Tirbi masha Elia gaw Ga Shaka Dingsa hta Karai Kasang hte grai nan ni htep let arau hkawm sa wa myihtoi langai rai nna, Israela amyu sha ni ntsa shingkang nga ai myihtoi langai re. Nden marai hpring tsup ai hte ngang kang ai makam masham rawng ai Elia gaw, nsin chyip mak re ai Israela labau hta, wenyi kawa langai hku nna, sumla nawku ai lam ni hpe ja ja ninghkap let, tinang amyu sha ni hpe Karai Kasang hpang de galoi mung bai woi nhtang wa ai hte lamik kumla amyu myu mung galaw wa sai. Shi a labau hpe madung hku nna 1 Hkawhkam Labau 17–2 Hkawhkam Labau 2 hta mu lu ai rai nna, dai lam ni gaw labau mabyin langai sha n re, tengman ai hte n tengman ai lam, makam masha hte hkrit tsang ai lam, yawng mayawng a ntsa Karai Kasang a up hkang nga ai lam ni hpe sung sung htawng madi madun ai labau ni rai nga ai.
YAK HKAK JAMJAU TEN PAW PRU AI MYIHTOI
Chyum laika hta Elia a lam hpe, shi a aru arat shingdu labau ni n lawm ai sha, a kajawng sha shachyen ya hkrum ai myihtoi langai re. 1 Hkawhkam Labau 17:1 hta, “Shaloi Gilead mung e sa nga ai Tirbi masha Elia gaw...” ngu na ka shalawm hpang da ai. Dai zawn, Elia a akajawng sha pru wa ai lam gaw, Israela masha ni a wenyi lam ja ja hten za nga ai aten re majaw rai nga ai.
Hkawhkam Ahab hte hkawhkam jan Yezebela a npu e nga ai Israela mungdan gaw, Yehowa Karai Kasang hpe shingdu tawn kau nna, Hkanan hpara Bala hpe nawku mat wa ai. Phoenician hkawhkam jan Jezebel gaw, Bala nawku ai lam hpe wanglu wanglang dam lada hkra galaw wa nna, Karai Kasang a myihtoi ni hpe zingri zingrat sat ai hte, mungdan ting hpe wenyi lam hta matsat shabat di kau wa sai.
Elia a shawng nnan na myihtoi ga gaw, mungdan ting hta marang mung n htu, mari mung n hkrat, hkun hkraw wa na re ngu htoi dat ai. Dai lam gaw, lamu marang hte hkailu hkaisha bawngring lam hpe jum tek tawn da ai ngu Israela masha ni kam ai bala hpe ading tawk ningdat dat ai lam re. Elia a myihtoi ga majaw, masum ning tup marang n htu mat ai.
NAM MALING KATA NA MAUHPA LAM NI
Lamu marang n htu nna, hkun hkraw nga ai shaloi, Karai Kasang gaw Elia hpe Yawdan hka tawtap na Hkerit hka shi makau hta makoi tawn da ai. Dai shara hta, u hka ni gaw lusha sha hpa ni sa jaw sha ma ai. Hka shi kaw na hka ni hkyet wa ai shaloi, Elia hpe bala hpe nawku ai masha ni law law nga ai Phoenicia mungdaw na Zarephta mare de sa shangun dat ai. Dai kaw matsan gaidan jan hte shi a kasha gaw, hpang jahtum na muk lusha hpe sha na matu hkyen lajang nga ai. Raitim, Elia a ga a majaw, gaidan jan yan nu a muk hte sau gaw, mungdan hta marang htu ai aten du hkra mau hpa hku nna matut lusha wa sai. Hpang daw hta, dai gaidan jan a kasha si mat ai shaloi, Elia gaw Karai Kasang kaw marawn jahtau nna asak bai hkrung wa na matu hpyi yang, bai hkrung wa sai. Dai labau gaw, chyum laika hta shawng nnan hkrungrawt ai labau masat rai nga ai. Elia gaw Israela ni a matu Karai Kasang dat dat ya ai myihtoi langai sha n re, maigan amyu ni a matu kasi la hpa tai lu ai myihtoi langai mung rai wa ai.
HKARMELA BUM NTSA NA ELIA
Elia a sasana magam bungli hpang ai shara gaw Hkarmela bum ntsa e rai nga ai (1 Hkawhkam Labau 18). Masum ning tup marang n htu ai hpang, teng man ai Karai Kasang gaw kadai re ai hpe sakse madun na matu, Ahab hte Bala myihtoi ni hpe shaga jahpawng ai. Maga mi de shagu hkungga nawng jau na rai nna, hkungga wan hpe lu nat ya lu ai wa ai Karai gaw, tengman ai Karai Kasang re ngu masat la na ngu myit hkrum ma ai.
