(Part 1) 101 SHARE NINGHKRING MAHO LA TSAI
Hpan Ja
2015 ning shata 5 asi de, Myen mung Sam mungdaw Muje na sumla hkrung gayat sara kaba Lashi Tu Ja hte shi manang yan, Sakhkung mungdaw htunghking sawk sagawn hpung kaw wa du ma ai. Shanhte du lung wa ai lam gaw, htunghking sawk sagawn du kaba Htoi Man hpe, shanhte Jinghpaw mungdaw hkan hkan sawk sagawn la ai n-gaw htawt laika hte sumla ni wa sa jaw ma ai re, ngai hpe hkumhpa laika buk langai kumhpa ma ai. Lashi Tu Ja datnu kaw sumla ni shalai ya na hkyem bang wa ai shaloi, saboi e mara taw ai datbung ningsa langai hpe hta yu let, grai gabu gajawng ai hku: "Aga, sara kaba, datbung ndai kanang na la da n ta?" Shi a myi gaw mi kawn kaba nga ai hta grau kaba hkra hpaw shachyen da, datbung poi mat na tsang ai zawn, ta lahkawng hte matu e manat let yu shati nna mani sha sai sai rai san u ai "Agu galau Zung Htang hte shi a hpyenla manang yan re. Shanhte Inglik hpyenla la ai ten e dem ai re, datbung ndai gaw agu a prat na gashu gasha ni hpe ngam da ya ai la-hkri shingtai rai nga ai." Ngai mung mani let shachyan ya we ai. "Aga, manu dan dik sai re law, ngai gaw n mu yu ga ai le.
Sara kaba, ngai hpe datbung gayat la shangun rit law?" Shi ngai hpe yu shati tawn nna san ai shaloi, ngai mung dem la u, dem da yang hpang prat na ni a matu sakse mai shatai ai ngu dat ni ai. Shaloi shi kremra shachyen la nna grai jahtuk let hprek she ngu tsawmra lang dem la ai hpang she, myit dik dum ai mani nsam hpe n-gup jut e htu gahkyin tawn hkra awng dum mat nu ai. Datbung hta shingkang shingwang re hpyenla marai masum a myiman nsam gaw, mungkan ga ntsa hkrit ai rai lama mi nga na zawn nrai ai shinggan myisha hpaw da, lawngta gadun hte labawp kaw du ai labu gadun bu, labawp gaang e du ai mawza za, lahpan ndung daw matut ai shanhpyi zauhkai hkai, kara galu hpe amanyen sha masit nna pungding kaw jaw krang krang nna kazu maka zawn di manai shangang tawn, shanhte masum a lagaw hpe pai hkra hkran rai tsap ai kaw, gaang na grau galu ai Galau Zung Htang gaw ta shaya tawn nna tsap, shi a pai hkra na manang yan gaw nshang madi let tsap nga ma ai. Datbung dai hpe nye myit hta kadai la ni mu tim yu shakawng dum, kadai num ni mu tim yu tsawm dum na re ngu galoi raitim myit sawn we ai.
Bai datbung dai kyem tawn nna, nye kraw hta: "Langai gaman langai share ninghkring hpyen." Ngu ai sumrai laika ka na ngu, myit saku sawn sumru ai kade ning she rai wa sai, de a majaw, laika tam sawk yu, anhte ga hkan Inglik hpyen shang yu ai ni a maumwi hkan sagawn yu, sumla hkrung labau hkan sengang maumwi tam sagawn ai ten grai law sai hta n-ga, kadai hte hkrum jahta tim maumwi dai chye nchye sha san shaja rai, madat gahtap hkra ai ni gaw ngai hpe anya ai pyi nga ma dawng. Lashi Tu Ja datbung htawt shalai bang nga ai laman, ngai gaw shi kumhpa ai Sam mungdaw ni shapraw ai nambat lahkawng mungkan majan hte Japan majan awng badang lu ai 70 ning ladu hkrum shaning hpe masat dingsat hkalum ai hkumhpa laika buk galap yu dat ni ai. Ga baw malawm hti yu ai shaloi, "Nambat lahkawng mungkan majan ninghkring Maho La Tsai" nga ai ga hkaw hti hkrup nna, lawan wan hpaw hti dat ni ai. Laika hta madung shachyan dan ai, lani mi na Japan majan man hta, Maho La Tsai gaw manit 5 laman e Japan hpyen marai kru hpe kawlanri hte galun sat kau lu nna, Amerigan hpyendu jaubu Wuilen Sati Wun e jaw ai nambat langai share ninghkring dakhkama kumhpa lu la nu ai, nga ka tawn ai shingdu e, (Maho La Tsai:1906 ning shata 7 praw 5 ya hta shangai ai) nga ai laika hti hkrup rai, myit hta grai gabu let, kaga laika baw bai tam hti wa ni ai.
Maumwi langai hta bai ka da ai: Sak 14 ning du ai, shaga mying Ngai Tawng ngu ai Jinghpaw shadang sha gaw, Myen ga, Inglik ga, Gala ga, Japan ga chye madat chye shaga nna, kin yu bungli hta grai dang, Japan gap ni hkan lamu shamying rai sa hkawm chyai masu nna, Japan ni majan gara hku gap hkyem ai lam hkrai sa sawk pru wa wa rai, Japan ni hpe majan agying sum agrawp shangun ngun rai, Japan ni pyi myit she htum mat nna, zoi hkrai bai hkan zoi yu masai, jahtum e shanhte hpa nyeng n shadu ai jahkrai ma hkraichyip Ngai Tawng e Wuilen Sati Wui hpe shiga lagu sa ya ya re re chye ai hpang, Japan ni Ngai Tawng hpe nju ai myit byin mai taw maya achyak sha kau na daram rai, Ngai Tawng hpe rim la nna, ja ku gadoi di kau ya di sat kau manu ai, Ngai Tawng hpe zingri sat kau ai hpang, hpyendu kaba Wuilen Sati Wui nan majan dawnghkawn pyi daw mi shayu hkra jahkik ai makoi mayang poi galaw nna shagrau shaa sai, nga ka bang da ma ai. Ngai gaw maumwi dai yan hpe n law hti dum dik rai, nsa kaba shaw let: "Tsa Lum e, ndai laika hta ka bang da ai Maho La Tsai yan Ngai Tawng a maumwi hpe loi galu nna ka shachyan dan taw rai na wa, naw hti mayu ai kaw htum mat sai." Ngu dat ni ai.
"Cha e, Maho La Tsai naw nga ai, ya shi asak 108 ning du sai re, le Sam mung ga e atsawm sha naw pra nga ai, shi gaw Japan majan na lam grai matsing ai, shi kaw sa san la yang mai na re le. ." Lashi Tu Ja mani sai rai ngai hpang de mada let tsun dan ai ga hpe, ngai nau n kam ai. 108 ning ting pra sayang, Japan majan na lam naw matsing na n shadu sai, mi naw pra nga tim myi n mu na layawng re dingla rai na shadu let: "Shi teng sha naw hkrung nga ni? Ga naw lu shaga, ana naw na a ni?" "Hehe, zeng sha gaw e. Sam mung Tawngji kaw sha nga ai. Shiga ndai gaw maning sha sara kaba Maran Ja Gun Maho La Tsai kaw nan sa san la nna ka bang ai re. Shi gaw nanhte Yinkyang ginwang Jansi Jana Munggum na re da. Ya nta ga e shi gasha naw nga ai, sara kaba Maran Ja Gun shanhte nta sa du, gasha Zau Awng hpe nan wa mu nna, gawa a lam ni tsun dan, gawa hpe sa jahkrum ga, lam shabrai ngai shapraw ya na ngu saw ai re, gasha wa n kam let: "Ngai pyi 80 jan ning du sai, lupba de lagaw adaw mi lup mat wa sai, wa gaw n hkrung sai, shi hte kunghpan maka gumlan kaba ten kawn n matut mahkai mat sai, kaga masha she rai na re." Nga rai n kam si ai da. "Jahtum e gasha n hkan sa sai da kun?" "Za zin za rang ngu saw jang she, nnangnawn nawn nna nta gaput mat ai, nta nan bai galaw ai rai n ngut ai, lam mi gaw sak kaba sai, bai lam mi gaw gawa chyinghtawk mu galaw ai re majaw, jau jau kaw nna shanhte hte n matut hkat na hku gadi kau sai, shing rai n htinglet hkat ai nau na sai, gawa nan rai n rai ma n chye hpa re, lam mi gaw sumtsan lam hkawm hkrit ai ngu hkap tawngban kau dat ai re da. Shanhte gaw gawa maigan ga kaw sa si nan mat sai she n shadu i." Nga tsun ai myiman kaw, teng nan teng sai ngu kam mat ni ai.
Chyahkring na laman nye myit hta, dingla dai gaw lam naw lu hkawm ai kun? Ga naw mai shaga hkat ai kun? Myi naw mu ai kun? Shaga ai ga naw na lu ai kun ngu myit shakru bang wa ni ai. Anhte nta e sak 105 ning du ai, lawu lahta nta na annau ni a gamoi ang ai Lawroi Ji ngu ai hpe woi nga lai wa saga ai. Moi ji naw hkrung nga ai ten, du krung nau dangu mat, shinglang gaw galu rai, dung yang lahput lapran kaw myiman chya rai, yu tim baw masum tu ai zawn she rai mat ai re, shi si ai shani, hkum magaw mat nna du-u kaw hta bang ai shaloi lahput pyi daw mi naw kra ai she hta kau sai. Shi naw hkrung ai ten hta myi n mu mat, lam hkawm yak mat re hpe sawn dat jang, Maho La Tsai hpe jau tak grai tak ra mat sai. Lashi Tu Ja ngai myit ru ai mu sam ai, ga-hpri n-gup mi lu la ai htawm tsun ai: "Tsun ma yang, na gaw loi layawng sai da, raitim shaga hkat yang hpa ndut ndang re nga ma ai, ga loi ja ja ngu san yang asan sha naw na ai re da. "Tsa lum e, ngai shi hte nan nan hkrum shaga mayu ai, kaning di sa tam la na kun? Chye ai wa ahka lu ai nga ga malai hte maren, nang tsun dan sai re gaw, nang nan hkan woi tam na nhten law?" Ngai gatu garu ngu hpyi shawn bang wa ni ai. Ndai gaw lani mi shawng lu hkrum yang yawng a matu akyu rawng ai mu kaba langai rai nna, myit hta galang ta nsa tam lu nlawt hku sawn dat ni ai. "Aga, nang shi hpe shade ahkyak la jang gaw, ngai woi hkawm ra sai ga rai nga ai. Teng sha ya shi gaw naw hkrung nga ai 101 hpyenla dingsa ni hta na myi na n-gup aga naw kung ai gaw shi sha rai sai da, shi hta sak loi gaji ai langai gaw nga ai re, madat yu yang yupku e galeng nga, ga n lu shaga sai she nga re ma ai."
