HPAUMYA NI HTE WURAW DU NI A MAJAN
SAWK KA AI: ALAT GUN AWNG
Lai wa sai lahkawng tsa ram ning hta, Hpaumya ni hte Zi Wuraw du ni Shadan ga e gintsu majan tsawm ra ning nga lai wa ai gaw, Mawa mung Gungshan tang du ai hpang tim atsawm nhting-ram ai, daini gaungwi ngwi shada myit shakya shada yan hkat nna zim mat wa lam chye lu ai. Shawngde gumra ngu ai hpe kadai atsawm n tek rem da ai, majoi dat tawn ai ten hta, Hpaumya ni gaw hpaga ga ai lam grai gumhkawng nga sai. Shingrai, Hpaumya ni hpe hpaga ga let lagu nna sut su ai nga nna tsun gumhkawng nga ma ai. Dai ten Hpaumya ni gaw, Dabang krung, Shadan krung, Jansi krung, Janda krung hkan hpaga ga hkawm nga sai lam chye lu ai. Hpaumya ni gaw, layang de na anga sa mari nna, lam kaw hkan nang ai ni mung gau lawm mat wa, lagu ai mung lawm rai, Htinchung ga de wa dut la ai. Dai kaw na gumra bai mari la, anga hte mung galai la, lam kaw hkan nang wa ai gumra ni hpe mung bai gau shalawm la, kaga kaw na lagu ai mung lawm rai nna, layang de bai anga sa galai, dut mung dut sha rai htinglet ma ai nga nna mung tsun gumhkawng nga ma ai re.
Dai hku rai galaw nga yang, shanhte lai lam makau hkauna wa na Mawa Tungkya ni a Laugung mat mat wa ai. Laugung madu ni gaw dinghkren grai hkinding tawn ai kaw na gara de hkawm mat ai kun ngu, Hpaumya ni hpe nanhte kaw anhte a laugung n hkan nang mat wa ai kun ngu san yu yang mung, n hkan nang ai nga masu dat ai. Dai ten laugung rem ai mung nau n law shi ai re majaw, laugung rem ai hkan sagawn hkawm yu tim shanhte a n rai taw, laiwa laisa ni hpe hkan sagawn yu yang Hpaumya ni langai mi rem ai nga na ai majaw, mayun hku sagawn yu yang, madu a laugung re lam hpe lu sagawn la sai. Tungkya ni gaw laugung mu nna shanhte a laugung re ngu sa tsun yang Hpaumya ni hkap ningdang wa yang yak na rai, dai aten hta Mawa gaw Zi ni hpe grai hkrit ai ten re. Htinchung Tungkya ni gaw Hpyin yang Janda maga hku hpaga sa ga nga yang, Hpaumya ni a jinghku lam dup nga ai rai. Laugung gaw aten tam na ngoi ai baw rai, bai sa lagu dun hprawng ngu yang mung grai yak rai myit ru nga ma ai. Dai shaloi gaw, Wan-rinkawn kaw gaw Min Shin Kawn ngu ai gawn ai rai, Mungga de gaw Yang Shin Kawn e gawn ai rai, Ndai lam hku rai yang Hpaumya ni a jinghku n nga ai rai, Yang Shin Kawn ni mung Htinchung kawn yu wa ai ni she rai, htaw ra kaw na ni gaw, shing rai shanhte ni gaw Yang Shin Kawn hpe sa shawk tsun dan na hku rai nga ai, anhte a laugung Hpaumya ni kaw nga ai, nang hpaji shaw lawm u, sa tsun yu sai shanhte hpe lagu mung n shadu ai, anhte a laugung n hkan nang i ngu mung san yu sai, n hkan nang ai nga ningdang kau ai, anhte a laugung gaw rai sai, n shut sai ngu sa tsun ai da.
