MUNGKAN KATSI MAJAN KIO HPE ADAWT DAUYIN SHACHYAI

MUNGKAN KATSI MAJAN KIO HPE ADAWT DAUYIN SHACHYAI (CPB 101 HPYENDAP LAFA MAJAW BYIN I?)

DKB. DINGSA NAW JA

Wunpawng Mungdan Sinpraw Dingdung Ginwang Ginjaw Ginra ngu masat da ai Nmai Krung Tamo Ngaw Chang Krung ni gaw bum shagawng rai nna bum tsaw krung sung, nhkrem, n-gam law ai shara rai nga ai. Du hkra ladaw mung nshung hte lanam ladaw lahkawng katsi shadang tsaw nna marang law ai ginra rai nga ai. Nmai Hka a sinna Maru krung Jahpwi, Lawhkawng, Sawq Law, Mangkyi Langse ginra ni hta Maru hte Lisu hpunau ni law malawng shanu nga nna, de a lahta daw Hkawnglang Hpu maga Nung, Rawang, Lisu ni shanu nga ai shara re. Tamo Ngaw Chang Krung Hpimo Kanghpang ginra ni gaw Lachik, Ngaw Chang myusha ni a nga pra ginra rai nga ai. Ndai ginra hpe KIO nnan rawtmalan hpang wa ai ten kaw nna tinang rawtmalan rudi ginra shatai la na yawshada let 1st Comlumn hte 5th Column yan hpe shawng dat dat ai raitim, dai hpung yan gaw kaga hpung rai nga ai CPB (Communist Party of Burma) de gumlau gale mat ai majaw, ndai ginra gaw KIO nlu uphkang ai ginra tai mat wa sai. Dai zawn byin mat ai raitim, kaga chyasam maigan hpyen n rai, tinang amyusha saidaw saichyen shada hpyen rum ai hpunau dap yan re majaw, lahkawng maga shada chyena masat masa galaw hkat let nga lai wa ai gaw shaning (40) ning jan mat wa sai. Wunpawng Mungdan Shanglawt Hpyendap gaw 1962 ning, December (12) ya shani kaw nna hpang ai Nba Pa Hka Hpawk Camp kaw hpawng ai KIO a shawng nnan lang na Kongsi Zuphpawng kaba hta Masat (3) Dap Dung (Pa Jau Bum) kaw na npawt hpang la nhtawm, Jahpwi Lawq Hkawng Nmai Krung, Ngawq Chang Krung, Sumpra Bum, Putao, Hugawng ginra ni de majen je dap hpaw maden na matu dawdan sai.

Zuphpawng hta myit hkrum masing jahkrat da sai hte maren, dai ten Masat (3) Dap Dung Up (KIOCC President) Col. Zau Tu gaw Hpaudawq mare hte Wu Htau Bum lapran nam shalawng shara mi kaw gan chyawm la nna, 1963 ning May shata praw daw hta Special Column hpe masha n-gun (27) hte Lat Du Layawk Zelum Column Com¬- mander dang san nna hpaw dat sai. Dai hpyen hpung gaw Column hpaw la ngut ai hte lit jaw masat dat ya ai Nmai Krung, Ngawchyang Krung maga de rawt hkawm mat wa sai. 1963 ning, May shata (13) ya shana Zang Nawng lahta Gye Lui Mare kaw gale pru wa nna Sara Minzai Lum Dau (Ya Du Up Daju Zao Bug Than) hte hkrum la n htawm bungli masa bawngban masing jahkrat la nna ta tut bungli shang wa yu yang, kade nna ai May, June a ten kadun laman ahkyak ai buga ginra ni wa du kawan da lu ai hte mungshawa hpe shanglawt masa ningmu jahpaw myit jasu sharawt kahkyin gumdin lam ram ram awngdang nna magam gun gun jat mung ram ram jat la lu sai.

