Rev. Dr Lahtaw Gum Se

Sara Kaba Rev. Dr. Lahtaw Gum Se

(B.Th, Dip. Theo, B.D, FDCS, D.D)

J.W Chyum Dakkasu Jawng Up Usa

Ahtik Labau Kadun

(1931–2018)

Shangai Chyinghkai wa ai lam

Sara Kaba Rev. Dr. Lahtaw Gum Se gaw moi shawng de Mung Myit Kudawng ga, Man Seng Mare e nga nhtawm, Man Jawp Ginwang Du galaw lai wa ai hpang, 1961 ning kaw nna, Sadung (Ya Waimaw) Ginwang, Gang Dau Yang Ninghtawn, Nlaw Seng Mai Mare wa woi de ai, Man Seng Duwa Lahtaw La Raw the Du Jan Hkahkye Du kasha Nhkum Ja Hkawn yan a Shandang sha alat rai nna 10* September 1931 (10/9/1931) hta Sammung Man Seng Mare, Pauhtun Kahtawng kaw shangai wa sai. Sara Kaba gaw kanau marai matsat a kahpu Kaba, Sarama kaba Sister Tauba Lum Nan a tsawra dik ai ningrum ningtau rai nna, kasha mali a chyinghkai kawa, kashu sanit a kaji dwi rai nga ai. Wunpawng sha ni a masin salum, Jinghpaw Wunpawng Chyum Dakkasu, Nawng Nang a shawng ningnan na Jawng Up Sara Kaba mung rai nga ai.

Kahpu Kanau Ni

1. Lahtaw Nang Mun (n-nga mat)

2. Lahtaw Nang Bawk

3. Saranum Kaba Dr. Lahtaw Nang Tum (Duwa Lahtaw La Raw + Du Jan Je Maw Ja Nan yan a nshang hkrat kasha ni)

4. Lahtaw Nang Awn + (Slg. Tangbau Gam)

5. Lahtaw Hkun Sam + (Nhkum Ja Bu hte Labya Htu Sam)

6. Lahtaw Zau Shan (n-nga mat)

7. Lahtaw Nang Grawng + (Slg. Bwilap Naw Awng)

8. Lahtaw Nang Lum

Hpaji Sharin wa ai Lam

Shawng Daw na Hpaji Saharin Ladaw

Sara Kaba a asak 9 ning, (11/5/1941 ning) kaw nna Nambaw Jawng hpaw hpang ai hte, Nambaw Buga Hpung a Hpt. Ndau La a dum nta kaw shanu machyu let Nambaw Jawng kaw jawng kaji lung hpang sai hte Myen mung hpe Japan ni bai up ai (1945 ning) du hkra hpaji tsang masum awng la sai. Sara Kaba a shawng ningnan na Jawng sharin Sara gaw, Sara Hkaraw Naw rai nga ai. (Sara Hkaraw Naw gaw, laika tsang masum (class 3) sha awng ai wa rai nga ai, Hpt. Hkaraw Naw gaw, Sammung kaw nna Jinghpaw Mung de hawt lung wa ai hpang, Mugaung, Htingnai Ginwang, Namsheng Buga a Hpungtau amu hta shaning law law, si ai ten du hkra ap nawng wa sai Hpungtau Usa mung rai nga ai).

Dai hpang, Nam Hkam Jawng kaw nna, tsang 7 (class 7) awng sai Sara Ndau Naw, Nambaw Jawng de sharin sara hku bai wa ap nawng ai hte sharin hkam la lu sai. Sara Nadau Naw Sara Kaba hpe kanau majing zawn grai tsawra ai hte hpaji munu tai wa na hpe grai myit mada let, shi nan hpaji sharin ya, lam madun ai hte karum madi shadaw la ai, kahpu Bawk rai nga ai. Sara Kaba Gum Se mung, Sara Ndau Naw hpe tsawra ai hte galoi mung grai chyeju dum ai lam tsun hkai let masat masa galaw ai kahpu Bawk rai nga ai. Sara Nadau Naw a kasha ni hte mung dai ni du hkra Sara Kaba Gum Se hte nta masha ni gaw hpunau makyit sumri nrun ai sha matut manoi htinglup htingshang, mahku mara hku hkau nga dingyang rai nga ai. Nambaw Jawng kaw tsang masum (class 3) awng hkra (1941–45 laman) hpaji sharin hkam la lu sai. Raitim, majan a majaw kaga Jawng kaba ni pat da ai a marang e, Nambaw Jawng kaw sha tsang masum (class 3) hpe lahkawng ning bai kahtap lung kau ra mat sai. Sara Kaba a asak shi ning daram hta chyinghkai kanu Du Jan Nhkum Ja Hkawn gaw, Madu Yesu hta yup pyaw mat wa sai.

Dai hpang, 10/5/1946 ning, Jawng kaba ni bai hpaw wa ai hte rau, Nam Hkam kaw nna htawt wa ai Zau Bung Namhpaka Sasana Janwg kaba kaw tsang mali kaw nna tsang sanit (class 4–7) du hkra hpaji sharin hkaja la lu sai. Tsang Kru (class 6) kaw nna, Yangung Kyimintai Myen Buga Hkalup Hpung, Numhpung ni kaw nna Sara Kaba a Jawng lung jarik karum la masai. 1948 ning hta Namhpaka Sasana Jawng kaw nna tsang sanit (class 7) ang ai hpang tsang matsat (class 8) lung ma matu Kutkai mare de Rev. Lahpai Zau Yaw hpang de lung wa sai. Kutkai pa e nhtoi 10 jan sha naw nga yang Maymyo de na Ma Ma Han gaw Sara Gum Se Jawng lung na hte seng nna Sara Lahpai Zau Yaw hpe jak hte shana dat ai.

Dai majaw, 1950 ning kaw nna Maymyo Colgate Jawng kaw tsang matsat (class 8) lung hpang sai. Jawng up gaw Daw Thawer Yee re. Ma Ma Han gaw General Science (Hpung tang Hpaji) sharin ya ai hte, Ma Ma Htela (1947 ning hta du wa ai) gaw madum sumpyi dum shapyaw rai let Sara Kaba Gum Se hpe gaw CE ningbaw lit shatsam sai. 1951–52 Jawng lung shaning hta tsang jahku (class 9) kaw lung nga ai Jawng ma ni Jawng laika madang dep ai ni hpe Matric tsang 10 (class 10) htai na ahkang hpaw da ya ai majaw, 1952 ning hta Sara Kaba mung Martic tsang shi hpe apyaw sha htai awng la lu sai.

Sara Kaba gaw Tsang shi kaw mung grai ningtawn ai madang (three Distinctions) hte awng ai majaw ‘Ningtawn Shagrau’ kumhpa “Gold Medal” hpe mung hkam la lu sai. Tsang shi (class 10) awng ai hpang, Sara Gum Se hpe Dakkasu matut lung na matu Mungmyit Sinli Sam Du (Sam Zaw Bwa) matut karum la na lam mung chyeju hkam la sai. Raitim, dai ten hta Kutkai Chyum Jawng Up rai nga ai Sara Kaba Rev. Lahpai Zau Yaw kaw nna, Kutkai de lung wa na lam shaga dat ai majaw Kutkai de lung wa sai.

Chyum Hpaji Sharin wa ai lam

Sara Kaba Gum Se gaw tsang shi sanpoi awng ai hte Tsi sara wun Jawng (Medical Doctor) lung na matu Shan State (Sammung) de Shan State Stipend shawk ai lu sai hku re. Raitim, Sara Kaba Zau Yaw gaw Sara Kaba Gum Se hpe Tsi Jawng n lung ai sha Sasana Chyum Jawng mahtang lung na matu shatsam ai hte Chyum Jawng Sara tai wa na matu grai myit mada ai lam hkap tsun u ai. Sara Kaba Zau Yaw gaw Sara Kaba Gum Se hpe, “Zinlum Pangmu kaw galaw ai KBC 75 ning Lung Seng Jubili, Trustee Zuphpawg hte Mung Shawa Zuphpawng hta Nang hpe Chyum Jawng lung shangun na lam yawng myit hkrum dawdan, lata da sai re” ngu nna tsun lajin ai majaw Kutkai kaw nga nan mat sai.

