MA PRAT NA MAUMWI
DA LIM
GANOI SHA SI MAT AI
Mam nnan sha naw gabawng wa yang na lana mi hta, ngai gaw nu shinggan gan pru la in kadun kaw lai shang wa ngu lagaw htawt dat ai hte aga e pya rai sai da. Dai tene gahtawng ting na ni gaw la kasha hkrai shaprat in, Nu a ma kan hpe ta madi let, nang la sha bai shangai jang gaw na madu wa shatai nu lu ngu hkra re mi rai re ma ai. Gam mi arawng dai shana anhte nta kaw mahkawn shabrang tsawmra mi sa yup chyai ma ai kaw, ngai hpe shangai dat ai hta n ga, ngai num ma re ai hpe yawng gabu nna, langai hte lanagi a ta n dung hku ren rai pawn shalai ma ai da. Ginhtawng htawng dep mat wa, makru wai ten rai mat wa ai lam gaw, dinghku ga- nu langai mi a myit kajuk ya nga ai. Nu gaw ngai hpe shangai nna makru nlu daw, mahkri hkri na ten ni shalai kau hkyem sai ngu myit dum dat nna, ngai hpe shangai ai shata chyen mi dang sha naw rai yang, htingbu nta Ma Sam ngu ai gashu kasha mung nlu re kani ya wa hpe sa tawn da ya na hku sa bawng yu yang, madu jan Dashi Htoi gaw: She sa tawn da ya u e, shi ma chyangai grai chye rem ai re ngu hkra hkam ya nna, nu gaw Ma Sam hpe ma tawnda ya nna Nai hkaraw de Nam makru daw mat wa nu ai da. Makru singga mi pyi rai ndaw lu yang, Nu madwi chyu hkawng kang machyi wa ai a hte ma kyek hkrap ai zawn nga ai nsen sheng nga hkra na dat nna, Ma Sam a nta de sa-hka she gama hkra htim wa ai, la- kang pawt du ndawt ma nhkrap yi ngu san sai, Ma Sam gaw n hkrap ai grai yup pyaw nga nu ai ngu tsun dan nna, nba magap tawn ai ma ntsa kaw lahka hkrai re lagaw bai hpai mara tawn rai kani lu galeng nga la sai da.
Nu masin hpra ngu let shi a lagaw hta shayu kau nna nba gun kau dat yang, ma myi man nmu ai, nbat gata kaw baw shamu ai sha mu taw nga sai da. Shaloi Nu myit si myit htum ma myi man hku ahkyen tawn ai nbat gun gayan kau ngut yang, ma gaw nsa marit nna ganoi sha si mat ai mi re da. Dai shani kaw nna Nu gaw ngai hpe nam makru singga mi hte ganoi galai kau ai nga nna, sai pyi ganoi hten mal hkra gajawng kau u ai. Shingrai shawng de gyenan ya na daram nmanu ai ten hta ngai nta de laika gade lang shagun tim, shi laika htang na ngu nna maisau pawngtin hta jum dat ai hte, shingran dai hkrai mu rai, myi prwi si myi magap kau ya ya re majaw, ngai hpe laika galang mi pyi nhtang yu ai re nga, ya du hkra rai tim ngai hpe laika galang mi pyi nhtang yu ai nga gumgai taw nga nu ai rai. NGA TAM SA AI Ngai naw gaji yang, anhte gahtawng kaw num kasha ngai hte maren re n nga ai, ngai hta gaba ai, ngai hta gaji ai ni yawng la kasha hkrai re, la kasha ni hte hkrai ganawn, la kasha ni galaw ai bungli ni galaw, U gap, Numda shachyen, mahkam hkam re mu ni galaw ai. Lani mi gaw ngai hta sak shi jan ning gaba ai Gareng Lu ngai hpe U sa woi gap ai, ngai gaw shi gap jahkrat dat ai u numji sha hkan hta la la rai Ndup jinghkang du saga ai, Maibau maling hkan hkawm nga yang me lahpra sawk sawk nga shara ai de yu dat yang, Sawoi gaba langai mi hkawm nga ai.
