JINGHPAW GA SI GA NGAU (Shachyaw Daw (5))

1. KAGRI KADUNG

Ndai ga si ga ngau gaw, kagwi kagrawng kaw nna sa wa ai re. Tinang Kanu Kawa, Kaji Kawoi ni si wai mat wa ai shaloi, n-gaw nja let yu chyai na matu si wai mat wa sai dinggai dingla ni ayan jum lang / jai lang lai wa ai arung arai / shi kagrwi kagrawng kap arung arai lama ma garan jaw ai hpe shamying ai re lam chye lu ai.

2. GINLAM

Ndai ga si gaw, “Lachyum madung” (Subject) ngu nna jai lang ai re lam chye lu ai.

3. MADI 1

Ndai “Madi 1” ngu ai ga si a lachyum gaw, masha langai langai bungli galaw ai shaloi (or) ga tsun shaga ai shaloi (or) shi hta rawng ai mawn nsam shapraw ai hta tsawm ai, ngang kang tsawm htap, matu dim hkra galaw ai, lagawn lamawn gawdawng gawngan ahprup ahprap n re, myit sumnung shungdi ai laisat laisa hpe tsun shamying ai re.

4. KANGKA AI.

Ndai ga si gaw, tsawm htap ngang kang hkra, ngut kre matu dim hkra, shabyin ra ai hpe byin hkra, awngdang hkra, lu la ging / lu la ang ai hpe lu la hkra ladat shaw galai lu ai lam hpe shamying ai re.

5. TUNG AI

Ndai ga si gaw, poi tung ai, (Hka kaba ai) hpe “Hka tung ai” shani ka-ang hpe “shani chyingtung” ngu ai hta jai lang nga ai .

6. AN AI

Ndai ga si gaw, Namsi namsaw grai si sumroi / marak jawng ai hpe namsi si an ai,

7. GINLUT AI

Ndai ga hkaw gaw, lamu ga ginlut ai, sutgan ginlut ai, sut masa ginlut ai, sut hpaga ginlut ai ngu ai shara hta jai lang ai re. Ginlut ai hpe yawm wa ai, grit nem mat wa ai, shawoi lu ai daram n lu wa ai masa hta jai lang ai ga hkaw re .

8. HKINGHTAWNG DAGRAW AI

Ndai ga si ga hkaw, shawng masha langai lai wa ai shara (snr) galaw lai wa ai bungli langai ngai hpe matut galaw ai. Dai shara (snr) dai dum nta kaw alu a atsu rai nga ai hpe tsun ai ga hkaw re.

9. SHINGKRA

Ndai ga hkaw gaw, madu jan si mat ai shadang la ni hpe shamying ai re.Shingkra wa la mung nga ma ai.

10. GAIDA

Ndai ga hkaw gaw, madu wa si mat ai shayi num sha ni hpe tsun ai re. Num ni hpe “gaidawng gaida” ngu nna mung shamying ma ai.

11. GA SU JAP

Ndai ga si gaw, masha langai ngai kaw nna masha langai ngai (snr) uhpung uhpawng (snr) bungli masing langai ngai (snr) dum n’ta langai ngai a ntsa, mang gala jaw shaman ya ai shaloi, awngdang uga ngu yang kaja wa awngdang ai, sum uga ngu tsun yang kaja wa sum mat ai, si uga ngu yang kaja sha si wa ai “ga ningjap” “ga kang ai” hpe tsun ai re lam chye lu ai.

12. JAHKRUNG SHINGKRA

Ndai ga gaw, dinghku jan hte shaning hti nna hka bra nga ai, madu jan hte jahkrung hka bra mat ai shadang la sha hpe shamying ai rai nga ai.

13. JAHKRUNG GAIDA

Ndai ga hkaw mung, madu wa hte aten na na shaning hti nna hka bra nga ai (snr) lam amyu myu a majaw dinghku la wa hte jahkrung hka bra mat ai shayi num sha ni hpe shamying lang hkrat wa ai ga hkaw rai nga ai.

14. WUMAN

Ndai ga si gaw, malu masha rai rai, ja gumhpraw mi rai rai, gambum garan jaw ya hkat ai shaloi shinggyim masha lam hta jai lang ai ga si (ga hkaw) re hpe chye lu ai.