Shing-rai Hpyendap maden shang wa lu sai hte maren, uphkang dap hpe mung hpaw sa wa lu na matu dai buga na Salang Lasuk Lum Hkawng, Slg. Nabuk Hkawng Ze, Slg. Jumzang Lum Hkawng, Slg. Lazuk Zadau, Slg. Hanggau Dau Zawng, Slg. Tait Bom (Hpimo), Sara Bom Yaw (Nazung Bau Jawng), Slg. Lanam Bawm Zung (Tamo Krung) ni marai matsat tup wunkat la na matu Masat (3) Dap Dung de yu wa sai. Dai majaw, dai ten Masat (3) Dap Dung Tau Dap Up makan lit hte KIOCC Amu Madu magam lit gunhpai nga ai Du Up Dumhpau Gawng gaw dai marai matsat hpe Nhpawt hte Lawq Pum lapran nam camp shara mi kaw shanglawt masa uphkang dap wunkat jaw nna special column de bai shalun dat sai. Dai ten hta Du Kaba Zau Tu woi-awn ai hpyenhpung langai mi mung hka hku mung Sumpra Bum maga majen je lung wa ai. 1963 ning, July 19 ya shana Njang Yang du nna Masat (4) Dap Dung hte Sumpra Bum Ginwang Rung hpe mung hpaw masat dat sai. Dai majaw, Masat (3) Dap Dung a npu hpaw da ai Special Column hpe mung 1st Column ngu nambat masat mying galai kau nna Masat (4) Dap Dung a yu reng ai npu de bai gayin bang dat sai.

1963 ning htum wa maga Mali Nmai Wa Lawng Jingma Yang kaw Wunpawng Mungdan Shanglawt Hpyen Dap, Masat (4) Dap Dung a kata 1st Column hpe bai gram hpaw dat ai. Dai column hta Du Layawk Zelum, Column Commander lit dang san nna masha n-gun (200) jan hte bai hpaw shagrin dat sai. Dai Column Hpyenhpung gaw nnan daw Column Rung hpe Nmai Hka kau (Jahpwi sinna hkran) jahkrat da nhtawm, shawnglam hpyenhpung law malawng hpe gaw 1963 ning, November hte December lapran Nmai Hka Sinpraw hkran de hpung hte hpung rap sa wa ai. Jahpwi Lawqhkawng Sawqlaw Mangkyi, Nazung Bau, Myawq Jawng, Ngawq Chang Krung, Chyang Yin Hku Du Hkra shara la dap jahkrat nga hpang wa sai. Dai ten dai buga na mungshawa ni mung tinang amyusha hpyendap lu sai ngu grai kabu n-gun lu myit su myit rawt let hkap hkalum madi shadaw ai hte hpyen magam hta shang lawm gunphai nang ai ni mung ram ram nga wa sai.

Dai zawn Dap n-gun law (dai ten n-gun 300 jan) mung shawa madi shadaw lam mung rawt jat ding yang rai nga ai hte maren, (1966) ning, February shata hta 1st Column kaw na masha n-gun ka-ang hkup shaw garan la nhtawm, 5th Column bai hpaw jat la dat sai. Dai Column hta Du Zahkung Ting Ying, Dap Up rai nna, Du Asi hpe Column 2ic makan lit dang san ya sai. 5th Column a shara hpe mung Sawq Law, Htangdung, Gawq Lang Kang Hpang kawn Ngawq Chang Krung Hpimo Lagwi Hpare du hkra garan masat ya sai. Hpyendap hpaw maden shang wa sai hte maren, Buga mung shawa yu reng woi awn na Uphkang Dap hpe mung Du Tait Bawm Uphkang Du (T.0) magam lit la nna, Lawngding Mare kaw rudi nhtawm, Myaw Jawng, Lang Yang, grup-yin shamu shamawt, mungshawa kahkyin gumdin lam, mare buga a rawt jat nga ngwi lam, uphkang masa hpe woi galaw hpang wa masai. Shawng nnan hpaji jawng hpe 1964 - 67 du hkra Myaw Jawng Lawu Tsang jawng, Gaw Maw lapran tsang jawng, (hpang e Lawnghpam de htawt nna Chyumlaika du hkra sharin yu ai) hpaw da ya lu sai. KIO nnan du shang wa ai ten ndai ginra hta tai dap Hk.L.Y, Hk.M.Y ngu ai ni rai n nga ai.

