GUNGDU GUNGCHYAN JAWNG AI LABAU

Jinghpaw ni a hkringhtawng jinat jawjau ai hkinjawng hkringlai bunghkawn lamang hta gungdu gungchyan jawng ai htunghking lamang nga ai. Dai gaw jinat jawjau ai lamang hta Matsaw ningtsang nat ni hpe jawjau ai shani Matsaw ningtsang nat ni sha rai jang, gara wa/jan hpe mi rai rai, gara madang mi jaw jaw yawng a jawng ai lamang gaw gungdu gungchyan jawng hkrai rai nga ai. Shanhte hpe hkungga jaw ai udi hkaitsu kaw nna hkawt, u wa mi sat ya ya, bainam mi sat ya ya, nga wuloi dumsu mi sat ya ya, ndai zawn dusat yamnga sat jawng ya ai kaw du hkra, lahkan kaw nna hkawt jawng ai shaloi yawng gaw gungdu gungchyan jawng hkrai rai nga ai. Ga shadawn: Udi hpe gaang na lawk di kau nna, lahkawng maga na dibaw dimai sha bang nna mayawn ya ai, nga gaitsu hpe ahkum gaang hte lat kau nna lamai hte abaw daw sha shachyaw mayawn jawng ya ai. Bai u sat ya ai shaloi tim, u baw hte chyingjawn ni hpe tawk daw la nna, gaang na hte naw lat kau rai shachyaw bang ya ai, singkaw lagaw hpe gaang hte daw kau nna, magyi maga de hte lagaw latsang maga tawk jawng mayawn ya ai.

Wa, bainam, nga wuloi, dumsu ni sat ya tim, jawng jahkum ya ai lam ma hkra bung ai, pukan asin sinwawp ni mi rai rai, kaga hpa mi rai rai, ma hkra gaw gaang na hte daw lat kau nna, lahkawng maga ndung npawt, masat jawng bang ya ai re. Dai zawn jawng ai hpe gungdu gungchyan jawng ngu ma ai. Lun ai shani ngam ai gaang daw na hpe gaw chyinghka lam sin ai Matsaw salang wa hpe jaw ai re. Shing rai, gungdu ngu ai gaw shi a hkindu shing nrai apawt, shing nrai ningmai rai nga ai. Gungchyan gaw abaw shing nrai ningdung daw de rai nga ai. Matsaw ningtsang ni a ahtawt hpe gaw nhtang hku daw ai re. Kawa hpe mi shi gara hku tu yang gara hku daw nna galaw satsawm ya ai, ningdung de mahka shayawn ai, madat ai hku daw ai re. Kaga gumgun masha hte jinat kaga ni a ahtawt gaw apawt de mahka shayawn ai. Shinggyim masha ni daw lang ai, hka nhtung, dumbung kedawk, tinghkyawn ni ma hkra gaw apawt de mahka madat ai hkrai re. Ndai zawn galaw ai hpe gungdu gungchyan jawng nga ma ai.

GUNGDU GUNGCHYAN JAWNG BYIN WA AI NINGPAWT

Moi shinggyim masha hte jinat ni aga naw hkrum ai prat hta, Shingra gaang ma ni gaw, Gaang gawngnyet mi galaw nna grai pyaw let nyet chyai ma ai da. Lamu de na Mu wa gaw, Shingra gaang ga de mada dat, kum ya dat yu yang, Shingra gaang ma ni Gaang gawngnyet grai pyaw nna nyet chyai nga ai hpe mu dat nu ai da. Shaloi Mu wa gaw, Shingra gaang ma ni Gaang gawngnyet nyet ai hpe yu saku, yu sharawng wa sai, nyet mayu wa ai kating katut she nga wa nna, Shingra gaang ga du yu wa nhtawm, Shingra gaang ma ni hpe: E Gaang ama ni e, dai Gaang gawngnyet ngai mung she nyet yu we ga nga, tsun sai da. Shingra gaang ma ni gaw: E Matsaw du wa e, Munu du jinghku e, nanhte matsaw du shingra ningtsang du ni gaw machyang n-gun nau ngan ai, nang gaw chyalai n-gun nau ja nau ngan ndai, n byin na re, n mai dung na re, n mai nyet na re, nang anhte a Gaang gawngnyet dung daw kau ya na ndai, shum sa dung ya, shum sa nyet ya, ngu tsun sai.

