KIO GAW HPA MAJAW FPNCC HTA SHANG WA RA A TA?

KIO gaw hpa majaw FPNCC hta shang lawm ra a ta? ngu ai ga san gaw Wunpawng mungshawa kata sha n-ga, Myen mungchying sha ni du hkra, tsun garu nga ai ga san rai nga ai, hpa majaw nga yang KIO gaw UNFC hpe woi awn ningbaw nga ai Rawt malan hpung langai rai nga ai. Myen mung a mungmasa, Myen mung a simsa lam hpe galai shai wa hkra gaw gap sa wa ai hta, Rudi amyu sha ni hte Myen mungshawa du hkra KIO hpe myit mada kamhpa lam lu ai wuhpung ni mung rai nga ai, mungkan wuhpung wuhpawng ni mung KIO a mungmasa woi awn ai hpe madi shadaw ya nga ai hpe chye lu ai.

Rai yang shawng de mungmasa woi awn ningshawng ai hta Wa, (UWSP/UWSA ) ni woi awn ai FPNCC hta shanglawm jang ndai ga san ni tsun garu wa ai hta n-ga KIO hpe grau myit lawm wa ai, grau yu maram ai lam byin wa nga ai re ngu mu mada maram lu ai.

KIO gaw hpa majaw FPNCC hta shanglawm ra a ta? ngu ai hpe tsun jahta ga nga jang KIO a mung kata majan shazim na matu, mungmasa bawngban lam tam ai, simsa lam tam shakut ai hpe shawng tsun jahta ra na rai nga ai. KIO gaw mungmasa bawngban jahkrup ai ladat hte sha, mung kata majan hpe shazim lu na re ngu ai bandung tawn da ai wuhpung re.

Dai majaw Myen asuya ban hte ban gap hkat gan jahkring nna, mungmasa bawngban nna lam tam ai hpe lang hte lang galaw lai wa yu sai re. Rawt malan wuhpung ni hte magam jinghku galaw nna, simsa lam tam shakut ai, maigan mungdan, htingbu htingpyen de du hkra hpaji hpyi garum hpyi shakut sai.

Grau n-gun dat woi awn galaw ai gaw UNFC ngu ai wuhpung hpaw nna Federal munghpawm gaw de na lam tam shakut lai wa sai re.

UNFC a madung yaw shada ai gaw mungmasa bawngban jahkrup ai ladat hte, Dimokresi munghpawm (Democratic Federal Union) gaw de na ngu ai re. Rai yang mungmasa bawngban lu na matu laknak lang ai wuhpung EAOs yawng shanglawm ai gap hkat jahkring ta masat NCA shawng htu na, raitim NCA garai n htu yang, mungmasa bawngban na lam (Political Dialogue) hte bawngban sa wa na masing masa hkrang ni (Political Frame Work) hkam dahka nga hkra jahkrup bawngban la ngut ai hpang she NCA htu na ngu ai lam re.

Raitim Myen asuya hpyendap ni gaw NCA Karip hta tang madun da ai lawnglam ni hpe hkap la myit-hkrum ai lam n lu la ai majaw NCA hkrun lam n awng dang mat sai re.

NCA n htu byin ai madung lawnglam ni gaw NCA kata na lawnglam ni hpe Myen asuya hpyendap ni n hkap la ai hta n-ga, NCA gaw 2008 ning gaw da ai tara kata rai na ngu ai, Rawt malan hpung ni yawng shanglawm ai NCA rai na. (alliances policy hpe n hkap la ai). Palawng, (PSLF/TNLA), Kokang (MNDAA) hte Rahkai (AA) ndai wuhpung masum hpe, mungmasa bawngban ai lam n-galaw na, NCA n mai htu ai, laknak jahkrat ra na ngu nna Myen asuya hpyendap tsun ndau da ai hte htim shagrawt majan masing madaw hpaw ai lahta tsang salang ni nan Myen mung Gumsan Magam U Thein Sein hte man hkrum bawngban ai, SD (Senior Delegation) dat nna mung jahkrup yu tim NCA Ka-rip hpe gram sharai jahkum shatsup na myit n hkrum ai majaw NCA n htu byin ai lam rai nga ai. Dai hta n-ga UNFC wuhpung kaw na hpung (8) (KNU, KNU / KNLA-PC, DKBA, ABSDF, PNLO, ALP, CNF, RCSS) ni 2015 ning October 15 ya shani NCA lakmat htu ai majaw NCA hkrun lam hku nna, mungmasa bawngban lam grau yak mat sai re.

Raitim, NCA n htu shi ai UNFC wuhpung ni kaw nna Myen asuya hte matut nna bawngban lu hkra, mungmasa bawngban ginrat hpung DPN hpung hpaw nna shakut sai re. Bai, 2016 ning July shata 26-30 hta Mai Ja Yang kaw NCA htu ai, n htu ai EAOs hte kaga Amyu sha mungmasa hpung ni du hkra, shanglawm ai Amyu sha ni a manhkrum hpawng kaba (Plenary Meeting) galaw nna, lawnglam (9) lawm ai myit hkrum lam galaw la lu sai. Dai lawnglam (9) hpe NCA mahkrun hku nna matut bawngban jahkrup ai raitim, Myen Asuya ni hkap la ya ai lam n nga sai re majaw UNFC, NCA hkrum lam hku hkawm sa ai mungmasa hkrun lam gaw myit mada lam htum ai daram rai mat sai.