Shi tsun ngut ai hte ga-hpri n-gup mi bai lu dat nu ai. Shi a ga-hpri bat ngai marawp hkrup tim n lu mayu mat, Maho La Tsai kaw hkrai chyung mat sai. Gabu ai myit gaw Lashi Tu Ja hpe pyi hta pawn gumjawt kau na zawn she nga mat sai. "Tsa lum, nang ndai daram gaja ai shiga gun wa ai majaw, ngai gabu dik sai. Myit ai kaw du yang suthti paw ai da, ngai 101 ninghkring ni a maumwi ka na ngu myit sawn ai tsawmra ning rai sai, dai lam chye mayu nna, sara kaba Sau Ka Mai yan Bum Shang Hkawng hpe pyi Myitkyina ga na Japan majan labau sawk ka dat marit ngu htet ai re. Kade ning she la kau sai, daini gaw gam rawng ai wa wadu pyi yupnga ai ngu ai nhtoi she rai sai, nang lawan wan sha nwoi sa yang gaw n mai na re law, sak kaba sai ni hpe gaw ten shachyut nna hkan tam san la ai hta nlai ai." "Mai ai le, ngai Muje de du wa jang gara hku hkawm yang mai na naw wa san sagawn yu nna bai shana wa na, nang hkyem let la nga magang u le i." Lashi Tu Ja myit mi asu nga hkraw sai majaw, ngai n chye tsun hkra gabu mat ni ai. Bai lam mi gaw datbung a akyu re ngu, byin mai taw shanhte hpe pyi salam na daram myit dik mat ni ai. Lashi Tu Ja ni yu mat wa ai kade ya nrai yang gyenan du ra ai. Shi tsun ai: Mandale lam hku mawdaw hte masum ya masum na hkawm jang Tawngji kaw du sai. Mawdaw boi shabrai lani mi Miwa gumhpraw masum tsa tsa jaw ra ai, lam lapran na mawdaw sau, hkawm sa masha ni a yup sha shabrai ma hkra ngai hpe pru na hku tsun u ai Dai gaw n tsun tim ngai pru chyalu sha rai nga ai). Hkawm ten ntsa lam gadi tawn sai. Ngai gaw rawt saga nga ai shiga sha la nga sai. Hkying ten gaw masha hpe nla ai sha lani hte lani lai she lai mat wa, jan mung lani hte lani rawt wa sai, nlum ta rai mat sai.
Mandale ga na jan gaw kabai bun ai zawn nga hkra gahtet ai hpe dum shagu, yupmang pyi ntsawm nhkra myit htum dik ai. Gyenan la let seng ang ai Japan majan labau laika mu ai daram tam sawk hti nga ai ten, 2015 ning shata 5 gaang e, ngai hpe Hkunmyin de zuphpawng shaga ma ai. Zuphpawng lung nna hkringsa ten hta Yinnan mungdaw nlaw amyu laika shapraw dap na sara ma kaba Nhkum Ma Hpang hpe, ngai yup ai Lenyin manam dap de ngai sa jahkrum rit ngu saw shaga la nna, madu mahkrawn jahta chyai ga ai. Shi ngai hpe ndai lapran nhpa laika ka nga nni nga san ai shaloi, ngai gaw ya ten hta 101 majan ninghkring langai hpe ka na matu, Tawngji de sa na hkyem nga ai ngu jang, shi bai tsun ai, shi mung ndai lapran Yinnan mungdaw kaba majan man sharum dap du kaba Hawng Yi e <101 Jinghpaw dap» ngu ai Miwa laika hpe Jinghpaw laika hku gale shangun nna, laika dai gale kyin nga nngai da. Mungkan e, hpan wa ningsang e garum ai she rai na sai. 101 hte seng ai lam ngai ra ai hku ngai kaw ni hkrai ni wa sai. "E Hpang, na laika dai ngai naw jaw yu yang n mai na kun? Ngai ya jang yu mayu si wa ni ai." "Mai ai le, ngai datnu kaw shalai dat ya na, dai re Inglik hku nna Miwa laika gale ai nau sha n hkrak ai re." Nga tsun u ai.
"Kaning di ka tim ngai yu mayu ai, masha ni tsun ai, Japan majan hta majan chye gasat dik ai gaw Jinghpaw ni hte Gawlahka ni re nga grai shagrau ma ai, laika dai kaw Jinghpaw la ni kade daram marai rawng ai lam naw tam yu la na re." Laika dai hti dat mayu ai myit gaw ut ut she nga mat sai. Zuphpawng ngut ndawt nbungli hte dai shana jang Mangshi de pyen yu wa nna, lungseng gaja htu hkrup ai hta grau kaba ai myit hte, sara ma kaba Nhkum Ma Hpang shagun ai laika ngau wa hpaw hti kyin si wa ni ai. Laika buk dai hta ngai ra ai laika hkrang ngau kade mi she rawng nga ngu tak sawn let, Mawho La Tsai hpe she tsun hkra yang grau gaja sai ngu, laika yan hte yan hti shakut mat wa ni ai. Laika buk dai ka ai gaw lawl share ninghkring ni hpe woi awn lai wa sai Weilem.R.Er Si hte Bulai Lisi yan jawm ka ai rai nga malu ai. Dai re Jinghpaw hpyenla ni hpe ka du shagu, maisau pawngtin grai maji ai hku hkrai ka nga ma ai. Laika dai hta Japan majan kaw Jinghpaw hpyenla ni hpe gara hku rangrut sharin la nna galu kaba wa, majan man de majen je gwi ai, masha hkum langai lahkawng e sha Japan hpyen tsawmra ra gasat shamyit kau kau rai, Japan ni a la du hpyen hpung 18 ni hpe jit si she gahte shangun lai wa sai nga tsun ai, mying tsun hkra ai gaw Zinghtaw Naw ngu ai wa sha re. Lashi Tu Ja a gyenan tsawm mari du sai, shi tsun ai: "Chyoi, sara ma kaba e, Sam mung daw de Sam hpyen ni hte Myen hpyen ni majan gasat hkat nna, lam n hku mat sai, hka, ya majan zim jang sha nsa sayang, ndai lapran gaw byin mai ai baw nrai sai ga re.
Maktek she rai sai, majan dai dai gaw kade njau jau re ngai lai ra ai lam kaw she bai gasat hkat, lasa si na hpyen ni e! Ya kaning di sana? Ngai myit bai shuk mat sai. Majan lam pat kau ya nna nlu sa ai ten hta, Maho wa kaning kana n mai rai ai ngu kyu hpyi na zawn pyi ngu mat ni ai. Lani hte lani lai mat wa ai ten hpe hkan gang la n lu, Sam mungdaw de na majan gara hku gasat chyi hkat ai lam hpe asan sha n chye lu ai hta n-ga, loi ya mi ting Lashi Tu Ja a gyenan chyip n hkrang mat sai. Htingra ta kawn yinam gaang bai du mat sai. Ngai hkrai sha ngawngaw ngu, nchyi nmu myit law nga ai ten, tsawm mari gyenan du wa ra ai. "Aga, tsa lum e, na gyenan n hkrang hkraw nna, ngai gaw bawnu pyi hkyet mat na zawn she ngu mat ni ai le." Ngai shi a gyenan hpaw madat ai hte, hka yawng ai wa a kashun pawt lu manat ngu ai hpa, myit zim sha nga mat sai. "Hkri bawk e, yahte shara magup ajawt hkawm nna gyenan hkring mat ai re. Rai yang ndai lapran gaw marang nau htu ningyit ai, lawu Myen mung de mawru hkrai ru rai, lamu ahku hku mat ai hpa hpa, kade sa na pyi yak mat sai re." Shi tsun ai ga a majaw, masin kaw nlung gamyet tawn ai zawn, ali in chyip bai nga mat sai. "Taw, ya gara hku di yu sana i? Kaga lam hku n mai lai sa sani rang?" Ngai nji n-gu san ai majaw shi ma myit pu wa sam sai, shi bai tsun ai: "Hkri bawk nang lama Maho La Tsai hte nhkrum nlawt rai jang, Yudiya mung de mahtang sa hkrum na hku di na nhten? Masha gaw ngai matut dat ya na. Yudiya hku rai jang gumhpraw grau ma na sha tsang ya sai law." "Gara hku rai tim mai ai, Maho La Tsai hte sha lu hkrum na rai jang, ngai kaw hpa manghkang n nga ai.