Mu wa gaw: E, Gaang ama ni e, ngai aja wa n dung dat na nngai, machyang n-gun gaw sharam kau na nngai, chyalai n-gun majoi gaw n shaja na ngai, yat sha dung nna nyet na nga sai da. Shing rai, Shingra gaang ma ni Mu wa hpe Gaang gawngnyet nyet shangun sai, Mu wa sha naw dung dat ai hte, rai pyi n nyet lu yang dung daw kau dat ya sai da. Shaloi, Shingra gaang ama ni gaw: Dai yu le, nang hpe tsun sai, nang gaw chyalai n-gun nau ngan ai, machyang n-gun nau jan ai, n mai ai ngu sai, ya chyawm maw yu, anhte shinggyim masha, Shingra gaang ama ni a Gaang gawngnyet wa mi adung daw kau ya ai gaw, ya ganing di sana ngu, daru ye nga, jarat ye nga nna pawt hkat ma ai da. Shing rai Mu wa gaw Matsaw ningtsang ga de bai lung mat wa sai da.

Shingra gaang ma ni, Mu wa hpe pawt nna, azai wa hkrai bai zai wa,anyan kum-ya wa gadaw wa masai da. Shingra gaang ma ni, machyang lungdin gaba wa mi bai ju jahkye la nna, hpai gumlet gumjawt teleng dan sai da. Shaloi Mu wa gaw, Shingra gaang ma ni machyang lung hpe ahkye teleng ngan di ju jahkye nna hpai gumlet shachyai chyai ai bai mu mada dat nu ai. Mu wa bai yu saku wa, marit sharawng wa nu ai da, shi mung hpai gumlet chyai mayu wa sai. Mu wa gaw Matsaw ningtsa ga nna Shingra gaang ga de galang bai du yu wa nhtawm, shi mung ju jahkye da ai machyang lungdin gaba dai hpai gumjawt na nga, Shingra masha Gaang ama ni hpe tsun jang, Shingra masha Gaang ma ni gaw: E, Mu wa e, nang gaw n lu hpai na re, n mai hpai na re, grai gahtet ai, grai li ai, grai manyen ai ngu tsun dan sai. Mu wa gaw lu hpai ai, nanhte pyi lu hpai ai mi, ngai gaw grau she lu hpai le, ngai gaw nanhte hta machyang n-gun grau ja, chyalai n-gun grau jan ai wa re mi ngu tsun u ai. Shingra gaang ama ni gaw machyang lung bai ju jahkye la nna, namman sau hpyat di, Mu wa hpe hpai shangun sai da.

Shingra Gaang ma ni gaw shanhte hpai ai shaloi gaw hpa n chya nna, Mu wa hpe hpai gumlet shangun na matu ju jahkye da ai machyang lung kaw namman sau bai hpyat di hpai ya mu yang, machyang lung hpe Mu wa hpai dat yang, gahtet ai hte, li ai hte re hta n-ga, manyen nna, rai pyi n lu gumjawt teleng chyai ai, tat jahkrat dat ai lungdin shi a lagaw abrep kau dat sai. Mu wa gaw, hpang e shi a lagaw tsi shamai la sai raitim, hten layawt nan mat nu ai. Rai yang, Shinggyim masha, Shingra gaang ni gaw, aju shingtung wa bai lawn wa, Shinggam manau wa bai mawn wa yang, aju shingtung pupgum shinggam manau shawng rai wa na nga, htaw Matsaw ningtsang ga de, Matsaw Munu Mu du wa hpe manau naushawng bai wa shaga masai da.

