Maho La Tsai nhting la-dawng hku tsawmra tsan ai kaw dawng jan rai gahkan tsap mat nna, shi yan kau da ai shara de bai nhtang yu let, lagaw na hpyenla shanhpyi gyepdin sumri galaw gang shangang gyit la, shinglang laraw ahkyen ai sumri galaw gyit shangang la, chyahkya si tsit nsam hpyenla palawng shingkyet tawn ai shanhpyi shingkyit galaw gang shangang la, nhting la-dawng dawng nna nhkyeng mat ai hpyenla bawchyawp galaw sharai chyawp la rai, nshang e tsat lang ai nshi shaw lang let, shi shawng nsa sa ai pyi n na kra lanyan hkrat wa ai kaw, manang ni mung shi a hpang e hkan gum dagup nang nna, baw gaw nshaw nshun rai hkan lajen nang let wa jawm yu dat ma yang she, lapu pahkram langai mi gaw dai hpunru lakran lahkyawn kaw ai zeng sha kawan yup rawng taw nga a hka! "Du Bala, rai htara gaw na magyi hta pyi n-ga hkra kaba nga ai le!" Maran Tang shi a hpang e nshang gaw kaw kaw rai hkan magaw nang ai du Bala hpe gayin yu let, ta hte n-gup shingga kau hkra gahte tsun dan u ai.
Shaloi Bala shi a magyi masawp yu dat nhtawm, du shawn rai hkra hpunru lakran de chyan mada dat u yang, teng sha lapu kaba rai nga la nna, sa dik she dik kau hkra hkum malan la let, Maran Tang hpe: "Nhpa mung nang a n-gup kaw du jang gaw grau jan ai zawn hkrai i." Ngu nhtang gahte dat u ai. "Hkau La hkau La, arai dai hpe nang she sharawt kau dat yu u." Du Sabaw Gam Ba lapu mu mada jang nshung si hte rawng nga wa nna, Maho La Tsai hpe shangun let, shi gaw lapu dum pru wa na hkrit rai, sharat pyi n na ai hpang de htingnut mat wa nu ai. "Yi, ngai gaw ateng apang machyit marut re rai n lu yu nngai lu!" Marip Naw mung nhtang hku hka kau de htingnut yan mat wa sai. Jasham Naw Dut bai rai jang, wa she nyin wa hkra chyan yu la nna, lapu pahkram shanhte hpe htim wa jang gayat dat na matu, nhtu hkret rai shaw la nna, latsai hpun kasha langai mi kran daw nhtawm, chyinghtum la langai gan gatawng lang tawn nu ai. Maho La Tsai ga matan let: "Baren sumraw kasha e, lapu pahkram kaba e, anhte gaw kadai mung kadai a hkrun lam a majaw hkrum hkat ai she re, ya nang mahtang anhte hpe shara ndai lana mi sha naw yan ya marit, anhte hpa mung n jahten shaza ya na ga ai.
Lama jahten ya jang sagya wa mu na re! Naw yan mat u law!" Ngu nna nshi nkrung hte lapu pahkram a shingma ang yang me yat yat sha ahkawk jasu dat jang, lapu pahkram mung ga chye madat ai zawn, grai myit su la ai hku, nshung yup shamwi ai kawn na yat yat sha hkum shapyan la rai, maling de gumtsun hkrawn bang mat wa nu ai. "Hkau La! Shan lu sha na ningtawn e, nang gaw shan bai shalai kau yi? Jaugawng gawng yu ai wa zawn mung n rai!"Maran Tang gaw Jasham Naw Dut a ta e lang ai chyinghtum la gare la nna, lapu hkan kabai let tsun u ai. "Hkau nang yaw, ya sha ngai ga matan sai re n chye na ai yi? Anhte sha na naw lu nga yang dusat n mai hkala ai." Maho La Tsai shing nga jang, Maran Tang du hkyeng di tawn nna: "Grai wa law, sharaw pyi mali manga gap sat yu sai nga ai la wa mi nsi, lapu langai hpe sha masin bai machyi si wa sai hku ngu?" "N bung ai shara n bung ai kaw na bungli hpe garan ginhka yu ra ai, nang sawn yu u le, ngai sharaw gade naw gap sat mayu ai, nli she tsai htum hkra gap kau mayu ai re, wa ngai hpe hkum gap sa, mara nhtang de lu wa ai nga jang, ngai mung rap tawn kau sai le. ."
Maho La Tsai shaga let hpunpawt makau e wan wut dat nna, shi a shat bu kaw ntsin ja bang la rai, shadu lu bang wa nu ai. Du Sabaw Gam Ba gaw du Bala hpe Inglik ga hku Maho La Tsai a dinghku labau loi mi tsun dan jang, du Bala ta ganu sharawt let grai nan shagrau nga nu ai. Jasham Naw Dut gaw ga n shaga ai sha, hpunru kaba langai kaw myit mu samsi rai shamyet let, shi a nhtu hpe sinda e htep di ahpum matep tawn rai dung nga nu ai, Marip Naw chyau me gaw gumhpuk hpun npu e shi yup na sumpan yupra noi la magang nga nu ai. Shanhte n-gu gangau hte ntsin shadu lu sha la re hpang, Maho La Tsai manang ni hpe: "Nanhte hpe makau grupyin asan aseng di ga ngu ai lachyum gaw, ndai zawn re manghkang pru wa na tsang ai majaw tsun ai re. Nam hkan nga hkawm yang, makau grupyin hkan grai sadi ra ai, kaning kana re lam hkrum na matu jau kaw nna tau hkrau kau ra ai." Ngu tsun let, shana shanhte nlang lapu pahkram dai hpe makran maja let, myet hprang myet hprang ngu yup shalai kau manu ai.
Maho La Tsai sharawng shara hte matut tsun ai: "Hpang jahpawt manap e, anhte hka wawn hte hka rap na shawng e, ngai shanhte hpe tsun dan ai, ya anhte lung na bum wora gaw mida 1500 jan tsaw na re, ntsin atsawm sha shadu gun ga, bum lung jang na matu kawa kyedawk daw la nna ntsin naw ja gun na re, rawt na shawng e ntsin nau n mai lu shalaw ai ngu nga ninglen, Maran Tang yan Jasham Naw Dut ngai tsun ai ga n madat ai sha, ntsin kyedawk nkam hpai nna ntsin hkruhkru tittit hte lu lang masai ngu jang, lam gaang pyi rai n hkawm yang, ntsin na mat nna lam n lu hkawm mat masai e! Ngai shan hpe saiman htawk ru bai tam gahtam jaw di, shan saiman htawk ru maya sha la re hpang she, ntsin madawn kau ai htawm, hkying hkum mi jan bai hkringsa la rai, gaungwi sha hkawm lung mat wa saga ai, grai na ai zawn nga hkra hkawm kau yang she, shawng shani ngai mu mada ai hkarang yi kaw hkawm du saga ai. Ngai manang ni a lapran hku gala lai mat wa nna, shawng lam kaw wa hkap nga nhtawm, du Bala yan du Sabaw Gam Ba hpe hkra maga hku mare lam tam mat wa shangun, kaga manang la ni hpe gaw pai maga hku tam mat wa shangun ni ai, hkring re hte, du Bala lam langai mu tam sai nga nna marawn tsun dat sai.
Anhte lam dai kaw hkan nna mare tam shang wa saga ai. Lam rai daw ngu yang, nam galup mat nna masha lai yu ai zawn re numsun lam a kumla sha mu sai. Anhte lam dai hku hkan mat wa saga ai, grai hkawm kau ai hpang she, nlung bum mi kaw hkawm du ga ai. Bum ting nlung hkrai pri, anhte grau tsaw kaba ai lunghtawn kaw lung tsap nna grupyin de mada yu ai shaloi, mare langai mu dat saga ai. Mare mu dat nna yawng gabu gara hte mare de shang wa na lam bai tam yu ai shaloi, lam langai sha nga ai, dai lam gaw magyi magaw, gayin gayaw rai, lungpu gata hku mung grai naw gale hkawm ra ai, hpyen ni hpe koi gam ai lam rai na zawn re mi she rai nga ai, anhte tsawmra bai hkawm kau yang she, mare shingnawm kaw du pru wa saga ai." Maho La Tsai shi kaw nna gan hkring mat sai. Shi ngai hpe galaw mada yu let bai matut tsun ai gaw: "Anhte mare shinggan e du ai shaloi, manang ni hpe mare shinggan na nam samum kaw lagyim nga ta shangun nna, ngai hkrai mare de shang wa ni ai. Mare shingnawm kawn nta atsaw langai mu mada ai hte, dai nta de hkre hkre sa wa nna, nta madu ni e ngu tsawmra lang shaga ai htawm, wa-ja la langai pru wa ra ai Ngai shi hpe hpyi shawn ai, ngai hpe ndai gahtawng na du ni a nta de woi sa ni ngu nngai.
Shaloi shi gaw ngai hpe du nta ndaw e sa sa kau da nna bai nhtang mat wa sai. Ngai nta ndaw kawn nta madu ni hpe sa shaga jang, hkahku nhkaw hkaw, hkahku dangpai bu, lawngchyang hpun ai, hkum ngau galu seng, hpaumaw n-gang hpye re, myiman shan maw mai re salang langai pru wa ra ai. Shi ngai hpe mu dat ai hte mau tsap mat nu ai, ngai mung mau mahka mat ni ai. Ngai hpe sa tau ai wa gaw kadai nrai, Lahpai Zau Jun she rai nga hka! Shi gaw ngaitsa wa a kasha sing sing re. Ngaisha ganu hpe gaw Lahpai Nang Kai ngu ai re. Ngai hkau Lahpai Zau Jun ngai hpe mu ai hte, ta lahkawng hte shakram chyit rai, gang ahkye let: Lamu e, ngai hkau La Tsai nang kaning rai ndai hkan dam pru wa ai re ta? Nang hkrai sha kun? Nga nji n-gu san bang wa ra ai." "Agu nang gaw mayu la wa hte hkrum nna grai gabu kau sadawng?" "Gabu dik gaw e, n myit madawm ai le. Ngai shi hpe tsun dan ai, ngai gaw Yindiya Ganan gata kawn lam hkawm nna wa ai re, anhte marai kru rai ga ai, ya manang ni gaw mare shinggan e naw makoi nga ta masai. Ngu jang she, hkau Lahpai Zu Jun gaw, sa sa, na manang ni hpe naw sa woi la saga, ndai hkan Japan garai n nga ai, hpa n tsang ra ai nga tsun let, manang ni hpe sa tau la mat wa saga ai." "Nang shang hkyem ai nta na du gaw nhpa du ni re ta agu?" Ngai ga daw bai hkan daw kau dat ya se ai.
