SHADAN KRUNG A LABAU GADUN

SHADAN KRUNG A LABAU GADUN

HKAI AI: AYANG NAW,

KA AI: DINGGA TANG

Hpaji sara ni sawk da ai kaw chye lu ai. Shadan krung ga kaw moi 3000 jan ning a shawng e masha sa nga hpang sai. Ya nga matut mat wa ai hku nga yang gaw Balawng ni shawng sa nga hpang nna, Lisu ni bai nga nang bang wa ai rai yang, galang mi hta Balawng ni a mashawt mahkam kaw Lisu ma langai sa kashawt achyaw si mat ai da. Shaloi Lisu ni gaw kawa wura pung kaw aya hkainu n-gawng re hkaili ni gahkyin gapung lang nna anhte a kasha sha ai gaw ndai ni re, ndai gaw shi a hkyi re. Shi gaw wa mung pa ai, nsi mat yang gaw sak galu, du magam galaw ai baw re ngu adap sa dung ma ai da. Shaloi Balawng ni hkai ningmai hte dusat yamnga u numji numchyoi yawng rai yang amyu latsa kaw na amyu mi latsa tsa wa na hku mawhke hka da ma ai da. Dai rai yang Balawng ni gaw Hkai pyet masum sha nlu tam shatup ai majaw, Lisu ni hpe lamu ga yan kau da masai da. Hpang e gaw, Lisu ni a madim kaw • Maran du kasha langai bai tsawt bang si rawng nga ai da. Shaloi Maimai Gawn ngu ai Lisu Maimai puntai krung e dut lu dut sha gawn ai wa rai nga ai. Shi gaw dai mung anhte gashu kasha rai na re ngu Lamyang du wa hpe Hkinru ga Woilang hka kaw du hkra ga jaw kau nu ai da. Shingrai nga ai hpang e gaw Lisu ma ni she Nrawng Hpan Nyeng ga, Lana du ni a manau hpun sa hta ju kau ya ai majaw, Lana du ni Maimai Gawn wa hpe rim shachya da manu ai da. Shaloi Sama du wa gaw gumpraw gawm hte magwi kawng mi hte sa shaw la nu ai da.

Hpang galang bai Lisu ma ni Magawng du ni a magwi sumri sa shingkawt ya ai majaw, Magawng du ni bai rim matep da nu ai da. Shaloi mung Sama du wa gaw Gareng Hkinjawng Tang hpe gumpraw gam ya dat nna bai sa shaw la shangun dat yang, Magawng du wa gaw Gareng Hkinjawng Tang hpa tsun tim n madat ai agatsi sha Gareng Hkin -jawng Tang dung ai tingnyang sa azat dat u ai da. Shaloi Gareng Hkinjawng Tang gaw nat litlawng jawn nna n-gun mung grai ja re majaw, pawt nna Npan nbang gunh -tung rawt numrat di kau dat yang, Magawng du wa gaw hpa nngu lu ai hkrit mat ai majaw, Maimai Gawn wa hpe hpa ndaw ra ai raw woi mat wa manu ai da. Dai hpang tsawmra ning a hpang, Sama du wa manau dum hkyem nna Gareng Hkin- jawng Tang hpe Maimai Gawn wa kaw hka wa ji shangun yang, Maimai Gawn wa a nta kaw du yang, garap kaw chyahtai htaiyawng mi mara, shat shadu sha ai di pawng mi rai, bawhtu mi rai, dai kaw wa mawn langai mi yaw da sha re majaw, pawt nna gumhtung bai rawt numrat di kau da nna wa dai a wa na mung gadoi ju sha kau da ya di, rai mat wa ai, Hkinru ga wa nga nga ai da. Maimai Gawn wa gaw Gareng Hkinjawng Tang hpe Hkinru kaw na bai shaga nhtang la nna wa mawn dai mung woi sat sha rai, garap na htaiyawng hpe mung hpai dat ya rai, gara kaw raitim anhte shara hkrai re ngu, Hkinru kaw rai tim wa nga su ngu dat nu ai da.

Ya Sama du wa manau dum ai shani gaw, Maimai Gawn wa gaw, langa hpaw hta ga majaw bang, ri matsun mi bang, langa si mi bang, dumsi magyi mi bang, di shangun dat nna shi gaw wa ga rai mat wa ai da. Ya ganau Maimai Gawn wa hpe gaw Maimai ga Ayawng ni e bau sat kau manu ai da. Sama du wa gaw lamu ga jaw kau sai re hpe chye ai majaw, Jinghpaw ni hpe bai nga shanu bang wa shangun sai da. Shingrai jinghpaw ni ndai ginra hta nga an bang wa ai rai yang, Sama ga de nan nkawn chyinghkyi sa nau tsan ai majaw Shadan du ni hpe bai sa woi la masai da. Hpang gaw jahtum Wuhpra du Hpri Marang gaw Lamyang du Nang Tsen hpe la ai rai yang, num brau hkrai brau nga nna kawa ni wa su ngu jang adap hkrai magra kabai bai di u ai da. Shaloi kawa gaw lamu ga hpyi ai re chye nna htaw wa nna nbaw shat chyaru lit wa galaw gun la su, shingrai hpawtni gara kaw hkrum yang gara kaw jaw na ngu dat jang, Lamyang Nang Tsen gaw Npri ga e shat wa galaw gun la nna kawa ni pyi rai nrawt yang htingwung kaw sa du rau sai da. Shaloi kawa gaw nhtu shaw ningwut nna naw she sit u ninghpu ning-yung ni nhtu lang naw dut ai naw sit u ngu ningwut nhtang ai rai yang, Hkaya ga Hkindu yang kaw du ai hte gaw nrawt hkraw ai dung zut rai mat ai majaw, Shanghting hka ga Hka ya ga kaw nna Shadan du ni hpe dan kau ya ai gaw Shadan a lamu ga gaw Janda hka du hkra re nga nna tsun ma ai rai. (Grau hkrak hkra naw hkai sharai la ga)