Shaloi Yang Shin Kawn gaw nang kaw nna wa lagu dun la mu ngu hpaji jaw nna, sa lagu dun na ni hpe shabrai jaw nna, sa dun yang Hpaumya ni hkan shachyut gap rai yang na bunglat hka ndaw na matu, gumhpraw jaw kau nna wa dun wa masu ngu shangun dat ma ai da. Yang Shin Kawn hprai ai masha dai yan gaw, Mungga ga kaw na Yang Lwi Hkaw hte Yang An Yu ngu ai yan rai nga ai, shan Wuraw kaw bai sa shaga jat la ai masha gaw, Hkaw Htu Nawng, Maye Nawng, Wura Nawng hte Mawa gahtawng na Wu Chyung Shu rai nga ai, shanhte marai 6 gaw Hka-len kaw Hpaumya ni rem tawn ai laugung sa dun wa ngu nna shabrai jaw nna wa dun la sai da. Shawng e sa yu yang gaw, laugung hpe wulawng kaw rem tawn nna shanhte gaw bungli galaw sa sa rai jang shani ma ni hte dinggai ni sha nga ai shaloi wa dun la na hku masing jahkrat wa masai. Sa wa yang nta rai n du lu ai Wa-lai yang kaw lawze manang langai mung dat tawn ai. Laugung sa dun mat wa yang lawze gaw manang n lu jang shi wa tsun dan na re hpe chye nna, lawze hpe mung dun mat wa na hku rim yu yang n lu rim hkraw nna gap sat kau da sai. Wa lam kaw grai dam ai hkindu hpra yi mi nga ai, sanat mung shangoi kau da sai re majaw, hpyen hkan nang wa yang loi mi sha pyi dang u ga ngu nna, hkindu hpra dai kaw sharaw nat kau da manu ai.
Maimai kaw gaw Maimai Zau Li ngu ai Wuraw lahta kaw sinpraw de npan yawng sinna de gaw nbang yawng re nta galaw da ai. Maimai Zau Li dai shani jahtai pali shit nna nta nga nga yang, jahpawt gwi grai wau, shana maga mung gwi awau nga rai nna, shawoi pyi gwi dai ram n wau ai ngu nna, pru gaw n pru yu ai nbang kaw na chyan yu yang, masha manga kru laugung dun na lai mat wa ai hkan mu dat nu ai. Hkaw Htu Nawng hte ya Muwun mare e nga ai Wuraw Nawng a kaji La gaw hkum hkrang grai bung ai da, dai ten na bu hpun palawng sumraw ai, bawhkaw labu htawng lawng re ni du hkra bung nga ai da. Shingrai, Maimai Zau Li gaw Hkaw Htu Nawng hpe she Wuraw La re ngu shadu kau ai. Gade nna yang gwi bai wau wa ai majaw kaning rai nna gwi hkrai hkrai wau ai kun galang bai sa pru yu yang, Hpaumya la ni hkan shachyut nang sa wa ai ni hte hkrum nna, kara de rai hkyem myit ni ngu sa pru shaga yang, Hpaumya la ni gaw shi hpe nang nta nga nni ngu bai nhtang san ai majaw, nga nngai ngu tsun htan ai shaloi, Hpaumya la ni gaw, rai yang anhte a laugung dun mat wa ai n mu ya myit ni ngu bai san sai da, shaloi, shi gaw mu dat ai, lai mat wa ai masha manga kru mi kaw, Wuraw La mung lawm ai ngu Hkaw Htu Nawng hpe Wuraw La re ngu yu shut nna, Wuraw La mung lawm ai ngu tsun dat shut kau dat sai.
Shingrai, Hpaumya la ni gaw, kadai ni wa rai kun ngu myit nga yang Wuraw La mung lawm ai nga yang gaw, daina Wuraw du ni kaw hkring nna laugung lai n lai kadai ni re rau sagawn ga ngu nna she kam nga yang, Wuraw La mung lawm ai nga yang gaw, hpa lachyum n rawng sai. Shanhte hte anhte hpa ningtsu mung n rawng ai, anhte a gumra wulawng sa hpya ai gaw, shanhte hpe mung hpya ai baw rai sai ngu nna nhtang mat wa sai. Hkalen ni Wuraw hpya na, Wuraw La anhte a laugung lagu dun mat wa ai ngu tsun nga yang, Wuraw kaw na ni gaw anhte n re law, nanhte atsawm chye mayu yang gaw nang kaw sa nna san mu, anhte tsun dan na anhte gaw n rai ga ai ngu tsun ai. Wuraw La gaw dai shani Ladin bum kaw Nga Li a kaji ni hte hkainu wuhpra yi galaw nna nga ai hpe she laugung lagu dun shadu nna, Wuraw ni hpe anhte n re, sa yu mu ngu nna wa sa masha hpe htinglet tim, Hpaumya ni gaw n sa yu. Ya na Muwun e nga ai Wuraw Nawng ni a kaji Tang wa gaw, dai ten hta Hka ya na Hpauje Roi hpe hkungran na shaning bai pru wa, dai prat hta tsa chyaru n-gu ni gaw Hkamung kaw she sa htaw rai ai rai. Wuraw Tang gaw tsa chyaru sa htaw na ngu nna gumra 6 hte sa htaw na ngu yang, mare na myitsu salang hpunau ni gaw, nang hkum sa u law, Hpaumya ni gaw Wuraw ni hpe hpya na nga nna bunghkrawng na nsa gahtet ai zawn rai na shi mawng gahtet nga ai. Nang hkum sa, sa na rai yang manang ni hpe dat u, garai n mai shamu na re ngu tsun ai.