Recondo ngu ai jarit sin dap hte Balik Dap ni gaw Lawq Hkawng, Sawq Law, Nazung Bau, Htangdung Htawgawq hkan dap jung da nna kaga mare kahtawng ni de gaw kalang marang shamu shamawt gayin nga hkawm ai madang sha re. Dai zawn mungshawa gaw Shadip Magam lahkawng uphkang ai kata 3/4 ning na mat wa ai hte dai shara KIA nnan du shang wa ai ten KIO a ntsa grai kamhpa madi shadaw nga ai mungchying kanu kawa ni hpe dai ten 5th Column na Du salang langai lahkawng mara kata n tara ai jahkrit shama zingri nat sat ai majaw mung, tai hpyen wa a zai ladat amyu myu hte tinang amyu shada hpe sumprat dawk ginhka garan ai majaw mung tinang hpe madi shadaw nga ai mungshawa kau mi hpang daw tai hpyen wa kaw myi man kayin mat nna shawng de n nga yu ai shara ni hta Pyitutsit ni paw pru wa, amyu hpu nau shada myit machyi daw hka wa shangun ai lam ni byin lai wa sai.

Shingrai shaning ladaw 4, 5 ning laman KIO a ntsa mungshawa ningmu ram ram shai wa ai hte mungshawa a makam madi shadaw lam mung yat yat hkrat yawm nna dap kata magam gun ni a ningmu myit marai hkam sha lam ni mung ram ram shai wa nga ai ten, 1967 ning, December shata hta Brig. Zau Tu woi awn ai GHQ de na hpyenhpung langai mi Pang Wa lam hku Miwa mung de lai shang wa sai. Dai hpung gaw Du Zahkung Ting Ying hte 1st & 5th Column na Du, Salang kau mi hpe mung woi mat wa sai. Shanhte ni kade nna ai January htum February 4 ya shani hta Nmai Hka rap nna bai nhtang du wa ma ai. Shanhte bai nhtang wa ai shaloi gaw M21, M22 sinat nnan Lau (300) hpai lai wa ma ai. Dai majaw, 1st, 5th Column na Du ni gaw sinat hpyi yu yang lau mi pyi n garan jaw da ai majaw, grai yawn myit n pyaw ai lam chye lu ai. Brig. Zau Tu gaw lai wa let Pang Wa kaw zuphpawng woi galaw nna, Miwa ni jaw dat ai Communism laika buk ni mung dai shara kaw yawng lahkawn kahkyin nat kau da ma ai. Dai hpyenhpung ni Pangwa kaw nna Mali Nmai Wa Lawng de bai lung wa ai shaloi, Du Zahkung Ting Ying hpe mung 5th Column Commander aya dawm nna GHQ de woi mat wa masai.

Nmai wa lawng de du wa ai shaloi gaw, Kongsi Zuphpawng galaw nna magam lit hprai, salang lata wa sai. Dai shaloi Du Zahkung Ting Ying mung magam dap shara ra kaw bungli kaba jaw la na myit mada nga ai raitim, shi hpe bungli kaba n jaw, Dap Jau Du bungli sha jaw ai majaw, myit n pyaw gaya pawt shalu let nanhte gaw du kaba, ngai gaw arai kaba (du-du kaba) nga tsun jahpyak da nhtawm, num la na ngu ahkang hpyi la nna, nta wa mat sai. Shi a nta Ngawq Chang Krung de du jang mi na shi dap manang ni hte hkrum la nhtawm, hpyenhpung yawng hpe shaga kahkyin la ai. 1968 ning, March shata (15) ya shani gaw KIA gasadi run shaprai kau nhtawm Communist hpyen gale na matu gasadi (Gashaka nnan) bai hkam la (Hpare Pa Sikhpyuzin Mare lahta BP6 Pass lawu kaw 1968.3.15 kap ai masat shadaw hpe 2003 ning hta sharawt Jung da woi ai hpe mu lu ai. Dai hpang Hpare Hkyet BP6 lam hku Miwa Mung Da lung Pa Min Kawng maga de shang mat wa sai.