N-gup hta gaw manghkang n nga ai ngu tim, myit hta loi tsang sai. Mungdan lahkawng na masha ni nambat masum mungdan hta sa hkrum hkat na matu, lam lapran na manghkang hpe bai tsang wa ni ai. Hpa rai yang rai, ma tai yang tai ngu ai baw, shawng lam de kade yak tim n du yu yang n chye, hkawm sa wa jang she kaning re manghkang hpe kaning di hparan na lam mu ai ngu bai jawm dawdan shagrin hkat saga ai. Lawan wan lu sa hkrum na she madung rai sai, ja gumhpraw ma nma hte hpa nseng sai, jet ai labau areng lu ka matsing la na she ahkyak sai. Hkrung nga ai 101 chyinghtawk a shiga na lu ai shani kawn, bawnu shamawt nna maumwi pau hkai na n kam sai, teng ai lam pyi n ma tsun chyalu re, tak ai wa grau, mu ai wa mau ngu ai hku n rai ra sai. Ashu ahpru nga ai yinam ta lai, mangai ginhtawng bai du, ten gaw shata 7 jan jan lai mat wa sai. Manang ni pe kam ai bungli re majaw, gyenan ngoi wa shagu Lashi Tu Ja nga ai mying gahtan pru wa na sha madoi nga ni ai. Shata 11 nhtoi 28 ya shani shingtung e, Lashi Tu Ja a gyenan shang wa ra ai. Dai shani na shi a gyenan e tsun ai lam gaw aming hku she rai sai. Shata 11 nhtoi 30 ya shani Yudiya mungdan Zhingmai Mesai kaw sa hkrum hkat na hku ma hkra lajang tawn sai, ten gaw kawa lamyi n mai htawt kau ai zawn re, kaning law nga yang shi hpe woi sa ai hpungtau sara Lama Gam a hkying ten n law la ai re, shi gaw shata 12 praw 1 ya kawn 4 ya laman sha rau ai da. Aga! Ya ngai kadai jan zawn rai yu sana kun? Shani shana shiga la let nga ai re wa, du ai shiga gating gatut nga jang bai myit htum mat sai.
Maho La Tsai hte lu hkrum na hpe gabu let, Yudiya mungdan de gara hku sa wa na lam san sagawn ai shaloi, maigan pru lakmat kaw sen htu la na matu shau htum laban bat mi la ra ai da! Shing nrai mat pawngtin lu jang gaw Yudiya mung bungli dabang kaw nan sa galaw la tim mai ai nga tsun dan ma ai. Galoi n du yu ai, ga n bung ai shara de ngai hkrai sa na matu loi gaw myit yak sai. Yudiya ga sa yu ai ni hpe san jang gaw, ga n chye yang grai yak ai, hpa n chye tsun jang nbungli hte bai nhtang htaw sa kau chye ai nga ai kau mi, bai kau mi gaw bu hkawm woi hkawm rung ni kaw maigan shang sen htu maisau pa hpyi gun nna, Yudiya mung du ai hte, dai maisau pa kaw yu nna ka bang ya jang rai sai, dai re Inglik laika chye ra ai bai nga masai. Kadai tsun ai ga raitim aihkre nga ai mi gaw n nga, jahkrit ai zawn nga ai hkrai rai masai. Shing rai ngai myit yak ai lam Lashi Tu Ja hpe n tsun dan ai sha, 30 ya shani Hkunmyin du, praw 1 ya shani Yudiya du na hku shi hte gadi hkat sai. Shi tsun ai, Tawngji buga na hpungtau sara kaba Lama Gam gaw Maho La Tsai hpe woi hkrat wa, Zhingmai kaw gaw Jinghpaw hkri satan hpung sara ma Hti Hta kawn masha dat nna mawdaw hte nbungli gut kaw sa tau la na hku, seng ang masha ni a gyenan ma hkra tsun dan masai. Lashi Tu Ja hpareng ai hku, shi matut ya ai gyenan nambat ni hte gyenan madu ni hpe azin ayang lu matut shaga la ai hpang gaw, masin grai kaba wa sai rai nna, nbungli hte Yudiya mungdan de rawt mat wa ni ai.
Dai shani gaw 2015 ning shata 12 praw 1 ya re. Nbungli kaw Yudiya mungdan de sa chyai hkawm ai Miwa ni hkrai ze, ngai hkrai sha lama nbungli gut e Miwa ga chye ai masha n mu tam yang gaw ma sai, masha ni tsun ai hpa, hpa n chye tsun dan jang kade nna sa wa yang kade bai wa sa kau ai kaw mi she ang na ngu myit ru let, nbungli yu nna, kumhpaw kumhpa anyin gun ai shanhpyi sutdek kaba sha dun rai, masha baw hkrai pri re gawk de hkan shang wa ni ai. Nbungli kawn pru wa ai Miwa mung masha ni a n-gup gaw, u chyahkye hte jahtawng htu ai hkrai rai sam ma ai, shanhte nta ga du sai zawn, aja ja n shaga jang shat n lu sha na hkrit ai zawn, Sichawn ga, Hkunmyin ga, Hunan ga, Bekyin ga, Shanghai ga, Fugyen ga, Kawngtung kawngsi ga gayau gaya, nhku ting chyeng she nga ngoi garu nga ai. Ngai pyi mali dam ai nga wula zawn zawn, shanhpyi sutdek dun let masha lapran hkan mau dawnghka chyan mada hkawm nga yang she, sinda e ta lahpan yan hpe yep di tawn ai mahkawn langai a akya shala sha nga ai Miwa ga shaga nsen na dat ai hte, pungding maiwang hku nsa hpoi nga hkra san mat wa sai, galu seng seng re, buhpun tsit chyang re hpe ga-wun hte palawng grai htuk hkra chyui bu hpun tawn ai mahkawn dai hpang de sit wa nna: "Hkawn tsawm e, ngai hpe ndai maigan pru lakmat naw lajang ya rit." Ngu hpyi shawn dat jang, mahkawn dai mani sha sai sai rai hkalap langai kaw maisau pa mi sa la wa nna, shi a latsang yang yang sha re ta lahkawng hte ngai kaw na maigan pru lakmat buk hkap la nhtawm, saboi galu ntsa e, maisau pa kaw laika set set ka bang la nna, hkalap kaw gumhpraw sa jaw su nga, maisau pa hte maigan pru lakmat buk bai nhtang ya ni ai, gumhpraw kade ang a ni ngu san jang, Htaichyu hkying mi lahkawng tsa re nga tsun dan ai.
Ngai gabu gara gumhpraw sa jaw, shi hpe mung Htaichyu masum tsa jaw se ai, shaloi shi gumjawt hkra ta lahkawng hte gumhpraw hkap la let: "Hap" nga Yudiya ga hte, ta lahpan lahkawng yep rai ngai hpe naw ai zawn re kumla galaw dan u ai, ngai mung shi hpe galang bai chyeju kaba sai ngu shakram kau da, ngai hte rau nbungli dung ai Miwa ni hpe naw kyin nga ta mu, ngai shawng hkawm sai ngu jang, Miwa dai ni ngai hpe yu mau let, mi yat sha pyi hpa n chye di ai nga, ya gaw shawng lam de bai rai mat wa i? Nga hkan san mau nga ai kaw, ngai nbungli gut shinggan de pru mat wa ni ai, hpri gumhpan shinggan kaw: "Maji Bawk" nga ai laika pa sharawt lang ai, hkum ngau loi kaba bawk bawk, myiman shan maw mai re la langai hpe mu dat sai. Ngai gabu gara hte mani sai sai di shi hpe ta galang nna pru wa let shakram hkat lu ai shaloi she, Yudiya ga sa na matu nde loi ai she re hka ngu myit lu nngai. Ngai shi hte gyenan grai gayat hkat sai majaw, mu dat ai hte Nhkum Gam re chye sai, shi hpe "Tsa ba" ngu, shi ngai hpe "Hkri bawk" nga rai shakram hkat ngut nna, shi a mawdaw kaw lup rai, ngai hkringsa na manam dap maga de wa sai. Lam lapran galaw shachyan hkat ai shaloi, Nhkum Gam gaw Yudiya masha rai nna, Miwa mung Jinghpaw hte Myen mung Jinghpaw, kaga maigan ga de nna du sa ai Jinghpaw manam du jang, htaw sa lam lit la ai wa re nga ai. Htap lahkawng sha re manam dap nta du saga ai, shi ngai hpe san ai, manu gara daram re kaw yup na kun, nang gaw maigan masha re ngu, ndai myu hte loi gang ai, garu gachyi n nga ai kaw matut da ya ai re nga tsun dan ni ai.
Shing rai ngai mung maigan ga du sai re, tinang mungdan na myiman n mai shayawm, Jinghpaw ni a apyang grau n mai shayawm ai, manu dan ai kaw hkringsa yang she, masha ni yu tim lu nna hkawm ai sha shadu na rai nga ai ngu let, mat pawngtin ni shaw ya rai tsap nga yang, shabrang amanyen nyen sha re marai mali mani sha sai sai rai, ngai yup na htap lahkawng de shanhpyi nhpye ni yup gawk de wa hpai sa da ya masai. Manam dap ting yahkyen manam pyaw nampan bat sha wai wai, yup gawk na gahtet gatsi ram daw hpaw da rai, madu nta du wa ai daram myit pyaw sai. Shata 12 rai tim shinggan de na gahtet saup ai nsa n shawn re ai. Nhkum Gam shana shat sa sha ga nga, gat ya de sa wa saga ai. Gat lam a lahta maga gaw buhpun hte bu hkawm masha ni hpe dut ya ai gatraw gatrai hkrai ze, lawu maga de gaw lusha seng ayan akan di galaw da nga manu ai. Shing rai hkatsu chyahkan gangau ai bat hkrai wa wa nga ai nsa marawp hkrup nna, nye myit hta daina gaw Nhkum Gam hpe hkatsu chyahkan agying woi hkungga jaw na ngu myit let, shi a hpang kaw chyaw chyaw hkawm nna, shat seng de shang wa saga ai.