"Du wa hpe Lahpai Hkun Nawng ngu ai re. Ngai hte gaw mayu da-ma daw ai rai nga ai. Lahpai Zau Jun anhkau manang ni hpe sa woi la nna, du Lahpai Hkun Nawng ni a htingnu de wa sai. Manang ni hpe wa sa kau da nna, an gaw mare shinggan de shim lam bai sa yu hkawm ga ai. Shaloi shi tsun ai, anhte ndai kaw Jinghpaw dap hpaw nna Japan gasat hkyem nga ga ai nga jahta let, du nta de bai nhtang wa ai shaloi, wa yaw ten rai nga ai. Nta langai mi a ndaw hku lai wa yang, gumgai langai wa bawm kasha tsawmra mi yaw nga la ai, hpun wa-kang kaw, wa hkum langai joi shi jan jan daram re wa ni wa shat ahprawp nga sha nga ma ai, Lahpai Zau Jun gumgai jan kaw anhte hpe daw jaw na matu wa kasha langai mari u ai. Gumhpraw lap mi sha jaw nna, ngai gaw nau yu matsan dum nna dengga langai bai jat jaw da sai. Dai nta shabrang kasha masum mali nga ai, Lahpai Zau Jun shabrang kasha ni hpe mung saw woi, wa rim la rai du nta de hpai sa wa nhtawm, wa sat nna wa shan naw shadu sha ga ngu, wa madu kasha ni hpe nan gyau kau da rai, an gaw mare numshang shinggan de pru mat wa saga ai." "Agu nang mi sha tsun ai, Lahpai Zau Jun nang hte hkrum ai shaloi Japan n du ai, hpa ntsang ra ai nga sai, hpa majaw nan mare shinggan hkan shim lam bai sa hkan zoi yu ai rai?" Ngai gaw dingla wa nau tsun law wa nna mahkoi malap mali re kun ngu, ga daw hkan daw dat ni ai.
Shaloi shi bai tsun ai gaw: "Japan n du ai ngu tim shara magup Japan ni a bat krai rai mat sai majaw, galoi du na n chye nna maja ai le. Anhkau mare shinggan de sa du saga ai, shi ngai hpe hkau nang yu, ndai hkan majan shara galaw yang mai na zawn rai a ni nga san ai, ngai shi hpe she mai le, ndai mare ting lunghtawn lungma krai pri, hpyen ni shang wa yang hkap gasat shanyawp manu ai shara rai nga ai ngu tsun let, lunghtawn ntsa de mada dat yu we ai, gatkung grai noi sumbyau nga ai. Ngai ndai mare hpe kaning ngu ai re ni ngu san yang, Lahpai Zau Jun shi mung mani sha du ai rai nna rai n san yu ai, n chye ai nga ai." Maho La Tsai tsun yang, dai shana shanhkau du nta de bai nhtang wa nna, dai mare a mying kaning ngu ai, masha gade nga ai, htinggaw gade nga ai san jang, du wa Lahpai Hkun Nawng tsun dan ai, mare dai gaw nung nau law, lung shagu lagat noi ai majaw, Lagat gahtawng ngu ai re nga shachyan dan sai. Gahtawng kaw htinggaw 47 du nna, shabrang gaw mali shi jan nga ai, shi matsat ning a lahta de na mahkawn sumshi jan nga ai, ngu shachyan ya manu ai. Shaloi Lahpai Zau Jun du Lahpai Hkun Nawng hpe shi gaw ndai shara hta hpyendap langai hpaw na matu, shanhpraw hpyendu ni shangun dat nna shawng du sa ai lam tsun dan jang, du wa mung grai madi shadaw ai ga tsun nu ai.
"Du nta kaw, mahkawn shabrang ni shat lajang jahkut tawn nna, shana shat sha na matu dawdap kaw shat hkan tawn ya masai. Anhte shat atsawm n sha ai shi langai ya tup rai sai majaw, shan sangau manam hkrup ai hte hkumbai she gapya wa saga ai Wa shan sau shum ai bat hte si htu simai ni mu ai hte, htingbu wa du ai zawn, si ntsang htim sha bang wa saga ai. Ngai gaw shat hpe galang ta htawm sha yang n mai ai lam dum dat nna, gade sha mayu tim loi sharam nna sha, manang ni hpe mung nau hkum sha shalai ngu tsun na hkyen al, shi jan ya ting simai n mu sha sai majaw, lama hkum htawm sha ngu yang ngai hpe mahtang myit n pyaw na ngu n tsun sai." Maho La Tsai grai sha mayu ai sharam nna naw sha nga yang, shi a manang ni marai manga gaw, shat sha nga ninglen, shat dun e langai hang langai, htawk dang ana gatut ai zawn rai si galau mat wa masai. Nta madu du wa Lahpai Hkun Nawng gaw hkringhtawng du re hta n-ga, hpyendu mung gaw rai tim, ndai zawn re lam garai n mu yu ai majaw, Maho La Tsai hpe sha mada nna, mau gajawng dung mat nu ai. Gahkau Lahpai Zau Jun mung wa gaw shi kawn mari ai rai jang, "Hkau e, yubak she rai sai!" Nga nten she hkraw mat hkra mau dung mat sai. Lahpai Hkun Nawng gajawng kaja hte Maho La Tsai hpe: "Aga! Hkau e, ya shanhte nlang si mat ma sai, kaning di sana re ta? Lahpu bau sa dum dat na nhten?" Ngu san dat sai.
"Shanhte n chye si ai, hpa ntsang ra ai. Ngai Lahpai Hkun Nawng hpe myit shazim ya let, nat ra na ahtawt ndum gan shayu la nna, ngai Ganan gata kawn hkyem gun ai tsi hkyep htu shingyun la, nta madu jan kaw nawhpu wan seng mi hpyi la rai, tsi hte nawhpu gayau la nhtawm, nshi hte shanhte a n-gup hpe langai hte langai mala hpaw nna tsi ru bang ya, du atsawm sha mayut ya rai, marai mi hpe tsi tinghkyawn hkyawn ru jaw dat sai. Tsi jaw dat ai hpang njang, shanhte kan manat nna machyi da gun wa mara ai law! Yu nga ninglen hkrung wa masai ngu jang, hkring nrai yang gaw dung shara kaw nan ahkyi se se, madawn hpre hpre rai masai. Kan mase hkyi ru ru ai ji magu rai, manam shagram awu asin rai jang, manam n hkam ai ni yawng hprawng pru mat wa masai. Ngai hkrai sha shanhte hpe sin nga let, shanhte madawn, mase tawn ai maza mala hpe, htingnat e hpreng tawn ai ntsin nhtung na hka she ma mat kra ru gashin kau ya ngut ai hpang, shanhte hpe labu palawng bai galai kau shangun rai, nta madu jan hpe tawngban ai, kaning n chye di sai, hpawtde mare ramma ni hpe saw la nna hka naw ja shangun na re ngu hpyi shawn jang, nta madu jan atsang arang hte hpa n ra ai, hka gaw bai ja la mai ai, masha hkrung wa jang rai sai nga ai." Maho La Tsai dai ten na manang la ni madawn nhpat, kan mase sharu tawn ai maza manam ai bat shi hpang de bai mawng bun kun ngu na zawn, galang ta n-gup shachyip kau nna gatsi dung mat nu ai. Shaloi ngai mung nsen rim jak na wan shat htum n htum gan yu, daraiba Nhkum Gam yan sara Lama Gam hpe shalang ai ta gyenan hte kremra na wan shat htum n htum la yu ya di ni ai.
Shinggan gan pru la re hpang e bai matut tsun bang wa saga ai. "Hpang jahpawt nhtoi pyi rai nhtoi yang, nta madu jan kasha ni hpe shangun nna mare na ramma ni hpe saw la rai, hka sa ja shangun nu ai. Shanhte hka ja sa ai grai na hkra n wa nna, ngai masin gahpra wa sai, ngai mau let nta madu jan hpe hka ja sa ai ni ya du hkra n wa ai, lam de nhpa manghkang mi byin sa, hkan sa yu ra n hten ngu jang, shi tsun ai, hka lu lam grai tsan ai, ya loi kring du wa na mara ai, hpa ntsang ra ai nga jang she, chyinghka lam de sha mada dat dat rai nna la nga saga ai. Hkying kru pyi rai n du yang she rai mat wa sai ni wa, hkying sanit kaw she pru wa mara ai, hkying hkum mi tup rai masai. Ngai shanhte hpe nde na hkra rai mat ai, hka ja shara grai tsan a ni ngu san jang, shanhte gaw tsan ai, gadawng grai yu ai, hka ja la nna gadawng hku bai lung wa yang, myiman pyi shawng ai ni a lahtin kaw ahtu hkra na daram gadawng ai, grai hkawm yak ai, atsawm nhkawm jang akrung de chyaileng bang mat wa na tsang ra ai, myi n mu ai hte rai, tsam mari she lu ja wa ga ai nga nna tsun dan ma ai. Shaloi she ngai shanhte hpe grai matsan dum kau, mana lama nanang la ni hpe shat nau hkum sha ngu tsun ai rai yang, ndai zawn masha ni hpe shaba ai bungli n pru na." Ngu myit malai lu nga ni ai.
