Matsing Da Ra Ai Lam Hte Malap Kau Nmai Ai Labau

1. 7 Majan (7 Stars)

Wunpawng mungdan shanglawt hpung ngu ai paw pru na matu shawng ningnan 1957ning htum maga de lana mi na simsa la ai yuptung hpawa aten sumsing lamu na 7 majan hte rau Yangone Dakasu na ramma Brang tsawm marai (7)re ai paw pru wa ai hpe chye lu ai.

Ndai wunpawng Brang tsawm marai 7 hpung ni hpe 7 majan (7 Stars) hpung ni mung ngu ma ai.Ndai 7 Majan Hpung ni gaw Myen amyu kaba lailen amyu hpan hkum hku dang sha dip sha ai hpe ndang hkam sharang wa ai majaw laknak lang rawt malan hpung hpaw na matu tau shajin ai hpung rai nga ai.

Ndai 7stars hpung hta shanglawm ai ni gaw,

1. Salang Salaw Lahtaw Zau Tu (Ningbaw)

2. Salang Hpauyu Tu Lum

3. Salang Pungshwi Zau Seng

4. Salang Nahpaw Gun Jawng

5. Salang Mali Zup Zau Mai

6. Salang Malang Shawng

7. Salang Hkangda Brang Gam ni rai ma ai.

2. Shangai Wa Sai KIO

Wunpawng Amyusha ni hpe dip da gamyet da hkrum ai kaw na woi shalawt lu ai hte shanglawt ai ninghtoi de woi awn sa wa lu na matu, 1960 ning October (25)ya shani Lasho mare kaw myutsaw ramma du salang ni marai (14) shanglawm ai Komiti langai hpaw ninghtan dat  ma ai.

Dai Komiti hpe mung Wunpawng Mungdan Shanglawt Hpung(KIO Kachin Independence Organization)ngu nna shingteng amying jaw ai the ninghtoi 25/Oct/1960 hpe KIO Masat Ninghtoi ngu masat shagrin da sai.

3. Wunpawng Mungdan Shanglawt Kongsi

Ninghtoi 1961 ning January (15)ya shani Du Wa Salaw Zau Seng gaw Lashu mare kaw Myutsaw ramma du salang marai (5) hpe zuphpawng woi galaw nna, Wunpawng mungdan Shanglawt Kongsi (KIC Kachin Independence Council) hpe hpaw masat shagrin da sai.

Dai Shawng nnan na Kongsi Slg ni gaw,

1. Du Wa Salaw Lahtaw Zau Seng

2. Du Wa Salaw Lahtaw Zau Tu

3. Lamung Tu Jai

4. Lama La Ring

5. Dumhpau Gawng ni rai nga ma ai.

4.Rawt Malan Ninghtoi

Du Wa Salaw Lahtaw Zau Seng gaw 1961ning January (15)ya shani hpaw ninghtan dat sai Wunpawng mungdan shanglawt Kongsi hpe 1961ning February praw 5ya shani Lashu mare kaw shawng nnan lang na KIC Zuphpawng woi galaw nna dai zuphpawng hta;-

1. Wunpawng mungdan Gumsan Mungdan gaw gap na lam

2. Laknak lang hpyendap (makawp maga dap) hpaw shabawn na nmatu dawdan ma ai hte dai zuphpawng ninghtoi February praw (5) ya hpe Rawt Malan Ninghtoi ngu masat shagrin dat sai.

5. Gumhpraw Dum Zing

Wunpawng mungdan Shanglawt bungli hpang sa wa na matu Du Wa Salaw Lahtaw Zau Seng gaw kanau Salaw Lahtaw Zau Tu hpe Lashu gumhpraw dum na gumhpraw sa shaw gun na matsun sai hte maren, 1961 ning March praw 7ya jahpawt hkying 8:00Am ten, Pyada ni sin nga ai lata kaw nan sa zing madu la lu ma ai.

6. KIA Hpyendap

Wunpawng mungdan hte Amyusha ni hpe makawp maga na Shanglawt Hpyendap (KIA Kachin Independence Army) hpe 1961 ning March (26)ya shani hpaw shabawn hkrang shapraw dat sai.KIA hpyendap hpaw dat ai hte Lt.Col Zau Tu hpung ni gaw May (18)ya shani Nam Maw Mung Len gat mare kaw Myen hpyen ni hte gap hkat ai Myen hpyen ni marai (4)si ai.Tinang maga Sgt. Cik Galau Zau Lum hte Cpl Lamung La (Section Commander) yan gaw mungdan hte amyusha ni a matu (Shawng ningnan majan poi hta ) asak ap nawng mat wa sai rai. 

