NUMSHANG GALAW WA AI NPAWT NHPANG
Nhkum La
Numshang gaw anhte Chyurum Jinghpaw Wunpawng myu sha ni a htunghking gaba langai mi rai nga ai, moi prat kaw na ya du hkra gah- tawng mare ngu na hta numshang n lu ai n nga ai, anhte linghpaw ni gaw manau dum ai hkrai, manau n dum ai gaw anhte myu n rai, num- shang n jung ai mare gahtawng mung anhte myu n re ngu yang grai tsun jaw nga ai, moi prat kaw na gahtawng ningchyawng de jang gaw numshang jung ra nga ai, ndai mung shi a npawt nhpang nga nga ai. Dumsa jaiwa ni ning nga hkai ma ai: Moi shinggyim masha nnan nga pra hkrat wa ai hpang e, mungkan ting hta naimam ngu ai hpe kadai pyi n chye kai sha ai majaw, shinggyim masha ni kawsi hpang gara chyu hkrum gajang nna nga pra, kaning nan n chye di sai rai nna nampawt hte hpunpawt re ni sha htu gawt sha nna ahku shatawng ma ai da, dai prat hta jahkrai ma la sha shannau mi nga ai, shannau a mying gaw gahpu wa hpe N-gam Nau nga nna, kanau wa hpe gaw Nnaw Bau ngu nna shamying, shannau lahkawng gaw akun gun sha na asak du sai rai nna, shawng hpang num la masai da, rai yang, gahpu wa la ai num gaw anhte shinggyim shayi sha, kanau wa la ai gaw Mahtum mahta ga de na shayi num rai, dai Mahtum mahta ga hta gaw lu na sha na rungrai ni grai grung dik nga ai da, hpa mung ntaw ntsang rai hkra jawng ai.
Nnaw Bau Mahtum mahta ga na shayi num hpe wa hprawn la ai shaloi, Mahtum mahta na ni "AWk, shinggyim masha ni gaw naimam hte shadu ai shat hpe grai she kam sha nga ma hka i?" Nga mu chye nna, Nnaw Bau hpe naimam hte hkai nmai law law ya dat masai, dai hta n-ga atsawm naw hkan shadum dat ai: "Naimam ndai ni kaga shinggyim sha ni hpe mung atsawm sha wa woi hkai sha su yaw!" Nga numhtet ga hkan tsun dat ma ai. Nnaw Bau mung nde wa mu nna kan bai naw chye hkru re naimam wa ya dat ma ai gaw, atsawm she wa woi hkai sha yu na re nga myit nhtawm, nta du ai hte gahtawng masha yawng hpe naimam nli gam jaw rai hkai shangun, yawng gaw Nnaw Bau tsun ai hku yi sa hkyen nna sa chye hkai da manu ai da. Nsi si ten rai sai wa nga nna sa chyawm yu ma yang, naimam dai ni nsi gaw nsan hkrai hkrai sha si nga la, shaloi masha nkau gaw Nnaw Bau hpe masu sha ai nga myit n pyaw wa masai da, nau gaw pawt lahput wa, Nnaw Bau kaning ngu gaw n chye tsun mat, dai rai Mahtum mahta ga de bai lung wanna naimam kaning di hkai sha ai lam atsawm sha wa san yu, Mahtum mahta du ni shaloi she ning ngu tsun dan sai da: Lamu de na marang htu wa, ga salu nsoi nsa rawt wa re hpang na ladaw laman hta mai chye hkai sai, nanhte gaw ladaw n tam ai majoi sa chye hkai ma ni? Ladaw sha tam jaw jang nsi grai gaba nna gumgoi hkra si ya lu ai, anhte tsun ai ladaw hku sha hkan nna atsawm sha wa chye hkai yu masu! Ngu sai da. Nnaw Bau nta du wa ai hte gahtawng mare masha ni yawng hpe Mahtum mahta du ni tsun dan ai ga hpe atsawm sha bai wa shana dan nhtawm, Mahtum mahta du ni tsun ai ladaw hku bai sa jahkrat chye hkai masai da.