"Nang gaw shanhte lawan n wa jang Japan hte mahkoi gatut kun ngu myit kau sai n rai yi?" "Chyalu sha gaw e, shawng shana de Lahpai Zau Jun she Japan rai n du ai nga tsun tim, hpyen ngu ai gaw galoi mung myit ai ten kaw n du ai, n myit madawm ai ten hta she chye pru wa ai. Myit nga ai ten e pru wa ai gaw hpyen n rai sa, chye hkat masha she re." Mahkawn shabrang ni hpe tsun du ai shaloi, shi a myiman nsam ningja bai gabrim wa sai, shi a myit shingran ni shara dai de bai gan poi du mat wa ang sai. Myit shingran re majaw, kadai wa mi rai tim myit dum jang chye len mat wa chyalu sha rai nga ai Shi bai matut hkai mat wa sai: "Ngai tsun ai, chyeju kaba sai, ya nanhte grai ba sai rai tim, jahpawt shat sha gaw naw shadu jaw dat marit ngu nna, mahkawn shabrang marai manga kru hpe shaga la rai, nta madu jan hpe shat hpareng shadu shangun sai, shat gaw hkying jahku kaw hkut tawn ya masai. Shat sha ten hta, du Bala myi gaw hkrawk hkrawk rai ngai hpe, La Tsai e, daihpawt mung shat law wa n mai sha kun? Nga san ai, ngai pyi matsan grai yu dum kau, hehe. Ngai shi hpe hpa n tsang ra sai, daihpawt gaw myit dik kra sha la ga ngu ni ai." "Shi gaw shawng shana na shingran mu nna pyi n sha gwi mat sadawng?" Ngai ga daw bai daw dat ni ai. Shi hpe ga daw n daw yang, nau tsun galu nna, jahkraw hkun si wa nga nu ai. "Shat sha ngut ai hpang niang rawt mat wa saga ai, nta madu du jan anhte hpe shani shat mung makai shagun ai.
Anhte Lagat gahtawng kawn rai mat wa ai, shana de kying masum hta Hkajang kaw du saga ai, Hkajang hpyendap shinggan kaw du nna, lam sin ni pe anhte a lam ni tsun dan jang, Amerigan shan hpraw hpyenla marai mali hte Jinghpaw hpyenla langai dung ai nhku de woi shang wa ma ai, Jinghpaw hpyenla gaw du kaba Lazum Tang Ji re. Shi galang ta anhte hpe hkap shakram nna: Aga! Nanhte grai ba sai, nanhte Gala ga kaw nna kaning rai du wa myit ta nga san ai, du Sabaw Gam Ba shi hpe anhte wanleng jawn nna mawdaw bai matut jawn, mawdaw lam htum ai kawn, lam hkawm ai, daini du yang shi lahkawng ya tup rai saga ai, ngu tsun dan sai." "Grai gabu sai, nanhte du wa ai grai hkrak sai, ya ten hta anhte Myitkyina de chyingtawk kyinyu yu sa na masha tam ai, kam ging na zawn re n mu tam ai, nanhte du wa na sha la dingda nga ga ai, nanhte gaw laksan shaman yu sai ninghkring ni re, nanhte du wa na re nga ai shiga anhte jau na sai, nanhte hpe grai la kau saga ai, raitim masum ya gaw naw hkringsa la mu, hkum naw sumli la rai shamu shamawt na di mu nga tsun u ai." "Du Lazum Tang Ji nanhte yawng hpe n shachyan yu a ni?"
Maho La Tsai grai gan mani kre la nna bai tsun ai: "Shachyan gaw e, du Sabaw Gam Ba kawn shachyan ya ai re, anhte hpe shachyan ya ngut ai hpang, shanhpraw la ni anhte hpe yu nna ladi magum ai mu jang she, anhte nlang shada da yu hkat yang, kara galu mat, nhka mun mazuk mazak rai galu mat ma sai, shi jan ya hka n shin sai majaw, hkum na kakrui hkri tsu manam, shan chyahkraw bat zawn mung nga, palawng ntsa hkan jum si she noi mat sa hka. Shi jan ya ting hka n shin jang gaw, myit dat tim ninghpu ninghpaw bat, na gyi bat, gyapdin tsu yat bat gaw manam chyalu sha rai sai. Ginhtawng rai nna pyi hkam sai ga re." Nhka mun galu ai lam tsun jang, sara Lama Gam gaw shi a sha galawp kawn tu mayawn mat wa ai nhka mun kindu gan masawp yu nna mani kre dat u ai. Anhte nlang jawm mani kre la ai hpang she, ninghkring wa bai matut tsun ai gaw ning da: "Dai hpang e, shan hpraw hpyenla langai anhte hpe hka garai hkum shin kau, n hka mun mung hkum ahkut, kara mung n rep shangun ai, nhtang de adap hte di hkama hpe hka hte gayau anya la nna myiman de kakrui achya shakap sharin ma ai.
Masum ya tup anhte gaw di hkama gumnya hte kaning di yang she hkum kaw kakrui shi krai kap wa ai kumla krai galaw sharin saga ai Masum ya a hpang shani, Maran Tang, Marip Naw, Jasham Naw Dut anhte mali hpe labu palawng ningsa mala la agang ai galai hpun shangun, shingnat nhpye shingman pyi adum mat sai hpye shangun ma ai, ngai a nhpye kaw ka-ni tawng masum bang ya, manang ni a nhpye kaw gaw tawng lahkawng kawng bang ya ma ai, ka-ni tauba mung bang shagun ma ai. Anhte myiman aka la chye ai hpang, lamyin hkan ka-ni amya shakap chya la, n-gup hkan mung ka-ni bat manam na matu kani arut shangun ma ai. Dai hpang du Lazum Tang Ji anhte hpe Japan hpyendap gata de hpyen shiga hkan sawk na matu, ngai hpe gaw ningbaw tai nna manang ni hpe woi sa na matu amying jahkrat nu ai. Anhte mali gaw ka-ni n chye lu ai ni hkrai re majaw, ka-ni chya dat nna, nten hpawm machyi, bum mat ma sai. Yu dat tim anhte a hkum hkrang hta hpyenla sama gachyi mi pyi n kap hkra mye la nna, Myitkyina nbungli dabang kaw sin ai Japan hpyen ni a gap mani de sa wa saga ai." Maho La Tsai Japan ni hpe loi yu angaw dum ai myiman nsam hte tsun ai: "Tsan tsan kawn Japan hpyendap chyinghka lam e, wa na abyap taw ai zawn re sumpan noi galam tawn ai bawchyawp chyawp ai Japan hpyenla langai, sanat hpe gahpa e hpai tawn nna zanzari tsap ai mu dat saga ai.
Ngai gaw manang ni hpe ga hkum shaga, hpa ga mung hkum ga, shanhte nhpa san tim chye madat ai zawn hkum di, majoi mau dawng hka nga mu, ga htan na lam ngai lit la na ngu sai. Anhte Japan hpyendap kaw du tim hpa chye ai masha zawn n rai ai sha, ding ding sa wa jang, zanzari tsap ai wa anhte hpe gahpa na sanat shayu madi tawn, nhpa galaw hkawm ai re nga hkap san ai. Shaloi anhte n chye na masu su ga ai, anhte gaw Japan ga mung loi li sharin yu sai re, raitim n chye na masu nna, bai san bai san rai jang Jinghpaw ga hku bungli tam galaw sa ai rai ga ai ngu sai, shi mung jinghpaw ga n chye madat rai, Jinghpaw ga gabyan langai tam wa nhtawm, anhte hpe nhpa masha re, hpa majaw hpyendap de sa wa ai re ngu san shangun u ai." Shi grai mani kre la nu ai. Shi mani ai lam gaw shanhte ka-ni ya jet jet zawn mawn kau jang, Japan ni a myi lu magap kau ya ai hpe dum nna mani kre ai rai nga nu ai. Maho La Tsai mani la nna bai matut tsun ai: "Japan hpyendap de bungli sa mai tam galaw ai nga nna, anhte gaw nta masha hpe bau ra ai majaw, ndai de bungli tam galaw sa wa ai rai ga ai, anhte hpe bungli madun na grai la dingda nga ga ai. Ngu jang she, Japan hpyenla wa grai gabu nna, shaloi gaw mai sa, anhte pyi kuli n lu tam nna grai yak nga ga ai nga, gabyan wa hpe anhte hpe nhku de woi shang wa shangun nu ai.
Gabyan wa anhte hpe Japan du kaga wa kaw bai wa gyau da sai, Japan hpyendu dai wa gaw gadun dawk kaba bawk rai, ladi gata e nhka mun loi mi mawk di zen gawan madat tawn, hpyen hking htep re nshang shingkyit kaw sanat gadun langai sanat kawp hte htep di noi goilang tawn, Japan majan hpareng nhtu hpe shanhpyi n-gang e bang nna pai maga nshang kaw noi lang ai, n-gang matu pyi labawp yang du ai nhtu nhku kaw manat tawn nna, anhte hpe myi she n la hkra hkap yu gayin kau ai hpang she, nanhte gara gahtawng na rai? Hpa majaw ndai de chye sa wa ai rai? Nga san pru wa ra ai. Shaloi ngai gaw nanhte hkawhkam hpyen ni du sai, masha sat wa ai nga nna tsun shapaw ai majaw, maling de hprawng bang mat wa ai ngu jang, shat pyi hpa n sha mat saga ai, ya she nanhte gaw anhte mung masha ni hpe matsan grai dum ai hpyen ni re chye nna, nante kaw mu sa galaw yang gumhpraw lu ai nga rai sa wa ai rai ga ai, anhte gaw gumhpraw sha lu tam na rai jang hpa mu mung chye galaw ga ai ngu sai, shi gabyan wa hpe ngam da nna, shinggan de tawm rai sai, hkring rai jang bai nhtang wa ai shaloi, anhte mali hpe nhtu mali hpra wa gam ya let tsun ai, nanhte hpun shadaw sa kran wa marit nga bungli gyau nu ai."