15. SHAMAN

Ndai ga hkaw gaw, gambum gam garan jaw ya hkat ai lachyum bung ai. Raitim, ndai ga si gaw, ji jaw nat jaw prat e Nat Lam hta jai lang ai re lam chye lu ai.

15. MAHKAU

Ndai ga si gaw, gambum garan ai, mahkau htu ai, Wa, Gwi, Lanyau dusat ni a mahkau htu shalawm ra ai ngu ai kaw nna byin wa ai re majaw n’ta dusat yam nga hte seng ai lam hta jai lang ai re hpe chye lu ai. Ndai ga si (ga hkaw) labau hta, n’ta langai na Wa ni gaw, shanhte kata na Wa langai rim sat sha kau ai mu jang “Ya chyawm mahkau langai yet sai, anhte ngam ai ni grau hkru hkra lu sha na saga ai” ngu kabu let tsun ai ga kaw nna “Wa a mahkau yet” ngu byin pru wa ai lam chye lu ai.

17. JAHKRAI

Ndai ga hkaw gaw, kanu kawa n lu mat ai, masha jahkrai, dusat jahkrai hte ya prat masa hta makau grupyin a madi shadaw lam n lu ai, mungmasa jahkrai, hpyen masa jahkrai, sut masa jahkrai, masing masa jahkrai, hpaji jahkrai ngu ai lam masa ni kaw jai lang mai ai hpe chye lu ai.

18. GA LA LA AI

Ndai “Ga La La ai” (Ka la la ai) ngu ai ga hkaw gaw, ndaw nhkra ai ramma kajan kana, kahkri katsa shada sumtsaw sumra byin ai mayun sumtsaw tsaw ai, ra hkat ai, ndaw lik nga nse nsa galaw ai hpe shamying lang hkrat wa ai re lam chye lu ai.

19. JAI WAWNG

Ndai ga hkaw gaw, “Jai wawng wawng ai” kaw nna sa ai re. Jai wawng wawng ai ngu ai gaw, kawa hte kasha, kanu hte kasha, kajan kana kahpu kayung sawng sawng ni shada, kahkri katsa majing ni shada hkum shan du kanawn mazum n-gyi shaba hkat ai, wa / la hkat ai hpe shamying ai re. Ndai zawn re ai amu manghkang hpan hpe “Jai Wawng Amu” nga nna shamying ai re lam chye lu ai.

20. HKAUWANG

Ndai “hkauwang ai” (hkau wang wang ai) ngu ai ga hkaw ga si gaw, kahkri ma a kasha, kashu ma hpe bai la ai hpe ngu ai re lam chye lu ai. Kashu ma hpe la ai shaloi “hkau wang ga” ngu ai Hpuja Hpaga langai shajan bang ra ai re lam mung chye lu ai.

21. DAW AI

Ndai “Daw Ai” ngu ai ga hkaw gaw, “daw hkra ai” nga jang la mai ai ngu ai lachyum mung re. Kahkri daw ai, kasha daw ai, katsa daw ai, kajum kaji daw ai, kanu karat daw ai, kani kawoi daw ai, kahpu kanau daw ai, kajan kana daw ai, kanam daw ai, katsa daw ai, kagu karat daw ai, kashu daw ai ngu ai hta jai lang ai re.

22. N DAW AI

Ndai “n daw ai” ngu ai ga hkaw gaw, “N daw n hkra ai” nga jang tinang la n mai ai ngu ai lachyum re. Raitim, Wunpawng mungkan Jinghpaw rusai lam hta (1) Kahpu kanau (2) Mayu (3) Dama ngu masum brum “Di Kru jung” rai nga hkrat wa ai amyu re majaw shachyen shaga hkat yang hpa mung n daw ai ngu ai n nga ai lama ma gaw daw ai lam nga ai.

Lam mi hku tsun yang “n daw ai” ngu ai gaw, tinang wanen la n mai ai, wa n mai ai kajan kana, kashu kahkri, kahpu kayung, kaji kawa, katsa ni hpe mung “n daw ai” ngu tsun shaga ai re.

Loi Yang Hkruji