Gareng Lu lahpaw htingkaw hte an hpe hkrit kajawng nna gumdin chyai mat wa nga ai Sawoi hpe hkan shachyut adup mana la nna nta de pawn wa nhtawm, anhte nta de wa nna, mare na shabrang ni hpe shaga la rai woi hpya sha sai. U sa gap ai ngu yang Sawoi pyi mu adup la ai kaw nna, ngai gaw jaugawng pyi tai mayu wa sai hta n ga, Gareng Lu hte hkawm mayu ai myit gaju galim she nga taw nga yang she, lana de mi Gareng Lu Adoi hpe Ndup jinghkang de Nga wa tam saga nga nna sa saw ai. Ngai mung hkan nang na ngu nna Nyi ba ni a nta ndaw kaw du hkra hkan ganan jang, Doi gaw ngai hpe lam nlu hkawm ai hkum hkan nang nga asawng u ai, rai tim ngai ningshe shanang ai majaw, ka- wa lasik hta la nna lahkap hku she rawn hkra gabat tawn tim, shingna lu sha jang grau nhkan nang nlawt rai sai. Shaloi Gareng Lu matsan nhten yu dum sam sai, ra mi hkan nang u ga nga nna woi mat wa sai. Nga ni gaw Ndup jinghkang kaw nna Sharaw bum de rai mat ai lagaw hka hka mat wa ai sa mu nna, anhte mung Sharaw bum de hkan mat wa saga ai. Ningsin sin nna hkra laman pyi grai gabrim ai she mu hkra rai tim Nga ni nam mali de shang mat nna nlu tam gau wa sai. Sharaw bum hkan gaw nam grai laja ai shara rai nna, ngai gaw nau kaji ai majaw, nam lap ndung myi man hkan hkrai gabat nna, lam nmu hkraw sai. Sharaw bum kaw nna Senghkawng bum de bai du sai, nam chyingbat nna lam nlu hkawm jang Doi ngai hpe lam hkawm nchyang ai nga nna htu dingsa dat dat rai u ai.
Gareng Lu gaw ngai hpe matsan dum sam ai, Senghkawng gadawng yu wa ai hte hta ba kau u ai. Shi a shingma ntsa kaw nna tsan tsan de yu dat yang, grai tsan ai de wan gachyi chyi law ai tu nna: "Buk lu, le ra wan tu ai zawn re gaw pasu ni mang tam sha hkawm ai rai jaw ai i?" ngu san ni ai, gaba ai ni tsun dan ai, pasu nat gaw shana myi gaba shatu tawn nna lupba kawng hkan mang hkan tam sha sha re nga nna ngai myit du sai. Shi tsun ai: Layang ga de masha ni dat wan shatu ai re da. Loi ni ai kaw wan tu ai bai mu nna le ra mung datwan tu ai re ni ngu jang, Doi gaw nta na wan mang e chyi ai wan rai nga ai nmu i nga nna gajet dat sai. Nta du wa yang, Nga nlu gau wa ai gaw ngai hkan nang nna rai nga ai nga nha, nu yan wa grai hkap daru ma ai. Rai tim ngai sa mayu ai de lu sa sai majaw myit pyaw si nga ai. Shat sha ngut ai hte, Gareng Lu nta wa hkyem ai hte ngai bai hkan ganan sai, shaloi nta ting ngai hpe yup tung tung sayang mug htingbu nta sa na sha anga nga ai, shingna hpyi ai rai sai nga nna da- ru let nsa shangun masai. Rai tim hkan mayu ai myit gaw n ji n gu gaya gayau, lagaw lahpan kaw byet rawng ai gaw hpang lam she rai sai. Gareng Lu tawm re hte, ngai mung kawa wuhpreng chyinghka hku matep pru mat wa se ai.