Yudiya ga gaw bu hkawm masha law la nga ai re, shat seng gata de shang wa ai lam hkan, hpun kumhtawng shadun tawn ai kaw, shala lap zawn re baw nga grai rem bang da nga ma ai, hpun kumhtawng makau e masha galeng ai baw lahkum langai hpra tawn da ai, masha ni kumhtawng kaw lagaw tsing bang tawn nna, nga gasha ni hpe hka kaw tsing nna tun wa ai lagaw hpyi ni machyin ahpyin sha shangun, bai manam nkau mi gaw lagaw tsing tawn nna, masha ni hpe shingma bai dip anut shangun re ni grai law nga ai. Ngai daraiba hpe lagaw galang tsing yang gumhpraw kade de hpyi ai kun ngu san yang, shi tsun dan ai Htaichyu lap latsa sha jaw ra ai da. Dai hkan lagaw tsing ai manam ni law malawng gaw Miwa ni rai nga ai, bai shan chyang masha hte shan hpraw masha loi jahkran ai sha re. Shan hpraw masha ni gaw labu palawng gadun ai bu hpun da nna, mun hkye gaw tsuk tsuk re magyi hte ta lahpum shakra tawn, bai langai ngai gaw labu palawng nhpun ai ma pawn tawn rai, myit mu samsi hte chyai hkawm nga ma ai. Ndai kaw du ai masha ni hpa mu ra chye na zawn nrai ai ni krai rai nga ma ai. An lahkawng lwi kri si hte gau hkyeng bat hkrai wai wai nga ai shat seng de shang wa saga ai, seng gata shat sha ai masha law malawng gaw Miwa ni hkrai re, shanhte gaw masha ni Miwa re n chye na tsang ai zawn, ga shaga nsen mung shanhte hpe maga mi de sem kau na zawn nga hkra garu let lu sha nga ma ai.
An hpe lahkum galu re mi kaw shadun masai, daraiba an myimam hkrum rai dung nna, hkatsu chyahkan manu grau hpu jaw ai ngu, law law htet dat jang she, Nhkum Gam mani sai rai tsun ai: "U shan hte wa shan loi htet yang mai na wa." nga jang, ngai u shan hte nga shan bai htet jat dat ni ai. Shat simai garai nsa shadu ya ai ten e, Nhkum Gam hpe shat manu kade daram ang na kun ngu san jang, shi tsun ai daina na matu nang n pru ra sai, ngai woi sha ai hku rai u ga da, ngai gaw mi shi hte nan hkrum ai shaloi shi hpe nga shan chyahkraw makai lahkawng jaw ai majaw rai kun ngu, ngai she jaw na ngu grai dara kau ni ai. Shaloi shi tsun ai, ngai manam re, shi madu re, nnan hkrum ai shaloi na shat sha gaw ngai woi sha na nga jang she, n dara mat ni ai. Jinghpaw amyu ni shada da shachyan hkat ngut ai hpang e jinghku majing rai mat mat re mara re, ngai mahtang manam re majaw, shi ngai hpe shat woi sha ai lam hpa gaw nra nga ai. Shi tsun ai, hpawtni kawn nang hkrai shaw na sha re, ngai hpe mawdaw jahpu hkying masum jaw, bai lam lapran na lu sha hte yupra manu ma hkra nang pru na hku re nga tsun jang, ngai mung hpa ntsang ra ai, dai lam ngai Miwa ga kawn hkyem lang sai ngu ni ai. Hkring nrai yang shat simai hpai jaw masai. Shat sha ai shaloi daraiba, u shan hte nga shan sha sha nna, ngai shi hpe hkatsun chyahkan n sha nni? Ngai hpe hkrai sha sha shangun ai, nlaw jang bai htet sha ga le ngu jang she, shi gaw Yudiya ga panglai hte ni ai majaw, hkatsu chyahkan hpe rai gaja n shadu ga ai, nga nna tsun dan ai shaloi she, ngai shan rai law law n htet ai lam myit malai lu mat ni ai.
Shi pe shan naw htet sha ga ngu jang, shi salang ningdang nga mat sai, ngai shi hpe tsun dan ai, Mangshi ga hkatsu chyahkan n law nna, manam ni hpe hkatsu chyahkan woi sha ai gaw arawng grai lu ai majaw n sadi kau ai re ngu dan ni ai. Dai shana na shat gaw ngai myit ai hku n mai byin ai sha, ngai madu hpe hkungga jaw la ai hku she rai mat sai. Hkatsu chyahkan gaw Yudiya ni a matu, anhte laubu chyinghkrang sha ai hku sha ai she rai nga ma ai. Teng sha, shat gumhpraw pru ai shaloi, lap lahkawng tsa jan sha re, dai hte hte Mangshi ga kaw hkatsu bagan mi pyi n lu mari ai re. Shat sha ngut pru wa saga ai, shat seng shinggan kaw mahkawn grai grai tsawm ai marai mali, u mun bawchyawp chyawp tawn, hkyeng pat labu hte chyu pat sha pat tawn, ta e gumhpraw manat kau rai, lam lai masha hpe shanhte hte datbung dem la na hku ginlaw bu nga ma ai. Miwa num langai mahkawn galu dai ni a lapran kaw sa tsap nna datbung dem la nu ai. Ngai gaw Miwa num jan masha ni grai pri tsawm ai a lapran kaw datbung dem ai hpe n kam yu si nga yang she, num dai ni gaw num n re ai sha, la chyahkraw ni she re nga tsun dan nna, grau yu lau mat ni ai. Shanhte hte datbung galang gayat yang Yudiya gumhpraw lap hkun sha jaw ai re da. Shi ngai hpe sa dem la su, Yudiya ga du yang na masat dingsat kumhpa rai u ga nga tsun ai, ngai shi hpe: Tsa ba e, la chyahkraw ni anhte Sakhkung mungdaw Shuili ga hkan jau kawn nga sai, la ni mi nsi num hkrang galai kau ai nga ai na mau ai, yau sai, ngai n kam dem ai ngu ningdang kau ni ai. Manam dap kaw du wa ai shaloi, sumla hkrung yu yang ga n chye madat rai, ntsin lagyi hte hka shin la, nbung gatsi jak loi sharam nna hpaw la rai, yupra kaw sawn rap galeng let, hpang shani na lam myit sumru let yup mat wa ni ai.
Hpang jahpawt Nhkum Gam ngai hpe jau jau sa tau la sai, manap shat sha la rai, mungkan hta mying gadu dik ai Zhinlai Mesai de rai mat wa saga ai. Lam lapran Nhkum Gam ngai hpe tsawm htap numchying shachyan ya rai jahta mat wa ai, ndum ai hkying hkum mali jan hta, Myen mung hte Mesai hka sha din ai Zhinlai Mesai mare lawk kaw du saga ai. Mungdan lahkawng a jarit madin Mesai hka gaw lalam shi daram pyi dam na zawn nrai ai, mahkrai gaang kaw nna mungdan lahkawng a jarit galaw nna, mungdan lahkawng a dawnghkawn sharawt tawn, mahkrai gaang kaw she lam lai masha ni a lakmat hkap jep ya nga ma ai. Mesai ngu ai shara mying ndai hpe naw gaji kawn na yu sai, kaning law nga yang, moi Miwa hpraw hpyen hte Miwa hkye hpyen ni gasat chyi hkat ai shaloi, Mau Ze Tung madaw Kyang Gai Shi hpe dang kau nna, Kyang Gai Shi Htaiwan ga de hprawng atun mat wa sai. Hpyen sum mat, masin gaw nsi, kaning gaw nchye di rai, Htaihpyin gat kawn Gawmyin tang hpyen shang ai hpyendu kaba Li Mi hpe Mesai kaw ngam da nna, lani mi gaw Miwa mung hpe bai wa gasat la na re ngu gyau da ai re nga lahka tsun gajai ma ai. Hpang e myit su wa nna, laika law law hti re kaw bai maram yu ai shaloi, masha ni tsun gajai ai hku raw sha re, majoi Kyang Gai Shi ndai hkran de wa nhtang gasat na atsam nlu mat ai majaw, Li Mi hpe Htaiwan de bai shaga la kau ai re da. Ndai shara hta Yudiya masha hte Myen mung masha ni htawhtaw yaya rai hpaga ga sha, busing bu ai hkrai, hkum shan maw mang re hkrai, dangpai bu ai hkrai, kadai gaw Yudiya masha, kadai gaw Myen mung masha re n chye yu ginhka nga ai.
Lam kaba langai kawn numshe mat wa ai, magyi magaw re shara tsawmra lai kau da saga ai, nta chyinghka nchyun e hkrisatan dawnghkawn jung ai, hpri tsit pye galup ai nawku jawng kaw mawdaw jahkring dat nu ai. Nhkum Gam shi shawng yu nna nawku jawng de shang wa sai, shi a hpang kaw num hte la yan pru wa nna, ngai hpe sa tau la ma ai. Anhte shakram kat nna shachyan la ai shaloi, num dai gaw nawku jawng na hpung sara re da, shi mying gaw Mwihpu Matsai ngu ai re. Hkum ngau galu kaba myiman shan maw re la wa-ngan wa gaw Maho La Tsai hpe woi hkrat wa ya ai hpung sara baga Lama Gam re. Shanhte shaga ai ga nsen gaw grai kya ai, ngai chyu sha hkawngrang u zawn rawraw rara ngu shaga let, Maho La Tsai n lawm nna mau mau ngu: Share ninghkring wa gaw lawm hkrat wa sani? Ngu san dat ni ai. Kaning re lam hkan kaning mi rai sa ngu myit hkrit ai mung dingyang. Mwihpu Matsai tsun ai: "Shi nhku e hkringsa nga ai." Nga jang she, myit law myit tsang ai lam yawm nga mat sai. "Anhte mung ya sha du ga ai, dingla wa mawdaw nang na hkrit nna daihpawt manap shat n sha ai majaw, loi ba mat rai, ya gan galeng la shangun nga ai." Lama Gam nhka hte nhku maga madi nna tsun u ai. "Shaloi gaw naw hkringsa la u ga, nanhte hpe grai shaba kau sai, ngai gaw gabu, nanhte gaw ba, raitim, anhte yawng ndai zawn mungkan hta mying danhkung ai share ninghkring a nhkan e hkrum zup lu ai hpe she ahkyak shatai saga." Gabu ai myit gaw ngai hkrai n kam hkam sha nga ni ai. Hpan wa ningsang chye wa ningchyang e hparan ya ai wa rai sai kun ngu myit yu, galaw mayu ai lam hte myit ai lam hpe dingyang sawn nga jang, awngdang ai ngu ai baw mahtang rai sai kun, ndai zawn lamu shamying re, loi pyi n myit madawm ai ten kaw me ngai tam mayu ai masha hte lu hkrum na rai nna, gup jut e mani sai dingyang noi tawn ni ai.
