Anhte Jinghpaw Wunpawng myu sha ni gaw, moi chyaloi nkoi prat kaw nna mateng daini du hkra, tinang amyu a manu dan madum sumhpa lu ai amyu langai rai nga ga ai. Jinghpaw Wunpawng myu sha ni a madum sumhpa ni hta, ahku wo la nna dum shapyaw lang ai madum sumhpa ni gaw: Hturen, pyisun, pyiman, pyirun, pyihtawt, pyllang, larung, dumba ni rai nga ai. Madum sumhpa ndai ni gaw ya daini du hkra naw dum shapyaw lang nga ga ai. Rai yang, ndai madum sumhpa ni hta na hturen a labau gaw ram ram na galu nga ai. Ndai kaw ayawn maumui langai mi shawng jawm madat yu ga. Moi shawng de, Jinghpaw Wunpawng myu sha ni Majoi shingra bum lagaw daw naw nga ai prat hta, gahtawng langai mi gaw, Donda bum ngu ai sharaw grai ju ai shara kaw yi hkyen nna nga ma ai.
Dai aten hta Laya Tang Ji ngu ai Magawng La-sang gasha langai hte Hpungtsin Kai Li ngu ai Lahtaw shayi sha yan gaw, shan a shayi shadang shingyan bung, wunchyen amying mung hkrum re hte maren, shada grai ndi nhka rai nna tsawra hkat ma ai. Galang mi hta shan gaw Donda bum na yiwa kaw sa hkrum shaga chyai na hku, gadi ningdat tawn sai hte maren, Hpungtsin Kai Li gaw loi shawng nna sa du nhtawm, shi a tsawra wa Laya Tang Ji hpe la let, wa gata na krauda kaw dung nna, shi a ri kabang hpe krauda npu de gale tawn rai, ri ri dung nga sai. Shingrai shi ri ri dung nga ai tsawmra na ai hpang, sharaw rawngba langai mi gaw dai yiwa makau hku lai wa ang sai, kabang chyai wa wa re hpe mu nna, kabang chyai wa jang sa rim shala chyai ya ya re da, shaloi Hpungtsin Kai Li gaw, shi a tsawra wa shi hpe sa shala ai rai sam ai ngu nna, "Dai kaw ngai hpe hkum sa shala nga sa law, lau shang wa rit." ngu shaga dat u ai, shaloi sharaw gaw masha re chye nhtawm, galang ta htim shang wa nna, Laya Tang Ji a tsawra myit manawi jan Hpungtsin Kai Li hpe ga lahkun mi pyi n jahtau lu ai gawa sat kau nna, sai chyup sha nga sai.
Laya Tang Ji yiwa de sa wa yang, wan chyi ai mung n mu, sharat shara ai mung n na re majaw, shi a tsawra jan rai n sa wa ai kun ngu myit let, agatsi sha yiwa npu maga hku nna sa wa u ai. Shingrai yiwa kaw sa du yang, sharaw ningjap hkrai mawng nga manam nga la ai sha nrai, wa nhku na krauda npu de "Hpyek! Hpyek!" nga hkrat shara ai mi na nna, hpa baw rai kun ngu shi a nhtu ndung kaw lagrang lap di mara tawn in ja yu yang, shata jan mai ai re majaw, asai lui hkrat ai re hpe hkrak chye nu ai, shingrai yiwa npu hku nna atsawm chyan yu dat yang, sharaw mai kra nga ai hpe mu nu ai, dai shaloi, shi gaw amu pru sai re lam hpe hkrak chye nu ai. Shingrai shi gaw yi shingnawm na shaman gan shit la nna, sharaw mai hpe yiwa shadaw kaw lahkawng masum lang bat di shajup ahkang tawn nhtawm, yiwa nhku de lup rai shang wa nna sharaw hpe shang gahtam sat kau nu ai.
