Naw Seng gaw 1st Kachin Rifiles na re dai aten May Myo kaw H.Q. shawng e Thawadi kaw re. Myen mung kata majan byin wa ai hte Kayin gasat na na matu Thawadi de bai htawt dat ai, hte Yethashe Mare kaw nna 1949 ning February 16 ya shani rawt malan gale mat wa sai. Shaloi B,C,D-Coy 3 hte 3rd. Kachin na Coy 2 mung Pyinmana de Kayin hte Kummyunit gasat yu mat wa ai kaw na gale mat wa ai. Yawng Coy 5 rai nna, Masha yawng 800-900 daram re. Hpang e May Myo hte Thawadi hkan na, H.Q.hkan na yawng pawng jang 1000 mi jan rai sai.
Shawng nnan e mu mada myit lu ai lam gaw Anhte Jinghpaw ni Japan hpe mung gasat kau sai. Myen Kummyunit hpe mung gasat kau sai. Ya Kayin hpe mung bai gasat ra wa, Anhte Amyu ni Amyu law law hpe Hpyen shatai ra wa ai. Kaga ni dang yang mung anhte Jinghpaw ni hpe bai sat shamyit kau na ang ai. Myen Asuya U Nu ni nan dip sha, nau roi ai hte re ai. Dai majaw Myen Asuya hpe mahtang gasat nna, Myitkyina de lung mat wa ga ngu ai lam sha re.
Hpang e Kayin Rawt Malan hte pawng la ai hpang she Kayin ni mung, Kayin mung gaw sharawt na nga ai. Anhte Jinghpaw ni mung Jinghpaw Mung gaw sharawt ga nga ai, masing de bai matut galaw sai.
Naw Seng ni hpung Yethashe kaw nna lam ding yang May Myo du hkra gasat la kau ngut nna, bai gasat yu wa ai Pegu makau Hparaji kaw du hkra gasat la kau ai. Tawng Ngu kaw Kothole Asuya hpaw tawn sai rai. Dai majaw Naw Seng ni mung Jinghpaw Mung Gaw Sharawt na de yaw shada mat wa ai re.
1949 ning, July shata Kayin hte hka nna, Tawnggyi lam Sam Mung hku lung wa ai. Nam Hkam kaw Sama Sin Wa Naw gaw U Gyi Hting Nan hte kaga salang ni hpe dat, Sam Mung hkan na salang ni hpe dat rai nna, Myitkyina de lung wa na rai yang, gasat nna lung wa ai gaw n kaja ai. Laknak ap jaw kau nna lung wa yang mai ai, nga sa tsun bawng ban shangun ai. Sam Mung na salang ni mung Lashio lawu hkan kaw nna shawng sa tau la, Mawdaw hte rai Laknak ap jahkrat na matu tsun ai. Nam Hkam e she Sama Wa dat ai masha ni mung bai du ai hte dai hku tsun ai re. Dai lam hpe Naw Seng n hkap la ai.
Sama wa gaw dai zawn maga mi bawng ban masu nna maga mi de Naw Seng hpe gasat shabra kau ya ai. Hpyen Dap ni hpe bai shinggyin la, shajin la ai lam galaw ai. Dai hpang Naw Seng ni hpe lawu lahta hku matep nna aja awa gasat sai. Dai majaw Naw Seng ni gaw Kutkai kaw nna 1949 ning August shata hta nam de bra shang sai. Tinang Dum nta de mayun bra wa mat ai ni mung law sai. Shata 6 hpang bai shaga na ngu shabra dat ai rai.
Dai hpang 1949 ning October shata htum de Sam Mung Hu Hpyet kaw shara shagu na Mung Du Salang ni hpe shaga bawng ban nna Jinghpaw Mung gaw Sharawt na matu woi aw law shabra dat sai. Hpyen Dap Hpe mung P.N.D.F (Pawng Yawng National Defence Force) ngu hpaw dat sai hte, shabra kau sai Hpyenla ni hpe mung bai shaga sai.
Dai shani jang Wunpawng Amyu a Dawng Hkawn hpe mung masat sai. Dawng Hkawn gaw ya na KIA Dawng Hkawn raw re. Lachyum shapraw ai lam ni mung yawng maren re.
Nnan shaloi P.N.D.F. 1st Bn., 2nd 3rd.. Bn 4th., Bn. ngu nna Bn.4 hpaw ai. Strength tup gaw nre ai. 1950 ning hta 1st.Bde., 2nd Bde., ngu Gang Ming kaw bai hpaw, dai shaloi Bn.6 du sai.