Gaja wa nsi si ten hta sa yu jang naimam grai gaja nga la ai, nsi mung grai si tsawm, shaloi shinggyim masha ni grai chyawm kabu masai. Ya gaw anhte shinggyim masha ni sha yang kan chye hkru wa ai naimam hpe chye hkai shatut sai, Mahtum mahta du ni hpe mung n shatsang ra sai, dai kaw na shaning shanang Mahtum mahta du ni hpe chyeju dum let atsawm sha hkai sha ga ngu nna myit hkrum tsun kabu nga manu ai da. Dai hpang gade ning rai mat wa ai mung n chye sai, shinggyim masha ni Mahtum mahta ga de kadai nwoi lung mat masai, Nnaw Bau a madu jan mung shinggyim sha ni hte shani shana rau nga shanu mat nna Mahtum mahta ga de n mai lung mat nu ai. Rai yang, naimam hkai sha ai lam hta ningra ai lam grai naw law nga ai, yu, laning ning hta mam nsi nsan hkrai hkrai bai byin wa, laning ning hta dusat du myeng ni e sa shaza sha kau ya, laning ning hta marang mawru e sa agre gaput kau ya, laning ning hta mam nsi si n tsawm, grau nna gaw hkai jahkrat ai gade nna yang mam yi ting ahkye in gakgak rai si kyip mat ma, ya Mahtum mahta ga de wa tsun dan mayu ai lam mung n hku mat sai.
Shinggyim sha ni myit sumru yu ai, Mahtum mahta du ni hpe chyeju dum ai dingyang, rai yang hpa wa naw ra nga ai rai kun? Shing rai naimam hkai ja-hkrat ten hta Mahtum mahta ni hpe chyeju dum let galang ta sha u wa yamnga sat nna nsoi nsa jawjau di yu masai da, tim, naimam ana byin ai gaw dingyang, shing rai bai sumru jahkrup yu ma yang, ningra ai lam gaw Mahtum mahta du ni a mara nrai na re, shanhte kaw na she shinggyim sha ni hpe naimam sa dat na atsawm wa hkai sha mu nga ai, manawn masham lam gaw n chye rawng na ma ai, lama ningra ai ndai hte gaw shinggyim masha ni dingsa galaw sha ai lamu ga mali marawn hkan hta lama mi hpe naw jawjau hkungga ra ai lam nga ang ai nhten ngu myit du wa masai da. Jawm bawng yu ma ai shaloi, moi jiwoi jiwa ni tsun hkai ma yang, moi n chye nkaw prat hta nat dingla langai mi hpe Mahtum mahta du ni e dat shayu nna ginding aga hkaraw nhkap maling mala hpe sa sin gawn shangun ai maumwi nga yu ai, dai hpe naw hkungga shalawm du ra ai she rai nhten nga myit hkrum la ma ai majaw, dai kaw na Mahtum mahta du ni hpe hkungga masat ai shaloi lang ta nat dingla dai hpe mung shalawm rai hkungga jawjau masat sai da (Nat dingla dai hpe hpang e dumsa ngu ai nga wa ai kaw na "Mali jahtung" ngu nna shamying mu ai, hpang e gaw "Jahtung myi tai tu" nga bai shamying), dai gaw shawng shawng hkan e shi hpe shayu dat ai shaloi, shinggyim sha ni hpe atsawm sha hkuhkau atsawm yu gawn su ngu amying jaw dat, rai yang, shi rai jang gaw Mahtum mahta du ni a ga hpe nmadat ai shinggyim sha ni hpe roirip ai mu galaw, shing re mara gaba lu nna Mahtum mahta du ni shi myi langai krawk gabai kau ya, shi nga shara mung grau sung ai akrung sinwa sha gawn shangun mat, grau na dam lada ai lamu ga hpe gaw loi mi gaji ai jahtung ni hpe dat dat nna sa gawn shangun mat sai re da.