Sara Kaba Gum Se gaw, 1951–52 ning a Jawng lung shaning hta BDS (ya na MIT), Yangung Insein de Chyum Jawng sa lung na hpang hkrat mat ai. Dai majaw, Kutkai Chyum Jawng ma ni hpe mahkawn sharin let, Kutkai Buga Hpung kaw mung Hpung Jawng (Sunday School) lit hkam / Jawng up galaw ai hte sasana sara nan yan rai nga ai Sara Kaba Crider hte Ma Ma Crider yan hpe mung Jinghpaw laika hte Jinghpaw ga sharin ya rai Kutkai kaw hkring nga sai.

Dai shaning laman, Sara Kaba Gum Se gaw Sara Zau Yaw nta lu sha let, shana gaw Sara a Sun (ya kasha Lahpai Zau La a nta) e Sara Zau Yaw a kahkau Hkun Myat hte rau yup rai nna Sara nta shanu shingbyi lai wa sai.

Shani shagu Sara Kaba Crider yan hpe Jinghpaw Laika hte ga sharin ya nna, shana de rai jang Sara Kaba Crider gaw Sara Gum Se hpe Chyum Laika Ga Shaka Dingsa hte Ningnan Npawt Nhpang (OT & NT Introduction) hpe bai sharin ya ai kaw nna, Chyum mungga sharin hkam la hpang wa sai.

Sara Kaba Crider gaw Sara Gum Se hpe “Jinghpaw Chyum Sara Kaba tai wa na wa gaw Jinghpaw Chyum Laika atsawm chye ra ai, Jinghpaw Hpung a Labau hkrak atsawm chye ra ai,” ngu tsun ai hte Sara Gum Se hpe Jinghpaw Chyum Laika shawng hkaja shangun na lam zuphpawng kaw hpaji jaw tang shawn sai.

Dai majaw, 1952–53 Jawng lung shaning hta BDS (MIT) Jawng nlu sa mat ai raitim, Kutkai Chyum Jawng kaw mahtang Chyum masa hpaji hpe Jinghpaw hku nna lahkawng ning shawng sharin hkam la hpang wa sai. Kutkai Chyum Jawng kaw lahkawng ning lung ngut ai hpang, 1955–56 Jawng lung shaning kaw nna she MIT (BDS: Willis and Oleando Divinity School, Insein: hpang e Burma Divinity Schol, Ya gaw Myanmar Institute of Theology–MIT) kaw, Jawng shang sanpoi kalang lata awng ai (regular shang ai) hte Karai Masa Hpaji hpe mali ning tup sharin hkam la lu sai.

1959 ning March Shata kaw nna Kutkai Chyum Jawng kaw sharin Sara wa tai let sharin achyin ai sasana magam hta ap nawng dawjau hpang sai. Dai hpang, 1959 October Shata hta Centre Union of Theological Seminary, Kensus University kaw nna jaw shagrau ai B.Th degree hpe hkam la lu sai.

1963 ning hta Hkristan dinghku gaw de la lu na matu Kutkai, Lahkam Kahtawng na Tsi Sarama Tangbau Lum Nan hpe mayu du ni kaw hkungga lara, Wunpawng htung hking hte wa hpyi mahtan da nna, India–Kala Mungdan de Chyum hpaji matut sharin hpung jat sa mat wa sai. Sara Kaba gaw, 1963 ning hta Chyum masa hpaji B.D course hpe India–Kala Mungdan, United Theological College (UTC), Serampor University hta masum ning (1963–66) tup sharin hkam la ngut ai hte Kutkai Chyum Jawng de May shata kaw bai du wa sai.

Sara Kaba Lahtaw Gum Se gaw, India–Kala mungdan a Hkalup Chyum Jawng Kaba rai nga ai Serampore University hta Karai masa Hpaji hpe Jinghpaw Wunpawng myusha ni hta na shawng ningnan labau shang sa lu sharin hkaja la lu ai Jawng ma rai nga ai. Dai hte maren Sara Kaba gaw, Jinghpaw Wunpawng myusha ni hta maigan de shawng ningnan (Further Study Abroad) Chyum Hpaji sa hpungjat sharin hkam la lu ai wa mung rai nga ai. Sara Kaba gaw 1963–66 laman hta UTC kaw nna Diploma Theology (Dip. Theo) hte Jawng gan shangut la ra mat ai. Hpa majaw nga yang, Myen mungdan a up kang mung masa galai shai mat ai majaw rai nga ai.

Myen mung kata General Ne Win woi awn ai rawt malan hyen Asuya a kajawng sha up hkang bang ai sai. Dai majaw, Myen mungdan hte maigan mungdan ni a matut mahkai lam dan di kau hkrum sai hte maigan Sasana Sara / num ni wa mat ra ai zawn, Myen mung Jawng ma ni maigan de hpaji hpungjat sharin na lam ni yawng mung pat mat sai.

Sara Kaba Gum Se gaw, UTC kaw Jawng lung ladaw laning mi naw shangut la ra ai raitim, mung masa galai shai mat ai majaw bai n mai sa mat sai. Dai majaw, Sara Kaba gaw, 1982–83 ta India, UTC Jawng kaw nlu shangut shakre la lu ai B.D Janmau hpe MIT (BDS), Insein, Yangung kaw bai sa lung shangut la ra mat ai re. Dai shaning hta Jawng Up magam bungli hpe Sara Kareng Hting Nan hpe gan galai prai ap da sai.

Sara Kaba Gum Se lung wa ai Serampore University, Hkalup Chyum Jawng Kaba gaw, Hkalup Sasana Sara Kaba Rev. Dr. William Carey hku nna hpaw ninghtan da ai rai nga ai. Sara Kaba Lahtaw Gum Se lam shawng hpaw majen je da ai a marang e, dai ni Jinghpaw Wunpawng myusha ni law law gaw dai Jawng kaba kaw matut manoi Karai Masa hpaji hpe sa hpungjat, sharin hkaja hkam la lu nga saga ai. Grau nna, Sara Kaba shi nan lam madun, madi shadaw laika ka ya ai hte, Sara Lahpai Shawng Htoi (KTCS) gaw UTC Jawng kaba (Sr. Kaba Gum Se shi nan lung wa ai Hpalup Jawng Kaba) kaw M.Th (NT) hpe lung la ngut sai hte Srm. Lahtaw Nang Dim Pri (KTCS) gaw M.Th (OT) lung ngut nna, ya D.Th (OT) lung na hkyen nga ai. Ndai zawn, Sara Kaba Shi nan Karai mungga sharin hkam la lai ai United Theological College (UTC) kaw matut nna Karai mungga hpaji hkaja lu nga sai. Shi a Jawng ma ni hpe yu nna mung Sara Kaba myit n gun lu ai hte myit pyaw myit dik nu ai.

Sara Kaba gaw, Jinghpaw Wunpawng Chyum Dakkasu, Nawng Nang kaw Jawng Up galaw nga ai shaloi mung, 1990–91 laman hta Sara Kaba Rev. Dr. Hkyen Naw hpe Jawng Up gan malai da nhtawm, American Mung, Minnesota Mungdaw, St. Paul Mare na Bethel Theological Seminary Chyum Jawng hta Laning mi tup Chyum Masa Hpaji ‘bai hpungjat ai’ Refresher Course hpe sa lung, sharin hkam la lu sai.

Hkalup Hkam La Ai Lam

Sara Kaba Gum Se gaw, Namhpaka kaw 1948 ning hta Sara Kaba Rev. Labya De a lata hta kamsham hkalup hkam la sai.

Hkristan Dinghku de ai lam

Sara Kaba gaw, 1963 ning hta shi India-Kala Mungdan de Chyum hpaji matut sharin hpung jat sa wa na shaloi, Wunpawng htung hking hte hkrak mayu du ni kaw Num hpyi mahtan da ai mayu kasha Sarama Tauba Lum Nan hte Sara Kaba Rev. Lahpai Zau Yaw a lata hta Kutkai Sword Masat Htingnu kaw 1966 May 14 ya shani Hkungran ga shaka hkam la ai hte dinghku de sa wa sai.

Sara Kaba Gum Se gaw, May shata 14 kaw Hkungran ga shaka la ngut ai hpang, May shata 15 ya shana htunghking nga ai hte maren Mayu du ni hpe lagaw htang shaman hkam la ngut ai hte Myitkyina de KBC a EC hpawng dep hkra lung wa sai. Dinghku nnan de ai raitim, sasana magum bungli hpe madung dat ra mat ai masa lam a majaw, ningrum ningtau jan Sarama hpe Kutkai kaw tawn shakram da let Sara Kaba gaw Nawng Nang Chyum Jawng Up amu hpe wa gun hpai nga ra mat sai.