Maho La Tsai ta lahpan arut let, hkalap shinggan de loi mada la ai hpang bai jahta bang wa sai: "Nbungli dabang kawn maling de sa wa yang, lam lapran hkying hkum chpyen mi hkawm ra ai, anhte hpun shadaw sa kran la nna, hpyendap makau e aga gatsing grau tsaw nna bum tawn ai de, hpun shadaw hpe ndi nda di hpai kagat hkrat wa saga ai, shanhte hkan marawn magang anhte ga bum de kagat magang, hpa majaw ga bum de hpai sa ai re nga san ai shaloi, anhte gaw ga bum de htingra htu tawn ai n re ni, nta galaw na shara n re ni ngu nhtang san masu ga ai. Ngai gaw chye sai, shanhte ga shingbut grai bum tawn ai shara de gaw laknak kaba tawn ai shara re, dai kaw nna Japan hpyenla ni grai zup ai shara de bai hpai dangla hkrat wa jang, hpyenla ni hkan shachyut nang nna n shang shangun ma ai, raitim anhte ga n chye madat masu su nna shara magup hpai ajawt hkawm let, Japan hpyenla ni gara kaw laknak kaba tawn ai, masha gara kaw mahta nna tawn ai ni mahkra chye la jang she, shanhte hpun ngau tawn shangun ai de bai hpai wa saga ai. Dai hpang anhte hpe shat jaw sha ma ai, shani shat sha ngut ai hpang, wura kawa bai sa kran shangun ma ai, wura kawa hpe pawt kawn ndung hkren mali kau nna pai wa nga matsun ma ai, anhte kawa sa kran la nna shanhte madun ai shara hta wa hpai tawn ya ai hpang, jan mung du wa sai, shaloi shani anhte hpe hkap tau la ai Japan pyendu wa gaw anhte hpe nta wa na kun, mahtang ndai kaw yup mat na kun nga san jang, anhte gaw mu tam galaw sa ai she re, lama yup shara nga jang gaw ndai kaw yup nna hpawtni bai galaw na ga ai ngu tsun jang, yup na hku hkraw ya masai."
Maho La Tsai tsun ai, dai shaloi njang shanhte mali hpe nchyang ginsum de sa sa bang kau manu ai. Kuli sa ai ni yawng Jinghpaw hkrai rai nga ma ai, shi gaw manang la ni hpe myi gamun nna magawn mara ga hkum shaga, masha ni hte shachyan shaga lam hkum galaw, ga tat jang jamjau hkrum ai gaw hpa n re, anhte a shim lam tsun gapaw shamawng kau dat jang yaw shada ai magam bungli n lu shakre na ngu nu ai. Shana shanhte mali gaw shinggan maga de shanang nna makran maja let yup ma ai. Hpang jahpawt shanhte nlang hpe htingra shawt shangun nna ginsum galaw na hku tsun ma ai. Nam grai grai galu ai hpe shawt gyit la nna hpyendap ndaw de wa hpai sa shangun ma ai, Japan hpyenla ni la mali hpe nachye sa htawm hpai wa shangun nna, nachye gam ya, nam shawt gyit la nhtawm, hpyendu ni nga ai de wa hpai tawn shangun ma ai, ga htu shara ngut jang, Japan hpyenla ni dawng hte htingra shadawn la nna mailak jung tawn nhtawm, shadaw nhkun bai htu krawk shangun manu ai, shana de du yang nta hkrang galaw shadun tawn, share lapa ni pa tawn ngut manu ai, shangu galup na matu shangu n lu ai ngu jang, shangu htat sa ai ni garai n wa ai, nanhte naw hkringsa la mu ngu hkring nga shangun manu ai.
Dai hpang Japan hpyendu wa Jinghpaw la masum mali hpe shaga la nna, shanhte a gap mani de nga chyu hte jumdui wa gayau tsing la shangun nhtawm mu galaw ai ni hpe sa hpai jaw manu ai, shanhte nga chyu naw lu nga yang, shangu htaw ai nga law du wa ra ai, dai ten jan du wa sai majaw, shanhte gaw Japan la ni hpe ten n rau sai, shangu gaw hpawtni bai sa galup na, nta de na ni n-gu simai mari wa na la nga ma ai, anhte hpe lahkawng ya na shabrai naw jaw ngu tsun jang, Japan gumhpraw lap masum sum htuk jaw manu ai. Maho La Tsai tsun yang, dai hpang shani gaw shanhte Bang mudi nbungli gut kaw nna Mayan de sa wa masai, dai re Myitkyina kaw mung Japan hpyen ni gaup kau sai majaw, Mayan de sa na matu lam grai gawai ai, shanhte Mayan kawn Japan hpyen ni gashun zing la kau sai Myitkyina de bai sa wa masai, dai shaloi mung shanhte hpe nhpa rai hkawm ai re nga nna agying san jep manu ai, shanhte Jinghpaw ga hku Japan ni du sai nga ai hkrit nna, nam samum de hprawng makoi mat ai re, maling rawng ai ten nau na sai majaw, shat hpa n sha nna bungli tam galaw sa ai rai ga ai ngu tsun ai hpe, shanhte mung n chye madat nna, gabyan bai tam la hkra san jep ngut ai hpang she, daini jan du mat sai, bungli mung hpa galaw na n nga sai nga, shanhte mung myit mu sam si hte hpawtni galaw tim mai ai, galoi galaw tim mai ai, bungli sha nga jang gaw anhte galaw ya na ngu manu ai.
Dai hpang shani shanhte hpe gaduk htu shangun manu ai. Lahkawng ya htu ai hpang, Maho La Tsai ni gaw shabrai naw jaw, nta de shat hpa n sha sai ngu, gumhpraw masu la nna rai mat wa manu ai. Shanhte rai mat wa ai hpang shani, Gatta de bai sa wa masai. Gatta kaw lahkawng ya bungli sa galaw la nna, Mugawng de lung wa masai, Mugawng kaw bungli bai sa hpyi galaw masai, mu galaw hkawm masu let Japan ni a hpyen tawn masa mahkra yu la ngut ai hpang, jahku ya ngu na shani she Mugawng kawn na Hkachyang de du wa ai, du kaba Lazum Tang Ji hpe shanhte lu sawk la ai hpyen tawn masa ni wa tsun dan manu ai. Maho La Tsai da nga yang: "Du kaba Lazum Tang Ji grai gabu nu ai, shing rai shi gaw hpawngchyawm garum hpyen hpung ni hpe shiga jaw ra ai, ya nanhte Manmaw de naw du ra ai, Manmaw du na matu lam maw n mai hkawm ai nga nna tsun u ai." "Agu, nanhte Japan hpyendap gata de shang ai shaloi, Japan hpyendu ni a mying nsan yu ai kun?" "N san ai, gara kaw mung n san ai, lama san jang anhte chyinghtawk re chye kau jang mu n ngut na chyalu sha re, san ma n mai san ai, san jang gaw Japan hpyenla ni ntsen wa na sha rai nga ai. Anhte gaw Japan hpyenla marai gade nga ai, laknak gade daram lu ai lam sha sawk la hkawm ga ai." "Dai ten hta nanhte mu sawk la ai Japan hpyen hte laknak gade dang rai sa rang?" "Myitkyina kaw gaw myawk kaba 58 du ai, jak sanat gaw masum tsa jan du ai, hpyenla gaw mun lahkawng jan dang nga ma ai."
Maho La Tsai bai tsun ai: "Du kaba Lazum Tang Ji gaw ya nanhte Manmaw kaw nga ai Japan ni a lam lagu san jep la ya na matu du sa ra ai, raitim mawdaw lam n mai hkawm ai, lam tup Japan gaman re, nanhte hpe lama rim la nna sat kau hkrum yang, anhte a matu sum kaba re, nanhte, grau nna Maho La Tsai nang ningbaw re n mai si ai, ya ten hta nanhte zawn re chyinghtawk grai ra gadawn nga ai, nanhte Mali Nmai hka rap nna, Na-hpaw kaw du na. Na-hpaw kawn she Manmaw de yu na nga matsun let, gahtawng shagu anhte hpe hkap garum tau la na matu laika pa mi ka dat ya u ai, anhte shi ka ai laika pa sha la gun rai rawt mat wa saga ai, gahtawng mi kaw du yang laika dai shaw dan jang, gahtawng na ni hkap garum tau la nna bai hkan sa sa rai, Na-hpaw kaw atsawm sha du lu saga ai." Na-hpaw gaw ya daini na Sama Laisin rai nga ai. 1988 ning shanglawt majan kaba byin nna wa shingbyi ai ten kawn, Laisin ngu kau ai re, Na-hpaw ngu ai pyi kadai ndum shai mat sadawng. Maho La Tsai ta hte lang rai nna bai tsun ai gaw: "Na-hpaw kaw gaw ngai hpyen garai n shang ai shaloi, Jansi ga naw nga ai ten hta Shadan krung hku nna sa yu sai.