Wa gaw dawdap kaw pali shit nga let: "Ma Bawk dai gaw shana yuptung yuphkawng rai wa nga yang me htingbu nta sha asa mayu ai nga gaw, Sharaw tai wa kun, Hkan tai wa ai rai kun, le nut mu! Nga nna amying jaw dat sai, shaloi she nu pali lapu magra lang nna ngai hpe lakang baw kaw hkan gabat u ai. Nu a shingna ma- rang htu bun ai zawn nga hkra hkum kaw hkrat bun tim ngai gaw nlu sa n lawt, lakang kaw hkrat si ntsang gawngleng mat wa ai, wudang lapran hku bai matep pru wa nna maling htinggrum gata na hka lu lam hku gumtawng mat wa ni ai. Gareng ni a nta gaw anhte nta hte hka lu hkaraw mi din hkat ai, ngai Gareng Lu hte chyahkring mi sa lu dung la jang she myit pyaw mat nna, nta de lawan wan bai nhtang wa se ai. Dai shana, ngai gaw shani tup myit shadang la lu sai majaw, grai myit dik mat nna, nta masha ni ngai hpe ga- ning nga nna pawt tim, shanhte pawt ai ga gaw pai na hku shang hkra na hku bai pru mat rai mat sai.
WA HKALI
Ba gaw tingbu nta na num la ai re, num nnan jan num brau brau mat ai majaw num dai hpe bai jahka kau re hpang, mayu gumgai gaw anhte hte n ja n hpra rai naw ganawn nga ai. Bai anhte nta ni mung mayu dama ntai mat tim mayu dama zawn di sha nga nga ga ai hte maren, shawa bungli sa mat, gat sa mat rai jang, Nyi ba gaw an- nau ni hpe shanhte nta na wa yaw shangun ngun rai u ai. Nyi ba ni nta anhte nta chyahpung kaw sha re, n ta htamung kaw nna hprawt Wura kawa, Maihtawg kawa, Wulaw kawa ni tu ai sha nrai, hpun gaba htinggrum ai majaw jau kaw nna Jan pyi nmai hkra re gadawng hpat wat kaw rai nga ai. Shana de Wa wa shalum yaw ya rai yang, shani loi mi gasup ma nna jan du mat, shingnrai nta na shawng yaw nga rai ningsin jasin kau jang, ngai gaw maling de hkan sharaw ni hpe jah- krit ai ngu, kawa dumsu dum shangoi, ngai nau Ji Bu hpe gaw wa shat di de wan lawan wut shagrung shangun rai, wa shat lu shalum jaw kau da ai hte, nta de lahpan pyi ga de galoi nhkrat ai, kara htamlap ai sha mu hkra hprawng yu wa wa rai ga ai. Lani mi marang grai kasha nna, Nyi ba ni a wa shawng wa shalum yaw ya ga ngu nna lung wa yang, wa ni gaw gashung nna lakang pawt kaw jawm apawm yup taw nga ma ai.
Ji Bu hte an wa kasha ni wa ganu kaw chyu chyu dumbang re yu masa nna chyan yu yang, wa hkalung ni a hkum ting Wa hkali ni kan gaw gapaw ga na daram ram hkru hkra, machyit marut gawa jung taw nga ai hpe masin yu pawt nna, rim din sat kau ngu yang dang na ntai rai, ngai ji Bu hpe tsun ai: An chyau labu palawng raw kau nna wa tsip wa hkali hpe an a hkum kaw shakap la nna hka singgat kaw sa agre sat kau ga ngu jang, Ji Bu grai sharawng ai hku palawng raw bang wa sai. An wa tsip de shanyen bang wa jang, wa yan nu ni nyut shalu let npu de rawt hkawm mat masai. Annau a labu pal- awng nkap sai hkum krin kaw Wa hkali ni gabu gara hte, kagyin kayang ni zawn rai hkra hkawm gasu lung wa sai. Wahkali ni du yang du lung wa jang, annau hka sing- gat gata de kagat hkrat wa nna, Wa hkali hpe marit sat ai ngu, gashung ntsang gah- krang nga saga ai. Hka kaw gashin kau kau rai sai ngu tim kara gata hkan makoi rawng ai Wa hkali ni gaw shana tup annau hpe matai htang nna gawa dingsa ai yup she nmai hkra rai nga ai. Ginhtawng ta du jang Nyi ba ni wa sat ai shaloi, annau ni hpe wa yaw ya ai nga nna wa magyi mi sa hpai ya ma ai. Dai mu sau ai wa shan lu sha jang, annau ni gaw Nyi ba ni a wa yaw ya na matu grai kam si nga ga ai.