Dai ten Shingra gaang ga na Gaang Ningsen ngu ai, chyip magup nga ai, hkum sumhpa nga ai, chye tsun la ai aga n-gaja ai chyu tsun kam la ai, shamying kam la ai, jahkum jahkam ngu ai mi nga ai da. Shingra gaang ni Matsaw ningtsang ga de Mu wa hpe manau shaga sai, Mu wa gaw: Ngai n sa na, nanhte a ningwa sa-wa Gaang Ningsen dai aga ra mi nga, n hkru ai majoi tsun shaga ai, nau chye tsun ai, n sa na nga sai. Gaang ni: E, Matsaw du Munu ningtsang du jinghku e, she sa ra na re, naushawng naw she sa shawng ya ra na re, dai Gaang Ningsen hpe anhte lajang kau na, nang hpe n mu hkra re shara kaw rim rawng shachyim kau na ngu tsun sai da. Shingra gaang ni, Matsaw ningtsang ga e Mu wa hte ningdat kau da rai, Shingra gaang ga bai du yu wa nna, Gaang Ningsen hpe wa rim rawng masai da. Gade chyip ai kaw rawng tim, mu ai hkrai nga, Gaang Ningsen hpe chyip dik ai kaw shawng rim rawng kau dat yang, Gaang Ningsen gaw nanhte Gaang ni ngai hpe ndai kaw rawng yang, ngai shingra Gaang ga ma hkra mu ai, dai mung naw mu ai law, wora mung mu ai law anga nga sai da.

Shaloi, Gaang ni gaw, Gaang Ningsen hpe lashen tingsan kaw bai rim rawng kau yang, ya mung naw mu ai law, wora mung naw mu ai law sha anga nga wa sai, grai chyip ai shingnoi, ka-rawng kaw rim rawng tim, hpa mung naw mu ai law, jahkum jahkam nga bai naw tsun nga sai da. Shaloi, Shingra gaang ni, singga ka-ran kaw bai dagup tawn manu ai da, shaloi she Gaang Ningsen wa gaw ya chyawm n mu sai, hpa mung n mu sai law, asin chyip nga mat sai law nga sai da. Shingra gaang ni shinggam manau wa puum wa, shingtung manau wa chyip num wa, Matsaw ningtsang ga de Matsaw du Munu Shingra du jinghku Mu wa hpe galang bai wa shaga nna, matsaw du ni mung du hkum sa rai, aju shingtung nau rai wa, shinggam manau wa shawng rai wa sai. Amu wa mung yu sa nna, nautung naubaw abu shang bang wa sai. Mu wa naushawng tai, ashawng kaw hten ren hten ren rai naubaw woi hpang wa ai shaloi, Gaang Ningsen gaw, yu law, wora Mu wa gaw lagaw latum ai wa law, daini na naushawng gaw lagaw layawt ai wa law ngu, jahkum jahkam amyu myu ngu tsun nga jang, Mu wa gaw: Dai yu mu le, ngai n sa na ngu sai, nanhte a ningwa lasa sa-wa Gaang Ningsen hpe sha n lajang kau yang n sa na ngu sai le, wo madat yu mu, nanhte lajang kau sai nga ai, nanhte a ningwa lasa sa-wa Gaang Ningsen gaw wo jahkum jahkam nga wa ra ai, lajang kau sai nga ai, wo yu yu mu le, madat yu mu le, wo ya ajawp bang wa sai nga nna, manau manau nga ai dangam kaw rawt mat wa sai da.

Shaloi, Shingra gaang ni gaw: E, Matsaw Munu Shingra du jinghku wa e, hpa pyi rai n lu jaw dat ai wa, madai larawn sha pyi naw hkan jaw dat ga nga, Shinggyim numshang ni, Shingra gaang masha ni gaw, Mu wa hkawm mat wa ai de hkan shachyut nang nna, madai larawn hkan shachyut jaw ma ai da. Madai larawn hkan jaw yang, Mu wa gaw hpun ningdung du mat wa ai kaw hkap la sha u ai da, gaitsu hpe gra rai nga baw de kret, nga mai de kret rai gaang na shi latup da ai nga hkum hte hpe gaw gabai kau da, udi hpe mung di baw de kret, di mai de kret rai, shi latup da ai gaang na hte hpe gabai jahkrat kau da rai, atsa jaw yang mung, tu nga ai kawa ningdung hpe hprat di daw la nna, gara hku tu yang gara hku dinghpyawt dat ai majaw, ningdung de mahka shayawn nna tsa hkap ja lu la u ai da. Labau ningpawt dai hkan nna mateng daini du, Jinghpaw ni mat- so ningtsang jawjau yang, gungdu gungchyan jawng ai ngu ai htunghking ningpawt nga wa nna, labau maumwi ndai hpe hkai ginlen dan dan rai ma ai.

Dingga Tang