Anhte Na-hpaw du ni a nta wa manam ga ai, ngai Na-hpaw du wa hpe tsun ai, ndai daw kawn nna Manmaw yu na lam ngai chye sai, nanhte n hkan sa ra sai ngu jang, Na-hpaw du wa matsun ai, shaloi rai jang nanhte Sama kawn shing nrai Shadan krung hku nna Nhkum krung Maru chyinghtawng hku lai, Alaw bum lung, Alaw bum kawn yu mat wa ai, Numlang, Kunglaw, Myu tsit du jang she Manmaw bai du na rai nga myit dai, nanhte hpe nan nan n hkan sa ra sai hku re ni? Nga nna tsun u ai. Shara dai hkan gaw ngai du yu sai hkrai rai nna, shi hpe hpa n tsang ra ai, ngai lai yu sai shara hkrai re ngu tsun kau da nna rai mat wa saga ai." Du wa Lazum Tang Ji ka shagun ai laika mung Na-hpaw du wa hpe jaw kau da, Na-hpaw du nta ni u sat nna pun yaw tawk simai galaw jaw ai shaloi, u baw shamawn yu yu yang lam hkrang na masa n sa al majaw, Na-hpaw du wa ningwot langai hpe shaman kungdawn ga hte hkan sa kau dat shangun hkyem nu ai. "Shat sha ngut ai hpang jang hkawm na ten hta, Na-hpaw du wa nta masha ni hpe shani shat mung makai shagun shangun ai, anhte gaw kadai mung kadai a matu shat makai gahtet sha la gun rai, Shadan krung hku rai mat wa saga ai, Shadan krung gaw Miwa mung rai nga ai, dai lam gaw ngai hpyen rai n shang yang sagu mun hpaga ga nna grai lai yu sai, Shadan krung ga gaw gahtawng hte gahtawng grai tsan hkat ai re, sagu mun joi mi gumhpraw lap chpyen mi lu myat ai, mari ai shaloi gaw lap masum sum jaw nna, dut jang gaw lap masum chpyen chpyen dut la lu ai." "Agu rang sagu mun dai ni gara kaw sa mari la ai re?" "Sagu mun gaw le Kunglaw gat de sa mari la nna, Numlang hku,
Numlang kaw nna Zaiung hku, Banma, Naw-gu, Numlang Kunglaw hku hti hti htang htang rai mari dut hkawm ai re. Shadan krung de wa dut yang gumhpraw grau myat ai, shanhte gaw lam tsan nna gade mung nau n lu sa sam ma ai. Anhte Shadan krung kawn numtawk lam hkrai hkawm rai Maru Lu-jam kaw du yang jan du mat sai. Maru kaw gaw Maho ni grai law ma ai, ngai paga ga hkawm ai shaloi ayan lai manam ai majaw, ngai hpe chye ai masha hkrai re. Maru hkan na ni ngai hpe shabrang kasha zawn sha arai nga ai nga hkap hpu ma ai. Shaloi ngai gaw shan praw nna shabrang ai mu ai rai na re, ngu we ai. Hehe." Shi tsun ai hte maren, shi gaw shan hpraw, hkumngau bai gaji sek rai, sak gaji kaba shi a hkum hta n dan dawng lu ai hku rai nga nu ai. Ya shi hpe yu tim, shawng kaw tsun lai wa yu sai hte maren, latsa jan ning du sai nga tim, matsat jahku shi daram re kumla sha mu nga ai. "Maru Lu-jam kawn Maru chyinghtawng du, Maru chyinghtawng kawn Alaw bum lai nna, Zaiung kaw du hkrat wa saga ai, Zaiung kaw mayu Lahpai ni nga ma ai, nyi ba hpe gaw Nhkum Kaw ngu ai re, shi gaw Share du kasha re. Shawng de Share du ni hte Sharaw du ni majan byin ma ai, Zaiung na Lahpai du ni majan regau sa ai grai law sai, ngaitsa wa Lahpai Gam Maw mung wa gasat lawm yu sai. Nhkum Kaw gaw du kaba Nhkum Naw a gana shawng nan re, Nhkum Naw gaw 1950 ning hta Myen hpyen shang ai re, dai ten hta ngai Tachilik hkan Miwa hpraw hpyen ni hpe gasat hkawm ai ten rai nga ai. Dai mung labau gadun mi she tai mat sai." "Agu, nanhte Zaiung kaw du ai shaloi gade nta sa manam ai rai?" "Anhte du nta kaw sa manam ga ai.
Gahtawng du wa gaw ngai tsa wa nan re." "Ningtsa wa gaw nhpa kasha nhpa mying re ta?" "Ngaitsa wa hpe gaw Chewui Gam ngu ai re, shi gaw nye gatsa sing sing re, nu yan wa jawm hprawng mat wa ai ten hta shi gaw Numlang ga kaw naw nga ai, hpang e she Zaiung ga mare du sa galaw shangun ai re. Shi tsun ai, ndai hkan Japan ni lunglung yuyu rai grai hkawm ma ai, lama nanhte hpe mu rim la jang, adup ajin di zingri san jep shatsang na rai nga ma ai. Nanhte simai sun de she naw sa makoi rawng nga mu, nga nna tsun u ai." Shi arawng mi alu nga bai tsun hkai dan ai gaw: "Hpa ntsang ra ai, anhte hpawtde jau jau Kunglaw de rai mat wa na ga ai. Anhte Gauri kaw naw du na. (Gauri gahtawng grai kaba ai, sara Lama nang du yu sai kun? ) Ngai gaw lamu ga sumla hte shiga shalai jak ni hpe ngaitsa wa hpe ap ya kau nna, atsawm sha naw makoi da ya, atsawm sha makoi lu, nam de she sa makoi tawn u, nta hkan n mai makoi ai, anhte bai nhtang wa jang wa la na ga ai ngu matsun ni ai." "Shaloi nanhte hkum gaman bai rai mat wa sai ngu?" "Anhte gaw Manjang kaw Japan hpyendap hkan chyinghtawk mu galaw hkawm ai shaloi bu hpun ai buhpun palawng ni sha naw bu hpun lang ai, shing rai lam hkan kadai hte hkrum tim anhte hpe hpyenla n shadu ma ai. Anhte gaw Kunglaw de na Japan hpyen ni nga ai shara de galang ta du hkrat wa na sawn ai re, Kunglaw du na shawng lam kaw hka mahkrai langai mi nga ai, mahkrai baw kaw Japan hpyenla marai masum zanzari zawng nga mala ai.
Anhte gaw nhtang ngu yang masha ni grau n tsen kau na tsang rai, ra mi abraw lai ga ngu lai wa jang, hkap rim la nna hpyendap de mahtang woi shang mat wa masai, gabyan langai anhte hpe ndai hkan nhpa rai hkawm ai re ni nga nna san shangun ma ai, anhte mung nhtang de shanhte hpe mahtang hpa majaw anhte hpe matu n mu ai rim la ai re ni ngu san saga ai. Shaloi she gahpa kaw shagan lahkawng kap ai Japan hpyendu wa pawt pawt rai tsun ai, nanhte hpe rim la ai lachyum gaw kuli galaw shangun na matu she re, nanhte hpe hpa ndi ai nga jang she, anhte gabu let mau mat saga ai." "Nanhte hpe kuli nan bai galaw shangun sa?" Ngai chye mayu dik le. "Aga! Anhte gaw mau mat sai le, ya hpyen shiga sawk hkawm ai la ni hpe wa, kuli shatai kau na re nga jang, myit law si wa saga ai le. Anhte hpe chyu pala shagun nna, mi anhte sa wa ai hpang lam de bai woi nhtang mat wa masai. Shadan krung kaw shang wa ai shaloi, Jinghpaw ni hte majan wa byin ma ai, anhte gaw hpyen wa a hpaihka gata e mu galaw ai re majaw, hprawng na ngu gade lang nyan yu tim, gara hku mung n mai shamu nna, chyu pala sha hkan gun ya tik tik." "Agu, Shadan krung kaw Japan ni hpe hkap gap ai gaw kadai re n chye?" "N chye ai. Hka n mai san ai gaw, ga san jang, masha ni anhte hpe hpyenla re chye kau na tsang nna, nsa kaba pyi n shaw gwi ai daram she sadi kau saga ai." "Agu, Shadan krung kaw Japan hkap gasat ai gaw Sau Hpaga Tang ngu ai wa re da le." "Kadai re n chye sai. Sau Hpaga Tang hpe chyau me gaw shi hpaga ga ai masha rai nna chye ai." Shi shing nga jang ngai grau kam mat ni ai.
Hpa majaw nga yang, Sau Hpaga Tang Shadan krung kaw shang ai Japan ni hpe hkap gasat ai, shi lu ai gumhpraw hte laknak mung myawk du hkra mari la nna hkap gap ai re, myawk n chye shading nna, galang gaw grai tsan ai de gap shalai kau dat, galang gaw ni ai shara de gap ndeng kau dat rai, maling hkan makoi rawng ai Japan hpyenla ni hpe chyahkring sha n lu tsan kau ai lam, Yinkyang ginwang labau matsing buk kaw ka bang da ai labau maumwi mu hti yu nngai. "Ganam nang gaw she ngu nga ai, Japan ni kaw kuli shang ai shata masum tup rai jang, anhte a bu hpun palawng mahkra je amyang mat sai, hkum pyi n lu magap mat sai le, Japan ni gaw anhte hpe yam sha na sha myit, bu hpun mung n htuk ya ma ai. Mi kaw nna bu hpun ai mung ningsa hkrai rai nga ai kaw, ten na mat, gahti galai gaw n lu, shani shana lawng tete, bu tete jang, gaya gahpa rai je mat wa nna, anhte mali kaning ndi, jumdui bang ai buri hpe gaw palawng shatai, n-gu bang ai buri hpe gaw labu shatai na matu hta gashin la nna, pali shit mali la nhtawm, buri hpe nhtu hte gadoi rep la rai labu palawng chyui bu hpun saga ai." "Anhte buri bu hpun galaw hpun ai gade nna yang, hkum ting maru ru wa saga ai. Buri masa nna gaya ai lam mi, maru gaya ai lam mi, nchyi nmu ngu nga yak si nga tim, Japan ni a hpaihka gata mu n mai yet ai galaw ra nga ai. Hke! Gade ya n rai yang, hkum ting maru gaya ahprun, hkum machyit mat, shawng e machyit ai kaw ntsin gatsing abyi, hpang byin wa ai machyit ni gaya hkrai gaya, mahkyit jahpye kau ai kaw matsui htu rai, si na daram hkam sha yak ai sharang nna Japan ni a chyu pala hpai ya kyin ga ai." Maho La Tsai gahpa npu hkan, magyi hkan, ta laseng hkan, ya nan nan gaya nga ai zawn di mahkrit shalai dan ai hte rai tsun ai shaloi, anhte masum grai hkan mani kre kau saga ai. Myit dat yu tim, buri hte pali sha shit mali la nna bu hpun chyui hpun ai pyi mani mayu nga yang, shi a shamu shamawt ai lai hpe bai yu dat jang, grau mani mayu si wa nna, shada da yu hkat let mani sharang kau saga ai.