Shi gaw anhte hte hpa mung n ra ai mi ngai she sa na, Wuraw Tang shi myit ai gaw masha ni sa mari yang n law n lawm, tsa mung n mu ai la wa ya na tsang ai. Mare na salang ni gaw, nang n sa n mai rai yang gaw, Shalau hkran lam Hka len ni hte ni ai lam hku hkum sa, Mungden hku sa u ngu nna, lam hkan yu yang yu yit shangun na hku Lisu ni a bu hpun palawng bai sumraw lang, gumra gau manang gaw Yang Ja hpe woi lang rai na, Mungden hku Hkamung gat sa ai. Hkamung gat sa yang she Shadan krung na ni gaw, shi hpe Lisu hking mi sumraw lang tim myiman hkrum rai yang chye yu nna, gat kaw Wuraw Tang mung sa ai i ngu mung nga, tsa Gun mung sa ai i ngu mung nga, wa Gun mung sa ai i ngu na chyu hkap shachyen ai hkrai rai nga sai. Shadan krung kawn sa ai ni yawng shi hpe chye yu ai hkrai hkrai. N-gu hte tsa mari nna bai wa ai shaloi gaw Lisu hking hking tim lachyum n pru ai ngu nna, Jinghpaw hking bai galai kau nna wa ai. Gumra gau nna Yang Jang Ha hte wa yang, Shangtu damya gaw Hpyinshan hkyet kaw she ra ga ai ngu nna, dai kaw loi mi maja lung wa yang hpa n ra jang shi hpe hpya na damya n nga ai ngu ai hku nna, Hpaumya ni hte mung shi hte hpa n ra na re ngu ai hku Munglung lam (Lasi lam) hku wa yang, Hkalen kaw na Hpaumya ramma kasha langai hpang kawn hkan doi nang ai, Baudung hkyet kaw du jang she Wuraw Tang hte Yang Jang Ha gaw Lasi lam numshe hku gumra gau nna rai mat wa yang, ramma dai gaw lam numshe kaw gagat yu wa nna Hka len kaw kaba ai ni hpe Wuraw Tang hte masha langai gumra 6 gau nna Lasi lam hku yu wa sai, sa hkap yang mai na sai ngu wa tsun ai.
Rai yang, Hpaumya ni gaw mare masha gan ginrawn la nna lam dung lawu lahta sa hkap nga ai. Wuraw Tang gaw Yang Jang Ha hpe gumra gau shangun nna hpunggaw langai mi lai yang, hpa n ra jang bai hkan nang rai u ai. Lasi kawn yu wa yang punggaw grai tsan ai, mahkrai pawt na lam numshe kaw, ra yang mung ndai kaw sha tsang ra na sai, ndai kawn lai jang gaw shi a jinghku ni hkrai rai sai ngu, Yang Shang Ha hpe gumra gau nna shawng hkawm shangun nga yang, lam numshe lamdung lawu lahta kawn masha ni le rai gumra gra gra, Yang Jang Ha hpe mung nhtu n-gung hku puk puk di dat yang, Yang Jang Ha gaw ngai gaw gumra gau lawm ai she re, gumra madu gaw hpang e hkan nang ai ngu tsun dat sai. Shaloi Wuraw Tang wa mung masa nhtuk sai ngu nna lamdung lawu hku gat yu mat wa yang, Hpaumya ni hkan gap dat ai pala shi a nhpye n-ga jinghpa mung hprut rai hkra Wuraw de hprawng mat wa nu ai. Hpaumya ni gaw Yang Jang Ha hpe mung woi mat wa, gumra hte n-gu tsa ni mung la mat wa, Wuraw Tang hpe hkan shachyut yu ai n dep mat ai. Wuraw Tang gaw mare na ni hpe Hpaumya ni gaja wa rai wa masai kaning di na hpaji daw lawm ngu wa tsun dan ai.