SHARAW GRAWT AI
Nu gaw annau ni grau kyet wa na ma- tu, sun chye yang mung marai mi alawk lawk di garan tawn ya nna chye shangun, hkai hkai ai shaloi mung san san di hkai ya rai, annau ni mu galaw n gun grai lu ga ai. Dai sha n rai, U Wa yaw tim, marai mi a gade re, gara madaw re garan madun tawn ya nna yaw shangun ngun rai, mu galaw n gun grai lu ai hta n ga, madu a numhkau rai hpe ganing di yang grau gaja na hpaji myit shapraw chye la lu nga ga ai. Laning mi na mangai ten lau du wa ningtawn e, nta na Wa ganu kasha shi jan ting hkai tawn ai, shaloi nu anhte hpe Wa kasha ni hpe ma- dun let gara gaw kadai a matu re nga nna hparan ya u ai. Ngai na gaw wa ka kasha langai mi re. Ngai gaw wa ka kasha langai sha lawm yang ngai lu madu nna grai gabu let, wa yaw ten shagu shat di na shat loimi gamai la, hkangwi shadung sha magra bang di nna wa kasha hpe kawa wa-kang kasha langai kaw laksan sin jaw jaw di jang, wa ka kasha gaw ganu a chyu lu chyu ai kaw ngai jaw ai shat bai sha jat rai grai bawng tsawm wa sai. Myit e sha ngai yaw ai wa ngai nau ni a hta grau gaba tsawm nga ai, kan pyi pung pung rai hkra hpum wa sai ngu lagu gabu taw nga ni ai. Lana de mi hta, lamu loi mi mung mung nga nna, wa ni hpe wa shat n htung pyi adit baw kau na daram adawk dum nna shaga jang, wa ganu hte kasha nkau mi gaw nsa hte hawk kagat wa mara ai.
Rai yang ngai a wa ka kasha niawm pru wa nna, hka hku de naw sa tam na matu, jan bai du mat rai nsa tam lu sai. Myit grai npyaw let wa ka kasha galoi wa wa wa ngu nta npu de sharat hkrai madat nna ningsin jasin la sai. Shana gaba ai ni hpe wa nwa ai lam ni naw tsun dan nga yang, Hkalu lam de Sharaw grut ai awum nga jang she, wa gaw Sharaw nta makau de nsa wa na matu, lah- kam hkun dang pyi n ga gaba ai bau la hpe lamu pyi ganan hkra dum awut dat jang she, Sharaw grut ai nsen n na mat sai. Hpang jahpawt shan jau gawng rai nga ai Ba sanat hpai nna Sharaw grut ai Hka hku de lung yu yang she, wa kasha hpe rim sha kau ai sai taw ai wa mu sai nga nna wa tsun dan ai shani kaw nna, ngai gaw Wa yaw na lam n myit mada mat sai. Teng sha dai shani kaw nna wa yaw ai lam hpe nye myit hta galang pyi n ningtsing mat yu sai.
HKA HPUNG YAWT NAWNG HTU AI
Anhte Muwa hka gahtawng mare htum- pa dingda maga de Muwa hka lwi ai. Hka dai ramdaw gaba nna hkatsu chyahkan grai rawng ai, hka kau hkan gaw hka kashun hte walai palun ni mung grai masa nna, anhte ma ni shani hkan hkatsu chyahkan sa hkwi, kashun makru daw, walai palun ni sa di chyai rai ga ai, lani mi gaw Gareng kasha ni, Sumdu kasha ni, Nhpau kasha ni annau ni hpe sa saw nna, anhte nang Muwa hka de hkatsu sa hkwi ai shana, ang shaa Sumdu Hkawn Shawng machyi gahprup si mat ai kaw nna, gaba ai ni gaw anhte hpe Muwa hka de Jahtung nat ja ai nga nna nsa shangun mat masai. Anhte mung sha- ni shana ganawn nga ai Hkawn Shawng si mat ai kaw nna, Muwa hka de Jahtung nat nga ai lam hpe teng sha kamsham saga ai. Hka shala mayu ai myit makru gaw nmai daw kau ang ai, ngai gaw sun kindit kaw nhkun htu la nna singgat hka shalen bang tawn nna hka hpungyawt nawng galaw tawn sai. Jan du wa mahka yawng me ndaw de: "Sa- wa hkrai chyip hkrai mak ni, hka singgat gaw nanhte a abaw ngu nna dawm kau mu ni! Nye htau gumpye kau na yaw!" nga nna, hkyi pyi lalam mi dang shaw na zawn nga hkra matsa nga ai. Shi gaw anhte nta ni a hka singgat sha jau nna nga ai Sumdu wa rai nga ai. Shi a galu gaba atu asan re hkrang man hpe yu yang manang hpe ga n kaja ai hte chye matsa na zawn gaw nrai ai, rai tim kasha ni hpe pawt wa jang gahtam sat na, gamai dagup kau na, htau gumpye kau na, dumhpyawt kau na, azat mani kau na, gap shajoi kau na nga ai krai htep rai nna, ngai mung hpa zawn n nawn ya we ai, hka singgat naw sa shalai ya n ga ngu pru wa yang, shi hkrai matsa mawa ga hte shalai la nna angun mat wa nu ai.