Shi mung lahta wuman wa mali hkrat mat ai majaw wuhka mat ai wuji she kra hkra mani am dat nna, myi e matep pru wa ai myiprui si hpe, ta lahpan pawt hte gatsut kau nna bai tsun shali dan ai gaw: "Shadan ga na ni gaw hkarang yi sha hkyen sha ma hka, lahpawt mi anhte mam chyarang kaw bum tawn ai yihku bum kaw maru mahkyit let jan lam nga ga ai, galoi mung gasup ntsawm ai Maran Tang gaw ngai yihku ntsa e galeng ai mu nga ninglen, yihku kaw wan lagu nat shakap dat nna, yihku hkru si wa sai. Dai shaloi yihku gata hkan sha hkru la nna yup pyaw nga ai yu ni hpe zawzang dat nna, yu ni yihku ntsa de prawng goitsat jinghkyen pru wa gajang sai, yu du kaba langai gaw ngai a man hku nak nak rai prawng pru wa ai kaw, nye pai ta hte hkap magra rim tawn se ai. Ngai myit ai, yu du ndai nau hpum sau sai, ndai lapran Japan ni shan sau n lawm ai shat hkrai woi sha ma ai, shan sau grai kut sai, naw sat malu ju sha nna, shan sha mayu ai marit naw shamai na re ngu, yu dai hpe yihku hte galaw gamyet tawn, manat sat la nhtawm, si jang yu dai hpe n-gup kawn hpyi yen kau dat sai, yu nau hpum nna yu sau gaw nye ta ting kap mat sai, yu sau kap ai ta lakran hkan na maru tui ai hkan sai ntsin pya pya rai wa ai hpe pyi n dang gawn ai, shan sha mayu ai she madung sai majaw, hpun lakung ni hta ju dinghkrum tawn nna wan galaw wut shagreng la rai, yu shan dai hpe atsawm sha ju gakang sha kau saga ai, yu hpyi hpe gaw hpun lakying mi hta sa jen tawn se ai." "Agu le, yu shan gaw mu a ni?" Sara Lama Gam gan san dat nu ai. Nhkum Gam mung yu shan tsun jang loi matsat sam ai, nten shamawt nna dung nga nu ai.
"Ganam nang she ngu le, yu shan mu ai gaw hpang lam, grau ahkyak ai mu mi she pru sai 1o, hpang jahpawt, ngai a ta hkan na maru n gaya mat, shawng shani sha saisam pru ai maru ni mung mahkra hkun hkraw mat sai. Shaloi ngai nau gabu gajawng nna, chyarang de bai kagat sa wa nhtawm, shawng shani hpun lakung kaw jen da ai yu hpyi sa shayu la, manang la ni yawng hpe shaga la rai, yu sau a akyu hpe shawng shachyan dan ai hpang she, shada da hkum ting yu hpyi na sau jawm chya hkat saga ai." "Aga, shaloi yu sau mung maru tsi kaba she rai nga hka i." Darai ba Nhkum Gam grai na shagrau nna tsun lasha dat nu ai. "Dai shani kawn anhte a maru mahkra mai tsai mat sai, n myit mada ai sha, Maran Tang gasup ntsawm ai ngu tim, shi wan nat dat nna yu ni hpe n nat shapraw dat, ngai shan n marit yang, anhte a maru ana gaw gade daram na hkra naw ru taw nga, nhpa pyi yat di mat hkra ru ahpun gaya taw nga na re ndang chye ai. Ngai gaw dai shani kaw nna yu sau gaw maru tsi yang, hkra ai hte mai lu ai re hpe, ngai hte sha hkrum yu ai ni hpe tsun dan dan di ni ai, tsi kaba rai nga ai le, sagya wa yu hpe hpan da ai, yu hpe shinggyim masha ni grai nju ai, raitim, sha chye lang jang akyu grai kaba ai she rai nga hka.* "Agu, ya ngai nta ga du wa jang, maru gatut sha ai masha ni hpe naw wa tsun dan na, maru n ru tim, lama ru wa yang na matu naw hkaw shabra dat na re.
Laika ndai pru wa jang, laika hti hkrup ai masha ni ma hkra chye la na masai gaw i." Ngai gaw shawng de Mangshi ga nnan du, asuya bungli nnan wa galaw ai ten hta, rung masha ni galoi mung galoi Fahpa shait de hpunlum hka sa woi shin shin re kaw, hka sa hkan shin nang ai ngu jang, maru gatut nna, hkum ting maru ru mat, shani tup tup maru mahkyit she n rau, ngai chyu sha byin ai n rai, shait sa sai manang ni yawng ngu na wa maru gatut sha ga ai, dai shaloi na maru hpe, nnan e gaw hpayawng jat sha chya shangun, hpayawng jat chya tim n mai hkraw jang, rung na tsi sara ma gaw gaya zim tsi htu ya, gaya zim tsi jaw re sha chye, maru tsi na hpaji ladat n chye nu ai. Anhte tsirung kaba de sa jang, tsi sara wun ni gaw akan hpe wantsi hte anya gayau ai tsi pa la ya nna, labu palawng ningsa man mi galai bu hpun nna, shani shana tsi dai sha chya, hka hkum shin, bu hpun hkum galai, laban bat mi tup rai jang she, bu hpun raw kabai kau nna hka shin kau nga matsun dat ai, gaja wa dai hku galaw sai, hkum pyi wantsi tingsan zawn nga hkra manam mat ai bu hpun galai kabai kau nna, hka shin kau ai hpang, maru gaw mai mat sai, raitim wantsi bat gaw shaning lam manam ai zawn sha anga nga ai. Shaloi lama yu sau hte maru tsi mai ai re chye yang, dai daram n jamjau ai sha tsi kau lu na chyalu sha rai nga ai. Hpa majaw nga yang, Mangshi ga hkan yu grai sawng ai, rim la mung grai loi na hku re. Maho La Tsai n-gun mi alu in nga bai tsun bang wa nu ai: "Shata masum du mat wa ai hpang she, Japan ni anhte hpe Nhkum krung Share laugawn hku nna Janda pa de woi mat wa masai. Janda hka rap mat wa na hkyem ai re, Gawmyin tang hpyen ni e hkap gasat amya dat nna, hka hku mayan de woi lagyim lung wa masai, masum ya masum na gasat hkat yang mung, Japan ni hka n lu rap lai mat wa masai.
Masum ya ngu na shana ngai gaw manang la ni hpe lagyim prawng na hkyem saga, shana na hkying jahku hta shamu shamawt na hku re ngu saw tawn sai. Shana ningsin sin wa ai hte, anhte gaw u zui u tsa zawn langai hpang langai rai mayun mat wa saga ai. Janda pa gaw grai dam ai she re hka." "Ngai gaw Janda pa masha rai sai." Ngai shi hpe gan shachyan dan la ni ai. "Gara gahtawng na rai?" Shi san ai. "Nambang ga na rai nngai." "Wumya gahtawng mung grai kaba ai she re hka. Nanhte hte ni ai kun?" "Wumya mare gaw Janda pa a dingdung maga de re, ngai gaw Nhkum krung hte Htaihpyin lapran na Nambang buga Muwa hka gahtawng na re." Shi shara dai ni chye ai nga nna, ngai bai gan shachyan dan ai re. "Anhte mali prawng mat wa saga ai. Shana tup ningsin krug e prawng she prawng nna, maling shang na matu Janda pa htumpa de hprawng mat wa yang, Japan hpyen garum hpung mi hte tut le. Shanhte gaw anhte hpe kuli rim la ai hpung ni hpe garum lung wa ai ni rai ma hka, anhte hka kau na maio maling de htim makoi bang mat wa saga ai, Jasham Naw Dut gaw hpang loi hkrat mat nna, galang ta aga de shagum hku up rai taw mat jang, Japan hpyenla ni shi a shingma hku gabye lai mat wa ya ai. Japan ni anhte hpe n mu ma ai re, anhte pyi shanhte hpe mu ai wa, grai mana kau shadu saga ai. Haha, dai re, lama shanhte e she mu kau yang, sat kau hkrum na re pyi n chye.* "Hahaha, ningsin gata kaw rai nna nanhte hpe n mu kau ai sha rai nga ma ai. Dai lang nanhte hpe hpai shangun ai laknak gaw nhpa hpa rai?" "Sanat hte chyu pala ni re. Ngai gaw Inglik ga, Gala ga, Japan ga ni chye ai, raitim n shaga ai, shanhte nhpa tsun ai sha madat la la rai nngai. Jinghpaw ga sha ga nna, anhte a chyinghtawk masha hkrang hpe makoi magap tik tik di ra ga ai." "Agu, Japan majan ten hta nang zawn rai chyinghtawk galaw ai masha gaw nanhte hpung kawn kaga n nga sai kun?" Teng sha tsun ga nga yang, Jinghpaw la ni gaw chyinghtawk mu kaw badang grai awng ai lam ka tawn ai yu nna san ai re.
