Ga Nhpaw
Dai ni mungkan hta masha law law a n gup hta tsun lang nga ai ga si langai mi nga ai. Dai gaw ‘ DEVELOPMENT ‘ ngu ai ga re.. Lachyum gaw “ Rawt malang le wa ai, shanglawt lu ai, masha langai a shakut shaja ai kaw na lu la ai MAHTAI ngu ma ai. Dai hpe anhte gaw BAWNGRING ngu nna jai lang nga ga ai.
Dai Deverlopment = Bawngring ai ngu ai hpe madu lu na matu prat ban hte ban mabyin masa lam amyu myu hte ngamu ngamai ai ..pyaw ai prat ban de du wa lu na matu shakut ai, rawt malang le wa na galaw hkrang shapraw sa wa ai hpe ngu ai re.
Nde a matu shadawn jitna langai mi nga ra ai hpe malap kau ga ai majaw , anhte sawn ai hku nna, sutsu jang, hpaji jan mau degree law law lu jang, makam masham lu jang rai sai ngu ai hku nna myit kau ai shaloi nhkum tsup mat ai..dai majaw hkum tsup ai “Abundent Life” de du na matu gaw (Yh 10:10b )” Sagu ni asakhkrung lu na hte nhpaw n-ya lu la mu ga, ngu nna sa ring ngai” ngu ai hpe myit dum ra ai re.
Ndai lam a matu anhte myit dum mai ai lam gaw ….(1). Hpu nau hpe daw jau ai hte gam jaw ai lai..(2). Masing jahkrat ai hte mu mada ai daw hpe gang sharawt ai lai (3). Mu mada hkam sha ai hte rawt malangshakut let hkrang shapraw shachyang la ai lai, ngu ai lam 3 hte sa ra ai. Ndai lam ni kaw mahta nna lam kaba 2 hte jawm myit yu ga, ngu nna ga saw dat nngai law..
Kam sham ai ni hpa rai Nbawngring a ta?
a). Sharin hkam la ra ai.
Awng dang ai masha hte yu yu masha tai ai ngu nna shai wa ai gaw , prat hta kaja wa bawngring mayu ai myit rawng ai, nrawng ai hta hkan nna sharin hkam la ai hta madung re lam ( Ga .sh 4:7-9 )
Yuda masha ni gaw ma prat ten kaw nna asak hkrung lam a matu matut ai amu hpaji lama ma hpe sharin hkam la ai lam hpe mu lu ai. Shanhte a hpaji masa hta jawng laika hpaji hta shinggan tatut amu hpe grau nna sharin hkam la chye ai lam chye lu ai. Asak 15 ning hpring ai hte laika sharin gawk hte shinggan tatut amu hpe grau nna sharin hkam la let chye chyang nga ai lam mu lu ai.
Hpa majaw dai hku galaw a ta? ngu ai shaloi laika hpaji sha chye nna tatut hpaji amu nchye ai gaw shawng na shaprai sha lawm nna hpang na shaprai nlawm ai Modo hte bung ai.
Madung gaw ..madat mara ai lam sharin la ra ai, tatut asung shang ai hpaji ni hpe sharin la lu na matu , shagrit shanem ai hte sharin la ra ai ( Ga.sh 16:16 )
Kangka ai amu ni a lam sharin la ra ai ( Lk 16:10-12 ) Amu kaji hta kangka ai wa amu kaba hta kangka ai lam tsun da ai re. Kaja wa bawngring ai masha tai mayu jang sharin la mai ai lam law law hta na ( NN 16:12-14 ) Isak a lam hpe ndai kaw madun da ai hpe yu yu ga.
Sut Lu Ngamai Na Karai Ra Sharawng Ai.
Sut su ngamai Sahti byin tai na matu ja gumhpraw tam ai gaw yubak mara nrai nga ai ( 2 The 3:10; Hag 2:8 ) . Raitim ja gumhpraw hpe ra marin nammak law hpa ai gaw yubak mara shabyin nga ai ( 1 Tim 6:10 ). Dai majaw KArai Kasang gaw Sumsing lamu hte ginding aga hpe hpan da ai shani kaw nna manu dan ai baw nhprang sut rai nga manga hpe hpan shalawm da ya sai re ( NN 2:1; Shingran 21:19-20 ).