Anhte ntsin lu chyai rai naw jahta bang wa yang, hkum ngau lapran le re, kara hpraw grai soi tsawm hkra tu nna, myiman shan gaw ma ni a zawn rai hkye hkalung ai dingla yup gawk de nna pru wa ra ai, shi a lata na paishau nhkaw masawp shara let, atsang awang nga ai nsen hte: "Sara ma nang du sai i?" Nga shaga pru wa jang she, ngai mau mahka mat ni ai. Sak 108 ning du sai dingla wa mi, tsap ai ading jan, myiman nsam hpe yu tim matsat jahku shi daram sha naw rai na zawn she rai nga ai. Ngai lawan wan shi hpang de rawt krat wa nna ta lakawng hte shakram let: "Aji nang grai ba na sai!" Shi ta e lang nga ai hkahku nhkaw lawan wan hkaw kau nna, ngai hte shakram hkat saga ai. Shi a lata hpe manat hkra ai shaloi, kram nga nga ai. Dai shaloi nye a bawnu hta, mu lama mi dum dat sai.
Dai gaw 2008 ning ginhtawng ta hta, masha ni ngai hpe kabyan saw ma ai, Laiza kaw shanglawt hyendu tsawmra mi hpe sa woi la shangun nna, Mangshi Fahpa shait na manam dap ma kra mari la kau rai, kaga masha ni hpe tsep kawp n jashawn ai sha, machyi shim zuphpawng woi hpaw manu ai. Shada da shakram shachyan shaga hkat ngut nna, manam hte madu lahkum kaw dung hit re hte, du kaba Sin Wa Miwa la ni hte shakram hkat ai shaloi tsun ai: "Nyi, la ndai ni gaw yu maya masha n re, hyenla hkrai re." Nga, gahpa ladu loi sharawt hkra tsun ai ga, shingran pa mu dat sai, hpyenla lata gaw shakram tim kram kram nga, ta lapyin grai ja ai hku rai nga hka. Shi hpe atsang arang di akaw lahkum hta ya nna: "Dung ga aji." Ngu jang, shi a myiman mau rai, shakum e shakap da ai wudang kaw noi nga ai, sinda e gaw sai lwi, du nga mat sai Yesu sumla kaw yu mada nna: "N ba law, nang grau tsan ai de nna du ai she grau ba na sai." Gara ku nga tim shi grai naw shabrang dum ai hpe, aji ngu shaga ai n na ra na hku rai nga ai. Shi hkahku nhkaw atsawm sha hkaw la, zinyung palawng lawngtsit na lawngdu hte lawngta hkindang dang la, yungdawn hte ga-hpri nsam zinyung labu na numhpu gahtek kau, hkra gahpa e noi nga ai asoi nhpye pai gahpa de hpye la, shanhpyi zauhkai kaw numhpu kap nkap yu yu, shi hkum hta hpa ra rawng ai shara n mu jang she, ngai hpang de bai gayin mada dat u ai.
Myi npu na myi tingsan e ntsin loi rawng ai kaw, mahti yang baw na zawn tui nga ai. "Salang kaba e, ngai gaw Maji gasha rai nngai, mying gaw Ma Bawk nga ma ai, gara hku shaga hkat na kun, jaw ang ai hku naw shachyan la rit." Ngu dat ni ai. "Oh, shaloi ndai sara Lama Gam nan gaw Maji gasha rai nga ai, shi ngai hpe agu nga shaga ai, nang mung agu ngụ jang rai sai. Ngai gaw nang hpe ngainam ngu na sha re. Ga dai gaw shi shatep gayep tawn ai, wuman wa mali ntu sai n-gup kawn matep pru wa ai re. Shi galang ta ngai hpang de yin re shaloi, shi a myiman ningja grai masa, myi hpaw mada ai nsam mung galang a uhkai madoi re zawn rai hkra naw greng nga nu ai. Shachyan shaga hkat ai ngut nna, anhte nawku jawng kawn Mesai jarit de htawt mat wa saga ai. Mesai gat mai, Yudiya mung hte Myen mung jarit makau na Yangkawng manam jarawp kaw du saga ai.
Manam jarawp gaw Htinchung Miwa ni hpaw ai re, mu galaw ai masha yawng shabrang ni hkrai zeng, anhte hpe yupra hpaw ya ngu jang, yup gawklahkawng sha ngam sai, htap langai kaw na gawk hta yupku masum tawn ai, lahkawng htap kaw na gawk gaw yupku langai sha rawng ai re nga tsun dan ma ai, ngai kaga manam jarawp naw hkan tam saga ngu jang she, sara kaba Lama Gam atsang arang nga tsun ai: "Na Bawk, yupku masum rawng ai hkrak rai sai, agu dingla hpe hkang na matu, daraiba an lahkawng shi hte rau yup na ga ai, dai yupku langai sha re de nang yup jang rai sai." "Gaw namu na re ni? Nanhte masum ting gawk mi kaw sha wa?" Ngai myit yak sai, hkraw ya ngu yang gaw la masum ting gawk mi kaw sha yup ra, n hkraw ya ngu yang dingla hpe htep lahti nan hkang ra rai, manan e shanhte masum hpe gawk mi kaw shayup yang grau manu ai ngu, yupra jahpu shaw dip da nna, ntsa htap de lung wa saga ai, ngai chyinghka zo kaw zosi achyaw bang dat ai hte, ahkran htoi chya da ai hpun chyinghka kaw hkran hpraw hte "101" ka tawn nga ai, nye myit hta, cha e, ndai gaw ang shaa nan rai sai ngu: "Nanhte she yu yu mu, ngai 101 hpyenla dingsa kaw maumwi sa sawk ai ngu jang, yup gawkdu hkra 101 gawk rai taw nga sai, n myit mada ai mu le i. Agu, chyinghka lam makau e naw tsap ya rit, ngai datbung gayat ya na. Ngai kremra hte datbung gayat ya ai shaloi, Maho La Tsai a mani sai rai nna grai ningpyet ai n-gup gaw, datbung hta kap nan mat sai rai.
PRA SA SAT LAWAT
Yup gawk kaw du bang wa saga ai, Maho La Tsai sinda e dak hkama sumpum mi shakap da ai lawnghpraw hpe chyinghkyi hkai kaw shaw noi tawn nna, dung ndawt jahta bang wa sai. "Ngai gaw Myen mung na majan ma hkra shang gasat lawm yu sai, dak hkama ndai ni sakse re." Ngai lang rai garai pyi nhkyem lu yang, Maho La Tsai matut manoi shi a prat na mahkrum madup lam jahta bang wa ra ai. "Agu, gai gai, hkring mi naw, ndai dak hkama mying naw ka la na, naw tsun dan rit, abwi sha yaw." Lama Gam hpe ta gyenan hte sumla hkrung dem na hku lit ap, Nhkum Gam hpe gaw datbung gayat ya na hku aga saw la, ngai gaw nsen rim jak hpaw lang rai, san htan bungli galaw bang wa saga ai. Dingla wa grai awng dum let, palawng man hkra maga sinda hku hkrep shakap tawn ai gata htap na dak hkama kaw madi let galang bai tsun dan ai: "Ndai gaw nambat langai mungkan majan hta lu la ai shagrau kumhpa re, ndai yan gaw nambat lahkawng mungkan majan hta lu la ai shagrau kumhpa re, hpyendu kaba Sati Wun nan sen htu ai re, shagrau kumhpa masat laika mung nga ai, lam masum gaw Miwa hpraw hpyen angaw angam ni hpe gasat ai shaloi na re, bai ndai lam mali na gaw Kayin hpyen ni hpe gasat shazim ai shaloi lu la ai re, lam manga hte lam kru gaw mungdan gata na gasu gabrawng re hpyen ni hpe shazim kau ai shaloi lu la ai re, ndai ni gaw magrau grang ai hpyenla masat, nbung jawng gumhtawn arawng kumhpa masat, hpyen pru masat, mungdan jarit soi masat re ni rai nga ai." Nga tsun ngut ai shaloi, hkra ta hte hkra maga palawng sumbu e dip tawn nna agatsi sha tsap nga sai. "Agu, shagrau lakmat n la sa nni?" "La sa ai le." Shi mi yat dip tawn ai sumbu na mali htap di gahtap ai maisau pa yupku e shaw shapyan dan nu ai. "Agu, ndai gaw Myen laika she re, Inglik laika nrai nga ai le rang?" Ngu san dat jang she, shi grai myit n pyaw let tsun dan ai:
"Myen hpyen asuya ni la kau ya sai, shanhte mi na Inglik laika hte sen htu ai shagrau lakmat la kau ya nna, ndai Myen laika hte sen galai htu kau ya masai, Inglik asuya ni ngai zawn re hpyenla ni hpe htuk jaw ai gumhpraw gaw dawla hku she jaw ai re, Myen asuya ni dai hku njaw ai, shata mi Myen gumhpraw lap mun masum sum sha jaw ma ai." Myen gumhpraw mun masum gaw Miwa gumhpraw lahkawng tsa jan sha rai nga ai. "Agu hpe grai tawngban let san mayu ai, ya daining nang sak 109 ning rai sai re, nang a shangai nhtoi nan matsing lu ai kun?" "Japan majan ngut ai hpang, ngai Kayin majan naw lawm nga ai shaloi, nta de wa si sai nga ai shiga shana dat ma ai, shing rai ngai nta buga Myitkyina Ka mai gahtawng kaw wa a makoi mayang poi wa lawm ai shaloi, dawdap kaw nu ngai hpe hpri sutdek langai hpai tawn ya nna tsun ai, La Tsai e, ndai gaw ningwa nang hpe ngam da ya ai la-hkri re nga, zosi langai ladawn ai, ngai zosi la nna shawa yawng a man e hpri sutdek kaw la tawn ai magri zo hpaw dat se ai, sutdek kaw buhpun tup hkra gahtap bang tawn ai, nsam gaw hpraw ai chyang ai ni rawng ai, ngai labu palawng yawng la shapraw tawn ni ai, sumpu htumpa kaw maisau lam mi nyep tawn nga ai, ngai gaw galoi prat na shi laika ningsa rai kun ngu yat yat sha shaw gale yu ai shaloi: Maho La Tsai, 1906 ning shata 7 praw 5 ya jahpawt hkying 8 manit 15 hta shangai ai.