1st Bde., hta gaw BC hku nna Brig. Rank hte P.N.D.F. a VCS mung galaw kapyawn ai gaw Salang Prang Kang Di re. 2nd.Bde. hta gaw BC hku Brig. Rank hte Hkam Man Dingia galaw ai. Naw Seng gaw General hku re. Dai shaloi lst.Bn.CO. Lasi Naw Din (ya CPB), 2nd.Bn.CO. Nhkum Gam (si sai), 3rd Bn. CO. Bawm Yaw (Miwa Ga de n shang lawm), 4th.Bn.CO. Ndau Krang (ya CPB), 5th.Bn.CO. Zau La (Miwa de shang lawm), 6th.Bn.CO. Maran Hkun Htun (ya CPB) ni rai ma ai.
Shing rai Lashio lam kaba a Sinna maga 2nd.Bde. lit la,Sinpraw maga lst.Bde.hte G.H.Q.lit la nna gasat mat wa sai. Maga mi de Hpyen nau jawm wa ai hte maga mi de Sam Du ni jawm gasat n htan shai wa ai majaw ram ram yak mat wa ai. Dai majaw Miwa de shang na myit mat wa ai. Yaw shada lam -
(1) Miwa Mung kaw shata 6 sha shang nga nna Hpyen Training Shaman Shakyang la na.
(2) Miwa mung kaw laknak garum hpyi la na, ndai lam lahkawng sha re.
Miwa de laika hte rau masha mali lang dat yang she ya na Kunmying Chywin Shi na Hsa Fu Si Lin hte hkrum nna yawng shang wa na hku hkap la sai. Shing rai 1950 ning April shata htum hkra Munggu, Mung Lung, Hpawng Seng ndai shara 3 hku hpung 3 hku garan nna Shang wa, yawng Miwa ga de shang lawm ai 600 daram re. N kau hpe gaw dingsang jahkring kau da ai. Shata 6 hta bai wa na ngu la nga shagun ai.
Miwa de du ai hpang Kummyunit rai mat sai ngu hkrit nna 100 jan bai hprawng n htang mat sai. Jahtum e grin ai (480) re. Miwa mung Kwi Tsu kaw du mat wa ai ni rai sai. Yawng Kwi Tsu e nga ai. 1958 ning du hkra yawng arau tawn nna, Miwa laika hte Mung Masa sharin nna nga ai. Kwi Tsuhte Yunnan shara lahkawng kaw kahti galai nga ai. Yunnan mung daw kaw nna 1958 February hta Kwi Tsu de htawt ai. Kwi Tsu kaw Myen Mung bai shang ai du hkra nga ai.
Kwi Tsu de htawt ai kaw nna gaw Miwa Citizen hku nna rai mat sai hte bungli shang galaw sai. Pada Jak Rung hkan bungli galaw ai. 1964 ning du hkra Miwa Kummyunit hku nga tim, Ayin, Zau Lawn, Zau Mai, Bawm Ying ndai mali sha naw re ai. 1962 ning hta Miwa Pati hta bai n hkap la mat ai, bai pat kau ai majaw re.
1964 ning October shata kaw nna gaw, Myen Mung Kummunit Pati na Soe Thein, Kyi Pyai, Tu Sein hte Ung Kyi ni gaw Naw Seng hpung kaw sa nga ai. Pati Gawng malai hku sa nga sai hte CPB kata hku nga mat wa sai. Shawng ejahkrup la ngut sai hte maren shatup mat wa sai rai.
1968 ning January 1st.CPB Myen Mung bai shang ai ten du hkra Naw Seng hpung ni masha 430 rai ma ai. N kau mi machyi si mat ai ni lawm ma ai. Raitim Miwa Mung kata Miwa Num la ai Naw Seng hpung ni marai 200 tup rai nna, Miwa Num 200 woi wa shalam ai. kasha ni hte hpawn rai yang Myen Mung de bai du shang wa ai 600 jan re ai lam ni hpe sagawn chye lu ai rai.
LAHPAI NAW SENG A LABAU KADUN
Lashio Ginwang, Loiwaw Bu Ga Mare na re ai. 1940 ning Englik prat hta hpyen shang ai. 1942 ning hta Japan shang nna Englik ni India de htingnut ai shaloi hkan nang wa ai. Sumpra Bum Mare kaw wa hprawng nga ai. Dai kaw Nai Lu ngu ai Num la ai. 1962 ning July hta Putao hku nna Englik bai shang wa ai. Lewi Dap hpaw ai kaw Hpyenla bai shang galaw ai. Myen Asuya Hpyen Dap hta matut shang Rawt Malan mat wa nna, Miwa Mung du mat wa ai. CPB Dap kawjahtum ai lam chye lu ai. 1972 ning April shata Wa Mung Dingdung Shin Di Jang ngu ai mare kaw shana U yup gyam gap sa ai kaw di hkrat hkala nna Asak sum mat wa ai lam chye lu ai.
Ka ai; Du Kaba Tu Jai, 1961 ning kaw nna 1978 ning na rawt malan labau.
Discussion
0 comments
Sign in to join the discussion.
Sign in to commentNo comments yet. Be the first to join the discussion.