Wunpawng amyusha ni ginru ginsa yu hkrat wa ai hta, La ntu lakung, Ja San Nbawn Pyi Sa, Ja Sen Mai Aw dap lakung ni gaw;- Hkindu Yang kaw nna sinna maga Mali Hka rap nhtawm nga pra hkrat wa ai re nga ma ai.
Ndai dap lakung ni Hkummung Maw Lung Dawn grup-yin e shanu nga ai aten, 1750 ning daram hta, Hkummung Naw LungDawn Daw ai mabyin byin pru wa ai. HkumMung Naw LungDawn ngu ai gaw, Hkummung Bum maga ladawn nna, gum taw ai majaw, shamying ai re nga ma ai. Lai wa lai sa masha ni ndai hkran, wawra hkran, tsat kap kap rai lai hkawm lu ai LungDawn re.
Laja Yang Tu hkying jan, Tingmai Ma Ja Ing gaw, Hkummung Naw LungDawn kaw, kasha Ma chyangai galeng tawn nna, baw hkrut nga yang, kasha mat mat ai da. Hkan tam yu yang, Hka la-ing LungDawn maga nbat ding-yang rai nga ai sha mu sai. Kanu gaw, Lapu garawt la sai re chye ai majaw, hkrap marawn nna, nye kasha Nkung Na Li chyangai Ma Ja Ing hpe, ndai Hkummung Naw LungDawn e rawng ai Ningka Naw Puren e garawt sha ya sai.
Ningka Naw Puren hpe mung, achye daw, nye kasha Ja Ing hpe mung, shaw ya rit law, Ladawng Tu Nga Chyahpraw jaw na law nga nna, Hkummung Bum maga yawng ai LungDawn re majaw, Hkummung Bum Mu hpe, shawng shaga ai. Dai hpang Singgawng Bum Mu hpe bai shaga sai. Masum lang ngu na hta, Lung Ja Bum Mu hpe shaga yang, kasha a Mang hte hpawn Lapu hpe garawt shaw tawn ya sai. Hkummung Naw LungDawn mung, daw lawm mat sai.
Tingmai Ma Ja Ing gaw, Kahpu Kawa, Mayu nta de Ladawng Tu Nga Chyahpraw nga ai hpe mu chye ai majaw, kahpu hpe kam nna, Ga sadi tawn ai re da.
Shingrai Tingmai Ma Ja Ing gaw, Kahpu Kawa, Mayu nta de sa nna, shi hta byin hkrum sha ai mabyin lam hpe, tsun nna, sa hpyi ai shaloi, Mayu ni mung, dai Nga Chyahpraw hpe jai lang na shajin da ngut sai majaw, n lu hpyi la sai da.
Shingrai Nga Chyahpraw lu jaw hkra ngu kade tam shakut tim, n lu byin sai majaw, Ndup Dumsa La Yawng gaw, Nga hpe shadung chya jahpraw nna, Nga Chyahpraw re ngu masu jaw na ladat shaw, woi galaw sai. Mu ningshe Htingnu de shi nan dumsa ap ya sai. Hkap mung hkap la sai.
Mu ningshe ni gaw, Nga Chyahpraw n nga majaw, Mu-nu Htingnu de ap shalai n gwi sai. Dai majaw shinggyim dumsa rai nga ai Ndup Dumsa La Yawng hpe, shaga nna, Mu-nu Htingnu de ap shalai shangun sai.
Dumsa La Yawng gaw, grai htuk manu hkra dumsa ga chye tsun ai wa re da. Shingrai dumsa La Yawng gaw, hkawp Mu-nu Du kaba ni e, hka ai mung lai, dum rit ai mung shai sai. Nga Chyahpraw n lu ai majaw, Nga Shachyang jaw ai rai ga ai law ngu tsun shapyaw ai majaw, hkap la sai da. (Raitim jaw jau ai hta masu sai majaw, matsaw ningtsa Nat ni sindu galau myi man ningmau sai.)
Dai hpang Dumsa La Yawng hpe, dumsa shabrai gaw hpwa ra nta? ngu yang nanhte jaw ai mi la na nngai ngu sai da. Matsaw ningtsa Du ni gaw, dumsa La Yawng hpe ka-ang shingra dinghta wa yang ga de mada yu u! ngu nna, shawng nnan gitgu kum ai hkrai dem rai nna mare ka-ang na nta gaw grai kaba alum ala rai. Makau grup yin na nta ni gaw, kaji ji re ai hkrai dem re ai mare kaba langai madun dan nna, ndai gaw Gumchying Gumsa ngu ai Mare re. Dai hpang Lahkru Laja Hpun hkrai dem maren ren re ai nta hkrai hkrem re ai mare kahtawng kaba langai bai madun dan sai. Ndai gaw Gumrawng Gumtsa Mare re ngu ginhka tsun dan nna, nang yu ra tsawm mu ai wa la u, ngu tsun yang dumsa La Yawng gaw, Lahkru, Laja hkrai dem maren re ai nta hkrai hkrem re ai Gumrawng Gumtsa mare hpe tsawm mu ai, yu ra ai ngu lata la sai da.