Sara Kaba a ningrum ningtau Jan. Sarama Tauba Lum Nan gaw, Sig. Tauba Hawng Lum hte Jan. Zahkung Nang Htang yan a shayi sha rai nna, 1939, April 5 ya hta Nam Hkam Tsirung kaw shangai wa ai rai nga ai. Sarama mung ningja rawng ai, atsam pring ai ningrum ningtau rai nga ai. 1962–64 ning laman, Taunggyi kaw Nursing hte Midwifery jawng lung la ngut sai. Dai hpang, 1964 ning June Shata kaw nna 1967 ning du hkra, Kalaw Tsirung kaw tsi shamai shatsai ai magam gun hpang sai.

Hkungran dinghku de ngut nna, Sara Kaba hte tsan gang ai shara hta du nga ai raitim, masha asak hkye ai shamai shatsai ai sasana magam bungli hta grai shakut ai hte shang lawm dawjau lai wa sai. Dai hpang, 1968 ning hta Myitkyina Tsirung kaba hta tsi magam bai htawt gun lu sai. 1970 ning hta Myitkyina PaLaNa Tsi gawk de bai ang sai. Dai hpang, Sadung Tsi gawk, bai wanleng lam Pinbaw Tsi gawk, Waimaw Tsirung ni de lit sha ang hkrum ai shara shagu de n ning dang ai sha sa ap nawng daw jau lai wa sai re.

Ya ten hta gaw asak hpring nna, hkringsa sai hte (ya pinsin la ai 20 ning du sai hku re) ningrum ningtau Sara Kaba hpe karum let n gun jaw, tsi gawn lajang ai gaw daini du hkra rai nga ai.

Nshang Hkrat Kasha hte Kashu ni

Sara Kaba hte Sara Jan Sarama yan hpe Karai Kasang shaman ya ai shayi shadang sha ni marai (4) hte kashu ni yawng marai (7) hpe hkam la lu sai.

1. Srn. Lahtaw Ja Nu hte Kahkri Slg. Malut Zau Hpan

   Kashu ni:

   • (1) Dr. Malut Seng Awng + Jan Ulai Doi Pan

   • (2) Malut Seng Tawng

   • (3) Dr. Malut Naw Tawng

   • (4) Malut Ja Nan Lu

2. Shd. Lahtaw Hkun Seng (N-nga mat)

3. Shd. Lahtaw Zau Awng (N-nga mat)

4. Dr. Lahtaw Zau Ring hte Kanam Sm. Maran Ja Seng Lung

   Kashu ni:

   • Lahtaw Nang Seng Mai

   • Lahtaw Nang Bawk Seng

   • Lahtaw Zau Hkun Nan

Galaw Gunhpai lai wa sai Sasana Magam Bungli ni

Kutkai Chyum Jawng hta ap Nawng Dawjau ai hte Jinghpaw Wunpawng Chyum Jawng a Shawng Lam Masing Jahkrat ai Lam

Sara Kaba gaw, Chyum Jawng nlung shi ai aten kaw nna Kutkai Chyum Jawng ma ni hpe mahkawn sharin ya let, Kutkai Buga Hpung kaw Hpung Jawng (Sunday School) lit hkam, Jawng up shawng galaw lai wa sai. Chyum Jawng lung ai hpang e mung Jawng ma tai let ten chyen sharin sara mung galaw lai wa sai. 1952–1963 shaning laman hta, Sara Kaba gaw maigan sasana sara yan rai nga ai, Sara Kaba Crider hte Ma Ma Crider yan hpe shawng ningnan Jinghpaw laika hte Jinghpaw ga sharin ya sai.

Sara Kaba Crider hte Ma Ma Crider Manmaw kaw nau kahtet ai majaw Kutkai Chyum Jawng de du wa ai rai nna, Sara Kaba hte Ma Ma hpe Jinghpaw laika hte Jinghpaw ga sharin ya ai hte, Sara Kaba Crider gaw Sara Kaba Gum Se hpe Enlik (English) Chyum Laika sharin ya sai. Sara Kaba Crider a Assistant (Ningtau) hku nna mung Sara kaji tai lai wa sai. Sara Kaba Crider sharin ai sharin lakjet, Laban Jawng Sharin laika (Sunday School Lesson) ni yawng hpe mung English kaw nna, Jinghpaw laika hku gale ka da lu sai.

Sara Kaba Crider English hku hkaw ai mungga ni hpe mung Jinghpaw hku ga byan ya ai hte Ma Ma Crider English hku ka shapraw da ai Choir-Senhkum ni hpe mung Jinghpaw hku ga gale nna dip shapraw da lu sai. Ma Ma Crider a Music Assistant (Ningtau Music Hpa-awn) mung tai lai wa sai (Ma Ma Crider gaw Master of Music Janmau lu da ai wa rai nga ai).

Sara Kaba gaw, Kutkai Chyum Jawng a rung gawk kaw mung, aten pring (Rung up/rung chyare zawn) ap nawng gun hpai lai wa sai. Dai ten na Sara Kaba a shata shabrai gaw lap 15 rai nga ai.

Dai hpang, MIT de Chyum Jawng lung ngut nna bai wa ai shaloi mung Kutkai Chyum Jawng kaw sharin Sara hku nna April 1959 kw nna 1963 du kra (4 ning: 1959–63) ap nawng dawjau lai wa sai. Sara Kaba gaw MIT kaw Chyum Jawng ngut nna du wa ai hpang, 1961 ning kaw nna, Jinghpaw Wunpawng Chyum Jawng, Kutkai a ‘gaw da ai Tara’ ni hpe jahkrat lu sai hte dai gaw da ai Tara hta Hpaji Up san da na matsun mung bang shalawm da lu sai (Dai ten na Myen mung ting a Chyum Jawng ni hta Hpaji Up san da ai lam hte, matsun pyi n nga shi ai ten re).

Dai hte maren, Chyum Jawng a gaw da ai Tara ni hpe shagrin la ngut ai hpang Sara Kaba shi nan Kutkai Chyum Jawng a ‘Hpaji Up’ lit hpe 1961 ning hta shatsam hkrum sai. Hpaji Up a magam lit gaw, Chyum Jawng kaw na sharin achyin ai hpaji masing (Curriculum) ni woi gran na hte Chyum Jawng a shawng lam galu kaba lam masing woi jasat na matu rai nga ai.

Kaga Jawng hte n bung ai, Jinghpaw Wunpawng Chyum Jawng ma ni gaw, Chyum mungga hte kapyawn nna, galaw lu galaw sha bawngring hpaji rawt jat galu kaba wa hkra masing lu galaw shabra ai hte masing jahkrat woi-awn chye ai sagu rem kaja ni law htam jat wa na myit mada nga ai.

Dai majaw, Chyum Jawng kaw nan hkum dingnum bawngring hpaji sharin ya sai.

Ga shadawn:

• Hpung woi hpaji

• Hkam kaja lam hte seng ai tsi hpaji

• Hkrai rem hpaji

• Ta sama hpaji

• Jawng sara tai hpaji

• Lata hpaji

• Dinghku hte seng ai sumpan rep chywi

• Shadu lu shadu sha hte seng ai hpaji

ni hpe Chyum Laika hte kapyawn nna sharin ya sai.

Grau nna, Hpaji Up Sara Kaba Gum Se hte Sasana Sara Kaba ni bawng ban jahkrup da ai lam hta

1. Jinghpaw Mungdaw de Chyum Jawng bai Hpaw jat mat wa ai shaloi,

   Kaga Nawku Hpung masha ni hpe mung anhte a Chyum Jawng kaw Karai Mungga sharin hkam la na ahkang hpaw da na lam hte,

2. 1970 ning hpang nhkrat ai sha Nawng Nang Chyum Jawng pe lapran tsang kaw nna,

   Lahta tsang madang de sharawt sa wa na lam hte B.Th (Bachelor of Theology) jaw ai Chyum Dakkasu madang de lawan sharawt sa wa na lam ni rai nga ai.