5th Column ni Miwa mung de rawt wa na shaloi, 1st Column ni hpe mung anhte gaw rung shatut la na matu rawt saga ai. Nanhte manang ni grai shakut nga mu yaw, ngu T.0 Taik Bom ka dat ai laika hkyep lu la ai hte, manang ni pyi rawt sai anhte mung hkan rawt nang saga nga 1st Column n-gun yawng 150 jan hpe Column Commander Du Layawk Zalum woi awn nna 1968 ning, March shata (28) ya shani Myawjawng Kanawq Kawng kawn Pangwa Lam hku Miwa mung Kodung mare na Masat (105) jarit sin dap de woi shang mat wa sai. Ist & 5th column ni hpa majaw kaga wuhpung de gale mat ai mahtai tam ga nga yang tsunna lam law law nga na re, laika ka ai wa hku na gaw 1968 ning, February shata Nka ga kaw hpawng ai zuphpawng hta GHQ War office a staff officer hku nna shang lawm ai salang langai tsun dan ai ga hpe gadun mi tang madun mayu ai.

Ndai zuphpawng gaw GHQ (General Headquater) nnan hpaw la nhtawm rung magam gun masha ni Jingma Yang kaw nna Zi Chyanata mare de htawt nga ai ten dai mare hte nau n tsan ai Nlaw Nka ga kaw Cadre Wunkat kadun mi hpaw dat ai. Dai Wunkat hta 1st & 5th column hte Law Hkawng Ginwang daw de na du salang marai 30 jan shang lawm ma ai. Wunkat ngut bra wa na ten GHq de na Brigdier Zau Tu. Salang kaba Pungshwi Zau Seng, Salang kaba Maran Brang Seng, Salang kaba Lanyaw Zawng Hkra ni sa du nna zuphpawng woi galaw ma ai. (Du Zahkung Ting Ying gaw zuphpawng du maw mahka 2 ya jau nna a hkang wa mat ai. Du Layawk Ze Lum mung dai wunkat zuphpawng de n du lawm ai).

Ndai lam hte seng nna salang wa tsun dan ai hta -

1. 1st column nnan hpaw wa ai ten mung masa ningmu rawtmalan mahkrun madup nau n nga ai hpa awn langai lahkawng a n gup kaw na atsawm n myit yu ai amyu sai ginhka ai ga manaw tsun pru wa ai majaw n pu tsang dap shawa n kau mi n chye na myit n pyaw shangun ai lam byin wa ai.

2. Nka ga na zuphpawng hta 1st & 5th column hte Law Hkawng Ginwang daw de na salang ni lawu na lawng lam 2 hpe tang shawn wa ma ai.

(1) Law Hkawng Ginwang daw hpe Ginwang atsang masat ya na matu tang shawn ai. Raitim dai lam hpe n hkap la ya ai ( gumlau mat wa ai hpang 1968 August 28 ya shani she Masat 10 Dap Dung hte Law Hkawng Ginwang hpe hpaw masat dat ai.)

(2) Jinghpaw Shanglawt Hpyen Dap ngu ai hpe mying galai na matu hpyi shawn ai. Shan hte tang shawn ai gaw Wunpawng ngu ai lachyum hpe la nna Tawng Zaw/ Tawng Byu htap htuk ai mying galai na ra sharawng ai. Nam Lap ngu jang Lahkru Laja Latsai hpun kawa lap yawng lam sai. Tawng Zaw/Tawng Byu nga jang Wunpawng a myu yawng hkyawm lawm sai ngu aja awa tang madun hpyi shawn ma ai. Raitim dai lam hpe mung nhkap la ya ai hta n ga Brig. Zau Tu htai sang lang dan ai hta mung masa myi n hpaw, ningmu gyip gyeng, tinggyeng shanang ai myit jasat re ngu ai ga manaw n sen hte gumshem ladat hku nna daru kau ai majaw Jahpwi, Law Hkawng, Nmai, Ngawchang krung de na hpu nau du salang ni grai yawn myit n pyaw nna kabun kahte let nhtang mat wa ai lam chye lu ai. Dai salang ni tinang ginra du ai hte kade n na yang gum lau mat wa sai.

