JIT DWI SAI DWI ANA

Jit dwi ana gaw sai kaw dwi ai dat nau law ai majaw jit mung dwi wa ai ana re. Tut nawg e dwi ra ai sai dwi shadang gaw 5.6-6.9 mmol or 100-125 mg/dl rai ra ai. Ndai hta grau tsaw jang gaw sai dwi ana nga ai kumla rai sai.

Ndai zawn sai dwi tsaw wa ai lam gaw dwi ai malu masha dat Glucose ni sai shan Cell ninggun tsi tai hkra Insuline Hormone dat e gram shaprai kau ya ai re. Ndai Insulin dat hpe kanpai manang panereas kaw nna galaw shapraw ya ai rai nga ai.

Shingrai kanpai manang n’gun n rawng jang (shr) hten mat jang Insulin dat galaw shapraw ai lam yawm mat, pat mat nna sai kaw na dwi dat hpe rin gram ya ai lam bungli n byin mat ai majaw sai hte jit kaw dwi dat nau tsaw wa ai lam re.

JIT DWI ANA MADANG.

Jit dwi byin ai masa hta hkan nna madang lahkawng hku garan da ai. -Diabetes Insipidus jit dwi ana byin wa na kumla nga wa ai madang Type I. -Diabetes Mellitus jit dwi ana byin nga sai madang Type II.

MABYIN PAWT (Causes)

1. Sai hkan maka (Genetic Factors) kanu kawa jit dwi ana byin yang kasha ni mung byin chye ai. Ma marun ni hta lahkawng yan rau byin chye ai.

2. Ninghkap dat Autoimmunity ngu ai ninghkap dat law lawm ai lu sha ni Insulin dat hpe ninghkap ai majaw.

3. Virus ana a majaw insulin shapraw ai Pancreatic B Cell hpe ahtu hkra ai majaw.

4. Grup yin mali maka (inviromental Factors ) dwi hpa nau lu nau sha ai, nau hpum ai, shamu shamawt ginsup ai lam n nga ai majaw .

5. Ma hkum rai nna Insulin shapraw ya ai kanpai manang hpe dip pat da ai majaw.

6. Kanpai manang bum machyi hten kaji, n’gun n rawng mat ai majaw.

7. Tsi nkau ni a majaw, EG. Nicotinic cid, Glucocorticoids, Thiazides, Protease inhibitors.

JIT DWI ANA KUMLA (Sign and Symtom)

1. Sai kaw dwi ai dat Glucose 5.6-6.9 mmol or . 100-125 mg/dl hta grau tsaw wa ai.

2. Jit ji da ai hkang kaw kagyin hpu ai.

3. Masum law, langai yawm re ai lam byin ai. - Hka grai law lu ai. Hkring hkring lu mayu ai. - Lu sha grai sha ai. Hkring hkring kansi ai. - Jit law sa ai. Hkring hkring jit ji mayu ai. - Kade lu sha tim lasi ai.

NINGHKAN MANG HKANG (Complication)

1. Gau ngwi ngwi ninggun yawm wa, lasi wa ai.

2. Sai ninggun yawm wa ai.

3. Myi mu ninggun yawm wa ai. Myi mam mam wa ai.

4. Sai lam ni ja wa nna salum ana byin wa ai.

5. Lagaw ni bum hpam hpye wa ai.

6. Hpyi hkan sai kating mang wa ai.

7. Lamyi laman bum machyi wa ai.

8. Virus hte Bacteria ana kanu ni shang loi wa ai.

TSI LAJANG LAM

1. Malu masha hpe grai sadi sahka shadawn sharam nna sha na hkup, hka, hkri ai namsi, namlap lu sha madung sha na.

2. Shamu shamawt ginsup ai lam hta shakut galaw na,

3. Insulin lawm ai sha tsi hte shawng tsi na. Sha tsi hte ndang jang she htu tsi lang na, shawng ningnan short acting Insulin lang na. Na wa jang long acting hku jaw na.

4. Sai kaw na dwi dat Glucose 16 mmol a lahta de tsaw jang htu tsi jaw yang grau manu ai. Ningnan jang insulin 15 unit htu na, hpang shani 15 unit, lani mi din 10 unit, lahkawng ya din 10 unit, masum ya din 5 unit, hpang de bat mi hta kalang htu nna gaungwi ngwi shayawm na, sha tsi matut sha na.

5. Kaga ninghkan ana ni hpe byin ai masa hta hkan nna tsi lajang na.

6. Jit dwi ana a tsi madung gaw lu sha sharam sadi sahka ai lam re.

JIT DWI ANA BYIN AI NI KOI GAM RA AI LAM NI.

1. Dwi ai lu sha ni koi ra ai.

2. Udi tum, Ma-un si sau, dusat sau ni koi na.

3. Ten na na dung hpum taw lam koi na.

4. Jit dwi ana grau byin wa chye ai ninghkan ana ni n byin wa hkra makawp maga koi gam na.

HD