Raitimung, Chyum Jawng wang nnan gawgap ra ai lam, Hpaji Up Sara Kaba Gum Se shi nan mung India-Kala mung de Chyum Hpaji bai hpungjat sa mat wa ra ai hte, maigan Sasana Sara Kaba ni mung tinang a mungdan de bai wa mat ra ai lam ni hte mung masa lam ni a kajawng sha galai shai mat wa ai lam ni a majaw, Chyum Dakkasu masing hpe lawan ai hku hkrang shapraw mayu ai raitim, nmai byin mat sai. Dai hpang, masing jahkrat da ai shaning 20 hpang e, 1990 ning June Shata 25 ya hta she Myitkyina Nawng Nang kaw, Jinghpaw Wunpawng Chyum Hkawlik hpaw hpang wa lu ai lam rai nga ai.

Dai hta sha n ga, Sara Kaba gaw, 1960–1963 (3 ning) laman Sammung Ginwang a CE (Dai ten na shakut sharang hpung) Amu Madu mung galaw lai wa sai. Dai ten na CE ngu ai hpe hpang e “Hkalup Ramma Kanawn Mazum Hpung (BYF)” ngu nna bai galai hpaw ninghtan da lu sai. Sara Kaba a dai ten na magam gun shata shabrai gaw lap 50 re. Grau nna gaw, dai ten hta Myen Mungdan kata hta Bukda makam hpe mungdan nawku htung shatai na masing jahkrat ai kaw nna mung Sara Kaba gaw shi nan Amu Madu tai let woi shang lawm ai hte ninghkap gasat wa sai.

2. Jinghpaw Mungdaw, Jinghpaw Wunpawng Chyum Dakkasu, Nawng Nang hta Ap Nawng Dawjau ai Lam

1966 ning hta Jinghpaw Mungdaw, Myitkyina Nawng Nang mare kaw Chyum Jawng hpaw hpang ai gaw, Kutkai Chyum Jawng hpe Nawng Nang de htawt sit kau ai n re. Jinghpaw Mungdaw hta Chyum Jawng langai bai hpaw jat la ai lam she re hpe Sara Kaba shi nan sang lang da sai. Jinghpaw Wunpawng Chyum Jawng gaw Myen mungdan a lahta daw de shawng ningnan hpaw hpang ai Chyum Jawng rai nga ai. Dai majaw, Kutkai Chyum Jawng a sharin Sara yan rai nga ai Sara Lahtaw Gum Se hte Sara Kareng Hting Nan gaw Nawng Nang Chyum Jawng de shawng nnan sharin Sara hku nna lit wa garan gun ai yan rai nga ma ai.

Raitim, Jinghpaw mung de Chyum Jawng hpaw jat ai hpang nmyit mada ai mung masa galai shai mat wa ai majaw, maigan Sasana Sara Kaba ni tinang a mungdan de wa mat ra sai.

Sasana Jawng ni yawng Myen mung Asuya ni zing la kau ai hte, sut masa dap ni yawng hpe mung Asuya sut dap hku tek jum kau ai majaw, alu gumhpraw shang/pru jai lang ai lam hta dut tang ai hte grai yak mat ai ten hta Sara Kaba Jawng Up galaw lai wa sai.

Ndai zawn alu ja gumhpraw yak hkak mat ai ten hta, KBC Ginjaw kaw nna gaw Chyum Jawng lahkawng yan hpe lit la madi shadaw na lam n dang mat ai majaw, Chyum Jawng lahkawng yan hpe Nawng Nang e shara mi kaw sha pawng kahkyin kau ra wa ai hte, 1967 ning hta KBC rapdaw kaw nna Nawng Nang Chyum Jawng hpe sha lit la na lam myit hkrum daw dan sai.

Sara Kaba gaw 1966 (April hta Lashio kaw nbyin mat ai) Myitkyina kaw galaw ai Hpung Shawa Zuphpawng Hpawng kaw nan, Nawng Nang Chyum Jawng Up galaw na matu lata san da krum sai. Sara Kaba gaw, May Shata 29 hta Gies Nawku Htingnu kaw galaw ai KBC EC hpawng a mythkrum dawdan minute hte maren, 6 June 1966 (6/6/1966) hta Jinghpaw Wunpawng Chyum Jawng, Nawng Nang kaw hpaw hpang ai hte rau Sara Kaba gaw aten hpring Jawng Up magam bungli hpe shawng numshawn shaw galaw hpang wa sai.

Sara Kaba a dinghku mung nnan sha naw de hpang wa ai hte, Chyum Jawng mung ningnan hpaw hpang wa ai re majaw, lam shagu hta Sara Kaba hkrum sha ai yak hkak jamjau ai tsinyam ni gaw tsun ndang, ka nma rai nga ai. Hpung masha ni yawng mung nam rawng rawng ra ai ten, mungdan Asuya mung lam shagu guji guyang (majap, shaba, mahkrisum du hkra Asuya ni tek jum ai ten re) yawng hpe magra tek jum da ai ten re majaw, Nawng Nang Chyum Jawng gaw Inghtawngsu pyi nmai lu ai aten rai nga ai.

Jawng ma ni hte sharin Sara ni yawng mung grai yak ai ten, lu na sha na matu grai myit pu ba ra nga ai. Dai majaw, Langu pawt hkrai krau sha ra ai ten mung rai nga ai. Dai ten hta, Hpt. Hkang Tsen Tu gaw Shi a langu byap ni Jawng ma ni hpe alu jaw ai hte lusha a matu karum la ai hpe grai chyeju dum nga ai.

Nawng Nang Chyum hpaji sharin hpang ai lam hpe Shawng ningnan Gies Nawku Htingnu shingdu na (Madu a Shana Lusha Poi lajang ai) gawk kaji kaw Jawng ma marai masum (3 marai) hte hpaw hpang wa sai. Dai hte maren, Sara Kaba Lahtaw Gam gaw Mare Buga shagu hkan kawan hkawm nna Chyum Jawng ma hkan lahkawn ai majaw, Jawng ma 23 bai du wa ai. Dai hpang, Chyum hpaji sharin ai lam hpe Nawng Nang de htawt lung wa sai. Raitim, laika sharin gawk, shat gawk nlu ai majaw grai yak hkak lai wa sai.

Jawng ma ni nga na matu nta lahkawng sha naw gap ngut ai, langai kaw Jawng la ni nga, bai nta langai kaw Jawng num ni nga ma ai. Jawng num ni nga ai nta kaw Sara Kaba gaw gawk kaji langai hta nga, Jawng num ni gaw gawk kaba lahkawng kaw nga ai hte, Sara Kareng Hting Nan gaw dawdap kaw yup rai nna, laika sharin gawk nlu ai majaw, hpun pawt kaw laika sharin shara shatai lai wa sai. Shat gawk mung nlu shi ai majaw, hpun pawt kaw sha shat shadu sha let gawgap magam bungli hpe galaw hpang wa sai.

Nawng Nang Chyum Jawng hpaw hpang wa ai ten kaw nna, Hkristu a hyen ma myit rum manang kaja tai let, Nawng Nang Chyum Jawng a sharin Sara hku nna sharin achyin ai sasana magam bungli hta myit lawm hkum lawm shang lawm ap nawng dawjau ai hte shingdep shingtau tai lai wa sai.

Sara Rev. Kareng Hting Nan hpe mung nachying wa chyeju dum ai lam, Sara Kaba a sasana prat krun lam labau hta shagrau masat masa da nga ai hpe mu lu ai. Jinghpaw Wunpawng Chyum Jawng hpe, Jinghpaw Mung Myitkyina Nawng Nang kaw shawng nnan hpaw hpang wa ai shaloi, Myen mungdan hta Ne Win Asuya lung wa ai hte up hkang masa ni mung wa galai mat ai aten rai nga ai.

Myen mung na Sasana Jawng ni yawng hpe mungdan Asuya zing la kau nna, Asuya Jawng shatai kau ai hte, maigan Sasana Sara/num yawng hpe mung tinang a mungdan de wa na matu gawt kau sai. Sasana Jawng hta ap nawng nga ai Jawng Sara ni hte Buga Hpung hta ap nawng nga ai Hpungtau ni mung, mung masa Jawng lung la nna, mung masa Asuya bungli san san sha mai galaw mat ai (Nawku Hpung a makam masham lam hte Sasana bungli ni hta n mai shang lawm mat sai) ten rai nga ai.

