WUNPAWNG SHA NI A MAKYIT SUMRI MASUM (KIO NINGSHAWNG SANIT MAJAN "SEVEN STARS" HPAW HPANG AI LAM)

WUNPAWNG SHA NI A MAKYIT SUMRI MASUM (KIO NINGSHAWNG SANIT MAJAN "SEVEN STARS" HPAW HPANG AI LAM)

KUDAWNG SENG

Wunpawng amyusha ni gaw moi Jiwoi Jiwa ni a ban prat mi hte prat mi kaw nna kadai amyusha, kadai Shadip Magam a Uphkang ai npu e mung n rawng ai, tinang amyu tinang mungdan kata n dut n dang wanglu wanglang, shadip jahpang Gumrawng Gumtsa rai nna nga ai amyu bawsang langai mi rai nga ai. Shaning aten law law nga pra hkrat wa ai hte mayat maya law htam wa ai hta hkan nna galaw lu galaw sha, tam lu tam sha, hkawm sa hkawm wa, kanawn mazum myit mang lam magup hta langai hte langai n-gun atsam, myit marai lam sut su ngamai lu lawm lam n bung n pre madang shai hkat ai lam ni nga wa ai majaw n-gun ja ai wa gaw n-gun kya ai wa hpe dangsha mayu ai, kaba ai wa gaw kaji ai wa hpe dangsha mayu ai hte shada dip up sai chyup hkat mayu ai myit jasat kyang lai len ni pru wa ai hta hkan nna (1) Mayan ai len hte uphkang hkat ai. (2) Gumchying Gumsa magam lai len hte uphkang hkat ai lai len ni byin pru hkrum lai wa yu sai. Raitimung maigan wa a npu de shang ai lam n re, tinang amyu, tinang a mungdan nga nna nga pra hkrat wa ai gaw 1886 ning du hkra rai nga ai.

1819 ning hta lawu Myen mung de du bang wa ai Sinna mungdan de na English mung maden Koloni Shadip Magam gaw, 1886 ning hta Wunpawng Mungdan kata de shang kabye maden bang wa masai. Dai hpe Wunpawng amyusha ni gaw lu ai Ri, Nhtu, Sinat, Htunghpau, Ndan, Lahpaw, Masawn, Lungdin ni hte bumlang hkaraw nhkap jut magup hku nna dangdi lu ai atsam hte hkap shingla gasat yu sai. N-gun atsam n bung ai majaw dai ten kaw nna maigan amyu a dip up sai chyup ai lam hpe hkrum sha mat wa ai. 1940 ning daram hta Sinpraw mung de na Japan Hpetsit gumshem shadip magam gaw Englisha hpyen hpe gawt shapraw kau nna Hpetsit gumshem lailen hte Wunpawng amyusha ni hpe dip up zingri uphkang sha ai mung hkrum katup lai wa sai. 1944-45 ning daram hta English Lewi (Levy) hpyenhpung hte American Rengja (Renger) hpyenhpung ni bai du sa nna Japan hpetsit hpyen ni hpe bai gasat shapraw kau nhtawm, English Koloni shadip magam ni kalang bai uphkang lai wa sai. (English Levy hpyenhpung hte American Renger hpyenhpung hta Wunpawng amyusha ni ramram shanglawm shakut shaja lai wa sai.)

1947 ning hta Myen amyu Bochuk Aung San gaw English shadip magam kaw mungdan shanglawt ahkang aya jawm hpyi la nna munghpawm Myanma mungdan jawm gaw de na matu Kayin, Kaya, hkang, Mun, Rahkai, Sam hte Wunpawng amyusha ni hpe ra mari (Mesoi) Kahkyin gumdin bang wa sai. 1947 ning February (12) ya shani Sam mung Bang Lung mare kaw galaw ai zuphpawng hta Sama Duwa Sinwa Naw hte Wunpawng amyu Du Gyi Salang n kau mi sa du dung, myit hkrum gasadi laika ka da lawm ma ai. 1948 ning, January shata praw (4) ya shani Munghpawm Myanma Mungdan shanglawt lu ai hte Wunpawng Mungdan kata de Munghpawm Myanma Mungdan ngu ai ahkaw ahkang hte Myen shadip magam tara du shang bang wa sai. Myen amyusha (chauvinism) lailen hpe tek lang nga ai mung maden Myen shadip magam English Koloni mayam lailen, Japan Hpetsit gumshem lailen ni hpe hkringhtawng dagraw lang nna Bang Lung gasadi hte nhtan shai ai hku kaga amyusha ni hte Wunpawng amyusha ni a ntsa dip up sai chyup, gumshem wazep zingri uphkang sha bang wa sai. Dai majaw 1948 ning March shata 28 ya shani Myen amyu kata na Myen mung Kummyunit hpung (CPB) nam shang sai.

