawm shayi ) hte dinghku rawn, htinggaw prawn nna mayat maya, gumja gumhpra, gumrawng gumra wa masai da. Hpungtsin kase aja sahte jan gaw mungkan ting a chyinghkai katwi re ai majaw mungkan ting aja hpe dai ni du hkra manu shadan, shareng shagrau jai lang nga ai lam re ai da.
Hpungtsin Kase hte Ninggawn magam a kasha ni gaw;
1. La N-gam… Myi Mut Gam.. Sinna masha ni yawng a kaji re ai.
2. La N-naw … Su ru Wawng Naw…Miwa amyu sha ni yawng a kaji re ai.
3. La N-la …Tingling La …Gala ni yawng a kaji re ai.
4. La N-tu…. Sam Tu (Kabai Sam Tu) Thai, Lao, Cambodia, sam ni yawnga kaji re ai.
5. La N-tang…Japan Tang …Japan, Korea amyu ni yawng a kaji re ai.
6. La N-yaw… Shapawng Yaw.. Wunpawng myu sha ni yawng a kaji re ai.
Ndai la N-yaw wa gaw kasha hpung dim re ai majaw Kanu yan Kawa e grau tsawra ai rai nna shan a makau e tut tut nga shangun ai re majaw Wunpawng Amyu sha ni gaw majoi shing-ra hte grau ni kahtep let nga pra wa ai lam re ai da.
Shapawng Yaw wa aprat ram, myit ningzai shatam wa ai hte ningwawt dum sa sharin, matsaw ningtsa madai jaiwa achyin rai nga nna asak kaba, nhka mun abya jang she madai ma Hpraw Sha hte lahput lagaw mawn, mayat dinghku prawn rai, shayi shalat, shadang shaprat masai da… shing rai Shapawng Yaw sha ni gaw madai shayi la ai ni re majaw madai nat jaw jau wa ai lam re ai da.
Madai ma Hpraw Sha hte Shapawng Yaw a kasha ni gaw la sha hkrai marai 9 re ai num kasha kade lawm ai gaw nhkai lawm ma ai. Shing-rai
Shapawng Yaw a kasha ni;
1. La N-gam marip wa rumja Jangmaw jangma, Ji wunla, Marip ru sai ni yawng a kaji.
2. La N-naw Lahtaw naw lalawn Lahtaw ru sai ni yawng a kaji.
3. La N-la, Daina la, Lahpai ru sai ni yawng a kaji.
4. La N-tu, Matsaw zing hkum tu, Zinghkum= Nhkum ru sai ni yawng a kaji.
5. La N-tang, Tang mai tang. Tingmai tang. Kareng ru sai ni yawng a kaji.
6. La N-yaw, Yaw pang yaw Maran ru sai ni yawng a kaji.
7. La N-hka, Hka shu hka sha. Nding pyen tingsa, Hprup sumpra, Nlam wa na, Tangbau tang la, Udi chyang maja ru sai ni yawng a kaji.
8. La Sharoi, Uma sharoi, Madoi chyu gumgoi, Mahkaw myi htoi, Lang bya wa ga chyoi, Mahkaw, mahka, Labya ru sai ni yawng a kaji.
9. La Nkying, hpung dim wa la kying, shapaw myitding hpai dang U tang, Magawng ngatsang, Nbawn labang, Magawng hte labang ru sai ni yawng a kaji. (Shapawng yaw a lahta daw hpe gaw Mashang labau lara rai nna Wahkyet kaw n lawm ai ni ngu tsun ma ai.Shapawng yaw kawn lawu daw de na ni hpe gaw shinggyim labau lara, Wunpawng labau lara Wahkyet kaw lawm sai ni ngu tsun ma ai)
Ndai zawn shapawng yaw a kasha la jahku ma ni kaw nna mayat maya gumja gumhpra wa nna ginru rat, ginsa prat wa ai hte ru sai mying ni law law gawn hkri zawn gawn chyaw, gawn si zawn sumbaw let prat pra prawn lada sa wa sai da .
Ndai la jahku sha ni a ru sai labau ginshi, matut sumri ni hpe kadai mung kadai tinang sagawn shachyaw, mawn sumraw la ga ngu ningmu jahpaw machyan shaw dat ai re law.
Ndai wunpawng labau lara maumwi mausa gaw ji woi ji wa, hpu shawng hpu ba, labau hkai sara , madai joi wa, myi htoi laka , lanyi majai ai ga, tsu wawn shara ni law law jai wa dumsa tsun hkai jahta ai lam ni hpe matsing sumhting ka mazing da ai hpe shawng hpang sumrat sumra, jahtuk shatsawm nna ka da ai lam re ai.
Shut ai gaw n lawm, ai n kawm n hkyawm re ai lam sha nga na re, ra ai kaw bungjat mayawn shabawn lam she jasat ga ngu manoi gum goi, lajin laroi aw law dat nngai rai.
Zai Balen
Discussion
0 comments
Sign in to join the discussion.
Sign in to commentNo comments yet. Be the first to join the discussion.