Ngai hkrai sha Sumdu wa shanhte a hka singgat htan la kau ya ai hta grau hkra wa matsa ai hpe grai ngwi let, wa shat dap kaw Lahkrang lap wa shat mawt dung nga yang, madu jan bai shang wa sai. Shi dawdap de wa lai dung nna, "Abawk, ngai hpe nawhpu naw shap jaw rit." Nga nna hpyi u ai. Ngai masin gabrawng sai, shi gaw an- nau ni krai nga tim, gaba ai ni nga tim, loi hkring ai nawhpu hkranghkri ni hpyi, wa sau hpyi, n gu hkoi, sun de si mai wa di sha, Nai sam lap wa shat di la re gaw hti pyi ndang kra rai nga ai majaw, dai shana de madu wa ngai hpe matsa ai majaw ngai nau pawt mayu nna, ngai mawt nga ai Lah- krang lap hpe Lahkrang lap hte matep la nna sa ya jang, shi hpaw yu nna naw hpu nrai jang ngai pe grai pawt kau nu ai. Dai shani byin ai mu lam lahkawng hpe shanla lahkawng shana nu ni wa jang majawng majat ngu wa tsun dan nna, nta ting ngai hpe gasup ntsawm ai, myit n rawng ai, akyang nhtuk ai, ndai mate sha naw law kaw nna maka nkap ai mu chye galaw ai nga nna, daru nga masai. Nu ni gaw annau ni masha ni hte gasup ahkawk ahkak rai nna ma ni gaba ai ni hpe ashi tsun rai, gaba ai ni shada sa san hkat rai yang mung, an- nau ni nra tim annau ni rai sai nga nna yin la nna, masha ni a man e annau ni pe chyu daru, lai jang gaw annau ni hpe mara shawng yin la chye ai ni she mara nlu ai nga nna bai tsun shadum rai ma ai.
Nu yan wa annau ni hpe matsa mawa ga hte nsharin shaga yu ai rai nna, Sumdu wa e ngai hpe wa matsa ai ga gaw htingbu Dashi gumgai e wa hpe bai tsun dat rai, wa ram ram yawn mat sai, "Ma ndai gaw Maji wa-hpai htu wa byin na hkyem ai kun?" nga nna nu hte tsun hkat let, kaga de htawt nga mat wa na hku tsun ma ai. Maji wa - hpai Htu ngu ai gaw ganing re masha re ngai nchye ai, ya maning moin- ing she Maji labau ka na wa mi gazik nna san yu yang, Maji wa-hpai Htu ngu ai jan gaw shi hpe num nkam wa ai kaw shagwi nna, wa zawn di hpai hkungran la kau shangun ai re, dai majaw shi nau pawt mayu nna ma pyi lu ai hpang she mayu dama la- pran sumprat dat nna mayu ni hpe ndum shami kaw wa gasat shamyit kau dat ai, la kasha langai mi chyu sha num langai mi ba nga ai kaw, num dai hpe gatawng kau dat ai rai yang, wa-kang kaw gadang bang mat wa nna lawt ai kaw na nli ni re nga na hkai dan ma ai. NTA HTAWT AI Sumdu wa ngai hpe matsa ai ga ni hpe wa gade nna ra ai re pyi nchye sai, nu yan bahte shanhte hkrai Wulawng kawng de nta galaw ai nga, jahpawt jau kaw nna rai mat wa ai, shana ningsin lup kaw she wa wa rai ma ai.