1949 ning nnan daw hta Kayin amyu ni gaw Kayin National Democretic Organization ngu ai KNDO mungmasa hpung langai hpaw nna Myen shadip magam hpe laknak lang rawt gasat hpang wa sai. 1949 ning, Februay shata 16 ya hta Wunpawng amyusha ni hpe shawng nnnan woi rawtmalan hpang wa ai Duwa Naw Seng hte Duwa Zau Seng Ningbaw ai wunpawng amyusha ni marai 1000 mi jan gaw KNDO hte matut mahkai n-gun jahkrum la nna Myen shadip magam hpe laknak lang rawtmalan gasat bang wa sai. May Myo, Lashio, Senwi, Kutkai, Namhpaka mare ni hpe gasat zing madu la lu nna Mung Yu, Muse, Namhkam mare ni de du lung wa sai. Manmaw, Myitkyina de matut lai lung wa nhtawm, Wunpawng Mungdan na mungshawa dawtsa hpe woi awn jasu sharawt kahkyin gumdin nna Myen shadip magam hpe matut rawtmalan gasat mat wa na matu, yawshada ma ai hte myit-su du, gyi, salang ni hpe matut mahkai bawngban jahkrup ma ai. Rai yang dai ten na Mungdaw Ningbaw galaw nga ai Sama Duwa Sinwa Naw hte du salang nkau mi myit n hkrum ai sha n ga, 1EK, 2EK ngu ai hpyenhpung dapdung nnan ni hpe tin shapun gan hpaw jat la hkra rai nna Myen Unu shadip magam tsap let ninghkap gasat ai hpe hkrum kadup ma ai.

Tinang amyu shada a kata kaw hpyen masa n htap n htuk re lam byin pru wa ai majaw 1950 ning April htum wa maga hta Duwa Naw Seng gaw masha n-gun (600) daram hte Mung Lung, Munggu, Hpawng Seng hku Miwa Mung de shang mat wa sai. Duwa Zau Seng gaw masha n-gun (60) daram hte Thai Mung jarit mayan de yu wa nhtawm, KNDO kata magam bungli shang gunhpai nga lawm let Wunpawng Mungdan shanglawt rawtmalan hte seng nna n yup n sha myit sumru nga ai. 1957 ning hta Kayin Mungshawa ni kaw kanau Zau Tu, Malizup Zau Mai yan hte hkrum nna Yangon, Mandalay Dakkasu Jawngma ni hte matut mahkai nhtawm, Rawtmalan mungmasa jashawn kahkyin gumdin ai lam galaw mat wa sai. 1958-59 ning hta Myen shadip magam Myen amyu kaba lailen joi lang nna dip up sai chyup, zingri zingrat gumshem ai lam laja lana grau galaw wa sai. Dai zawn re ai uphkang lailen hpe n hkam sharang n yu nga lu ai, Mungmyit Sinli, Manmaw, Myitkyina Wunpawng mungdan ting na shawa dawtsa ni gaw Myen shadip magam a n hkru n kaja ai lailen hpe rawtmalan gasat kau na matu myit su myit rawt ai hte dating hkyen lajang myit shajin bang mat wa shajang masai. Du KAba GOC Lahtaw Zau Seng, Zau Tu, Zau Dan shan nau ni gaw KIO Rawtmalan magam bungli hpe woi galaw na hkyen ai lam Kawa Hpung Up Sara Balawng Du hpe tsun dan nna ahkang hpyi ma ai da.

Dai shaloi Kawa gaw “nan nau ni ndai Rawtmalan magam bungli hpe woi galaw na rai yang, Karai Kasang kaw kyu hpyi majai nna mahtai hpyi la ga ngu tsun ai. Lata kabai bom langai la nna an wa ni a lapran kaw ndai bom tawn da ga Karai Kasang kaw akyu hpyi majai nna ndai bom hpaw hpyan dat yang ahkang jaw ai rai yang gaw bom n ngoi u ga. Ahkang n jaw ai rai yang gaw bom kapaw nna an wa ni yawng si u ga” ngu majai ga tsun let akyu hpyi ma ai. Akyu hpyi ngut nna bom hpaw hpyan dat yang n kapaw ai. Dai majaw, ndai Rawtmalan magam bungli hpe Karai Kasang kaw kyu hpyi apnawng da nna galaw hpang wa ai re lam Ningbaw Ningla ni tsun hkai dan ai mungga kaw na chye la lu ai. Anhte a Rawtmalan magam bingli gaw Karai Kasang ahkaw ahkang jaw nna galaw hpang wa ai re majaw, Karai Kasang hta ngang ngang kang kang kamhpa manoi manat let amyusha ni myit hkrum kahkyin gumdin makai hkak hkak hte jawm shakut sa yang, Awng padang ninglaw lu la na ga ai.