Grau nna, Jinghpaw mung kata kaw up hkang nga ai hpyen du kaba, mung du kaba ni kaw mung, law law lang myit shanem let hpyi lajin lanoi ra ai ten ni lai di wa sai. Bai Hpung masha ni hpe yak hkak ai lam ni tang madun nna, Boarder Jawng ma ni hte Sara dinghku ni a nga shara hte lusha, lang rai ni (di mala, hkawan, n-gu, jum, sau, shapre, hpun palawng ni) akroi anoi karum hpyi lajin ai hte lai di wa sai.

Dai majaw, Chyum Jawng Nawng Nang kaw wa hpaw hpang ai ten ndai zawn yak hkak ai lam ni hkrum kadup ai hte ram ram wa jam jau kaba hkrum lai wa masai.

Grau nna, 1967 ning hta gaw yak dik htum ai shaning rai sai. (1967 ning hta sha Sara Majai La Ja hte Sara N Ngai Gam dinghku ni mung Nawng Nang de bai htawt lung wa masai). 1968 ning kaw nna she mahkrun masa lam kaja loi li hpaw wa ai majaw, nsa tsawm ra mi lu sa awai la ai re. Ndai zawn re mahkrum madup mayak manghkang ni hpe yu nna mung, Nawng Nang Chyum Jawng ma ni hpe Chyum Laika sha nrai hkum dingnum hpaji sharin jahpat na masing jahkrat ai hte sharin ya sai (Hkai rem hpaji, Music hpaji hte kaga).

Sara Kaba gaw dai ten na KBC a magam gun ladaw term masum (term langai hta masum ning), jahku ning (3 × 3 = 9) hpring jang hkring ra ai raitim, Karai Kasang gaw Sara Kaba hpe matut manoi term jahku (term 9: 3 × 9 = 27) jai lang akyu jashawn la sai. Dai hte maren, Karai Kasang a chyeju san san hte sha Nawng Nang Chyum Jawng a Jawng Up amu magam hta shaning 27 ning tup (Term 9: 1966–1993) hte, karum Jawng Up amu magam hpe masum ning (3 ning: 1994–97) tup ap nawng dawjau lu sai majaw, Shi hpe jai lang ai Karai Kasang hpe mung Hpung masha ni yawng hpe mung nachying wa chyeju dum ai lam ka masat da nga ai.

Dai hpang 1993 ning hta, Nawng Nang Chyum Jawng gaw Chyum Hkawlik madang de rawt jat wa sai hte Sara Kabamung asak 60 ning hpring sai majaw Jawng Up magam bungli kaw nna hkring sa sai rai. Sara Kaba gaw Kutkai Chyum Jawng kaw mung mali 4 ning aten hpring ap nawng sai re, majaw Nawng Nang Chyum Jawng kaw 30 ning rai yang gaw aten pring sharin Sara hku nna ap nawng ai ladaw shaning 34 ning tup rai nga ai. Dai hta sha n ga, aten chyen sharin Sara hku nna ap nawng ai gaw 1952 ning Kutkai kaw Jawng ma tai let, sharin sara mung tai rai sharin karum ai kaw nna rai nga sai.

Nawng Nang Chyum Jawng kaw mung Jawng Up bungli kaw nna kring ai 1993 ning a hpang daw de mung aten chyen Sharin Sara hku nna ap nawng lai wa sai re.

Jinghpaw Wunpawng Chyum Dakkasu Byin Hkra Woi Jasat/Shakut Sai

Sara Kaba gaw, Chyum Jawng Up magam amu hpe gun hpai nga ai ten hta Baptist School Association a bawngban zuphpawng de mung shaning shagu sa du shang lawm ai. 1978 ning kaw nna, Nawng Nang Chyum Jawng hpe Chyum Dakkasu masing jahkrat let myit woi sharawt ai hte hkrang shapraw sa wa sai. Dai zawn, Chyum Dakkasu masing hpe shaning 15 ning laman KBC shingwang, jut shara shagu de Sara Kaba shi nan tatut hkawm sa nna, myit sharat hkaw tsun ai lam galaw lai wa sai.

Dai hpang 1990 ning June 25, Nawng Nang Chyum Jawng hpe Chyum Hkawlik madang de shatsaw sharawt woi hpaw ninghtan da sai. Dai hpang 1993 ning June 1 (1/6/1993) kaw nna gaw, Jinghpaw Wunpawng Chyum Hkawlik a Jawng Up magam bungli hpe Dr. Rev. Saga Hkyen Naw hpe lahpa galai lit ap ya sai. Jawng Up nnan Rev. Dr. Saga Hkyen Naw matut nna, Chyum Jawng a galu kaba lam hpe, Jawng Up Sara Usa, Sara Kaba Gum Se kaw hpaji hpyi san ai hte matut nna woi awn sai. Dai hte maren, Rev. Dr. Hkyen Naw gaw aten hta Chyum Jawng hpe matut nna ra ahkyak dik ai gawgap lam ni hpe woi galaw ai a marang e, 1994–2010 laman hta grai ra ahkyak nga ai.

Lahpai Zau Tu Laika Dum, AD 2000 Gawknu Kaba, Main Building kaw Jawng a magam gun sharin Sara/num ni nga ai dum nta ni hte Jawng Up nga na nta ni hpe woi gawgap lu ai hte Chyum Jawng gaw lani hte lani rawt jat wa ai hpe mu lu nna mung Sara Kaba Gum Se grai myit pyaw nu ai.

Grau nna, 2015 ning hta, Sara Kaba shi grai myit makun nga ai Jinghpaw Wunpawng Chyum Dakkasu hpe Rev. Dr. Nalaw Dai Hkawng Jawng Up bai galai ai aten hta kalang bai madang shatsaw hpaw ninghtan la lu sai, hpe myi chyaw mu lu ai sha n nga Shi nan mung shang lawm da lu sai.

Sara Kaba Gum Se gaw Nawng Nang kaw hpaw ai Jinghpaw Wunpawng Chyum Jawng hta, Jawng ma ni hpe hkum dingnum sharin ya na hpe myit makun let masing kaja ni jahkrat da ya sai. Sara Kaba tsun ai, masing kaja ni jahkrat da ya sai. Sara Kaba tsun ai, Chyum Jawng kaw Chyum Laika sha woi hti, research/thesis ni sha woi ka chyai, theology laika buk ni sha woi hti shabri ai hte sha n mai ai. Chyum Jawng gaw lama ma hpe gyin sha lat ai - Creative masa/atsam lu hkra shakut ra ai. Karai masa Chyum laika hte kapyawn nna, hkrang pan hpaji, Music hpaji, computer hte hkai rem bawngring hpaji, hte kaga hpaji hte kaga hpungtang hpaji (Technology) ni hpe atsawm hkrak rai sharin ya na masing jahkrat da sai. Dai hte maren, 2013 Jawng lung shaning kaw nna, Jinghpaw Wunpawng Chyum Jawng hta BATS (Bechelor of Arts in Theological Study: Music, English, Computer, Bawngring/hkai rem hpaji ni hpe sharin ai) Janmau jaw ai lamang hpe Jawng Up Sara Kaba Rev. Dr. Nalaw Dai Hkawng woi awn let hpaw hpang lu sai hku re. Sara Kaba Gum Se gaw, Shi nan lai wa sai shaning law law kaw nna myit shingran mu let masing jahkrat woi shakut ai hte maren, Jinghpaw Wunpawng Nawng Nang Chyum Jawng gaw lani hte lani rawtjat galu kaba wa ai hte, Sara Kaba shi myit shingran da ai lam ni dik tup wa ai hpe mu lu ai majaw, Karai Kasang a chyeju hpe shakawn shagrau let, grai myit payw myit dik nu ai. Matut nna, Sara Kaba gaw Jinghpaw Wunpawng myusha ni Shanglawt lu ai hpe mung mu da mayu ai hte maren, byin wa na re ngu kam ai.