Wunpawng Mungdan Shanglawt magam gun kaw na sadi run gum lau mat wa sai 1st & 5th column hpyenhpung yan gaw Kodung du tim shada n hkrum shangun ai sha, shara kaga ga woi nga ai shata lahkawng jan ai hpang she (105) Dap kata kaw pawng kahkyin da nhtawm, Miwa Hpyen Dap hte CPB Ginjaw ni lit la nna Communist masa shata (6) ningpawt ninghpang hpyen hpaji shata (4) tup sharin hkam la shangun sai. Communist tara masa hpyen hpaji ni hpe sharin ya ngut wa mahka Myen mung Communist Pati Ginjaw (CPB) kaw nna yu reng uphkang ai npu CPB (101) dingdung hpyen ginra hpe 1968 ning October shata praw (2) ya shani (Miwa mung a (19) lang na shanglawt nhtoi masat poi ngut ai hpang shani) Beijing mare daju kaw nan Miwa Shadip Magam Salang ni hte hpaw masat shagrin dat ya sai. (1968 Oct. (1) ya hpe la nna 101 masat la na masa nga). Dai 101 Dap mung shawa hpyendap (pyitu tatmadaw) hpe KIA kaw na gale wa ai hpyen n-gun (300) jan hte CPB Ginjaw na n-gun (50) jat nna hpaw dat sai re.

Dap Up gaw Du Zahkung Ting Ying rai nna U Htun Mau - U Si Mu U Tu Shingni hpe dang san hpaw shabawn ya sai. Dap dung hpaw masat ya sai hte hpyen Training mung ngut sai re majaw, dai hpyenhpung hpe ra ai laknak machyu pala hpyen hking, malu masha ra mara CPB Ginjaw kaw nna htuk shale ya ngut ai hpang, 1969 ning, May shata (25) ya shani Hpimo hku tinang Mungdan de bai lai shang bang wa sai. Dai shani kaw na gaw Wunpawng Mungdan a sinpraw dingdung ginra rai nga ai Hpimo Kanghpang Htawgawq, Ngawq Chang Krung, Sawq Law, Mangkyi Jahpwi, Lawq Hkawng ginra ni hta CPB hte Myen Hpyen Dap ni gasat gala majan byin hpang wa sai. Shawng nnan gasat poi majan byin ai gaw 1969 ning, May shata (26) ya jahpawt Htangdung Balik Dap hpe CPB 101 ni gap zing la ai hpang May 27 ya jahpawt Hpyinlaw, dai hpang Hru Grang kaw Hk.L.Y (58) na Du Jangma La woi awn ai Myen hpyenhpung ni hte gasat ai majan ni rai sai. Majan byin hpang wa sai hte maren, dai hpang daw kaw nna ndai ginra hta majan wan gaw lani hte lani grung wa sai. Dai aten CPB 101 dap ni gaw dap nnan rai nna sinat laknak myit marai grung nga ai ten re majaw, kade nna laning mi jan rai yang shara law malawng gasat zing madu la lu sai.

Gasat gala majen je nga ding yang rai let, 1971 ning, January praw hta ya na Pang Wa mare kaw 101 Dap Dung Daju hpe shara jahkrat dap Jung la lu sai. 1973 ning shaning nnan kaw nna Kanpaiti kaw mung 101 Bn a shawng lam hpyen man daju hku nna dap Jung da lu sai. Dai hpang daw kaw nna manga ning daram 101 ginra majan laja lana n nga, loi simsa wa sai majaw, dap shagreng la, mungshawa hpe zinlum kahkyin gumdin uphkang masa ni woi jahkrat nga sai. Communist masa gaw Karai n nga ai masa re hte maren, Changmo Krung, Myawjawng, Langyang hkan nga ai Hkristan hpung masha ni hpe akyu gaw hpyi mai ai, raitim, nawku daw jau lamang kaba, makam masham poi shing-ra kaba, alu hta lahkawn ai lam ni n galaw na matu sadi jaw pat hkum ai lam ni loi li nga ai. Grai laja lana aten galu pat hkum shingdang lam gaw n nga ai. Dai zawn simsa nga ai ten shawng de 2, 3 lang gap malu dat dat re ai Htawgawq tai hpyen dap hpe mung 1978 ning, July shata hta tsep kawp gasat zing la lu sai majaw, dai shani kaw nna Changmo Hkung (Ngawq Chang Krung) ginra hta tai hpyen n nga mat sai.

