JINGHPAW GA SI GA NGAU (Shachyaw Daw (6) Matut)

17. GINDING

Ndai “Ginding” ngu ai ga si gaw, hkrang kaba ai (Kaba dik ai) shawa kaba ai hpe tsun shamying ai re. Mungkan ga (lamuga) hpe “Ginding aga” ngu jai lang ai. Hka lawng hpe mung, sung dik ai, kaba dik ai hka la-ing hpe “Ginding La-ing” ngu shamying lang ai re lam chye lu ai.

18. GA JANG

Ndai “Ga Jang” ngu ai ga si gaw, n’ta kaw bungli galaw na matu Mam mu, Hkauna htu / galaw, N’ta gap, Ma woi (Ma nsut), shat shadu ma, sun hkyen sun nhpan kum hte lama ma galaw na matu shabri shabrai jaw nna saw da ai masha hpe “Ga Jang” ngu shamying lang hkrat wa ai re lam chye lu ai.

19. GWI LI LAWT AI

Ndai “Gwi Li Lawt Ai” ngu ai ga ngau gaw, Gwi ni, Gwi yi hte Gwi La, Lanyau yi Lanyau la ni hkum shan kanawn mazum ai hpe shamying ai re. Wa hpan hpe gaw, Wa li lawt ai, “Wa sawn sawn ai” ngu shamying lang ai lam chye lu ai.

20. GUP HTE TAI A LAM

Ndai “Gup hte Tai” ga si yan gaw, “Gup Langai-2” gup lahkawng rai jang (4) ngu hti jai lang ai rai nna, “Tai” ngu ai gaw, “Tai langai -1, tai lahkawng gaw (2) hpe sha re. Gup hti hkum ni gaw 2,4,6,8,10 ngu ai re. Tai a hti hkum ni gaw, 1,3,5,7,9 zawn re hti hkum ni hpe shamying da ai re lam chye lu ai.

21. MAN MI

Nhpye Ninggang “Man mi” Gyep din man mi, Na Ladan / Lakan man mi, Labu Palawng man mi ngu nna jai lang hkrat wa ai lam chye lu ai.

22. MYIT RUM AI

Ndai “Myit Rum Ai” ngu ai ga hkaw gaw, Masing Langai a kata, Wuhpung Wuhpawng langai a kata, myit shabawn let magam bungli langai hpe rau galaw ai Tara langai jawm hkansa ai, rau nga rau galaw, rau akyu jawm hkam sha ai, wuhpung wuhpawng mu gun ni a myit mang masa hpe shamying da ai re lam chye lu ai.

23. GINLAWM AI

Ndai ga si gaw, Mam, N-gu, Shapre zawn re ayun agu hpan ni ayai aya rai nga ai rai yang, “Ginlawm ai” shara mi kahkyin mahkawng chyawm da ai hpe mung ngu ai.

Bai nna, hkum tsup ai, “Ginlawm ai” hku tsun shaga ya ai, mungmasa hpung pati ra lata shingjawng ai rai yang, “KIO - NLD hpe madi shadaw ga” ngu ai hku nna pawm ginlawm ya ai hpe tsun ai.

Hpan mi gaw, “dai manghkang hte seng nna ngai ra ai re, yawng nye a mara rai sanu ga” nga nhtawm mara mahkra hpe “ginlawm” hkam la ai lachyum re lam chye lu ai.

24. MYIT RUM MANANG

Ndai ga ngau ni a lachyum gaw, masing masa (lam-yan) langai, wuhpung langai, hkansa tara langai a kata magam bungli langai jawm gunhpai ai manaw manang ni hpe “Myit Rum Manang” ngu shamying lang ai re lam chye lu ai. Ndai ga ngau hpe mungmasa hpung pati, Asuya magam dap, hpyen dap hte komiti wuhpung zawn re hkan law malawng jai lang ai lam chye lu ai.

25. MYIT RUM MANANG MYIT MASA

Ndai myit masa gaw, hpyen dap, pati hte komiti zawn re shara kaw madung jai lang ai lam nga ai.

Dai majaw, wuhpung wuhpawng langai, masa lam-yan langai, tara langai, nsen manawng langai, magam bungli langai a kata “Prat bung masa” hku nna ga shaka langai sha hkam la nna “gandang” langai jawm gunhpai nga ai magam gun (mu gun) masha ni a myit masa hpe “Myit Rum Manang Myit Masa” ngu ai re lam chye lu ai.

26. TSU GA

Ndai “Tsu Ga” ngu ai ga si a lachyum gaw, Amyu sha langai, sai langai rau si wa ai amyu sha langai mi a “Tsu numla / hta numla / wenyi ni hpe shabawn da ai, shawawn da ai shara lamuga hpe “Tsu Ga” ngu ai re lam chye lu ai.

