NSHAWN GA NA JINGHPAW NI SAM DU NI KAW AHKUN HKANSE NBANG RA AI LAM
MARU GAWNG
Shaning 1878 ning shawng hpang ten hta, bum ga nga ai Jinghpaw ni hkauhting hkauna nnan chye galaw sha wa rai nna, yawng mayawng pa ga de gahtawng htawt, hkauna waw rai magang masai, dai hpe Sam myu Htusi ni Jinghpaw ni pa yu ai hpe, pa ga na lamu ga gashun galaw sha ya ai ngu ai hku nna, hkanse hta shatsang, mam bum kaw laika hkan shakap, mam bum ni hkan nat kau ya rai. Nii dang mi kaw hkanse dang 10 rai shatsang ai lam hpe ndang hkam sha ai a majaw, manghkang amyu myu pru wa nga sai. Dai hpang kaw nna Sam ni hte majan byin wa sai, Jinghpaw ni yawng gaw bum ga bai htawt ai htawt, gaga maigan de hprawng ai hprawng rai sai. Gwi ai ni gaw pa de yu sa nna, tinang a hkauna bai sa galaw, n-gwi ai ni gaw bum yi hkyen, lahkyik lahkyawk re hkan hkauna wa htu hpaw rai nga wa masai. Raitim shaning shagu, mam bum kaw laika hkan shakap, mam bum nat, yi wa nat kau ya sha arai nga ai majaw ,Jinghpaw ni bai rai jang gaw, Sam ni a nga gumra, wa ni hkauna de lung jang hkap lagu gap sat sha kau ya ya jang she, mung masha shada da myit npyaw hkat, gatsu rawng hkat si wa manu ai.
Dai majaw, Sam ni hte bum pa, majan byin wa sai, dai kaw nna, Sam htusi du ni gaw, hpyenh pung hpaw nna, Jinghpaw bum ga de majan wa gap na matu, kung kat ai, jau hkyen sara galaw, "nat jawn ai" hpungkyi sara ni hpe woi nna Jinghpaw ni hpe gasat lung wa masai. Jinghpaw ni mung Sam ni gasat lung wa na shiga na lu ai hte rau, gahtawng shagu, pyeng namshang shagreng, Lung rawng kawng na jahtung hpe shaga la, Pranggum bumsen na matsaw jahtung hpe mung shaga la rai, Sam ni hpang de nat hpyen ni hpe shawng dat dat masai da. Shingrai Nawnggawn hte Dunhpyu Na seng mare hkan, shana shana rai jang, agwi hkrai wau shatsang, Sam ni nta hkinchyi hku lagu mada yu yang, Jinghpaw hpyen ni wa ruk ruk ngu shana shanang yan she yan, jahpawt rai jang mye bai nmu mat mat rai, raitim Sam hpyen ni Prangwai kaw shawng lung na hkyen tawn sai, rai yang, Prangwai ni Sam mada kawng ngu ai kaw nna yu yu yang, Nawng gawn mare kaw Sam hpyen ni hpawng ai hpe mu mada sai, shaloi she hpri dumlawng lalam 4 daram re hpe htumpa de wan hte ju adup apyet nna hkum ba nse hku waw di nna, wantsi joi 5 bang adik, sumpan tsup ni adit matsut, na jawn chyen nhtu ndaw ni hta bang di nna, ga kang kawng na masa hpun kaw, le Nawng gawn mare de shaang nna, nat agum kau dat jang she, Nawng gawn mare baw hkan nhtu ndaw dai ni pyen agat di hkrat wa ai hte Sam hpyen ni hkrit let tsun ai, nhtang sai, she hprawng saga ngu nna, Prang wai bum de Sam hpyen nlung mat sai.
Dai hpang, Hkatau, Manjak Chyinghtawng kawng, Man-gang bum de bai lung ai nga yang, Jinghpaw ni Wu teng kawng Lupba kawng maga hku, hkap tawn nna, nhtu, zahkun ndan ni hte hkap gasat nhtang kau dat masai, Dai ni du hkra ndai shara hpe "Sam si ya" nga nna shamying tawn da nga ma ai. Langdat, Pranggum bum de mung hpung mi lung, Lungba kawng kaw, lup hka zawn di htu gayin nna, wa hkap nga ma ai, Jinghpaw ni mung, Masa gadawng ngu ai dawnghkawn sa jung tawn rai, hkap nga ma yang, Sam hpyen ni htim lung wa mara ai. Jinghpaw ni hka mahkrai kaw wa hkap taw nga nna agying hkap gasat kau dat manu ai. Ndai shara hpe daini du hkra Sam ni "Tai chya" (Sam ga: Sam si ntsawm ) nga nna mying shamying da nga ai. Dai hpang Htusi ni kung dik ai jauhkyen mandan hpungkyi sara gaba Bung Hku, Htang Mang ngu ai lahkawng hpe woi nna, daini gaw jahpawt manap gaja jau jau saiwan hte gayau gaya rai uhkwi hte rung nga, Prangwai Yinhpan pa kaw, dai hpungkyi yan gaw hkum ting mak maka ka nna, langai wa gaw, nhtu lahkawng lang, bai langai wa gaw, greng dik ai laisi kan dang hpai rai, htim lung wa manu ai. Jinghpaw ni hkap gahtam yu yang ntai, zahkun hte gap yang njung rai. Hpang de nhtang htingnut nna, Bawhkye La Lum hte Gauhka Dum Bawng gaw, hpa rai nme htunghpau chyu hte gap yang njung ai gaw nhpa baw shan wa re ta ngu mau mat masai.