Ma shangai lawm ai: Mama Mai Rui, nga ka tawn nga ai." Ya ngai bai na mau si wa ni ai, Lashi Tu Ja tsun ai, shi gaw Miwa mung Yinkyang ginwang Jansi Jana masha re she nga ai mi, kaning rai Myitkyina Ka mai gahtawng de na bai rai wa sai kun i? "Agu, Lashi Tu Ja tsun ai, nang gaw Miwa mung masha re nga ai le, Myen mung de shangai ai bai rai sa?" "Nambat langai mungkan majan ten hta ngai Miwa mung Yinkyang Jansi Jana Munggum mungsa mare kaw nga ai re, nang du yu sai kun?" "Ngai chyau n du yu ai." "Munggum mungsa ga gaw Lahpai Danmaw du ni up sha ai shara re, Munggum mare lahta de Munggum mungsa ngu ai mare naw nga ai, gahtawng kaba mi re, mare masha law malawng gaw Maho myu ni rai ga ai, Maho nta masha nkau mi gaw Myitkyina kaw nga, nkau mi gaw Ka mai de nga ai. Nambat langai mungkan majan prat hta, anhte nta gahpu gawa ni law malaw Inglik hpyen shang ma ai, majan ngut ai hpang, Maho la ni hpyendap de nna pru wa ai hkalum poi hpe Myitkyina Ka mai kaw galaw ai shaloi, Jansi ga na Maho hpunau ni grai sa ma ai, dai shaloi ngai a gawa di daw ai Maho Gam ngai hpe sa mu u ai, ngai hpe yu yang num gasha zawn atu asan asumnung rai grai tsawm dum nna, madung gaw shi la gasha n lu ai re majaw, ngai hpe shi a gasha majing shatai la na hku hpyi shawn u ai, dai shaning ngai sak 12 ning rai sai, shi nau hpyi aput ai majaw nu yan wa ngai hpe wa di a gasha tai na matu Jansi ga de hkan nang wa shangun kau masai.
Jansi Jana Munggum mungsa ga du wa ai shaloi, wa di nta ni wa hte nga sat hkra Maho ni hte mare masha ni yawng hpe shat lu sha woi daw sha hkra rai, gumhpraw nhtu n-gang langai hte dumhpau sanat langai myen rai, ngai hpe gasha shatai la masai." Dingla wa tsa ning na lam hpe asan sha tsun sanglang dan ai hpe ngai mau sai. Shi a matsing atsam kaga masha hta grau sam ai, tsa ning na mu asan sha naw matsing nga ai. Matut nna shi bai tsun ai: "Myitkyina Ka mai ga nta e namsi sun grai kaba ai lu ai, nu yan wa ngai hpe namsi hpun grai woi hkai sharin ma ai, ngai mung grai chye hkai sai. Wa di nta ni gaw yi hkyen sha nna, kaga simaw simai n chye hkai sha ma ai, shaning shagu yi hkyen ga ai, laning mi shara mi hkyen nna, hpang shaning kaga de bai htawt hkyen hkyen rai ma ai, shaloi ngai gaw yi shari hpe yu lahpawt ai majaw, namsi hpun amyu myu sa hkai hkai rai nngai. Wa di ni a nta gaw bum ga re, Jana ga bum law la ai, htinggaw hte htinggaw shaga hkat yang nsen gaw na tim, masha nan mu hkat na matu chyingdu lup hkawm ra ai shara re. Nta grupyin hpunnu hpun gam ni e shinggrup nna, nta gaw n mu ai, hpun ndung de wanhkut mawng ai sha mu ai ga re." Dai chyau teng sa, Jana ga ngai du yu sai, bum hte bum lapran hkan hkaraw hkamwam din rai, yu yang she ni tim hkawm yang lam grai galu ai, gadawng lung gadawng yu, shada hkrum mayu nna gawan gatsan hkat tim chyingdu lup aga tum ai shara re. Maho La Tsai Munggum ga na maumwi gadun mi hkai dan ai.
Wan nat kau sai hkarang yi e, hkru n ma ai hpundu hte punghkaw ni achyang chyang rai hkat dung galeng taw nga ai. Yi htumpa hku lai wa ai jaugawng Maho La Tsai yi shingnawm na hpundu kaba langai hta shingbyi let, hkama yi e gahkan pru wa ai chyahkyi hkyi la langai a gahtan kaw na ahpraw wan re maka hta shading gap dat hkyem ai hte, kahka u ni shaga ak pyen wa ai majaw, shi a hkum hta ningshung si hprui ngu mat nu ai. Lashawng kaw magaw shachya tawn ai yungdawn hpe loi ap di sharawt kau nna, ana jawng di madat dat u yang, sharaw grut ai nsen hta masha kyek marawn ai nsen na dat ai shaloi, shi a lata gari ashun wa rai, raitim sanat lashawng gang jahtim dat nu ai. Sanat ngoi ai hpang njang chyahkyi lau rai sai. Maho La Tsai tsun ai, shi gaw myi hte na grai lapyin nna, jaugawng la manang ni e "Ngoi nsen na ai de gaw u mun hkrat ai nsen pyi na, myi sam maga de gaw lagat gatmai pyen ai pyi hkan mu, lagaw lata laram de gaw nbung hta grau lawan ai." wa re ngu shamying ma ai. Shi chyahkyi mang lagaw hpe wubawng ru hte shawng lagaw yan hpang lagaw hkrum di gyit nhtawm, sanat pyawng kaw shalawt hpai nna nta lam de yawn re hte, ladi ndaw hku saira bat wai nga ai manam hkrup dat nu ai. Shi ladi sharat nna bai galaw manam yu let: Nrai sai, mu mi pru sai! Ngu myit let, chyahkyi hpai nna nta de lawan wan wa nu ai. Shi ndaw ya e chyahkyi wa kabai tawn nna nshang malan tsap nga ai laman, nhku de gasha mayu she krawp mat hkra hkrap ai nsen na dat rai, lakang kaw pyi htik lahkawng masum hpe galang ta gahkan shingkra lai let, nhku de htim shang wa u ai, kanu ma ba shayu ai, oyaw, ma gaw nhkrap law, loi hkring nu chyu tauba gun wa na ra ai law nga, jahka dap hte htingnat lapran e gahkrang nga u ai.
Maho La Tsai sanat n-gang wantsi nhpye ni chyinghkyi kaw raw noi kau nna: "Nu, ningnam jan Lahpai Nang Seng gaw rang? Hpa rai ma jahkrap ai re ta?" Ngu wa san dat sai. "Daini nang jaugawng gawng sa wa ai hpang njang, shi mung simai nlu ai, Munggum hkaraw de shabying chyingdaw naw sa gan di na nga rai mat wa ai lata, ya du hkra n wa nga ai law!" Kanu ma ba ashun let, hkrap bat hte mawng ngu tsun dan u ai. Maho La Tsai gasha jan a maidang kaw yat yat sha ahpuk ya let, gaju galim nga ai myit dip shadang nna, kanu a shingma na ma chyangai bai shayu pawn ashun shayu yu, ntawt kaw sa tsap mada yu dat u ai, madu jan a shingran nran nga ai. Shaloi shi nhku de bai shang wa nhtawm, pawn nga ai ma kanu hpe bai ya kau nna: "Nu, mare de ma kanu ni kaw chyu naw sa tam shachyu su, n-gu hpa rai tim lawan malum jaw su!" Nga, hkintep lapran hku ahkat rai hkawm wa nhtawm, chyinghkyi hkai na dumhpau sanat hte hpaumaw n-gang bai shayu hpye, wantsi nhpye shayu hpye la, lahkam mi e gumdun mi daram galu ai nshi hpe wantsi nhpye kaw n-gang hte nawng bang gun, du kaw nga hpyi ninggang shayu gali la rai, nbang dap de shan chyahkraw ju adup sha nga ai gawa yan gasha kaw, tin shapun: "Wa, shan chyahkraw hkut jaw sai, nye mung jaw rit." Nga tsun let, wandap e ju tawn ai shan chyahkraw lahkawng masum hta la nna ahkra kaw dap ahpu jasan let: "Wa, Nang Seng ya du hkra nta nwa ai, lama mi she rai na sai, ngai Munggum hkyet de naw sa tam na, loi hkring mare na jaugawng ni hpe naw hkan nang shangun yaw." Nga matsun let, shan chyahkraw sha na ngu n-gup de shawn di dat ai hte, ningsing wa nga jang, sak nining jan re gasha Gam Seng e jaw kau da nna pru mat wa ai shaloi, gasha hkan ganan nang nna,shi tsun ai: "Ma gaw shaga madat ai, wa ma nannau a kanu hpe naw sa shaga la na, jidui hte shan ju sha nna la nga yaw." Ngu asawng let, shan chyahkraw yan mi shalen kau da nu ai.