Dai ginra yawng CPB 101 dap a uphkang ginra tai mat sai. CBP 101 Dap nnan du shang wa ai ten KIA ni hku nna gaw hpunau shada hpyen masat majan manghkang kaba baw hkat n mai ai ngu tinang shawng n shut hkra sadi maja let nga ninglen n myit mada ai, 1971 ning hta Gawmaw ninghtawn Yawpap Post hpe sa gap ya ma ai. Dai hpang 1972 ning laman Wakau mare kaw kalang, Yaw Jaw mare kaw kalang, Ryaw Ngaw mare kaw kalang, 1973 ning Rawtmalan poi a hpang Hpa Maw Hka zup kaw Slg. Kb Lanam Gyung Zang hpung hpe Aimpost hkap gap ai kalang, 1974 ning Shangaw krung Hpukmao mare kaw D-3 na Du Sau Chang hpung ni hte kalang (Shata n htoi ni n lu sagawn) gasat poi ni byin lai wa sai. Dai hpang daw mung 3 ning daram du hkra shada ahtik ahtawk n hkrum n ra lam ni byin lai wa sai. Kaning re ai manghkang ni nga pru wa raitim, tinang amyusha hpunau chyaw ran shada hprai shai daw hka gasat hkat ai gaw n jaw n mai ai hta n-ga, lahkawng yan gasat kau ra ai tai hpyen rum ai hpunau dap yan re majaw, shada hpyen masat hkat, tinang amyu sai daw sai chyen shada gasat gala hpyen majan baw hkat gaw n mai ai lam lahkawng maga myit dum myit hkawn ai hte maren, 1976 ning KI0 maga Salang Maran Brang Seng Ningbaw Kaba galai ai hpang daw kaw na shada matut mahkai htingrat htingram la nna magam jinghku bai hku makyit sumri bai dun let n-gun pawng hpawm, hpyenman rau hpaw, ginrun majan masing kaba ni mung rau jawm galaw wa lu sai.

Shawng nnan jawm pawng ai majan masing gaw, 1977 ning mangai ta rai n du yang Sadung Sai Law, Mangdawng, Shangaw, Wulawng Yang grup-yin gasat ai majan rai sai. Dai hpang 1979 ning, April shata kaw na hpang ai Wulawng Yang, Njang Yang, N¬greng Kawng, Mazup mayan gasat ai Kapyawn majan daju masing rai nna, 1985 ning Manmaw/ Shwigu Ginwang kata na Shweya Awng majan masing kaba hte hpang jahtum 1989 ning, November hte December shata hta (Nov. 19 ya Njang Yang gap) Njang Yang hte Sumnpra Bum mawdaw lam mayan Nsawp, Njip, Tayang gasat ai ginrun majan masing ni rai sai. Dai zawn KIO hte CPB 101 Bn a makyit mahkai kanawn mazum ai shaning (20) ning de lahkam wa ai hte Miwa mungdan Ginjaw de mung 1982 ning, September (12) ya shani kaw na Shadip Magam ningbaw ningla nnan Deng Xiaopin Dap Awn Daju magam lit la nna Gumsan magam tingnyang galai dung wa ai kaw na Maigan makyit mahkai mungsang masa hpe galai jashai kau dat ai hte 1985 ning a hpang daw Miwa Shadip Magam gaw Myen mung Communist (CPB) hpe garum madi shadaw ai lam mung yat yat shayawm dat sai.

Shing-rai CPB Ginjaw mung yakhkak dut dang manghkang hkrum nga ai ten CPB Ginjaw na Myen amyusha Salang ni a ntsa kaga Ethnic amyusha salang ni hku n na kamhpa lam nau n nga wa ai hte ningmu n hkrum, myit masa shai hkat ninghpang pru wa sai. Dai ten Myen mung Shadip Magam a mung masa mung galai shai wa nna Amyusha rawtmalan hpung yawng hpe gap hkat jahkring nhtawm, Simsa lam hkap la nna, hpaw da ya ai mung masa chying hka (Road Map) hku shang wa let mung masa bawngban na matu saw shaga nga ai ten rai nga ai. Dai majaw, Myen mung Communist hpung kata lawm nga ai Ethnic amyusha wuhpung myitsu salang ni mung dai ten na Myen mung masa sat lawat hta hkan nhtawm, 1989 de du shang wa ai hte rau shawng nnan Kokang (MNDA) hpung ni, 1989 March shata (14) ya shani CPB kaw na garan pru nhtawm, Myen mung hpyen Shadip Magam (NWT) hte simsa lam la mat sai. Dai hpang kade nna yang Waq amyusha (UWSA) rawtmalan hpung, de a hpang Mailah (NDAA), Sam re ai ni mung matut manoi garan pru mat sai. Hpang jahtum Wunpawng mungdan a sinpraw dingdung de nga ai CPB 101 Kachin Dap ni sha ngam mat sai.

