MAGUN SHATLIT GAW LACHYUM AMYU MYU LAWM

MAGUN SHATLIT GAW LACHYUM AMYU MYU LAWM

Shanghting Tang (Tsinglap matu na Numri Shingtai)

Moi shawng de, Manmaw Ginwang kata kaw Lana Ga, Hpunggan Ga, Lahtaw Ga nga nna Du Magam masum up sha lai wa sai. Lana Du ni uphkang ai ginra ni gaw Kai Htik kaw nna Lana Laika Ga, Bang Htan; ndai shara ni uphkang ma ai. Kai Htik a lahta, Lahtaw Hka Pra lahta de gaw, Lahtaw Du ni uphkang ginra rai nna, Dingsing Pa kaw nna Gat Rawn de gaw Hpunggan Du ni uphkang let jawm nga mu ai. Dai ten hta, Lahtaw Du Kasha hpe Lana Du ni Mayu shatai nna la ma ai nga ma ai.

Dai shaloi, kasha masum rai hkra atsawm sha jawm nga ai ten Ningrum Ningtau Maduwa n nga mat ai da. Dai hpang, kasha masum hte yi galaw nna bau maka nga ai ten, dum nta hpe galaw la na matu hpun, kawa ngau shaw da yang hpang jahpawt sa yu yang, ngau hpai nhtang kau ya ya rai ai majaw, nta galaw la na grai yak mat wa ma ai da. Dai majaw, Lahtaw Du kasha wa gaw mayu ni kaw nlung nnan wa jaw shagu hta, kagu ni hpe tsun yang sharu sa htu ya ai hte, tsa lit kaw sharu chyen myi brak rai gaq nna lit kaw bang gun jaw jaw re da. Dai majaw mayu Du ni gaw mayu ga wa yang, sharu chyen n mu yu ai majaw kajan kamoi ni hpe hpa jaw na mung n chye, mau mat ma ai. Manu dan ai sharung ja rai ni jaw tim, hpa sharung mung n hta la rai sha, wa mat re da. Dai majaw, mali, manga ning naq wa yang, Lahtaw Du myitsu kaji ni hpe shaga la nna hpaji san ma ai. Dai ni mung sawn n ma ai majaw, dai kajan kasha wa hpe sha shaga la nna jawm san yu ma ai.

Dai shaloi, kajan wa tsun wa ai hta, “dum nta galaw na shara pyi annu ni n lu ga ai, ngau shaw da yang mung ngau hpai nhtang kau ya ya re majaw annu ni galaw lu galaw sha shara pyi n lu ga ai” ngu nna tsun ai. Shaloi, Lahtaw Du ni a lamu ga shara ya “Nba Kawng” ngu ai shara hpe garan jaw ma ai da. Nba Kawng lamuga gaw, Lana Ga nga ma ai. Dai Nba Kawng kaw nga ai shaloi, galaw sha shara gyip wa ai majaw, mayu ni kaw yi hkyen sha na matu, lamuga bai hpyi nna Man Nawng Kawng ngu ai shara hpe yi hkyen sha na matu jaw ma ai. Dai kaw yitnawng nawng nna Lana Ga de lawm mat ai re. Nba Kawng ginra hpe moi gaw Sharu Chyen Ga mung nga ma ai da. Kamoi kajan a gasi a majaw lamuga ginra du hkra, jaw ya nna jawm zinlum ai gaw sai langai sha re ai majaw re.