Matsaw ningtsa du ni gaw nang dai hpe ra ai nga jang, ndai wa galaw sha woi u, Du magam ni hpe hkum saw hkum shaga yaw ngu matsun nna, Mai-aw ndum lahkawng (2) hta Nbaw N-gu hte Tsa ntsin bang jaw dat sai da.
Dumsa La Yawng dai hpe wa galaw sha woi yang, Nbaw Bunghkrawng (9), Tsa N-gu (9) (Yam Kaba) hpring sai. Ndai lam hpe Gumchying Gumsa Du Salang ni gaw, n chyoi n chye ai. Raitim Ma ni gaw chyai hkawm let, wa du lawm ai. Shat Nbaw hte Tsa gam sha ai shaloi, Du kasha ni kaw du yang htum wa wa re ai. Dai majaw Du ma ni gaw, anhte hpe n jaw sha ai nga nna, pawt ai hte Kanu Kawa ni hpe dai lam azin ayang tsun dan yang, Salang ni mung anhte hpe n tsun ai sha dai lam galaw ai nga nna, pawt grang wa sai. Lu sha sha ai shawa masha mung ni myit masin galai shai wa nna, n kam hkam ai myit masa ni galai shai wa sai.
Dai majaw Gumchying Gumsa Du ni hpe gumlau ai majaw gaw, ndai Hkummung Naw LungDawn Daw ai shara kaw hpang wa sai. Lani hte lani majan grau kaba wa nna, Mali Hkrang Wa Lawng de du hkra gasat shang wa sai.
Shaning tsawm ra na hkra gasat hkat wa ai shaloi N-GUM LA Htingnu na ni mung, Dagrum ni hte pawng nna, Gumchying Gumsa hpyen luksuk Mali tsa (400) hte wa htim gasat sai. Gumlau maga na hpyen hpung ni laja lana hkrat sum wa sai. Share Jaubu gaw bai galai galai rai ninghkap gasat tim n dang sai. Marip La Mawng La wa rawt nna, ngai bai share galai na nga nna, gasat tim n dang lu ai majaw, La Mawng a share galai nga ai Ga Malai ya du hkra ngam nga ai. Hpang jahtum lagat hku muk ngu ai shara kaw laja lana gasat poi kaba byin sai. Shanhte lang ai N-gang hte Nhtu shachyai ai nsen gaw lamu de wu gadu hkra rai wa ai da. (Gumlau maga matsaw ningtsa hpyen garum du sai.) Ndai gasat poi hta, Gumchying Gumsa maga na hpyen hpung ni sum agrawp htingnut mat wa sai. Mali hka lam hku Wawn hta myihtoi lahkum wa a moi mang mara nna, hprawn hprawng yu wa yang, Sumli Hka mazup kaw shakaw shakap dat yang, myi htoi lahkum a moi mang rawt nna, myi htoi htoi pru wa ai da.
Myi htoi wa gaw grai pawt nna, shinggyim masha shabyin ai bungli n re, matsaw ningtsa nat Karai e shabyin ai bungli she re, gasat dang ai baw n re, hkum sa, sa gasat tim nanhte sum na re ngu nna, ngai tsun sai. Nanhte ngai hpe n kam ai, nye ga n madat ai, dai majaw ya gaw, ngai mung gumlau sana nga nna, myi htoi htoi ai da.
Shingrai N-GUM LA kawng kaw Gumchying Gumsa gumlau ai majan paw pru wa ai gaw, Hkummung Naw LungDawn Daw ai shaning (100) ning na ai hpang, AD 1950 ning daram hta re nga nna, tsun hkai ma ai law. Dai majaw N-GUM LA kawng hpe Gumlau kawng ngu nna, mung shamying ma ai law.
Ndai Hkummung Naw LungDawn Daw, Ningka Naw Puren shaw ai Maumwi Maubyin gaw anhte Wunpawng Amyu sha ni hpe, matsaw ningtsa kaw nna, Gumchying Gumsa kawn, Gumrawng Gumtsa de, shachyen ginhka dan ai Maumwi Maubyin ningpawt rai nga mali ai.
Labau Sawk Ka Ai Wa
Slg. N-sen Zau Seng
Sumprabum
Discussion
0 comments
Sign in to join the discussion.
Sign in to commentNo comments yet. Be the first to join the discussion.