Mare na ni gaw, Hkalen ni hpe kasa dat nna, anhte gaw n rai ga ai, ya nanhte gumra hte masha bawng hkap rim ai gaw anhte hpe atsawm wa tsun mu, anhte mung nanhte hpa n di na ga ai atsawm she tsun sharai ga ngu sa tsun ai. Masha mung dat ya mi, n-gu hte tsa chyaru mung num hkungran hkyem nna htaw wa ai re, atsawm tsun hkat ga ngu tsun dat ai. Masha hpe gaw kasa dat ai hpang shani dat ya nna, gumra hte n-gu, tsa chyaru ni gaw n sa ya ai, dai lu sha nna she Wuraw hpya na hku gaw tsun hkyen lajin nga ma ai. Gumra 6 hpe gaw hpyen saw ai regau gumra ngu nna, Wuhpai ni, Wuhpra ni, Sharaw kawng ni, Shalau hkran ni, Gumlau ni, Hka shang ni, Panlawng hku ni hpe garan shabra jaw ya sai. Wuraw kawng ni mung, ndai ni kaja nan rai bang wa yang gaw hkam sha ai baw n rai sai, anhte mung hpyen saw shajin ra sai, shanhte garai n sa hpya yang anhte shawng sa hpya ai baw rai sai ngu nna, Jangsi hpyen ni hpe sa saw la manu ai. Hpa Hkyeng, Hku la, Jang dau, Hpakawn, Bum dung kaw na hpunau ni hte mayu ni hpe shaga dat nna, hpyen ningbaw gaw Hkaze Hka, Hkahkyen Shang Hkying hte Shachyang Htang ni re.
Dai ni gaw, shawng e hpyen grai lawm ga sai ni re. Gara mare kaw shang yang gara mare kaw shawng htim ai, Wuraw ni hte Jansi hpyen shang sai nga ai hte mare kaw na ni gaw n hkap dingdaw ai, la ni gaw yawng hprawng mat, u wa yaw ai nu num dinggai ni sha ngam da nna yawng hprawng mat ai, dai nu num dinggai ni a lahkawn, hkachyi, na lapyen du hkra gashun raw la kau ya manu ai. Nta shagu na arung arai ni, dusat yamnga ni yawng hkyawm la kau ya, mare mi kaw sa htim yang mung dai hku sha la kau kau di ai. Raitim, masha gaw n sat ai, arai ni sha la kau ya ai mare 6 hpe gaw dai hku zingri bang wa ai hku re. Hkauna hka ndai hkran na ni gaw, Wuraw ni a yu ma hkrai re majaw hpa n galaw ai nga nga yang, Maimai kaw Kamai Gam ngu ai wa gaw, shawng e gala hpyenla la ga nna, nhtu hkyen mung sharin ga ai wa, Janshi hpyen mi rai yang rai, nye shawng kaw marai manga kru sha gaw azat kau lu ai, sa wa yu u ga ngu tsun ai. Shiga dai hpe Hkaze Hka a na kaw shang mat nna, ju masawn langai mi naw tu re nga ai, dai naw sa baw kau ga, n la kau yang gaw ju wa ai baw re nga ai. Kamai Gam gaw hkauna wa kaw nga ai. Hkaze Hka gaw Zau Li myihtoi kaw nhtu hkyen chye ai marai 7 sa lata u ai.
Myihtoi wa nhtu la gawut yu yang atsam rawng wunli rawng ai marai 6 hpe lata dat ya sai, Jahpawt nhtoi hprim hpram nga ai ten hta hkauna wa sa wang na hku Shachyang Htang hpe gaw npan de chyihghka lam sin, Wu Chung Hu hpe gaw nbang kaw hkap da shangun rai nna, ngam ai ni shang htim bang wa yang, Kamai Gam ka-ni shadu nga ai tawn kau nna nhtung na nhtu kaba atu di garang tawn ai hta la nna awut hkat bang mat wa ai. Kamai Gam gaw nbang maga de chyinghkyen dingdung hku kum tawn ai shakum kaw wa shingbyi nna man hku hkrai awut taw nga yang, npan kaw sin ai Shachyang Htang wa she shi gara kaw shingbyi ai ngu hpe yu matsing la nna nbang de gayin nna chyinghkyen pa hku shingma wa gahtam dat ya ai, nbang de gahtan pru wa yang Wu Chyung Shu wa e kalang bai kahtam dat nna lakang pawt kaw wa kalau si mat ai da. Yang Shin Kawn gaw, shi a uphkang nga ai kaw hpa n re ni she majan baw wa jang shi kawn wa htimram kau na hku di ai. Mungden de gaw Myin Shin Kawn up ai rai. Yang Shin Kawn kaw na htingram kau na hku, Wuraw ni hpe shawng sa tsun nna, Hpaumya maga de bai wa tsun yang hkraw ai. Wuraw hte Hpaumya ni a lapran na mare Npri na Sam Tang ni nta kaw gahkyin na hku nhtoi masat nna gadi tawn da sai. Ga chye tsun ai masa chye tsun ai ni sha nhku kata mai shang ai, dai kawn jan ai gaw n mai shang ai ngu nna mung tsun da sai. Wuraw maga na ni Yang Shinkawn woi sa wa, shi mung hpyen mung woi di nna wa ai. Wuraw du maga na gaw Hkaze Hka, Wuraw Tang, Wuraw La ni shawng du ai.