Bala myihtoi 450 gaw jahpawt jau ten kaw nna shana du hkra jahtau nna, ka manawt let, hkum hpe gang je kau nna, Bala hpe mahtai jaw na matu hpyi nem ma ai. Rai tim, hpa mung n byin wa ai. Elia chyawm gaw, asim sha akyu hpyi nna, Karai Kasang gaw lamu na wan jahkrat dat ya nna hkungga, hpun, nlung, hka, ga nhpu ni hpe wan nat kau ya let, Karai Kasang kaning re re ai hpe madun wa sai. Makau kaw yu nga ai Israela masha ni gaw ga de dingnyawm nna, “Madu gaw Karai Kasang rai nga ai!” ngu nna marawn jahtau ma ai.
Dai hpang, Elia gaw bala a myihtoi masu ni hpe sat kau nna, Israela amyu masha ni hpe Karai Kasang hpang de bai woi wa ai. Dai hpang shi gaw marang htu na matu akyu hpyi nna, shi a mayam ma hpe sanit lang yu na matu shangun dat ai hpang, sumwi langai mi dan pru wa sai. Mungdan ting marang bai htu wa nna, tara jeyang ngut ai hpang na Karai Kasang a tsawra matsan dum ai myit hpe htawng madi madun wa sai.
HKRIT TSANG AI HTE MYIT DAW MYIT HTEN WA AI ATEN
Dai hpang e, Yezebela shi hpe sat na ngu tsun ai majaw, hkrit kajawng nna hprawng mat wa ai.
Elia gaw myit tsang, myit daw myit hten let nam maling de hprawng wa nna, “Yehowa e ya ram sai; nye a asak dawm la kau ya ni” ngu hkrap let tsun nga ai. (1 Hkawhkam 19:4). Ndai lam gaw, myihtoi Elia a shinggyim masha langai hku nna garen gari, hkrit tsang chye ai lam hpe madi madun taw nga ai.
Karai Kasang gaw Elia hpe daru sharin ai hte n rai, angwi apyaw let ga bai nhtang ai. Lusha hte hkringsa nga shara ni hpe lajang ya ai, dai hpang Elia hpe Horeb (Sinai) bum de woi sa nna, dai shara kaw Karai Kasang gaw Shi hkum hpe nbung, nbung laru, wan hku n re ai sha, nsen kaji hte shaleng dan ai. Ndai shara hta, Karai Kasang a magam amu bungli gaw, galoi mung shinggyim masha shadu tawn da ai hku mau hpa lam n re ai hpe Elia chye wa ai; kalang lang gaw, ngam ngam rai let, shawng de sa nga ai lam rai nga ai.
Karai Kasang gaw, Elia hpe shi hkrai n re, Israela masha 7,000 jan gaw bala hpara hpe n nawku ai lam hpe bai shadum ya ai. Dai hpang Karai Kasang gaw, Elia hpe, ningbaw ningla nnan ni hpe namman chya ya amu, shi a hpang e sa wa na myihtoi Elisha a lam hpe hkyen lajang da ya na amu ni hpe shatsam wa ai.
WAN GUMRA WANLENG HTE ELIA
Elia a mungkan ga e nga ai prat gaw, shawng nnan e akajawng sha pru wa ai zawn sha, mau nan re nna, byin mat wa sai. Elisha hte rau hkawm sa wa ai shaloi, wan leng langai lamu de na yu dan pru wa nna, nbung laru hte Elia hpe lamu de woi la mat wa ai.
Elia gaw mungkan ga e n si ai sha, sumsing lamu de woi la hkrum mat ai, Dai zawn labau gaw, chyum laika ting hta, Enuk hte Elia a lam sha nga ai. Elia a hkringhtawng gaw, shi nga prat mat wa ai aprat aten hta lai jan hkra rai nga ai.
Elia gaw tsa ban law law na ai hpang Ga Shaka Ningnan hta bai dan dawng wa nna, Yesu a hkrang bung sumla galai shai ai shaloi Mawshe hte rau tsap nga ai (Mahte 17). Shi gaw Madu a nhtoi garai n du shi yang, Elia bai du sa na lam hpe tau hkrau tsun da ai Malahki a myihtoi ga hpe jahpring shatsup ai lam rai nga ai.
GA HPUMDIM
Elia a prat gaw wan zawn re ai makam masham, ndem marai, makam masham wenyi hpe woi jahten ai hkawhkam ni hpe ninghkap nna, shut shai ai makam ni hpe gumlang jahten wa ai myihtoi rai nga ai.
Karai Kasang a shaga ai nsen gaw, galoi mung nbung laru kata kaw na sha shaga ai n re ai sha, asim sha re bungsha kaw na mung shaga wa chye ai lam hpe sharin ya nga ai. Elia a lam gaw, wan hte mahtai htai ya ai sha n re, asim sha rai nna mahtai jaw, tsun chye ai Karai Kasang hta kamhpa manoi manat ra ai hpe madi madun taw nga ai.