27. TSU WAWN GA

Ndai “Tsu Wawn Ga” ngu ai ga hkaw hte seng nna grai sung li, grai dam lada ai ga hkaw langai re.

Anhte Jinghpaw amyu sha ni hta, Lahtaw Du ni a “Tsu wawn ga” Maran amyu ni a Tsu wawn ga, Lahpai, Nhkum, Marip amyu ni a “Tsu wawn ga” ngu nhtawm, Bum shagawng, Bum marawn, Kawng chyinghkang mayu hkringdat gang nna shawawn / shabawn bang da ai shara hpe shamying da ai re lam chye lu ai.

Anhte Jinghpaw amyu sha ni sha nrai, Wunpawng amyu lakung (7) a dai lup dai hpang ningpawt gaw, Majoi Shingra Bum” ngu ai kaw nna prat pra wa ai labau nga ai re majaw, Wunpawng amyu sha ni a “Tsu wawn ga” gaw, Majoi Shingra Bum rai na re.

Majoi Shingra Bum ngu ai hpe hpaji ninghkrin ni grai tam yu tim n mu lu ai. Dai majaw, Majoi Shingra Bum ngu ai gaw, “Sumsing Mungdan” hpe ngu ai rai na re ngu nna tsun da ai lam nga ai. Dai lam tengman ai rai yang Wunpawng amyu sha yawng numla shabawn shara “Tsu wawn ga” gaw Sumsing Mungdan kaw rai na sai ngu hkam la lu ai.

28. GAW DE

Ndai “Gaw De” ngu ai ga si a lachyum gaw, masha, asak hkrung dusat hte tu jung hpun kawa ni yawng hta asak rawng ai masha manang ni, kungzet lahkam ndep ai hpe “gaw de” ngu ai. Hpun Kawa ni mung kaga ni daram galu kaba shatang ndep jang, Hpun gaw de, Kawa gaw de, hkai nmai gaw de ngu shamying lang ai lam chye lu ai.

29. GANGHKAU

Ndai “Ganghkau” ngu ai ga si a lachyum gaw, ga ntsa e mung n tsap, lamu de mung n kap re ai, lamu hte ga lapran hpat wat hpe “Ganghkau” ngu ai re lam chye lu ai.

30. GANG BANG

Ndai “Gang bang” ngu ai ga si gaw, makau grup yin de lama ma hte kum magap makawp da ai lam nnga ai, ntsa de mung lama ma rau galup da ai lam nnga ai shara langai ngai, (Ga shadawn; Gawdin pa, hkauna pa zawn re ai hpe shamying ai re. Lam langai mi gaw, lam ntsa wahkrang hpat wat e shawam jamwa tawn ai, ndi dawm tsip hpe mung “Gang bang tsip” ngu shamying ai re lam chye lu ai.

31. GINLUNG AI

Ndai ga hkaw gaw, nga ai masha ni hpe chyawm kahkyin la nna bungli lama ma jawm galaw ai hpe tsun ai. Lam mi gaw, makam masham hpung ni yawng pawng hpawm nhtawm kyuhpyi hpawng langai ngai jawm galaw ai. (Ga shadaw; Ginlung Hkrismat, Ginlung Chyeju Shakawn Poi, Ginlung Manau, Ginlung Wunli La kyuhpyi hpawng) zawn re ai shara hta “Ginlung” ngu shamying ka lang mai ai.

32. GANDANG

Ndai ga si gaw, masha lahkawng (snr) marai lahkawng a lahta de grai li nak ai arung arai lama ma jawm shingtau hpai ai hpun tawng (snr) kawa tawng (snr) hpri tawng zawn re hpe “Gandang” ngu ai re. Magam bungli langai ngai hpe jawm gunhpai ai rai yang, “gandang langai gunhpai ai” ngu lang ma ai lam chye lu ai.

33. GAM HPOI GA

Ndai ga si ga ngau gaw, Num hkungran, n’ta dingshawn, Ju Manau dum ai poi ni hta jaiwa wa ai, lanyi lanya, majan jangka ka ai, sha-awng mang gala ai shaloi lang ai ga si, ga hkaw ni hpe “Gam hpoi ga” ngu jai lang wa ai re lam chye lu ai.

34. GAW MAI GAW SHA

Ndai ga hkaw ga hkum gaw, nhkru n kaja ai mabyin ni, shinggyim masha prat ban shagu n kaja ai lama ma byin ai. Mare kata (snr) dinghku n’ta kata shaning shagu n shawp n kap ai, gumsha ai manghkang langai ngai byin ai hpe “gaw mai gaw sha” ngu ai re lam chye lu ai.

Loi Yang Hkruji