Sanit Majan (Seven Stars) Hpung Hpaw Ai Lam

1957 ning kaw nna Yangon Dakkasu Wunpawng Jawngma ni gaw Laknak lang Rawtmalan hpung hpaw na matu tau hkyen lajang hpang wa masai. Tau hkyen lajang ai lam ma hkra hpe lit la galaw gunhpai sa wa lu na matu ningshawng hpung langai hpe 1957 ning htum wa de hpaw shabawn dat masai. Dai hpung hpe Sanit Majan hpung (Seven Stars) ngu nna shingteng masat jaw masai. Hpung salang marai (7) san da ai hpung rai nhtawm, shana ningsin kaba 7 majan shagan pru ten hta she shim dik ai hku bawngban zuphpawng galaw nna woi shamu shamawt hpang wa ai hpung re majaw, dai hpung hpe “7 Majan Hpung” ngu shamying ma ai. Dai hpung gaw KIO a ningshawng hpung ngu yang mung n shut nga ai. Hpang e dai hpung kaw nna KIO matut paw pru wa sai majaw rai nga ai.

Dai hpung hta lawm ai salang ni gaw;

1. Salang Zau Tu - Ningbaw.

2. Salang Hpau yu Tu Lum - Shawng na Amu Madu.

3. Salang Malizup Zau Mai - Hpang na Amu Madu.

4. Salang Pungshwi Zau Seng - Hpung Salang.

5. Salang Kd. Brang Gam - Hpung Salang.

6. Salang Nahpaw Gun Jawng - Hpung Salang.

7. Salang Malang Shawng - Hpung Salang.

1959 ning hta Duwa Zau Seng gaw Kayin Mung, Thai ga jarit kaw nna Lashio, Sinli de mayun lung wa nna kahkyin gumdin lam bai matut galaw bang wa sai. Duwa Zau Tu mung Yangon, Mandalay Dakkasu hkan na Wunpawng Jawnma ni hpe kahkyin gumdin jahkrup da nna 1960 ning hta Lashio, de Duwa Zau Seng kaw du lung wa sai. Dai aten hta Dawa Zau Seng hte Duwa Zau Tu gaw Wunpawng amyu shanglawt lam, Myen shadip magam hpe rawtmalan gasat na lam hte Wunpawng Mungdan ting hta dam lada ai hku nna masing jahkrat woi shamu shamawt sa wa na lam ni hte seng nna n-gun dat bawngban wa masai. 1960 ning, October shata 25 ya shani Du Salang my tsaw ramma nkau mi Lashio mare kaw zuphpawng galaw nhtawm Wunpawng Mungdan shanglawt Rawtmalan a matu kahkyin gumdin lam hpe htep lahti matut galaw lahkam jat hkrang shapraw mat wa lu na matu Wunpawng Mungdan Shanglawt Hpung KIO (Kachin Independence Organization) ngu ai Mungmasa hpung hpe shalat shangai shapraw dat lu sai. Dai Komiti salang ni gaw;

1. Komiti Ningbaw – Duwa Zau Seng.

2. Ningbaw malai – Duwa Zau Tu.

3. Komiti Amu Madu – Lama La Ring.

4. Komiti Salang – Pungshwi Zau Seng.

5. Komiti Salang – Lamung Tu Jai.

6. Komiti Salang – Dumhpau Gawng.

7. Komiti Salang – Zau Dan (or) Zau Hkyen.

8. Komiti Salang – Malizup Zau Mai

9. Komiti Salang – Maran Brang Seng.

10. Komiti Salang – Hkangda Brang Gam.

11. Komiti Salang – Namsu Zau Tawng.

12. Komiti Salang – Hkangsau Kam Htoi.

13. Komiti Salang – Luk Tang Ji.

14. Komiti Salang – Malang Shawng.

Wunpawng Mungdan kata de tawt lai shang kabye rawng nga ai mung maden Myen hpyen shadip magam hpe rawtmalan gasat gawt shapraw kau lu na matu tau hkyen lajang ai lam lit la woi awn galaw sa wa na ningshawng hpung rai nga ai Sanit Majan (Seven Stars) hpung gaw Wunpawng mungdan shanglawt hpung KIO hpe hpaw masat shagrin la lu sai. Dai kaw nna KIO hpung Pati hte hpyendap, uphkang dap ni hpe hpaw maden nna shara shagu hta majen je shara la bang mat wa ai gaw ya aten hta Dapdung, Dapba ni hte Ginwang, Ginwang Ginjaw ni law law hpaw jat nna woi awn sa wa nga sai.