Israela hpyenla ni pyi hkrit gari ai, hkrit nan re shinggyim masha galu kaba re ai hte man hkrum ra ai sagu rem brang a lam hpe yawng na ga na re. Dai maumwi gaw, Dawi hte Goliat a lam rai nna, nden marai rawng let, Karai Kasang hta kamhpa manoi manat ra ai lam hpe sharin ya ai mabyin langai rai nga ai.
Manghkang Kaba Langai
Israela masha ni hpe gasat na matu, Hpilisti hpyen dap zuphpawng nga ma ai. Shanhte a magrau grang dik hte mazut dik htum hpyenla wa gaw, Goliat ngu ai galu kaba re ai masha wa re. Shi gaw manu mana galu nna, li la ai hpyen hking bu hpun let, nhtu kaba langai mi hpe mung lang tawn da ai.
Nhtoi 40 ya tup, Goliat gaw Israela hpyen la ni hpe jahpoi asawng ai hku jahtau nna, jahte tam taw nga ai. Shi hte gasat shingjawng na matu Israeala hpyen hpung kaw na magrau grang dik re ai masha hpe dat nna shingjawng na matu, ningdat taw nga ai. Israela masha wa dang yang, Hpilisti masha ni gaw shanhte a mayam tai na re. Raitim, Goliat dang yang, Israela ni gaw Hpilisti ni a mayam tai mat na re. Dai shiga hpe na ai hkawhkam Shawlu a hpyenla ni yawng gaw hkrit gari nga ma ai rai nna, shi hpe gasat na matu nden marai kadai hta mung n nga nga ma ai.
Sagu Rem Ramma Langai Rawt Pru Wa Ai
Dai aten hta sha, sagu rem shabrang wa Dawi ngu ai ramma langai nga ai. Kawa gaw shi hpe hpyen dap kaw nga ai shi a kahpu ba ni hpang de lusha sa sa shangun dat ai. Dawi gaw dai shara de du ai shaloi, Goliat jahtau ai hpe na nna, hpyen la ni yawng kade daram hkrit kajawng nga ai hpe mu ai.
Dawi gaw masin pawt nna, "Hkrung nga ai Karai Kasang a hpyen hpung hpe jahpoi asawng na ndai wa gaw kadai rai ta?" ngu nna jahtau dat ai.
Shi gaw, Hkawhkam Shawlu hpang de sa nna dai galu kaba ai wa hpe gasat na ngu sa tsun ai. Hkawhkam wa gaw shi hpe, "Nang gaw ma kaji sha re. Nang shi hpe n mai gasat ai!" ngu nna bai tsun dat ai. Raitim, Dawi gaw shi a sagu ni hpe makawp maga na matu chyahkyawn hte hkanghkyi ni hpe gasat dang kau ai lam, Karai Kasang shi hpe makawp maga ya ai lam ni hpe tsun dan ai. Shi gaw, "Ngai hpe hkanghkyi hte chyahkyawn ni kaw na hkye la ai Karai Kasang langai sha, ndai shinggyim masha kaba kaw na ngai hpe hkye la na re," nga nna tsun ai.
Hpang jahtum hkawhkam wa myit hkrum nna, Dawi hpe magri hpyen hking jahpun ya dat ai. Raitim, dai gaw Dawi a matu grai kaba nna li ai majaw, dai hpe raw kau ai. De a malai, shi a sagu rem ai shaloi lang ai shingkyit hpe sha la lang nna, hka hkin-gau kaw na hpraw tsawm ai lungdin manga hpe hta la dat ai.
Gasat Poi Kaba
Goliat gaw Dawi hpe, dawhkrawng hte sha lang nna shi hpang de sa wa ai hpe mu ai shaloi mani sumsai hte jahpoi asawng dat ai.
Rai-timung Dawi n hkrit ai, "Nang gaw nhtu lang nna ngai hpang de sa wa ai, ngai chyawm gaw nang jahpoi asawng ai Israela hpyen hpung a Karai Kasang, Chyahtum Chyalai N-gun Rawng ai Madu a mying ningsang hta nang hpang de sa wa nngai! Dai ni Karai Kasang gaw nang hpe dang kau lu na matu ngai hpe karum na ra ai," ngu nna bai jahtau wu ai.
Dawi gaw Goliat hpang de gat sa wa ai shaloi, shi a shingkyit hta lungdin langai mi bang nna, nwat kabai dat ai. Dai nlung gaw Goliat a lahtan hpe hpawk di hkra mat nna, dai masha kaba wa gaw ga de gum dagup hkrat mat wa ai. Israela hpyen hpung ni gaw dai zawn byin ai hpe mu jang, kabu gara ai hte, hpyen sum nna hprawng hkawm ai Hpilisti hpyen hpung ni hpe hkan shachyut let, awng padang kaba lu la wa sai.
Sharin La Lu Ai Lam
Teng man ai n-gun atsam gaw shinggyim masha a n-gun atsam, laknak arung arai kaw na pru ai lam n re ai hpe, Dawi hte Goliat a mabyin kaw na anhte sharin la lu ai. Nden marai hte makam masham kaw na sha pru ai lam re ai hpe anhte dum chye ra nga ai. Dawi gaw Karai Kasang hpe kam hpa ai majaw, kadai mung n gwi gasat lu ai masha kaba langai rai nga ai Goliat hpe ninghkap gasat dang la kau lu wa sai.
Ndai mabyin maumwi kaw na anhte sharin la lu ai lam gaw, anhte dinghkrai a Goliat ni rai nga ai, hkrit ai myit, myit kaji myit tsang ai myit, yak hkak jamjau kindut ai lam zawn re ai ni hpe, Karai Kasang hta manoi manat kamhpa let, Dawi zawn gasat dang shamyit kau lu mai ai lam hpe sharin la mai nga ai.