Hkalen maga na ni gaw, lawan n du hkraw, shana de salang ni du wa ai, mare masha mung hkan nang ai. Hkalen maga na ni gaw salang ni shang wa ai kawn rawt rai nta sa wang nna garu shim shem ngu nna "Wuraw Tang pru wa yu azat kau na, Hkaze Hka pru wa yu azat kau na." zanzi zawng ai ni hkawawt npan nbang zawng ai ni hpe anhte hpe shang wa shangun mu, shang azat kau na ngu marawn ma ai. Mare mi bai du ai mung nta wang nna jahtau nna nta kata na salang ni jahta ai mung n lu madat hkraw, jahpawt nhtoi htoi wa mahka de Hkaze Hka gaw masa n pru nga sai, anhte kaw sa ai gaw salang ndai hte chyu, Shadan kaw na gaw ndai hte sa wang tawn, nhtoi htoi kaw na gaw ndai daram gaw anhte zat ndang sai, ya myi garai n mu yang sat lu ai daram sat gale pru wa ai baw rai sai ngu nna nhtu langai mi gaw wa kaw makrang lang, nhtu lahkawng maga lang rai share wa yang, Yang Shin Kawn gaw garai hkum tin ngu nna naw jahkring da u ai. Lu htingram na masa n nga mat yang, Hkaze Hka hpe nla dap de woi shang wa nna, hpaji sa woi bawng ban ai gaw, Wuraw kawn sa ai salang ni hpe gaw dinggai ni a bu hpun palawng dagraw nna, hka sa ja ai hku nhtung na hka ni angwi sha ru kau nna hka nhtung baw tawn rai, ma ni mung shat shadu sha ten rai tim hka n rawng ai dinggai ni hpe chyu hka sa ja shangun ngu nna masha langai tsun marawn masu nna wa shangun ai. Shinggan na ni gaw dinggai ni hka ja sa ai ngu ai hku sha yu shalai kau manu ai.
Dai hpang Yang Shin Kawn gaw, yup mat sai, ninghtoi san ai hpang she, yup na bai dum wa ai masa hku mana ting mu paran ga ngu tim n lu hparan, dai hpawt raitim atsawm paran ga zim manu ngu tim garu jawng nga. Ya Wuraw du ni hpe shaga la masu, gade rai mat sai kun atsawm tsun hkat mu ngu nna zangzi mung nzawng mat ai. Dai kawn Hpaumya la ni nta kata shang wa nna jut shingnaw shagu, nta nnumgaw shara shagu tam yu tim n mu mat ai. Dai kawn Yang Shin Kawn gaw nanhte Hpaumya la ni mana htingram ga ngu yang n lu hting ram, Wuraw ni gaw hpyen mung n woi ai, mu jahta na ni sha sa ai, nanhte nau garu nna mu n byin mat sai. Nanhte Hpaumya maga na laugung dai gaw, Wuraw ni sa lagu wa ai n re, Htinchung kaw na Tungkya ni masha dat nna sa dun shangun ai re. Ndai ga laugung kadai n rem ai, htawra ga mung rem masha n law ai, mari la ai rai yang, dut ya ai masha tam shapraw mu, Tungkya ni gaw nanhte hpe lagut shadu nga ai.
Nanhte laugung dai mari ai rai yang, mari ai nta madun mu, dai kaw na npawt gawn mat wa ga, Wuraw ni gaw n re. Tungkya ni nanhte a lagu ai kun? nanhte mahtang Tungkya ni a lagu ai kun? npawt gawn mat wa ga ngu tsun dat nu ai. Nanhte ntsun n mai rai jang Wuraw ni hpe hkum shara nga sa, ngai kaw lung wa mu, ngai woi lung na, nanhte a asak sumri ngai hkam ai, Tungkya ni hpe wa tsun ga, Wuraw ni hpe mung ngai wa tsun da na, mu hkum jat masa ngu wa tsun kau nna, nanhte mung mu hkum jat sa ngu tsun dat nna bra mat masai. Dai shaloi Hpaumya maga na ni gaw Wuraw hpya na nga masum lang naw tsun nga ai. Raitim, bungli dai gaw, Mawa mung Gungshan tang du ai hpang mung kaga mi n tsun sai, daini du hkra dai hku hpa n tsun hkat ai shada yan hkat mat ai masa hku nna, yu ma nga nna hku hku hkau hkau rai Shadan ga an yu anma nga nna jawm nga nga ma ai rai.