"Dai ten hta Japan hpyendap de shi sawk hkawm ai masha marai manga shi jan du ai rai yang, Japan majan ngut kre ai shaloi dan dawng mat ai gaw marai masum sha re, marai mali shi sanit hpe kadai mung n chye ma ai. Anhte dai shana jang hprawng lawt mat wa nna, hpang shani gaw Zaiung kaw ngaitsa wa a nta e bai du pru wa saga ai. Ngaitsa wa anhte hpe mu ai hte, anhte a hkum na buri hte chyui ai bu hpun ni hpe hkap mu nna, gajawng kaja rai hkap yu mau mat nu ai." Maho La Tsai tsun ai gaw, gatsa wa shanhte hpe hkap mu ai hte gahtet gamawt hku san ai: "Aga! La Tsai rang, ya nanhte gaw mawhpyi zawn san mat ai, shata gade pyi n rai yang me, buri bu hpun she lang mat ai gaw, kaning re tsinyam wa hkrum wa masa ta? Japan ni a lata gatsing gatut sha ai re ni?" Ngu hkap san manu ai. Dai shaloi shi gaw nta kawn pru mat wa ai hpang, anhte Manmaw de yu hkrat wa ai, Kunglaw hka mahkrai kaw Japan ni e hkap rim la nna kuli galaw shangun ai shata masum rai sai, anhte hpe Japan ni e Yinkyang Janda pa de bai woi mat wa ai, lama Japan hpung dai ni hpe Miwa hpraw hpyen ni e n kap gap anyin sat yang gaw, anhte lu lawt na n rai nga ga ai. Masum ya masum na ting majan gasat ai kaw, Japan ni hka n lu rap ai laman, anhte prawng pru mat wa ai re, ngu nna tsun dan nu ai. Shaloi she gatsa ba gaw: "Rai sa rai sa, lawt lu jang rai sai. Ya nanhte gara hku sawn nga myit ta?" Nga nna bai san sai.
"Anhte makoi kau da ai jak rai naw wa la rai na ga ai." Ngu jang, nta madu wa nta masha ni hpe shanhte mali a matu labu palawng tam ya, shat lu sha lawan lajang jaw shangun nu ai. Shanhte shat sha la nna rawt mat wa masai. "Myu tsit kaw na myu shinggan e bum palaw kasha mi nga ai, shawng de gaw bum kaw hpun grai tu ai, balik ni nga ai shara re, Japan ni e nat kau ya nna, akrin akru she rai mat sai, ngai manang ni hpe kumshu yi kaw makoi nga shangun nna, ngai hkrai sha bum palaw dai de gyem lung wa yang, ndum shami du kaba Lazum Tang Ja mung ayat hking hking kau nna, shingkang shingwang rai bum pungding kaw maja makran let she ntsap nga la a ni! Ngai shingdu maga hku nna shi hpe wa salam dat jang, shi yin rai: Aga! La Tsai, nanhte hpe Japan ni rim mat wa sai nga ai shiga na ai hte, shani shana nanhte a shiga sha la nga ai, shata masum ting du tim hpa shiga n lu la ai majaw, Japan ni a ta kaw hkrat sum mat sam sai she ngu yang me, nanhte kaning rai bai lawt lu ai re ta? Nga nna gabu let, nye ta pyi ahkye di kau ya na zawn nga hkra shakram ahkye san u ai." Shan shakram ngut ai hpang san htai hkat ai lam gaw: "Anhte hpe Shadan krung kawn Janda pa hkan kuli hku woi hkawm mat wa ma ai, majan lama n byin yang gaw lu hprawng lawt na pyi n tai ai." "Mani nanhte gara kaw hkring ai rai?" "Alaw bum Zaiung kaw wa hkring ga ai. "Ya na manang ni gaw rang? Yawng gaw lu lawt myit ni?" "Anhte mali tup rai ga ai, shanhte kumshu yi kaw makoi nga ta sai ngu tsun dan ni ai.
Ngai gaw manang ni hpe kumshu yi kaw makoi nna kumshu hkum lagu sha ngu htet kau da nngai." "Ngai gaw du kaba Gumja Naw ni a nta kaw hkring nngai, daina anhte nlang shi a nta e bai sa hkringsa ga, ya ten n jau sai, na manang ni hpe shaga la nna rai mat wa saga." Lazum Tang Ji shatin dat nna, shi mung kumshu yi e lagyim nga ta ai manang ni hpe sa shaga la rai, Gumja Naw ni a nta de wa manam mat masai. Maho La Tsai loi mau la nna bai tsun ai: Alaw bum gaw bum lahkawng re, bum langai gaw loi tsaw, langai gaw loi nyem ai, masha ni tsun yang shawng de dai Alaw bum kaw utawng manau nau yu ai nga ma ai, gaw teng ai kun? Grau tsaw ai bum hta gaw Inglik hpyen ni hpyendap jung da ai shara re, dai shara gaw Miwa ga de hkrang ai lam madung rai nga ai. Bum pungding kaw grai ra tsawm ai, bum gaang kaw chyingtaw hpun kaba langai tu ai, dai shara kaw hpyendap langai jung na re nga nna, hpyendu kaba Sati Wen, du wa Gumja Naw, du wa Zau Seng, du wa Lazum Hka, bai langai mi gaw Amerigan hpyendu re, shi gaw chyinghtawk shaman na matu hpyenlahkawn ai re da, shi tsun yang, shawng shani masha marai sanit shi jan lu lahkawn sai nga ai. "Agu, Alaw bum gaw Miwa mung Maru chyinghtawng kawn lai hkrat wa yang du ai shara re, nang tsun ai Zaiung gaw Alaw bum naw lai yang she du ai n re ni?" "Ngai hpe utawng bum de sa wa na hku tsun ma ai, Miwa mung maga hku nna sa yang gaw ngai lam chye ai, ndai gata maga de nna sa na matu ngai n chye ai, n lai yu ai ngu jang, shanhte ngai hpe gara hku rai tim sa masu nga ma ai. Dai majaw mali ya ngu na shani anhte utawng bum de lung nna, Amerigan hpyen hpung 101 dap ni nga ma ai, dai kaw gaw chyinghtawk masha shaman ai shara rai nga ai."
"Agu nanhte Yindiya kaw pyi shaman la sai mi, dai kaw na 101 kaw naw wa shaman na hku kun?" "Anhte dai shara kaw du yang she, hpyendu langai mi hkrai Jinghpaw hpyenla marai 37 hpe shaman shakyang nna nga nga ma ai. Anhte du jang, anhte hpe mahtang hpyenla ni e wa shaman ya na matu shaga ai re hka. Gara hku shaman a ni nga yang, hpyen ni hte hkrum jang gara hku sadi maja na, sanat hpe kaning di lang na, hpyen wa hte gara hku nyan hkat na, sanat pala n ma ai sha hpyen wa hpe sat kau na, sanat run nna bai shachyaw la na hpaji re ni sharin ngut ai hte, du Naw Seng du pru ra ai, shi mung Shadan krung maga de nna sa wa ai re, shi gaw Nahpaw Lawhkum kawn sa wa ai rai nga ai, Naw Seng gaw shi a Fasi rengja hpyen ni hte Amerigan lewui hpyen ni ma gapyawn nna, Gatta kawn Myitkyina du hkra gasat shang wa ai re. Naw Seng gaw majan hta amat grai lu ai wa re, shi hpe kadai gap tim n kra ai da, pala pyi shi she rim sha kau ai re nga nna grai tsun shagrau ma ai, Japan ni hte gasat hkat ngut nna, Amerigan ni hpe masha gade sat kau sai ngu wa tsun dan yang, sakse nmu ai nga nna n kam ma ai majaw, hpang hkan Japan lu sat kau jang, nhpye kaw Japan hpyenla ni a na gadoi di gun wanna wa ru agat dan jang she, Amerigan hpyendu ni grai mau shagrau mat ma ai.
Anhte mali gaw Tat rengja hpung kaw rai ga ai, Tat rengja gaw Sati Wun nan woi hpareng ai ni re. Lazum Tang Ji gaw anhte hpe du kaba Sati Wun hpe shachyan ya u ai, shi tsun ai, ndai hpyenla marai mali gaw Yindiya kaw hpaji hkum hkra shaman shakyang la nna du wa ai ni re, chyinghtawk mu gaw shanhte hpe nan mai kam ai, ya ngai nan nang hpe gyau ya sai ga re, nang gara hku lang ra yang gara hku hpareng lang u, nga tsun nna ap da ya nu ai." Shi a ga hkring ai hte, nayi yu dat yang n jau sai. Hpyenla dingsa wa a mayu mung nau shaga kau nna krawp wa sai, shat kan mung kya wa re ten rai sai majaw, n tsun saga, hpawtni bai matut tsun ga ngu tim, shi bai tsun jat ai gaw: Anhte Mungmyit gutawng kawn nna Balawng Loilung de sa wa saga ai, dai lang anhte hte rau hkawm ai chyinghtawk hpung kaw, ma la kasha langai lawm ai, shi hpe gaw Ngai Tawng ngu ai re. Shanhte gaw ngai hpe Ngai Tawng hpe atsawm sha woi hkawm na hku gyau ya ma ai. Shi gaw ma naw re majaw, kadai nau n sadi nna, Japan shiga grai lu sawk la lai wa sai wa re. Anhte Balawng Loilung kaw du ai shaloi, shi hpe hkrai dat nna hpyen shi sa sawk shangun ai kaw, Balawng ni e rim la nna, la machyaw gadoi di kau ya nna si mat sai. Balawng Sam ni gaw Japan hpe n ninghkap ma ai." Shi shing nga tsun ai lam gaw, ndai laika nnan ka hpang wa ai kaw ngai tsun bang sai.
Shanhte Ngai Tawng hpe sa tam ai shaloi, nsa hti mat nga la sai da. "Agu rang, Ngai Tawng hpe sat ai masha ni hpe kaning n di? Matai nhtang la rang?" "She htang le, du kaba Lazum Tang Ji ngai hpe nan sa lajang shangun nna, ngai nan Balawng gahtawng de sa nna, la sanit shi lahkawng hpe rim la nhtawm, shanhte a la machyaw mahkra gadoi di kau ya nna si mat shangun sai." "Masin mi asi di sai i!" "She di ra le, Ngai Tawng chyinghtawk galaw nna lu wa ai shiga hte, Japan hpyendap gade hpya kau, Japan hpyen gade sat kau ya sai rai nga yang me." "Agu, daini ndai kaw naw tawn kau saga, hpawtni bai matut tsun hkai na re, ya gaw shat sha hpalap lu rai naw hkringsa la saga, nang mayu grai krawp mat sai." "Mai sa mai sa, nang sha lu madat yang ngai chyau gaw naw lu tsun ai gaw e." Maho La Tsai shi a myit hta, moi na majan prat hpe dum dat jang, shabrang sing sing naw rai dum sam ai, grai naw hkai matut mayu nu ai re, ngai jak ni la kau di shakre kau saga ai. Shana shat gaw Mesai hka hkinggau ntsa e galaw tawn ai shat seng kaw sa sha ga ai. Shat seng shingdu maga gaw Myen mung hte Htai mung a jarit mahkrai rai nna, mungdan lahkawng a dawnghkawn jung tawn ai kaw, hpaga yumga masha ni wawa sasa rai at nga ma ai. Mesai hka gaw Myen mung hte Htai mung lapran na pa gaang hku lwi ga lai mat wa ai majaw, hka lam deng mi daram kaw mahkrai langai ngai hkrai da nna, wawa sasa re mungdan lahkawng na mung masha ni hpe manu shangun nga manu ai.