4. Maigan Sasana Sara ni hte Hkau Chyap ai Lam

Sara Kaba gaw maigan Sasana Sara ni yawng hte grai hkau chyap ai hte sasana magam bungli hta mung shanhte hte ta gindun let grai shakut lai wai sai. Sara kaba hkrum tsup kanawn mazum kuhkau lu ai maigan Sasana Sara/num ni gaw, Ma Ma Elisbet Htela, Ma Ma Han, Sara Kaba Donald M.Crider yan Ma Ma Crider, Ma Ma Love Fling, Ma Ma Boney, Sara Kaba England, Sara Kaba Herman G. Tegenfeldt ni hte kaga sasana sara ni law law rai nga ai. Sara kaba England gaw bawngring hte hkawtsun sasana sara rai nga ai. Myitkyina kaw Sasana galaw nga ai Saranum Kaba Ma Ma Love Fling hte mung choir rau mahkawn let CE bungli hta rau jawm shakut lai wa sai. Sumpra Bum kaw sasana galaw nga ai Ma Ma Boney hte mung, 1958 ning hta hkrum ai hte grai hkuhkau sai. Myitkyina de hpang jahtum du hkra ap nawng ai Sara Kaba Herman G. Tegenfeldt hte gaw Sara Gum Se shi Kutkai e Jawng naw lung nga ai ten kaw nna, Nawng Nang Chyum Jawng kaw mu gun ai shani du hkra grai hkuhkau ai hte magam amu hta mung rau shakut shaja wa sai. Sara Kaba Gum Se India mungdan e Jawng lung ai kaw nna bai du wa ai shaloi, Yangung nbungli daru (Rangoon Airport) kaw sa tau la ai mung Sara Kaba Tegenfeldt rai nga ai. Ndai zawn, maigan Sasana Sara/num ni law law hte hkau chyap lu ai majaw, Sara Kaba Gum Se gaw hkum dingnum sharin hkam la lu ai hte, Sasana Sara/num ni a sasana myit jasat hpe grau grau yu la, mu la, sharin la ai majaw Jinghpaw Wunpawng myusha ni a shawng lam hpe grau grau mu mada chyena hkawn hkrang wa sai.

5. Chyum Jawng Ma Karum Gumhpraw Woi Mahkawng Hpang sai (KTCS Scholarship Founder)

Sara Kaba Gum Se gaw, Jinghpaw Wunpawng Chyum Dakkasu, a Chyum Jawng ma karum gumhpraw- scholarship fund hpe shawng ning nan woi myit shapraw ai hte tatut hkrang shapraw woi galaw hpang da lu sai. Ndai KTCS Scholarship hpe Sara Zinghang Tu Nan a mying hte 1983 ning, Chyum Jawng 50 Ning Hpring Ja Jubili (Nawng Nang kaw galaw ai) hta myit sharawt hpang wa ai re. Shawng ningnan Hpung shawa kaw nna Jubili ten hta jaw bang ai alu/fund mun masum (Ks. 30000) daram hpe lu mahkawng da lu sai. Raitim grai nlaw ai majaw, Sara Kaba Gum Se a nta masha ni hte Sara Zinghang Tu Nan a nta masha ni, alu jaw bang ai hte shang lawm ai hku nna 1983 ning hta KTCS Scholarship hpe hkrak hpang da ai lam rai nga ai. Dai ni na ten hta KTCS Scholarship hpe Chyum Hpaji bai hpungjat sa ai KTCS a sharin Sara/num magam gun ni akyu hkam sha nga sai (Master Study ni sen 40 & Doctoral Study ni sen 50). Ya gaw, KTCS Scholarship Fund hpe Sara Kaba Gum Se a kasha, Srm. Lahtaw Ja Nu woi awn let grai masan sa ai hte awng dang nga sai.

6. Kaga Wuhpung Wuhpawng Magam Bungli ni hta Shang Lawm ai lam

Mare Kahtawng Ningehyang Sasana-Urban Rural Mission (URM) Woi Jasat ai Lam

Sara Kaba gaw, Chyum Jawng magam bungli gun hpai let kaga magam bingli ni hta mung Jinghpaw Wunpawng myusha ni a matu myit let shang lawm shakut shaja lai wa sai. No.2 mungkan majan ngut ai hpang, shinggyim wuhpung kata hta mayak mang hkang lam, lusha buhpun lam hte nga shara lam amyu myu hpe bai gram lajang, lakawn la na matu, Asia dan de WCC (World Council of Churches) kaw nna woi hpaw ninghtan da ai Mare Kahtawng Ningchyang Sasana-Urban Rural Mission (URM) hta shang lawm woi awn sai. Shawng ningnan URM hpe 1978 ning hta Nawng Nang Chyum Jawng kaw shawng hkap la ai hte woi awn jasat sa wa sai. Dai hpang, shaning shagu awng pru Chyum Jawng ma hta na marai mali (marai 4) lata la nna, Yangong de shangun dat ai hte URM hte seng ai hpaji sa sharin hkam la shangun sai. URM hpe woi awn ai lam hta Sara Kaba shi nan mung tatut shang lawm ai hte, Uru Seng Maw (Hpakant) de nga ai shawa num, kani ya zawn re ni hpe wa hkrum shaga let mahtai tam nna, Yangong de nga ai URM Ginjaw rung de tang shana sai. Dai majaw, URM hpe 1993 ning kaw nna, "Kachin State Working Committee" ngu nna laksan hku bai woi hpaw ninghtan da lu sai. Ndai URM hpe shawng ningnan Sara Kaba Gum Se shi a nta Yan Gyi Awng kaw nan hpaw ninghtan da sai rai nna, shawng daw de Hkalup Hpung (KBC) hte Roman Catholic (RC) ni sha shang lawm raitim, ya hpang daw de gaw Nawku Hpung jahku (9) du hkra dam lada ai hku jasat sa wa lu sai. Ndai wuhpung wuhpawng hpe dai ni na ten hta "Kachin State URM" ngu nna Hpung kaba langai hku bai hpaw sa wa lu ai hte 1993 ning kaw nna, daini du kra Sara Kaba shi nan shang lawm ai hte woi awn nga ai re. URM a yaw shada ai lam gaw, hkailu hkaisha, remlu remsha ai bawngring magam bungli hpe madung dat sharin ya ai hte tatut galaw sha na matu rai nga ai. Grau nna, URM a marang e bumga na myusha ni mung layang ga na ni hte maren hkairem hpaji hta kungkyang wa ai hte, madang tsaw ai hkai rem hpaji ladat nnan ni hte hkrak galaw sha chye wa na matu rai nga ai. Ndai URM a lamu ga ginra dabang ni gaw, Myitkyina, Htingnai, Manmaw hte Waimaw Ginwang ni hta rai nga ai. Dai hte maren, Sara Kaba gaw Myitkyina, Yan Gyi Awng dum nta hta nga nna raitim, KBC kata na Komiti shagu, dap shagu hte Ginwang shagu, Buga shagu hta URM hte seng nna hpaji jaw, sharin lakjet jaw ai hte woi awn dingyang rai nga ai re.

Jinghpaw Wunpawng Htunghking Shingni Jawng: Kachin Institute of Culture and Arts (KICA)

Jawng Up Galaw lai wa sai lam

Sara Kaba Lahtaw Gum Se gaw, Jinghpaw Wunpawng myusha magam hte Htunghking ngang grin nga lu na matu, Sut Du Yup Zau Hkawng hte bawngban jahkrup sai. Dai hpang, Jinghpaw Wunpawng Htunghking Shingni Jawng (KICA) hpe 2001 ning hta woi awn hpaw hpang ai hte shawng nnan na Jawng up magam lit hpe kru ning (6 ning: 2001-2006) lit la woi awn lai wa sai re.

7. Kaga Ahkyak ai Magam Bungli Ni hta Woi Awn

Shang Lawm wa sai Lam

- Sara Kaba gaw, laika buk law law n lu ka shapraw da ai raitim, Buga, Ginwang saw shaga ai shara shagu de sa nna, Chyum mungga hte lakjet jaw sharin ya ai hte laika ngau-artical ni law law ka ai hku nna dawjau lai wa sai. Sara Kaba ka shapraw da lu ai Laika ni;

1. Jinghpaw Wungpawng Chyum Jawng (Kutkai & Nawng Nang) a 'Gaw da ai Tara' ni hpe woi ka hpang wa ai hte lang hte lang woi gram lajang lu sai.

2. KBC a 'Makam Hkridun' ka shapraw ai lam hpe kaga magam gun ni hte rau (Rev. Dr. Maran Ja Gun, Rev. Dr. N Gan Tang Gun, Rev. Dr. Sabaw Sin Wa Naw, Rev.Dr. Saga Hkyen Naw) shang lawm ka lajang da lu sai.

3. "Mungkan a Nawku Htung Amyu Myu" ngu ai Laika buk hte "Anhte a Awng Padang Yehowa Karai Kasang" ngu ai laika buk ni hpe mung ka shapraw da lu sai.