Htingra ta na lani mi hta, annau ni hpe nta htawt mat wa saga nga, hpun nba di hka wan woi baw gun rai n ta n nan de woi mat wa masai, nta nnan dap masum re ga n ta rai nga ai. Nta nan kaw du sai majaw, annau ni shara magup hkan yu chyai hkawm yang, chyahpung ma- ga de gaw hkinggau nten rai, shachyang maga de gaw lai lam rai nna, lai lam lawu de gaw hkaraw langai bai rai sai, makau grup yin hkan gaw Shangu dan rai nna, shangu dan lapran hkan Lamai hpun gaman ze rai, Lamai si ni nnan sha si machyut wa nga ai, gasup shara nnga rai chyahkring mi sa gawam la nna nhku de shang wa yang, shat di dun tawn ai kra gata na wan lap gaw shat hkut sha na krit ai zawn, wan lap aga de apyet let chi taw nga ai, nu gaw wa hpe ndai zawn san ai, shat pyi nmai shadu sha ai de me nta sa woi galaw rawng ai nga let, ndi mala hpun nba ni bai baw gun nna nta dingsa de woi mat wa u ai, wa ga- ning nchye di mat sai majaw, nhtung na ntsin hte wan mang sha galaw ru sat kau da rai, dumhpau sanat nhpye n gang hta hpye rai hkan nang wa mat nu ai.
SINGGYIN CHYALAM
Nta dingsa gaw galu galang rai nna tsaw ai, gata de Lagaw htum galaw tawn ai daw mi, gumra rawng ai daw mi, nga rawng ai daw mi, kumshu rin Lanyet shachyaw tawn ai daw mi, wa rawng ai daw mi rai nna, anhte gara yang nga chyai tim shara ntaw ai, dam gaba dik ai sun e, shachyang maga gaw Laubu chy- inghkrang, lasawn yawnswi, gaubawng pan soi ni majoi she sawng ai. sandu wandu ni anhte shang hkawm yang pyi nmu mat hkra tsaw ai she tu, gumhpan pawt hkan kumshu hkai tawn, htamung hkan gaw lap pyi Lagoi hpaw hta grau pa hkra re Malut ni tu, Lu- idwi hpun, Lwi hpawm hpun, Machyang hpun, Chyahkya hpun, Ndung hpun, Mali ka hpun, Sabyin hpun, Lagung hpun, Wa -dep langu, Langa nga-hkri, Maichyan ni tu kajang ai mayan mi, Naisam yi gaw ma lagaw hte rai nna rai kun, hkrang hkra hkawm na rai yang lahpawt mi re zawn nga hkra gaba ai. Sun nhpan gaw dingdung maga de Htingra praw hkai, sinna dingda ma- ga de Kadung nai hpun hkai, sinpraw maga de Htingra htoi hkai tawn ai kaw, Lwidwi hpun makau yang ma ni lung chyai na Lunghkrung gaba langai mung hpum ai, Hpundung gaba jung nna Kawa chyen hte bai da kau di kum tawn nna, nga gumra nlu shang ai shara rai nga ai.