Dai rai nna Abraham gaw grai lu su ngamai ai hte nga pra lai wa sai lam (NN 13:12 ) hta mu lu ai. Anhte gaw Abraham a aru arat , Madu Yesu hpe kam sham hkap la ai ni re majaw Abraham hte amyu daw ang ai ni rai ga ai. Dai majaw kam sham ai ni sut lu ngamai na Karai Kasang ra sharawng nga ai ngu ai lam re ( Gal 3:29; NN 12:1-3 ).
a). Madat Mara Hkan Nang Ai Abraham
Mungkan ga hte seng ai sutgan chyeju kumhpa mahkra gaw madat mara hkan nang ai ni a matu sha re, kam sham ai myit rawng jang bungli sha galaw ra ai, dai amu bungli hta chyeju tut kanan nang nga ai ( NN 17:9-14;22:16-18 ).hti,
Madat mara hkan nang ai gaw Karai Kasang a Hpung Shingkang hpe shadan shadawng ai amu rai nga ai.
KAM SHAM AI - Shakut nna galaw ai - - Shaman ai chyeju lu la na; Shakut nna galaw ai shagu hta chyeju lu na ( Lk 14:23 ).
b). Shawng lam shingran nga ra ai ( Rebeka a lam )
Isak a madu jan gaw kasha Yaku hpe sut masa chyai ai Suri, Hkanan Mare Kaba de dat ai, dai aten Haran Mare Turu, Tarshu ni htea gunrai ginlen ai hpaga ga na manu dik ai shara re, Turu gaw Lebanon mungdan a Sanghpaw daru kaba re lam chye lu ai.
Yaku sharin ya ai hpaga hpaji gaw Haran Mare na Katsa Laban a nta kaw nga nna nchyang bungli hte galaw hpang ai (14) ning tup sagu bainam rem ai amu galaw ai. Dai majaw sagu bainam hte seng ai gunrai hpan amyu hkum hkra hpe gin shalat chye ai hte sut madu hpaga la tai wa ai ( NN 31:38-39 ).
Ndai aprat hta mung Yaku zawn rai nna sut hpaga madu tai wa ai masha grai law hkra nga ai lam chye lu ai. Dai kaw kaji ai amu kaw nna hpang ai kaba ai amu du hkra sa wa na matu sha ra ai. Dai shaloi bungli shang hpang ai hte “ myit mada ai shabrai “ hte seng nna hkrum na re ( NN 29:15 ) Yaku mung hkrum lai wa sai. Ndai mahtai a matu ( Ga sh 16:16; 3:14 ).
c). Bungli ndai matut galaw na i? htawt na i? ngu ai hpe chye ra ai.
Bungli galaw nga shagu Karai Kasang madun ai gaw nre, htawt ang jang htawt galai ang jang galai ra ai lam (NN 26:2 ). Yaku gaw num lu na matu 14 ning , bai sutgan lu na matuu 6 ning galaw ai lam mu lu ai, raitim kahkau ni hte Katsa a amyat garan na matu aten nau galai wa ai majaw ladat shaw nna, Hkanan mung de htawt sit mat ai lam mungga hta mu lu ai ( NN 31:38-42 ).
Dai majaw tinang a nyam hkum machyu ngu ai gaw bawnu hkum lang ngu ai nre ( Ga,sh 3:5-6 ). David gaw Shawlu shangun ai mahkra galaw tim bawnu hpe jai lang nna, Karai Kasang hpe amu nlang ap da nna galaw sa wa ai lam mu lu nga ai ( 1 Sam 1 8:14-15;30 ). Karai Kasang hpe ap da sai ngu ti, bawnu hpe zaw hkat da na matu nre, jai lang na matu re ngu ai lam ( Ga.sh 13:20; 15:22 ).
d). Myit masin kaja ai langai hte sha n awng dang lu ai..
Myit masin gade kaja tim, tengman lam hpe nju jang matsan na, si hkrum na ( Hpaji 10:1 ).
David gaw Shawlu a maw lanyet kaw nna lawt lu ai ( 1 Sam 19:11-12 )
Gad hkaw Hkam Ahkisha hpe hkrit nna mana masu su ai aten David galaw lai wa sai ( 1Sam 21:12-13 ).
Pawlu asak lawt na matu hawng kaw nna hprawng gale ga sai ( Kasa 9:23-25 ).
Tsun mayu ai gaw Karai Kasang gaw shinggyim masha hpe Robot masha hku hpan da ai nre; bawnu hpe jai lang nna sut su ngamai na hpe ra sharawng ai; lam shagu kaw nna lawt wa na matu gaw makam masham hte ngamai lam hpe gaw gap la ra nga ga ai law….ngu nna hpungdim dat nngai law…
Tang madun ai
Rev. Nhkum Brang Seng