Matut nna, KIO ni FPNCC de shang ra ai lam hpe bai tsun jahta ga nga jang, NCA mahkrun mung myit mada shara htum ai daram rai sai, KIO hte majan rau gasat nga ai rawt malan wuhpung (2) hte Rahkai (AA) hpe NCA hta Myen Asuya ni n hkap la ya ai hta n-ga, shagrawt majan laja lana htim gasat wa ai, KIO ni NCA htu tim jarit matut nga ai wuhpung ni hte gasat gala byin jang tinang hte majan byin ai hte maren sha rai na re.

Ndai zawn mungmasa hpyen masa yakhkak ginchyum chyat nga ai ten, htingbu mungdan rai nga ai Miwa mung Asuya kaw nna Myen Asuya hte mungmasa bawngban lu hkra lam tam shakut garum na nga nna hpaji jaw n-gun jaw ai majaw mung KIO gaw FPNCC munghpawm mungmasa bawngban ginrat Komiti de shanglawm ai lam rai nga ai.

FPNC a yaw shada ai lam mung, mungmasa bawngban na mahkrun (channel) tam ai lam sha rai nga ai. KIO gaw (WSP) woi awn ai FPNCC npu de shang mat ai n re sha tinang mu mada ra sharawng ai lam hpe Komiti hta tang madun bawngban myit hkrum lam la ai ladat masa rai na re.

FPNCC hpe Myen Asuya ni hkap la na n hkap la na ngu ai mung, tinang lu galaw ai atsam , ladat hta she hkan na re, Asuya hpe ninghkap ai gara rawt malan, gara wuhpung hpe raitim Asuya kaw nna hkap la ai n re, hkap la bawngban lu hkra madaw lam tam ladat shaw la ai hkrai rai nga ai. Bawngban lam hpe n hkap la jang gaw, hpyen majan ladat the gasat la ra na rai nga ai.

Ya yang na Myen mung a mungmasa sat lawat hpe maram yu ga nga jang gara rawt malan hpung hpe raitim, 2008 ning gaw da tara shangwang shiggan hte Democracy Federal munghpawm jaw na lam n mu lu ai. Awmdawm shanglawt (ga garan pru ahkang ) jaw na lam mung n mu lu ai.

Mungmasa, Hpyen masa, tinang nan gawgap la ra ai, n gun ja hkra shagreng la ra ai. Tinang amyu sha kata kahkyin gumdin ra ai, kaga rudi amyu sha ni hte mungmasa bandung jahkrum la ra ai, ni dik ai htingbu mungdan Asuya a hpaji jaw garum ai lam lu la hkra lam tam ra ai.

Dai majaw kaning re ai mungmasa hpyen masa lam hpe raitim tawt kawt yeng seng kau lu ai atsam anhte hta nga ra ga ai. Rawt malan hkrunlam ngu ai gaw nampan nep ai hkrun lam n re, kaw zaw ahkyeng nep ai kaw hkap tau la na hpe n mai myit ai, mungdan ngu ai hpe gaw gap la ai, amyu sha ni a lu ging lu ang ai ahkaw ahkang, ahkang aya hpe madu lu na matu gaw salu salat, asak du baw hpe arang shatai ra na sha re, Mungmasa galaw ai ni mung gwi gwi rip rip hte masing jahkrat tsun shaga dara la ra ai zawn, laknak lang nna majan pa de lit la ai myutsaw mungtsaw hpyen magam gun ni mung magrau grang grang share shagan ai Magam myit hte rau zai ladat shaw nna padang dip lu ai gasat poi ni shang sa wa ra ai, mungshawa ni, amyu sha ni yawng mung tinang lu ai atsam hte du nga ai shara kaw nna Rawt malan magam lit hpe gun hpai ra ai, ja gumhpraw shaw ai mungkan wuhpung de shadan shadawng ai, n-gun madun ai, arung arai hte garum madi shadaw ai, Rawt malan myit jasat, lawt lu mayu ai myit jasat ni shaw madun let, ta gindun n-gun hpungtun hte ganawng sa wa na gaw anhte amyu sha ni a ningsang magam rai nga mali ai.

FPNCC, munghpawm mungmasa bawgban ginrat komiti gaw “Wa” UWSP/UWSA, KIO/KIA, Mai La, ( NDAA), Kokang (MNDAA) Palawng (PSLF/ TNLA), Rahkai (ULA/AA) Sam (SSPP/SSA) re ai wuhpung (7) shanglawm hpaw shabawn da ai dap hpawm wuhpung rai nga ai.

(FPNCC hte seng ai hpe 3.6.2017 hte july 15,17 dap shawa mungshawa sanglang hpawng mungga hpe lakap nna ka ai re.)

Bum Chyangau