Ndaw ya kaw tsing- du pa lanagai nga ai, dai tsingdu pa makau kaw mam dum langai bai galaw tawn rai nna, mamdum gata hkan U shingjat majoi mi galaw tawn ya ai hkan, U ni U di majoi mi di tawn tawn rai, ngai gaw wa shat shadu shagu U di hpe wa shat di kaw shadu bang tawn nna, wa shat gayau yaw jang U di bai shaw sha sha rai grai mu dum ai. Htingra ta rai nna chyahpung shachya hkan na Htingra pu pu an jang, U namji namchyoi ni ashoi rai sa chyu pyaw nga ma ai. Lana de mi gaw Doi Lahpaw lang nna Htingra byap de U sa madoi ai, Htingra byap kaw nna lai ai singgyin gaw lam dung law de labu gun kau nna hkum sa jasan nga ai Dashi Htoi a maidang kaw hpawk rai sai, Dashi Htoi pawt matsa ai: "Manang e lahpaw hte gap ai, ya, ngai hkawm ai lam hkawm, ngai hkrum ai yubak hkrum sha na law!" nga matsa ai ga hpe nu wa ni na pu sai, Doi hpe shawng ahkre kau da nna Dashi Htoi hpe bai sa tawngban rai kyin si nga masai. Mu lam dai ni pyi garai nzim yang, Htai hpyin jawng kaw jawng lu nga ai Bawk wa gaw, ta lahpum kaw sumpan hkye sha hkawn kau rai, mare na ramma ni hte dawnghkawn sha hpai kau rai Muwa hka de wanna, nat jaw nat ya, nawku kam sham lam wa dawm ai nga, anhte nta na laika hkum sumhpa ndaw ya kaw sa masawm nat kau, masha ni a nta gaw laika nnga ai, nat hkinrawng hkinri ni sa magawn nat kau ya rai ma ai.
Dai shani wa gaw Bawk wa hpe nmu shangun ai sha Chyum laika buk hte mah- kawn mangwi buk lahkawng lagu makoi tawn nna, shanhte rai mat wa jang, hkranghkri yam kaw bang nna, mahka de gaw bala satik hte bai magap nna gyit kau hkra di, mam dum na mam nka tawn ai pu gata kaw sa htu lup kau nu ai. Bai gumhpraw rai sumpum mi, shihkam baula kru, nri nhtu shabawn gaba 2, ri nawng nhtu mali manga mi, moi na magri dingsen sumrawn mi hpe gaw shawa de ap kau nga nna la shapraw tawn ai, gumh- praw rai hte bau chyu sha pai sha mat wa nna, nri nhtu ni, magri dingsen sumrawn ni gaw, annau ni mare na ma ni hte shat shadu chyai gat gat chai di jawm shala shama kau sai. Ri nhtu shabawn gaw htamung htamaw hkan ninghkan hkrai krai di gabai tawn kau sai. Laika shade mi kaw wa laika buk dai lahkawng sha lagu makoi la ai majaw, ngai gaw wa makoi tawn ai laika dai nhpa ka tawn ai lam chye mayu na, jawng lung na lam hpe shani shana tsun taw nga ni ai. Shaloi she gaba ai ni gaw jawng de galoi sa mayu yang galoi sa wa re baw nre ai, jawngma lah- kawn ten du jang she mai sa lung ai nga nna, ngai gaw jawngma galoi lahkawn na sha matang nga ni ai. Doi annau masha ni a gatsing galang nga ai matsa mawa ga lu sha ai pyi naw ma- sin machyi taw nga yang, Bawk wa e masha ni a nta nhku bai wa gashin ya re majaw, nu yan wa a masin ram ram hpawm mat ang sam sai, wa a nta htawt na myit galang bai gatu wa sai.
Lahpawt mi wa nu hpe mana ganing re yupmang mu n ni nga nna san yang, nu a yupmang ganing re mu ai gaw nchye kau ya sai, rai tim wa myi man nsam grai tsawm hkra tsun ai, wa du tsip mung tsip ai, nlung gaba langai mung hpum ai, nlung gata hku hka mung lwi ai nga nna tsun u ai. Dai hpang shani anhte nta ni wa yu da ai htingra nnan de sa yu ga ai. Shara dai gaw dingdung dingda sinna chyen de gaw bum rai nna, sinpraw hkran de gaw bum marawn dingyang nyem nyem rwi rai mat wa ai shara re. Dai nlung ntsa hkan di bu, nampan bu ni grai taw ai, dai hpe annau ni gaw nat ni lang ai rai ang ai ngu, nachye baw hte hpawk she di adup ga ga- mawng kau saga ai. Nta htingra dai htu hpang wa ai sha- ning na shata 9 hta, ngai gaw Htaihpyin gat de jawng lung mat wa ni ai rai.