Shi a tsawra jan hpe lawan wan hta pawn yu yang, nsa n kap mat sai. Shingrai dai kaw nna Laya Tang Ji gaw hkrap chyu hkrap nna nga mat sai da, hpang jahpawt shi gaw yawn jin hkrap jin rai, shi a tsawra jan a hpun palawng hpe gaw sharaw hpe jahpun, sharaw hpyi gaw la nna shi a tsawra jan hpe jahpun da di nhtawm, yi makau na madang kawa kran la nna, hturen wawt hpai rai, shi a tsawra jan Hpungtsin Kai Li a gahtawng makau kaw wa dum sharung nga sai da, hturen ga hku nna: "Mare a shawa, ningtung a ningba ni e, Donda bum de gadai shum sa, ningba sharaw nga ai..." ngu nna wa sharung nga ai da. Mare masha ni mung "Ya wora zawn nga ai ayawn nsen wa mi anga ai gaw, ganing re kun, she sa yu ga." nga nna Donda bum yi shingnawm kaw sa du yang, sharaw mang langai taw nga la, masha mang langai taw nga la ai hpe sa mu masai.
Hpungtsin Kai Li a ganu gawa ni gaw gasha a hpun palawng shalaw nbang hpun sumra ai mang kaw sa hkrap nga, sharaw hpyi hpun ai mang kaw gaw gadai mung hkrit ai majaw n sa yu ma ai da. Jahtum e mang hpai na rai jang she hpo yu yang, gasha a hpun palawng hpun ai gaw sharaw mahtang rai nga la, bai gasha gaw sharaw hpyi hpun nga la re da. Dai majaw, mateng dani du, masha si yang gaw yawng yawng hkrit, sharaw lu gap ai nga jang yawng yu mayu re gaw dai shani kaw nna hpang wa sai. Hpa majaw nga yang, masha gaw sharaw hpyi hpun mat, sharaw gaw masha hpun palawng hpun re majaw re nga ma ai. Yawn hkyen maumui ndai pru ai shani kaw nna ya daini du hkra, shana nsin sin jang nta shinggan hkan kabang n lang ai ga madat nga ai. Lagrang lap asai zawn re kap ai mung dai shani Hpungtsin Kai Li a hkum na sai gahte hkra nna byin ai re nga ai majaw shawng de gadai simai n shatai ai.
Madang hturen ngu ai mung dai shani Laya Tang Ji ayawn hkrum nna dum sharung ai kaw nna chye dum hpang wa ai re nga tsun hkai ma ai. Ya daini, Hturen a labau hpe tsun ga nga yang, moi shaning hkying gade ning a shawng prat hta, anhte a jiwoi jiwa ni gaw kawa hte sha chye galaw lang ai nrai, hpri magri lungseng ni hte mung galaw lang chye nna grai manu shadan lai wa sai da nga nna sara gaba Htoi Man a ginru ginsa labau laika buk hta mu chye lu nga ai. Daini na prat hta anhte myu sha ni lang nga ai hturen gaw, myu hpan lahkawng hku nna galaw lang nga ai hpe mu lu nga ai. Myu hpan mi gaw, greng ja ai laman pyawn tsawm ai kawa ginsa hpe lamyi n lawm ai sha gade nde hkrawt shara kau nna laman gaang kaw hku shajut waw la nna dum shapyaw lang nga ga ai.
Bai nna myu mi gaw, pyawn tsawm ai kawa laman galu hpe gaang ngu na kaw lahkawng hkrawng di daw la nna, hkra maga ngu na daw a matu kaw gaw nhtu nshi hte hka kau nna bai matut shachyaw dum lang nga ga ai. Ndai hturen hpe moi na ni gaw, Laya Tang Ji ayawn hkrum nna ayawn nsen hku dum ai re majaw, mare gata e gadai n dum ai, u gawn machya hte yi sa yi wa, shing nrai nga rem brang ni nga rem sa ai dabang hkan marit shingni mi alu nga dum shapyaw chye nga ai. Bai nna mahkawn shabrang ni sumtsaw sumra lam tsun jahta ai lachyum mung rawng nga ai. Ya prat hta, hturen hpe shawng de na zawn re sadi sahka ai lam n nga mat sai, hpawng shingra, gabu hpa poi, gaji gaba yu-ngui punra hta dum shapyaw lang nga ga ai, shi a madum nsen law malaw hku mai dum ai re majaw, anhte Jinghpaw Wunpawng myu sha ni yawng ra sharawng ai sha nrai, kaga amyu ni du hkra na ra sharawng ai madum sumhpa nan rai nga mali ai.
Sok ka lajang ai: Nhkum Hkawn Bok, Htoi Man