Shi kadun kaw lai mat wa ai shaloi, kanu sauyi byitsang kaw udi manga kru majaw lang nna, Zahkung nta de ma chyu naw sa hpyi shachyu na nga hkyem da nu ai. Maho La Tsai gasha jan a hkrap nsen madat let, masin hku e hkra ta hte dip nna lakang kaw yu mat wa nu ai. "La Tsai, lam de sadi u re lu." Kanu gasha a myiman hpe mada yu nna, grai myit tsang let hkan matsun u ai. Jamjau shi hpe ntsin naw lu la, ga-pri naw gabun lu la ga ngu, ngai gun ai anli jahkru mai ntsin ahprup bang ya ngut, ga-hpri gawm mi lu la ngut ndawt bai tsun bang wa nu ai. "Moi Jansi ga hta sharaw grai nga ai, ngai nam mali de bai nhtang sa ai shaloi, jan pyi hpun hta ten lai sai. Mungsa hkyet hku nsa kaba pyi nsa hkra lagyim hkrat wa ni ai, sharaw kaba langai lungbyen ntsa kaw naw hkru la nna lagaw sha shapyan kau rai yup nga ai sa mu ai hte, kraw hta sharaw dai hpe byin mai taw n-gup gang ga kau ya na hta grau hkra pawt mayu let, dumhpau sanat kaw wantsi ndum lahkawng hteng bang, chyu kaba langai jat bang di, sanat sumprang ja ja zawk la, lapren manga tup rai sai, ngai sanat hpai nna maibau pun lakying e sa lung shingbyi let, sharaw baw kaw shading nna gap bun dat sai, sharaw chyahkring mi lashan da kun nna sawn si taw mat sai. Ngai shi a ga daw daw dat se ai. Agu, sharaw mang dai nang krai kaning di hpai wa sata? Ngu san yang, shi tsun ai, shi rai mat wa ai shaloi gawa hpe jaugawng la manang ni hpe hkan nang shangun ngu htet da ai hte maren, manang ni sa hpai la lawm ma ai.
Dai hpang e, sharaw mang kaw gaw ngaisha kanu a law-hkam labu magap, ngaisha kanu hpe gaw sharaw hpyi magap ya di, grai hkik pawng ai makoi mayang poi galaw ya saga ai. Shana ma hkrap shagu, mungkan ting na sharaw ma hkra gap sat kau na chyu myit rai, wantsi htu shagreng wa ni ai. Shi mu dai tsun ai shaloi, myi hpe manam dap shinggan de dingyang yu taw nga rai, ga gahtap san na pyi nwam mat saga ai. Maho La Tsai ga-hpri mawm rai lu la nna bai tsun ai: "Ngaisha kanu hpe sha kau ya ai sharaw n myit mat dingsa, nye myit kaning di njasat la na, ngai wantsi htu hkyem ni ai." "Agu nang wantsi chye htu ai kun?" "Chye htu ai le. Ngai nta shachyang htamung hkan prut ai ashau maku shawt la nna di jang kaw shadu, shadu ai shaloi machyang hpun hkinlang, salwisi lakung ni dan bang di shaprut jahkyet nna, hpang jahpawt machyang hpun hte salwi hpun hkan noi kap ai ashau ahpu la nna, chyamang hpun wan numga hte wan tsi htu la, chyu si kaba kaba law ai gyin la, sharaw hte tut hkrum rai jang lang na hpun kabra sha galaw la rai, shani shana sharaw sha hkan hkui gap mat ni ai." Maho La Tsai dai kaw tsun du ai shaloi, madu jan hpe myit dum sam ai, myisha hpe tsan tsan de mada tawn nna nshaga mat sai.
Loi mi hkring re hpang she nsa kaba yat sha sa la nna bai matut tsun ai. Ngai sharaw manga ting gap sat kau ai hpang, wa ngai hpe pawt wa ra ai e, wa ngai hpe daru ai: La Tsai nang lu yaw, matai mung htang la sindai, myit hkum machyu sa, nau shalai jang mara nhtang lu wa ai, masin jasat kau nu nga, sanat mung la makoi kau ya sai, sanat n lu ai jaugawng gaw, pa layang ga dam hkawm ai sharaw hpa, ta latum mat ai zawn, hpa n chye galaw nna, shani shagu ma ngai hpe ahpa sha hpa jaw rai mau taw nga ni ai. Lani mi nye manang la langai ngai hpe Myen mung de hpyen sa shang ga, hpyenla la yang shata mi gumhpraw dengga manga lu ai da nga sa saw u ai. Ngai sawn yu tim num n lu mat, ma yannau hpe gaw gaji yan gawoi woi lakawn na sha re, shinggan de gumhpraw tam sa tim mai nga ai ngu, nu yan wa hte bawng yu yang hkraw ya masai, shing rai Manmaw ga de Inglik hpyen shang mat wa sangai.
JAPAN MAJAN PRAT
Ngai Inglik hpyen dap e naw nga nga yang, nambat lahkawng mungkan majan baw sai. 1941 ning shata 1 hta, Myen ni gaw Inglik ni hpe shachyut kau mayu ai nhkan e, Japan ni kaw bungmyem nna, Awng San gaw masha marai 30 du ai hpyen hpung gan hpaw la rai, Yudiya mung de Japan hpyen ni hpe regau saw ai hte hpawn, sa tau la ma ai. Myen ni Japan ni hpe woi bang wa ai lam gaw nga lawng de chyahkyawn shalen bang ai hpa, Japan ni hte gapyawn nna madu mungdan hpe woi gasat bang wa masai. Shanhte Japan ni hpe woi shang wa ai shaloi, lam lapran hka din jang kawa wawn galaw la nna htu sharap, hkrai noi noi ya, mahkrai hkrai ya, mung masha ni Japan hpyen ni hpe n mai shut, lu sha n law jang mung masha ni kaw lahkawn ya, ja gumhpraw lahkawn ya, num mahkawn lahkawn ya re kaw, Japan ni Myen mung de gasat shang wa na lam grai hkyem sa jaw sai. Maho La Tsai dai lam tsun ai shaloi, nsen grau tsaw wa u ai, shi kade daram n kam yu kau sai re chye ya nga ai. Shi matut nna bai tsun ai: Dai ten hta, Sabaw Gam Ba a hpyen ni Madazin Jinghpaw lung kaw hting nga ai, Japan hpyendu kaba Fanhten Seng Elang a hpyen ni gaw, Myen hpyen ni garum ai gata, nhkrit ntsang Yanggung de gasat shang wa nna, Yanggung sin ai Inglik hpyendu kaba Hu Dun hpareng ai Inglik hte Yindiya hpyenla ni hpe aloi sha gasat ayai kau dat manu ai.
Hprawng na shawng e, du kaba Hu Dun Japan ni hpe hpyen jarik nkam shayaw kau ai majaw, Yanggung myu e htaw bum tawn ai hpyen jarik bum kaw datsi ru bun nna wan nat shakap kau da sai, hpyen rai dai ni hkru ai, Yanggung myu ting wanhkut chyang she lun mat, datsi, noikrat, kaga buhpun lusha ni hkru hkat ai bat, chyu pala hkru gapaw nsen na she gadu, rai hkru hkat ai bat ladi hku she shalut, myi pyi n mai hpaw hkra hkru taw nga sai. Inglik hpyen ni Hpyigu, Yanggung, Maulamyen, Saewun panglai hka kau hku Japan ni hpe hkap nga masai. Inglik hpyen re nga tim, madung gaw Jinghpaw hte Gawlahka, Ahkang myu ni hpe lahkawn gahkyin ai hpyen ni rai nga ai. Majan kaman ni tak sawn ai, Japan hpyen ni Myen mung de lama gasat shang wa yang gaw, panglai lam hku rai na shadu rai, hpyen n-gun law madung hpe Anda man panglai hka kau de hkrai hting tawn nga manu ai. Yudiya hte Myen mung gaw jarit matut, bumtsaw, maling mala e gaup, hkaraw nhkap law nna, sin gaw mai nna htim gasat grai yak ai shara hkrai re. Japan ni Htena sare makau hkan na mare hku nbungli hte bawm agying agang sa gapaw ya masai. Inglik hpyen ni Japan ni a hka hpyen hpe maja ra, maga mi gaw nbungli hte sa wa ai Japan hpyen ni hpe hkap gasat ai, aga, ngainam e, lamu ting wanhkut gumdin she hkru chyaileng, pyen gamawng, gapaw ayai ai gaw e, Inglik hpyen ni Maulamyen de garai nlu htingnut wa ai ten e, Japan hpyen majaw mi gaw Yudiya Rehen, Mesai kawn Hkawk hkare lam hku nna, Myen mung hpe zing la kau manu ai, Inglik hpyen ni Hkawk hkare de Japan hpyen ni hpe agying sa gap dat ai shaloi, lahkawng maga hkala nba ram ram law ai, mang she ningrap mat sai.
Hkawk hkare tat kau sai majaw, Japan hpyen ni lam lahkawng garan nna, lam mi gaw Kayin mungdaw Bangan de yawng, lam mi gaw Maulamyen de rai mat wa masai. Htawui sa zing la sai Japan hpyen ni ndut ndang, arawng pa wa hte Maulamyen zing la kau lu manu ai. Maulamyen gaw Sakhkung hka hte Mali nmai hka hka zup dingda hkran re. Maho La Tsai a shaga nsen gaw, majan man na shingran mu ai majaw, ga lahkun hte lahkun grau tsaw jat wa sai, shi hpe hkring u ngu n mai rai, ngai a nsen rim jak manat ai ta mahtang grai tsu machyi wa rai, daraiba hpe ta dingsi la nna, hpunlum gawm mi wa ru jaw shangun we ai. Dingla ntsin mawm rai lu la ai hpang, nsen grau ja ai hku bai hkai bang wa nu ai. Laban bat mi jan gasat hkat saga ai, Japan hpyen ni panglai hka leng zawn ganawng bang wa mara ai, anhte Maulamyen kaw galang bai chyi hkat saga ai. Man hkrum tut rai, kawlan ri hte galun sat hkat, gamu ginchyup hkat, gawa amya hkat ga ai. Htingnut shara Sakhkung hka e pat kau ya sai majaw, myit si myit htan gasat chyi hkat ga ai. Anhte kawlan ri galun ai rangrut sharin la ai gasat hpaji hpe, dai lang akyu ram ram jashawn sai hku re. Lahkawng maga myi she hkye mat, nang si ngai hkrung gaw madu a atsam sha rai sai.