7. Maw Hke Hka

Wunpawng Amyusha ni prat ban hte ban galaw hkrat wa ai makam masham htunghking langai mi rai nga ai Magam bungli hta shangang shakang ya ai Ga Sadi Maw Hke Hka ai lam hpe Du Kaba Salaw Lahtaw Zau Tu hte Du Kaba Lamung Tu Jai yan woi awn nna 1962ning January shata 10ya shani Nba Pa Salang Kahtawng kaw galaw hpang ai kaw na Wunpawng mungdan ting Maw Hke Sakse (Hka) ai lam hpe galaw lai wa saga ai.

8. Mungdan Dawng Hkawn Sharawt Sai

Daini Wunpawng Amyusha ni hkungga lara galaw hkam la nga ai Wunpawng mungdan hte Amyusha ni a dawng hkawn hpe 1962ning December (24)ya jahpawt manap 6:00Am aten Wa La Manhkaw Hka Hpawk Camp kaw tara shang sharawt dat lu sai.Ndai Amyusha dawng hkawn a npu e Wunpawng amyusha ni yawng gahkyin gumdin nga ga.

9. Myen Hpyen Asuya Hte KIO Simsa Lam Ginrat

• 1963 ning August shata hta kalang

• 1972 ning June shata hta kalang

• 1980-1981 ning hta kalang

• 1992-1994 ning kaw kalang Myen hpyen asuya hte simsa lam tam ginrat ai lam galaw lai wa masai.Raitim Myen HPyen Asuya wa gaw Annau ni ra sharawng hpyi shawn ai hpe tsep kawp nmyit ya ai majaw ya aten du hkra naw nut hkat nga ra ga ai. 

10. Malap Kau Nmai

Wunpawng Mungdan Shanglawt Hpung hte Myen Hpyen Asuya gaw, 1994ning February (24)ya shani lahkawng maga jawm myit hkrum ai hte Myit hkrum ga sadi laika hta lahkawng maga na Dat Kasa Slg ni (3) Hpra ta masat jawm ka da nna gap hkat jahkring ai hpe mu lu ai.

Shingrai 13ning ting gap hkat jahkring tawn ai hpang dai myit hkrum ga sadi masat laika hpe ahkyak nshatai ai sha yuk jahtuk manai makai re ai myit jasat hte Wunpawng mungdan shanglawt hpung a ntsa sadi run, Myit hkrum ga sadi laika hpe Myen hpyen asuya shi hku nna jahten kau sai rai nga ai.Myit hkrum ga sadi laika hpe jahten sharun kau sai sha n-ga 2011ning June shata praw (9)ya jahpawt myi hprim naw rai yang tara shang hpaw tawn ai Sang Gang Kyit Hkai Rung hpe Hpyen wa gaw Akajawng sha shang htim gasat ai hpe galaw sai rai nu ai.

Dai Sang Gang Kyit Hkai Rung hta bungli ang ai Gyi Gamaw Ying Chyang hpe mung rim gyit zingri sat kau ai sha n-ga, Nsoi nsa nrawng mat sai moi mang hpe achyen achyan rai gahtam atawk, shingyim myit tsep kawp nrawng ai hku zingri sat kau ya masai.

Matut nna mungdan kata na dinghku majan she rai tim mungkan majan madang laja lana htim gasat wa ai hpe Wunpawng amyusha ni hte Wunpawng mungdan sha ni daini du hkra hkrum katut sha nga ga ai re.Ya daini du hkra hkamjan lu ai gaw Sumsing Lamu de na hpan wa ningsang chye wa ningchyang Yehowa Karai Kasang a chyeju nan rai nga ai.Dai majaw Karai wa a chyeju hpe shakawn let Anhte A Awng Padang Yehowa Karai Kasang Hpang de akyuhpyi hpyi shawn dingyang rai ga.

Wunpawng Mungdan Shanglawt Hpung hte Myen mung asuya gaw gap hkat jahkring tawn nna mung masa jahta ga nga 1994ning February (24)ya shani sakse sakgan hte hkrak myit hkrum ga sadi laika ka hkat ai shaning (17) ning ting na mat ai hpang ya na zawn sadi run kau nna tinang tara shang hpaw da ai Sang Gang Kyit Hkai rung hpe akajawng sha maja sa htim wang gap ai kaw na bai hpang wa ai majan rai nga ai hta sha n-ga Anhte a Myutsaw share ninghkringGyi Gamaw Ying Chyang hpe myen hpyen ni matse labye myit jasat hte zingri sat kau ai hpe Wunpawng Annau ni a Prat Ban hte ban maroi nni masin nsi, malap kau nmai ai labau rai nga saga ai.

Amyu a magam hta,

Uma Zai