Mesai gaw Myen mung maga de re, Mesai myu de gaw nbungli dabang mung nga ai, Mesai kawn nna Myeng mung Yanggung, Mandale de, shing nrai Htai mung Bankawk de nbungli dung nna sa ai ni, dai kaw hkrai sa dung ai rai nga ai. Ninghkring Maho La Tsai gaw anhte hte shat seng de shat n sa sha lawm ai, shi hpe gaw nawku jawng na hpungtau sara ma Maho Matsa1 atsang arang sa shadu jaw ya ai. Hpa majaw nga yang, Maho La Tsai dat namhpun bang ai simai simaw n sha, dat wushat jaw ai wa shan u shan ni n sha, udi hte namlap shadu ai simai sha sha nu ai, dai kaw gahpri re sha lu ai majaw, shi hpe shat n lu woi sha kau da nna myit grai ndik kau ni ai. Hpang jahpawt manap shat sha ngut re hpang bai matut hkai bang wa saga ai. Ngai Tawng hpe makoi mayang poi galaw ya ai shaloi, du kaba Sati Wun kaw nna hpyen dawnghkawn daw mi shayu hkra shagru shaa ai hku galaw ya sai, nga nna tsun nu ai. Balawng Loilung kaw du Bala hte bai hkrum zum masai. Ngai Tawng hpe makoi kau ngut ai hpang, Maho La Tsai hpung ni gaw Mungyaw Manmak de bai wa ai rai yang, bum kaw Japan ni sin rawng nga la sai, dai shara hta Japan ni grau tsaw mahta ai shara kaw sin nga ai majaw, shanhte hpe gap na matu grai yak mat sai, myawk hte gap ngu yang gaw nau wa ni nna n mai gap, du Bala hpe kaning di na lam san jang, shi gaw Japan ni a gap ni gata de nan shang nna gasat gamawng kau yang she mai na re nga, shi hpe mahtang she shawng lam de bai shangun dat masai da. "Ngai gaw nhkrit ai, hka, si tim mu gaw shangut ra ai re, hpyenla ni gaw si ai hpe shingdu de dat tawn, du baw hpe shingkyit kaw noi lang ai hte maren re. Ngai hkrai lagyim lung wa yu yang she, Japan ni bum lagaw kaw nna kawa masawn jung lung wa nga ma ai.
Bum gade gaw n kaba ai, shanhte bum dai kaw gaduk sung sung htu tawn nna, hpyen masum tsa jan makoi rawng nga ma hka. Shana anhte kawa masawn baw kau rai mayun lung wa nhtawm, bareng gan sanat hte gap ahprup nna wa gashun la lu saga ai." "Agu na chyinghtawk nambat gaw gade re ta? Nang a mying hpe majoi n mai shaga na n rai i?" "Hpyendap nambat kun?" Maho La Tsai na loi layawng sai majaw, ngai san ai ga atsawm n chye na kau dat nu ai. "N re, nang gaw chyinghtawk mu masha re majaw, nang hpe tam jang gara hku tam na rai kun da!" Sara kaba Lama Gam shi a na kaw n-gup sa shachyaw tawn nna, san u ai. "Ngai hpe tam jang kun? Nambat 57 re, gara kaw du mat wa tim, jak hta 57 ngu shaga dat jang ngai hpe tam ai re chye sai." "Nanhte hkum hta galoi mung gun hkawm ai laknak gaw nhpa rai? Nshi kun? Sanat kun?" "Re. Nshi, nhtu gadun galu gun ga ai, n-gang gaw shanhpyi hte chyui gayep la ai baw re." "Nshi gade de galu ai re?" "Nshi gaw lahkam mi jan jan galu ai, kawlan ri mung gun ga ai, kawlan ri gaw shinggan n pru jang n la gun ai, hkawm na shaloi sha la gun gun rai ga ai, nga shara du wa jang bai wa ap kau ra ai, nhtu nshi gawn ai masha san san nga ai, tinang lang ai nhtu nri ni hpe kadai mung kadai a shara kaw sha tawn da ga ai.
Lang ra jang sin ai ni hpe chyinghka hpaw ya shangun nna la gun mat wa jang rai sai." "Agu, chyahkring naw san yu de ga, nanhte Yindiya ga kaw naw nga yang, nbungli jawng gumhtawn sharin nna Myen mung de htaw sa na re nga ai mi, nang gaw chye gumhtawn sai rai tim, nanhte hpe n wa htaw sa ai, kaning re majaw re?" "Yindiya mung kaw naw nga ai shaloi gaw nbungli jawng gumhtawn sharin ma ai, anhte hpe nbungli kaw htaw nna pyen lung wa ai hpang, aga de wan hkye shatu tawn ya nna, nbungli tsaw de mida 350 kaw du jang, wan tsit tu ai hte, nbung jawng sumri ahkye raw la nna dai wan hkye tu ai shara kaw gumhtawn yu wa wa re re, shani gaw marai langai ngai rai nna gumhtawn sharin, shana gaw marai masum hpung hpung rai nna gumhtawn sharin ai, shana galang mi gumhtawn yang gaw shani gumhtawn ai masum lang hte bung ai, ngai gaw shana hkrai gumhtawn sharin nna, ngai hpe nbungli gumhtawn arawng kumhpa pyi jaw ma ai, mana de nang hpe tsun dan ai nbungli sumla kap ai dazik dai re." "Oh oh, chye sai. Shaloi gaw agu nang Inglik ni hpa majaw Japan ni hpe n hkap gasat ai lam loili naw tsun yu u." Lana mi hkring mat jang, jahta ai lam npawt bai sharawt la ra ai zawn she rai mat sai, shing rai shi a shingran bai wa matut na matu, shi hkawm lai yu ai lam de bai nhtang tsun dan nna, gyin wawng wawng nna gyin yang tam ai hku galaw ra sai. "Japan ni Myen mung de gasat shang wa na sawn nga chyalu kaw, Awng San ni e Inglik ni hpe shachyut kau shangun na matu, Htai mung kaw nan Japan ni hpe sa saw shaga bang la ai rai manu ai. 1942 ning shata 1 hta, Japan ningshawng hpyen Chungchyi hpung ni gaw Bebyi makau Htai mung hte Myen mung jarit hku lagyim shang wa nna, shata 1 nhtoi 19 ya shani gaw Myen mung na majan ahkyak shara Htuwa kaw aloi sha htim tsap la kau manu ai. Japan ni dai daram loi ai hku htim shang wa ai hpe Inglik ni grai mau mat masai.
Htuwa kaw sin ai Inglik hpyen hpung ni hprawng na karang lam ma kra pat kau ya sai majaw, hka lam hku prawng mat wa ai rai nga ai. Dai hka lam hku hprawng ai shaloi gaw Maji Tu hka de gumhtawn bang mat wa ai shaloi na majan rai nga ai." "Agu, ngai naw san yu de ga, Myen hpyen ni Japan hpyen ni hpe sa saw la nna gara hku woi shang wa ai rai?" "Dai kun? Ndai hku re, Myen hpyen ni gaw Inglik ni hpe shachyut shapraw kau mayu ai nhkan e, Japan hpyen ni hte rau Myen mung de gasat shang wa masai. 1941 ning shata 12 nhtoi 21 ya shani, Myen hpyen ni mung hpung masum hku garan nna, Htai mung kawn Myen mung de shang wa ai shaloi, Myen hpyenla ni gaw Japan ni hpe lam woi madun, shat lu sha lahkawn ya, hka du jang mahkrai hkrai nna shalai, Japan ni nhpa ra yang nhpa galaw ya rai garum la ai kaw, Japan ni Myen mung de aloi sha lu shang wa masai. Japan ni Myen mung kaw shang lu ai hpang, Myen hpyenla ni gaw mung masha ni hpe Japan ni nhpa tsun yang nhpa madat ya, hkan galaw ya, shanhte hpe n mai ninghkap ai, nhpa ra yang nhpa garum la ra ai lam sha tsun ma ai.
Dai majaw, Japan ni gaw Myen ni garum la ai nhkan e, grai manu grai loi ai hku nna Myen mung gata shang gabye tsap la lu manu ai re." "Inglik ni hpe shachyut kau lu sai hku gaw re ni agu?" "Ganang mai byin na, Myen hpyen ni Japan ni hpe regau saw nna Inglik ni hpe shachyut kau na ngu sawn ai lam gaw alaga she rai mat ai. Myen hpyen ni hte Japan hpyen ni Maulamyen kaw du shang wa ai hpang, rap ra mu gun salang hpung hpaw nna Myen ni hpe asuya ahkaw ahkang jaw na hku tsun gadi tawn ai rai yang, Japan ni Maulamyen kaw du ai hte, hpyenladat hku she uphkang sha bang wa masai, shawng e ka da ai, Japan ni up la lu sai shara hkan gaw Myen ni hpe uphkang shangun na ngu ai ga gadi laika ni ashep je kau manu ai." "Shaloi gaw Myen hpyen ni mung hkrap let wa pu shup ra mat sai hku rai nga ai i."
Hpan Ja