Dai majaw ya daini du hkra maumwi hta hkan nna jahtung ngu ai amung amak e nga gajang sai, shing rai, gara kaw yi hkyen galaw sha yang mali ja-htung, nunghpung jahtung re ni hpe hkungga jawjau kau di nga ai, shaloi kaning re yi e hkyen galaw sha tim wunli lu, naimam mung law htam lu la. Bai nna dumsa nga wa ai shani kaw na, mi yet sha tsun du ai Mahtum mahta du ni hpe gaw matsaw ningtsang, madaw jahka amyu myu ngu na bai ginhka shamying di ma ai. Dai hte maren moi shawng de Mahtum mahta hte kaga nat ni hpe jawjau ai shaloi gaw "Numshang" ngu na kadai n shamying shi nga ai. Ndai lam lawu de na maumwi hte maren naw byin nga ai, anhte dingyang naw chyawm madat mat wa ga. Jaiwa dumsa ni ning nga naw hkai ma ai: Moi prat hta jiwoi ni madu a yi e jaw ang ai hku sha nat dai ni hpe jawjau hkungga di ma ai, wunli gaw lu ai, tim, moi prat hta gaw n-gaw chyu htawt ra mat, madu galaw sha ai ayi ni hpe gaw bai n mai htawt la, yi nnan she bai waw galaw sha ra mat, dai ami jawjau hkungga ai nat hpe gaw kaning di yang she mai na re ta nga yang, shaga la na madu a nta e she bai jawjau galaw masai da, raitim dai hku jawjau hkungga yang mung wunli gaw mi na zawn dingyang lu nga sai da, hpang hkan e Jinghpaw Wunpawng myu sha ni loi loi ngwipyaw wa sai rai nna, gahkyin gumdin rai mare gahtawng hku chyawm nga shagrin wa ma yang, shawng shawng hkan kaw na hku rem ai u wa yamnga ni mung law she hkan law wa, dai gaw gaja lam mi chyau rai sai, dai she n gaja lam mung bai pru wa, wurum warum tutnawng e chyu byin pru wa wa rai sai da, u wa yamnga si ai gaw si, nsi ai ni gaw layawt layat rai machyi jung, dai hta n-ga masha machyi makaw hkrumsha sha ai mung law law nga wa, dai rai gahtawng mare na myitsu ni bai myit sumru wa masai da.
Dai ten hta mare gahtawng hta du salang ngu ai chye masat wa sai, dumsa ngu ai mung hpaji grau nna kunggat mat wa manu ai majaw, shanhte chyawm bawng yu ma yang, matsaw ningtsa, madaw jihka, jahtung re ni hpe naw makawp maga shangun yang she mare gahtawng chying lu na nhten, gahtawng chying na rai yang madu nta hku sha nat dai hpe n mai galaw sai, kaning law nga yang mare ting hte seng ang mat sai re majaw, mare hku jawjau hkungga lam galaw ra sai, shing rai ginhkyawm nna nat galaw na ginra langai mi she tam wa masai da, ginra dai gaw masha hte u wa yamnga tut e lai hkra ai shara kaw rai na, shaloi gaw mare shinggan hta masat tawn yang mai na tai nga ai, sha nrai yang mare ting hpe n makawp hkra ai ngu mare myitsu ni hte dumsa ni jawm bawnghan manu ai da, dai bawngban ai hku dumsa ni hpe chyaba shaman yu shangun nhtawm, mare gahtawng shinggan na lam madung kaw nat galaw shara shatai masai da. Shing rai, shara dai hta nat ni hpe hkungga jawjau, gaja wa dai kaw mare ting grau na nga pyaw wunli lu wa masai da. U wa yamnga mung grau law htam mat wa, wurum warum mung n pru mat, mare masha ni gade na madu gahtawng de lai shang wa yang myit hta alum ala sha nga ai majaw, dumsa ni e nat galaw shara hpe "Numshang" ngu nna shamying da sai re nga ma ai.
Ndai zawn re maumwi nga nna rai sai, anhte a jiwoi jiwa ni htawm hpang de shusha ni grau nna galu gaba pra tsawm wa mu ga nga myit nna, numshang pe daini du hkra woi sharing hkrat yu wa, dai rai numshang ngu ai nga nna kaga myu ni a mare hte mai yu hpaga la, ndai gaw Jinghpaw gahtawng re hpe asan sha chye lu mat, dai sha nrai, numshang gaw moi kaw na ya du hkra shawa masha yawng hpe mu galaw aten du sai nga nna shadum jahprang ya ai ahkyak hparan ninghkawng re, grau nna gaw moi kaw na daini du hkra numshang htung tara ja ai re majaw, gahtawng mare masha mung htunglai dai ni hpe hkan galaw shatup du na shawa masha yawng chyawm nga pra tsawm nga ga ai, numshang gaw shawng e tsun lai yu sai hte maren, mare gahtawng hpe naw gunhpai ya nga ai, ndai ni ma hkra sumru yu jang, ya ndai prat hta raitim numshang wunli ninghkawng ngu ai hpe n mai gabai kau nga ga ai, dingyang shangang shakang shagrau sharawt la mat wa ga ngu nna yawng hpang de mung tsun ginrawn dat ai hku re.