Dai majaw, CPB 101 Dap ni mung 1989 ning December (5) ya shani (December 1, 15 ya ngu ka da ai ni mung nga ai hpe mu lu ai) NDA (K) mying galai nna NWT hpyen Shadip Magam hte simsa lam la mat sai. 1939 ning, August shata (15) ya shani Yangon Mare Kaba 48 street Nagani LanTahkyin Htun Shwe nta kaw shangai dai daw dat ai. CPB Ginjaw (zing hkrum ai ten Pangsang) hpe mung 1989 April (14) ya shani Waq (UWSA) ni zing kau sai majaw, CPB Ginjaw Salang ni Pangwa, dai kawn Miwa mungdan Minglian Mare Kaba de hprawng shingbyi mat ai shani kaw na asak (49) ning jan kung kaba nga sai CPB mung boi bya mat wa sai. NDA shingteng shamying nna NWT hte gap hkat jahkring simsa lam la nga let mung masa bawngban ai lam matut manoi rai nga yang 2008 ning htum 2009 ning de du shang wa ai hte 2009 April (28) ya shani kaw na NWT Hpyen Shadip Magam wa gaw simsa lam la da ai rawtmalan hpung yawng hpe BGF jarit sin dap shing n rai Pitutsit gale hkrang galai na matu adan aleng tsun shadut wa sai.

Gara rawt malan hpung raitim BGF shing n rai Pyitutsit gale nna mung masa hpung Pati hpaw, ra lata shingjawng poi shang nna mungdaw mungdan a uphkang ahkang aya hpe mungdan a mungbawng rapdaw kaw tang shawn bawngban jahkrup hpyi la mai ai ngu tsun ndau dat ai hte NDA mung kaning n chye di nna dai chying hka de shang mat sai. Dai majaw, NDA (K) gaw 2009 ning, Nov. (8) ya kaw nna Myen Hpyendap tek jum ai npu na BGF dap gale mat sai. NDA kaw nna BGF de gale wa ai shaloi, NDA ni NWT hpe tang madun ai jahpan hta masha n-gun (1,286) hte sinat laknak hpan hkum lau (1,150) tup tang da ai. (Nnan jahkrup ai shaloi gaw asak (50) ning n pu magam gun (500) sha tara shang hkap la ya na ngu ai rai tim hpang daw gara hku bai jahkrup la lu ai n chye) BGF gale mat ai hte dap hpaw shabawn lam hpe NDA kaw na gale wa ai BGF n'gun 300 Myen hpyendap kaw na n-gun 30 (300 + 30) pawng gayau ai BGF Masat 1001 Dap Dung (Ganhkung),1002 Dap Dung (Luq Pyi) 1003 Dap Dung (Shingjai) ni hpe hpaw da nhtawm, asak kaba mat sai ni hte BGF de n kam hkan shang mat sai NDA magam gun 300 jan gaw pru hkring sa mat sai. Shawng de CPB 101 Dap Up, NDA ningbaw galaw lai wa sai Salang Zahkung Ting Ying mung Jahpwi Sawq Law Njang Yang Sindan pa bang ginra, dinghkrai amat salang shang galaw mat ai gaw 2016 ning, June shata (24) ya shani du hkra galaw gunhpai lai wa nu ai. Ndai lam gaw dai ten na grup-yin mungmasa sat lawat hta hkan nna Wunpawng myusha ni kaw shang wa ai Communist Pati a hpang jahtum ginchyum wa ai labau kadun rai sai.