- KBC 'Masum Ning Masum Tsa Sasana' masum ning galaw sa wa na masing (1978-1981) hta, shaning shagu (3 ning ting) na Ga baw hpe myit shapraw woi jai lang ai hte shang lawm sai. Dai Ga baw ni gaw: (1). Yesu Hkye La ai 'Jesus Saves' (1978-1979), (2). Yesu Shalawt ai 'Jesus Free' (1979-1980) hte (3). Yesu Kahkyin Gumdin ai 'Jesus Unites' (1980-1981) ni rai nga ai.

- Jinghpaw Wunpawng Chyum Jawng (NN) kaw nna shaning shagu woi galaw shapraw nga ai "Myihtoi Ma" Magazin hpe woi shapraw hpang ai hte, shi nan laika ngau-artical shaning shagu ngu na daram shakut ka bang da lu sai.

- Jinghpaw Wunpawng Chyum Jawng Ma Dingsa Hpung (KTCS Alumni) hpe 1995 ning hta galaw ai Mandalay, Awng Panglai kaw galaw ai Jinghpaw Laika lu la ai 100 hpring Laika Jaw Poi hta Sara Kaba Gum Se gaw, Jawng Up Sara Kaba Rev. Dr. Saga Hkyen Naw hte bawngban jahkrup nna woi hpaw ninghtan da lu sai.

- Sara Kaba gaw, 1983 ning hta, Jinghpaw Wunpawng Chyum Jawng 50 Ning Hpring Ja Jubili hte Hkalup Hkam ai 100 Ning Hpring Jubili Poi Kaba hpe mung, Myitkyina Nawng Nang pa hta grai shakut let woi awn galaw lai wa sai.

- Sara Kaba gaw, 1995 ning hta Mandalay, Awng Panglai kaw galaw ai, Jinghpaw Laika lu la ai 100 Ning Hpring Jaw Poi hta mung, December 25 ya shani na Jubili Program lamang kaba hpe grai hkrak ai hku woi awn sai.

- Jinghpaw Wunpawng Chyum Jawng hpe Chyum Dakkasu byin tai wa lu hkra masing woi jahkrat ai hte Mungkan kaw nna masat masat galaw ya na mahkrun mung woi tam sai. Dai hte maren, Association for Theological Education in South East Asia (ATESEA) 'Sinpraw Dingda Asia Dan Chyum Jawng hta tara shang, Hpung shang hku nna lawm lu na matu mung (Member) jep dinglik hkam let woi matut da sai re.

Shagrau Sha-a Hkam la ai lam ni

1. MIT, Yangung, Insein kaw na shagrau ai FDCS (Fellow of Distinguished Christian Service) "Hpung Magam hta Laklai Ningtawn ai hku Dawjau ai" ngu ai shagrau sha-a lam hpe shawng na pang hta shagrau hkam la lu sai.

2. Sara Kaba Rev. Lahtaw Gum Se gaw, 2008 ning March Shata 29 ya, KTC Nawng Nang Chyum Jawng hta galaw ai 75 Ning Hpring, Lung Seng Jubili hte 58 lang na Jinghpaw Wunpawng Chyum Hkawlik a Jawng Yu Poi Kaba hta Chyum Hpaji Munu, Doctor Janmau - Doctor of Divinity (D.D) Janmau Degree hpe mung Jinghpaw Wunpawng Chyum Hkawlik (KTC, Nawng Nang) kaw nna shagrau ai hpe hkam la lu sai.

Kasi La Mai ai Lam Ni

1. Makam Masham Wenyi lam hta

Sara Kaba gaw, makam wenyi lam hta e Chyum Mungga/Laika hpe nan npawt hkrindun shatai let Jinghpaw Wunpawng myusha ni hpe woi awn zin lum ai wa rai nga ai. Sara Kaba a wenyi makam gaw galoi mung kri dung nga ai hte nta dinghku masha ni hpe mung dai makam wenyi hte woi awn zinlum sai.

- Sara Kaba gaw masu magaw, gumlau gumle, manawn masham, nju ndawng ai lam galoi n nga lu ai. Mungga hte ding ding hkawm sa, asak hkrung ai wa rai nga ai hte, kasi la mai ai magam gun kaja, Hkristu a kangka sadi dung ai shangun nchyang mayam zawn galoi mung shagrit shanyem ai myit hte Jinghpaw Wunpawng myusha ni hpe dawjau lai wa sai.

- Sara Kaba gaw, tsawra shawang myit grai dam lada ai hte, myit galu kaba ai, pawt ai nsam galoi mu yu ai, mani sumsai myiman hte Jawng ma, hpung masha, magam gun manang ni hpe galoi mung n gun jaw, kasi madun ai wa re. Ga tsun shaga ai lam hta grai si mani ai hte sinpawt lahtep galoi n nga ai, grang ai ga n tsun ai, hte tengman dinghpring lam hpe grai ra sharang ai hte dai lam hta htep lahti hkawm sa ai wa rai nga ai.

- Tinang a matu 'Tinggyeng akyu' n tam ai, masha law law a akyu ara hpe madung dat ai hte shi a prat htum ten du hkra ap nawng dawjau lai wa sai.

2. Myutsaw Mungtsaw Myit Dam Lada ai

- Sara Kaba gaw, shi nan Du kasha re majaw, kaji ten kaw nna, myutsaw myit grai rawng ai wa re. Kanu Kawa ni a prat kaw nna tinang a ninghtawn, tinang a lamu ga ngu ai hpe makawp maga mayu ai myit jasat rawng ai. Bai nna, gasat gala ai kaji kawa ni kaw nna yu hkrat wa ai kashu re majaw, tinang a amyu hpe makawp maga na, tinang a amyu galu kaba kra shakut ra ai ngu ai magam myit grai rawng nga ai.

- Shanglawt Lu ai hpe Grai Ra Sharawng ai Sara Kaba gaw wanglu wanglang ai, shanglawt ai (Freedom- Independent) hpe ra ai, hte gyit hkang da ai lam, pat hkum da ai lam ni hpe n ra ai wa re. Shanglawt ai Mungdan hpe grai ra sharawng ai hte Jinghpaw Wunpawng myusha ni shanglawt lu ai hpe grau mu da mayu ai wa re.

3. Grai Madat Mara ai hte Shakut ai wa re

- Sara Kaba gaw, Jawng lung nga ai ten hta, Sara/num ni a ga hpe grai madat mara ai. Sara ni nmai galaw ai nga ai hpe galoi n galaw ai, hkum tsun ngu ai ga hpe galoi ntsun shapraw ai, kinsha lasha ga kaji ten kaw na ntsun ai hte majoi n ginsup ai. Jawng sara/num ni a ga hpe galoi mung atsawm sha n hprai hkra madat mara hkan sa ai majaw, sara/num ni mung shi hpe grai tsawra hkungga ma ai.

- Shingrai, Jawng laika hpe mung nchye yang chye hkra, n kung yang kung hkra sara kaja langai tai wa hkra grai shakut ai wa re. Jawng lung ten hta, Jawng laika sharin ai ten hpe galoi n hprai ai sha, Jawng sa, Jawng lung ten ni hpe hkrak tup hkan sa ai hte galaw mayu ai lam ni hpe hkrak tup lu galaw hkra shakut ai. Ndai zawn tup hkrak re ai myit masa gaw kaji ten kaw nna ya daini du hkra rawng ai, kasi la ging ai lailen kaja rai nga ai.

4. Laklai ai Atsam

Sara Kaba a laklai ai atsam ni law law nga ai. Grau nna Sara Kaba hta grai laklai ai bawnu nyan, matsing lu ai atsam lu nga ai. Jawng kaw laika sharin ai ten, Buga hkan lakjet hkan jaw ai hte Mungga hkan sharin ya ai shaloi, galoi laika buk n yu ai sha sharin ya lu ai gaw laklai ai atsam rai nga ai. Sara Kaba a matsing bawnu grai kaja ai majaw, shi sharin lai wa sai Jawng ma ni yawng hpe galoi n malap ai, Shi a Jawng ma a mying (Htinggaw mying, amyu mying hte hpawn), hte ap nawng nga ai Buga Hpung du hkra grai matsing lu ai atsam nga ai wa re majaw, Shi a Jawng ma ni grai myit pyaw ai hte n gun grai lu ai rai nga ai.