Shingrai, shan gaw maichyu kawa lamyi greng dik ai gahtam gyin bang nna she gap yu ga ngu, dai kawa lamyi lahkawng masum gyin gun nna, htim lung wa ai Sam hpyen ni hpe hkap gap bun dat jang, Sam hpyen lahkawng masum si hkala mat jang she, hprawng nhtang mat wa masai. Dai shani kaw nna, share shagan ai Bawhkye La Lum hte Gauhka Dum Bawng yan a mying sha na dat tim, Sam htusi hpyen ni manu mana hkrit gari mat wa masai rai. Dai hpang Nshawn du ni mu ndai shangut na matu, bumdu shalang ni hpe shaga sai, rai yang Bumdu ni langai mung n gwi sa ma ai majaw, Sam ga Miwa ga Myen ga kung dik ai, magrau grang, share shagan gwi ai shalang marai 4 hpe lata shalun dat sai. Dai ni gaw Prangwai na Maru La Sang Gam gaba. Pranggum na, Maru Tsunhtu Mayam. Kumsai na, Maru Shawngba La Nu. Japdaw na, Maru Dumbawng Gam gaba ni rai nga ma ai, Shanhte mali Sam dai ni hte sa dara hkat ai rai yang, nta ga na ni mung ndai 7 ya lapran hta, dingyang wan nsi, nat sharawt, rai nga nga ma ai. Shanhte hpyi shawn ai lam gaw, bum ga na ni hpa rai pa de nmai yu? Nmai yu sa jang gaw Jinghpaw hte Sam ga lapran hta lamu ga jarit tawn ga! Nanhte Sam ni mung anhte bum de hpun kawa hkum wa la, nanhte hkau na galaw yang, dai anhte bum kaw nna lwi yu wa ai hka shum bang, nanhte a hkauna mam gaja ai gaw, anhte bum ga na wuhkyi, wahkyi jit hkyi hpunlaw hpunlap ni yawng yu wa ai majaw she, nanhte pa na ni a hkauna gaja ai re ngu dara bang wa masai.
Dai re majaw, nanhte pa ga na ni madaw she, anhte bum ga na ni hpe mam jaw na tai ai. Anhte Jinghpaw ni gaw, hkauka gat ten e hkauna mam gaja na matu, hka tsu, u tsa lam sat ra ai. (1) nanhte gahtawng mi mam dang 10-20 jaw ra ai. (2) hka tsu na matu, gahtawng mi, u ram ram re 5-10 shapraw ra ai. (3) Nawng gawn mare kaw nna Nshawn hka ndai hkran Nawnghkyu, Na seng du, nanhte a mare kaw nna hkren, lam waw dinghkung hpun hkai jarit tawn nna, lahta daw anhte Jinghpaw ni galaw sha, pa dungming de nanhte galaw sha, ngu nna wa daw dan da sai. Shingrai 1956 ning du hkra ndai Prangwai kaw nna, Japdaw du hkra, Sam ni kaw gahtawng shagu, hkaulaw hkaupau, ngu ai hte kai ban u ngu ai sa lahkawn sha lu nga ma ai. Sam majan wa dawdan shangut ai Maru la marai mali hpe, Sam ni shan chyaru mumu maimai shachyip jaw ai lu sha kaw, na si tsi lagu bang jaw dat nna, shanhte nta du wa ai manga ya shani, kadai mung kadai a nta e wa si mat masai rai. Dai lu sha kaw, na si tsi shalawm dat ai re majaw, dai share shagan ai la ninghkring salang 4 gaw nta wa ai hpang 5 ya ngu na shani kadai mung gade nta kaw bum nna rau lani sha si sum mat masai rai. Dai hpang kaw nna, ndai ni a nta masha, madu jan ni hte gasha ni gaw, jahkrai ningmai matsan mayan rai pra lai wa yu masai. Shanhte si mat sai raitim, Nshawn ga na Jinghpaw du ni hte mare masha ni gaw shanglawt lu ai shani du hkra, Sam du ni kaw ahkawn hkanse nbang yu manu ai rai.