Dai lang na majan hta, Jinghpaw hpyen hte Gawlahka hpyen ni a majan atsam laksan mi dan leng pru wa sai. Nye myit hta, dingla ndai gaw kadai kaning rai gasat ai masha mying n rawng ai, chyi hkat ai sha nga jang, kadai tsun ai maumwi mung madu a mai shatai la ai ngu: Agu, nang nau ba sai, chyahkring mi sa la na nhten? Ngu ga daw daw dat ya nngai. Shi ta sha sharawt nna bai matut tsun u ai. Jinghpaw hpyenla marai latsa jan re kaw na, Maji Tu ngu ai wa nambat langai kungkyang jan ai, nang hte maren sha Maji gasha re. Shi a nshi gaw galang hte galang Japan la ni a sinda de galun hkrai galun aprup ya, Japan la ni a sai gaw shi a hkum hta gatsit bun nna chyang kap mat sai. Ngai hta grau galu kaba ai Japan hpyenla langai e ngai hpe aga kaw gamu apyet tawn sai, ngai shi hpe kaning di nan n lu gamu gale ai majaw, shi a gahpa npu kaw ta kanu madi tawn nna magra tawn se ai, shaloi shi gaya sam ai, nreng gaw machyi ai kun, shi loimi gabrawng wa jang ngai shi hte matum malai rai gamu gumchyup hkat nga ai laman, Maji Tu kagat wa nhtawm, nshang na nshi tsut shaw la nna, Japan la a palawng kawlan kaw magra la nhtawm, du hkawt di gadoi di kau ya nu ai, shaloi Japan la de baw gaw aga hkan naw chyai hkawm nga ai, e gaja mani mayu na zawn zawn she re gaw e. Dai hku gasat chyi hkat taw nga ai shaloi, kadai gaw hpyen, kadai gaw madu masha re nchye mat sai.
Chyu pala marang htu ai zawn ru, myawk sanat gapaw ai wanhkut majoi dun mat, sai hka she lwi, hkrap nsen majawn nchyi ngoi garu mat sai. Gap sat ai, gahtam sat ai, galun sat ai, kan gala ya nna pu kan gale abya mat ai, yu pyi she n gwi mat ai gaw e. Aga ga, sai ra nau manam nna ngai nsa pyi n lu sa mat ai le. Maho La Tsai a mayu shaga nga dangam grau krawp wa sai, ngai grai myit law wa ni ai, lama maumwi garai n tsun ma yang mayu krawp mat nna n mai shaga jang kaning di sana ngu, shi hpe naw hkring la ga ngu galang bai tsun dat ni ai. Rai yang shi galang mi tsun tun taw nga sai ga hkaw hpe nkam hkring sam ai, bai matut tsun mat wa nu ai. Wuitawliya sanghpaw grai lawan nna sanghpaw daru de gawt hkrat wa ra ai, ngai gaw anhte hpe majan sa gasat garum hkrat wa ai hpyenla htaw sa wa sam ai ngu myit la nga let naw yu nga yang, sanghpaw kaw nna mahkrai angai hka kau kaw shaw shawo dat sai, dai ten na nye myit gaw, anhte hpe garum sa ai hpyen ni yu wa nna, matse dik ai Japan hpyen ni hpe sa gasat shamyit na sha rai sai ngu gabu si wa ni ai, dai re wa, sanghpaw kawn masha langai mi mung n pru wa ai, la langai mi Inglik ga hku: "Hprawng saga! Hprawng saga! Lawan hprawng saga! Sanghpaw de lawan lung wa marit. Lawan mu! Lawan mu!" Nga nna sha jahtau taw nga sai. Maho La Tsai dai kaw tsun du ai shaloi, ta lahkawng hpe hkrupchya di la nna manai shala dat nu ai. Shi a myit hta daini du hkra myit n hkawn ai zawn re masa dan pra sai.
Shi chyahkring mi dawn rai shinggan de na nbung n bung ai majaw lap pyi n galang ai hpun ndung de yu let, nsen grau tsaw ai hku bai tsun bang wa ra ai. Maji Tu hte an sanghpaw de shingma yawn rai, ga breng sanat hte Japan ni hpang de gap ahprup bun tik tik di saga ai, dai sha nrai "Mi esi" ta bawm mung Japan maling de kabai shapyen bun nna, Inglik hpyen, Yindiya hpyen hte manang ni hpe sanghpaw de lawan shang nna hprawng na hkinjang tam ya nga saga ai. Maji Tu an gaw jahtum e sanghpaw kaw du ai re, sanghpaw jak sharawt tawn sai, lai lakang dawm la kau na ri ri sha rai sai, dai ten e Maji Tu nye ta na sanat ret gashun la nhtawm, shi a hpri lakap zawn ja ai ta hte ngai hpe sanghpaw de magra kabai bang kau dat nhtawm, shi hkrai sha kagyin kayang zawn chyang gaput nang ai Japan ni hpang de yin rai, sanat kaw chyu sha anyin bang la di bai gap ahprup bun dat, bawm kabai bun rai kyin nga ai laman, sanghpaw gaw nsa kaba makan shaw let hkinggau n mu mada ai panglai de gawt hprawng mat wa sai, ngai Maji Tu hpe ta galang ai hte, shaga ai hte di, lawan hkan gumhtawn shang wa rit ngu yang, sanat gap sharu ai nsen, bawm gapaw nsen, Japan hpyen ni a lawan hkan gap sat mu law nga nna jahtau marawn ai nsen ni, ngai mayu pyi gale mat na daram jahtau ai nsen hpe gaput kau ya sai.
Wanhkut hte numhpu alun rai mawng ai gata e, Maji Tu gaw hpri shadaw zawn panglai hkinggau e ading jan tsap let, sanat gap nna gahpa ladu ashawng rai, sanat hpaihka kaw wan aprip rai, sanat langai na pala ma jang langai bai galai gap rai, shi hkrai gasat chyi nga ta sai. Japan hpyen ni Maji Tu hpe hkan shachyut htim gap nga ma ai, Maji Tu a shingdu de gaw gumshem hpyen ni hkan htu nang, shawng lam de gaw shingbyi shara n nga ai, sanghpaw hkawm mat wa nna ngam da ai ayan akan re panglai hka leng sha rai mat sai. Ngai yu nga dangam shi bawm kabai bun ma nu ai, pala mung gap ma nu ai. Sakhkung hka hte Mali Nmai hka ndai kaw wa zup nna, laying zawn re hka man wa byin ai, ndai daw kawn gaw Saewun panglai ngu ai mying shamying kau sai. Maji Tu chyu pala gap ma kau rai, sanat gaman lang nna, dam lada ai panglai de yawn rai hputdi let lamu mada nga ai ngu jang, chyahkring sha panglai de tsat lup gumhtawn bang mat wa nu ai. Dai shaning shi asak 41 ning sha naw re.
Anhte sanghpaw ntsa kawn shi hpang de salam jaw kau da let, shi daram majan gap lapyin ai wa n Iu hprawng lawt ai ngu lahpawt dum let, hkrap myiprui hte shi hpe salam jaw ai lata grai na hkra nkam shayu la ga ai. Ngai chyahtam shi hte grau ganawn nna, masin ram ram gaprep let yu nga ninglen, Japan hpyen ni a sanat gaw Maji Tu gumhtawn bang mat wa ai hka kaw kade hkan gap sharut bun ai re pyi n chye mat sai. Myawk hte wuitawliya sanghpaw de hkan gap bun ai bawm gaw, nbung hte gayawp ai asin tawng zawn, sanghpaw makau hkan hkrat gapaw nna, hka leng e sanghpaw wa ahtu ganawng ganawn dat jang, sanghpaw mung gale galau nga wa sai, dai ten hta, panglai hka leng sanghpaw kaw ahtu ai nsen, la ni bai nhtang na nga dagam ai nsen, num ni gajawng nna kyek marawn ai nsen, ma ni kanu ni a marawn nsen hpe na gajawng nna kyek hkrap ai nsen ni, Manggala panglai hpunggaw ting gachyi mat sai, Japan ni a myawk nsen chyau me anhte hpe hkan sa ai zawn, chyu pala ma ntsang, dingyang hkan gap nga ta masai. Maho La Tsai ndai kaw tsun du jang, shi a wuman wa n tu mat ai n-gup hpe shatep kau dat nu ai.
Maji Tu a maumwi nye masin hta ahtu ganan hkra tik tik rai, nsa kaba pyi nsa hkra madat la ngut ai shaloi, ngai agu e, Maji Tu gaw sanat e n gap hkra tim panglai kaw tsawt si mat na sai i ngu bai san dat ni ai. Shi mani sai rai bai tsun ai, ngai mung she mau sai, dai shani na Maji Tu a hkum hta nat shang sai nhten, shi a hpyenla manang ni yawng, anhte ta latup shaja let, Maji Tu, anhte matai wa htang ya na yaw, myit hkum garen ngu jahtau tsun nga ninglen, Japan hpyen ni a myawk nsen ngoi ai nna mat sai. Dai shani gaw 1942 ning shata 1 nhtoi 30 ya shani rai nga ai, bai dai shani gaw Japan ni Myen mung Maulamyen hpe gap zing la kau ai shani mung rai nga ai.