Madu Yesu hta Yup Pyaw wa ai lam

Sara Kaba Rev. Dr. Lahtaw Gum Se gaw, 2016 kaw nna hkum hkrang hkamja lam nau nhkrak wa ai hte dai shaning hta lahkawng lang (2 lang) Aye Tu Kha mung shawa Tsirung hta tsi tsi hkam la sai. Dai hpang 2017 hta gaw bai maitsai wa ai chyeju hpe hkam la lu ai. Raitim, 2018 hta bai machyi sawng wa ai hte April Shata praw 2, 2018 (2/4/2018) kaw nna, Aye Tu Kha Tsirung kaw tsi tsi hkam la nga ai ten hta Sara Kaba gaw 14/4/2018 jahpawt 8:15 am aten hta Madu Yesu hta yup pyaw mat wa sai rai.

Sara Kaba a Numhtet Numra Ga

1. Kaja ai Makam Masham Nli Tum Gat Hkai Ga

Tengman ai nlu tum hpe sha shaw shapraw gat hkai mai nga ai. Tengman ai nli tum gaw Chyoipra ai Chyum Laika hta rawng ai Mungga rai nga ai. Tinang a tinggyeng makam masham a lam hpyan dan ai, tinang a hpaji shadan dan ai, tinang a mahkrum madup sha hkai dan ai lam ni gaw teng man ai nli tum majing n tai lu ng ai. Chyum Laika hpe htep lahti htai dan ai hte Hkristu a lam tsun dan ai ga chyu sha tengman ai nli tum majing tai lu nga ai. Hkristu a kabu gara shiga hte seng ai mungga hpaji gaw jet ai nli tum rai nga ai. Dai majaw, tengman ai hte Jet ai nli tum, Ja kat ai nli tum gat hkai na lam htet, matsun, sharin da nga ai.

2. Sasana Yi-Ngam Sharawt Ga

Jinghpaw Wunpawng Hkalup Hpung Ginjaw (KBC) hte J.W Chyum Jawng gaw kalang bai yi ngam yin wa de pru sa nna Sasana yi-ngam sharawt sa wa ra nga ai. Hkristu a Sasana yi ngam yin wa gaw, Bum masha ni, layang masha ni, kahtawng ning chyawng masha ni, ruyak jamjau amyu myu hkrum sha nga ai ni, nchyang ni, mung up ai ni hte mung masha ni yawng jawm de hpring kabrat nga ai mungkan rai nga ai. Dai Sasana yin wa, mungkan hta Karai Kasang a ra sharawng ai, jet ai, ja kat ai nli tum noi hpye let Sasana yin wa hta tu kaba wa hkra gat hkai ai, Hkristu a kangka ai nchyang mayam, mungkan a shabri shabrai hpe madung n tawn ai magam gun kaja ni tai nga ga.

3. Myit Hkrum Kahkyin Gumdin Let, Hkum Tsup ai de Kung Kaba Rawt Wa ga

Sara Kaba gaw, Jinghpaw Wunpawng myusha ni hpe 'myit hkrum kahkyin gumdin' nga na lam shi Tsirung kaw nsa hti wa na ten du hkra tsun htet da sai re. Jinghpaw Wunpawng myusha ni yawng myit hkrum ai rai yang teng sha 'Shanglawt' lu na re. Dai gaw bai maitsai wa ai chyeju hpe hkam la lu ai. Raitim, 2018 hta bai machyi sawng wa ai hte April Shata praw 2, 2018 (2/4/2018) kaw nna, Aye Tu Kha Tsirung kaw tsi tsi hkam la nga ai ten hta Sara Kaba gaw 14/4/2018 jahpawt 8:15 am aten hta Madu Yesu hta yup pyaw mat wa sai rai.

Sara Kaba a Numhtet Numra Ga

1. Kaja ai Makam Masham Nli Tum Gat Hkai Ga

Tengman ai lu tum hpe sha shaw shapraw gat hkai mai nga ai. Tengman ai nli tum gaw Chyoipra ai Chyum Laika hta rawng ai Mungga rai nga ai. Tinang a tinggyeng makam masham a lam hpyan dan ai, tinang a hpaji shadan dan ai, tinang a mahkrum madup sha hkai dan ai lam ni gaw teng man ai nli tum majing n tai lu ng ai. Chyum Laika hpe htep lahti htai dan ai hte kristu a lam tsun dan ai ga chyu sha tengman ai nli tum majing tai lu nga ai. Hkristu a kabu gara shiga hte seng ai mungga hpaji gaw jet ai nli tum rai nga ai. Dai majaw, tengman ai hte Jet ai nli tum, Ja kat ai nli tum gat hkai na lam htet, matsun, sharin da nga ai.

2. Sasana Yi-Ngam Sharawt Ga

Jinghpaw Wunpawng Hkalup Hpung Ginjaw (KBC) hte J.W Chyum Jawng gaw kalang bai yi ngam yin wa de pru sa nna Sasana yi-ngam sharawt sa wa ra nga ai. Hkristu a Sasana yi ngam yin wa gaw, Bum masha ni, layang masha ni, kahtawng ning chyawng masha ni, ruyak jamjau amyu myu hkrum sha nga ai ni, nchyang ni, mung up ai ni hte mung masha ni yawng jawm de hpring kabrat nga ai mungkan rai nga ai. Dai Sasana yin wa, mungkan hta Karai Kasang a ra sharawng ai, jet ai, ja kat ai nli tum noi hpye let Sasana yin wa hta tu kaba wa hkra gat hkai ai, Hkristu a kangka ai nchyang mayam, mungkan a shabri shabrai hpe madung n tawn ai magam gun kaja ni tai nga ga.

3. Myit Hkrum Kahkyin Gumdin Let, Hkum Tsup ai de Kung Kaba Rawt Wa ga

Sara Kaba gaw, Jinghpaw Wunpawng myusha ni hpe 'myit hkrum kahkyin gumdin' nga na lam shi Tsirung kaw nsa hti wa na ten du hkra tsun htet da sai re. Jinghpaw Wunpawng myusha ni yawng myit hkrum ai rai yang teng sha 'Shanglawt' lu na re. Dai majaw, Hkristu a hkrum hkrang dagraw let, tsawra ai myit hte kahkyin gumdin nga nna, tengman ai ga hpe tsun, tengman ai amu galaw let lam shagu hta hkum tsup ai de kaba rawt wa ra nga ga ai. "Lam Shagu" ngu ai gaw 'hkum dingnum' hpe tsun ai rai nna, dai hta makam masham lam, htunghking lam, sut masa lam, hkm ja lam, up hkang masa lam ni yawng lawm nga ai. Ndai zaw, hkum dingnum, hkum tsup ai de rawt jat galu kaba sa wa lu na matu, Jinghpaw Wunpawng Chyum Jawng kaw nna lit la let masing jahkrat sharin jahpat sa wa ra nga ai.

4. Makam Kri Dung ai hte Amyu Mungdan Htunghking hpe Gaw Sharawt la ga

Jinghpaw Wunpawng myusha ni a matu makam masham gaw grai ahkyak nga ai hte, tinang a makam masham madung gaw hpabaw re ngu ai hpe atsawm sha chye ra nga ai. Grau nna, Hpan da Madu Yehowa Karai Kasang hta lai nna, kaga kadai hpe mung n mai kam nga ai. Yehowa Karai Kasang gaw mungkan ting a Karai rai, yawng hpe dang di lu ai Karai rai nga ai majaw, dai Karai hta anhte a Mungdan lamu ga, amyu htunghking ma hkra hpe gaw sharawt shatsaw, shagrin maden jat la sa wa ga.

Shamyet Shanat, Mahta ai Laika Labau ni

1. Sara Kaba a Ningrum Ningtau Srn. Tauba Lum Nan ka Sumhting da ai Labau Kadun

2. Rev. Dr. zinghang Lat Nawng (KTCS) ka Mahkawng Ginchyum da ai "Myihtoi Ma a Myithtoi Ga" (Sara Kaba Gum Se a Myihtoi Ma Laika Ngau ni)

3. Nhkum Lamai La San "Rev. Dr. Lahtaw Gum Se a Labau Ginshi" '(L.Th Research: KTC (Kutkai), 2010).

4. Rev. Dr. Saga Hkyen Naw (Interview Record & Edit) hte Sara Kaba Gum Se a Dum Nta Masha ni hpe San nna Jahkum Shatsup da ai (14-16/ 4/ 2018).

Labau Ka Lajang ai Kasha, Lahtaw Nang Dim Pri (KTCS)