DU SHAYI MASU LA KAU SAI
MAUMWI HKAI AI:DAU NYI
KA LAJANG AI:HTU LUNG
Nmut ta na lahpawt mi hta, bum du wa gaw Nang Bya masu sha ai lam na la lu nna, grai na mau nga u ai. Shing rai nna shi gaw Nang Bya ngu ai wa gara daram wa nan chye masu sha nga ai kun ngu chyam yu mayu nna, shi a shangun ma ni hpe dai masu sha chye la ai Nang Bya hpe sa tam wa yu marit ngu shangun kau dat nu ai. Shangun ma dai ni gaw dai shaloi jang, Nang Bya hpe sa tam mat wa masai. Nang Bya a nta kaw sa du ai shaloi, shangun ma langai wa Nang Bya hpe tsun ai: "Nang Bya, du wa da nga yang, du nta de sa wa yu na da! " Nang Bya htan ai: "Ngai hpa amu mung nshut yu ungai, hpa majaw du ni nta de sa wa na re ta?" "Hpa baw amu shut nshut hte nseng ai, nang hpe sa wa ngu jang sa wa jang rai sai, hpa ga gaji ntsun taw nga ra sai. " du wa a shangun ma ni grai rai dum ai hte tsun ai. "Shing nga jang gaw, nanhte shawng naw wa magang mu, ngai ya hkan nang na. "Nang Bya shanhte hpe tsun ai. Raitim, shanhte nhkraw ai majaw, Nang Bya gaw shanhte hte rau rai mat wa nu ai. Shanhte nlang du nta kaw du wa manu ai. Du wa Nang Bya hpe mu ai hte san ai: "Nang gaw Nang Bya ngu ai wa rai nga nni?" Nang Bya htan ai: "Ngai gaw Nang Bya rai nga nngai. " "Nang grai chye masu ai re nga ai nre ni? Hkrak sha grai chye masu ndai i?" du wa gaw aning anaw ngu nna san yu da nu ai. "Nre law, du wa e. ' "Nang Bya tsun ai. Shaloi du wa gaw: "Daini nang hpe sa saw wa shangun ai lachyum gaw, nang shade wa chye masu ai rai yang, ngại hpe mung masu yu rit ngu ai re.
Gara hku?Masu lu na yi, kun n masu lu na yi?"Du wa gaw Nang Bya hpe yu nna, Nang Bya ndai ganing nga tim shi zawn re bum du wa hpe gaw nlu masu na re ngu myit let, Nang Bya hpe san shati nga nu ai. Shaloi Nang Bya htan ai: "Ngai du wa hpe nmasu lu ai. " Du wa Nang Bya hpe tsun ai: "Bai daini nang ngai hpe gaja wa masu lu tim n masu lu tim masu ra ai, n masu nmai nan re! " Shaloi Nang Bya gaw du wa e ngai gaja sha wa nang hpe nmai masu ai law bai ngu nu ai. Shaloi du wa gaw, masin sha lun ngu na, masu lu na gaw nrai re mi ngu ai myit nna aga gaba dat dat nu ai: "Nang ngai hpe lu masu sha jang, ndai nye tsaw ra ai shayi sha nang hpe ya sha kau na. "Du wa gaw shi makau kaw nga nga ai shi a tsawm la ai shayi sha hpe madun nna tsun u ai. Raitim, Nang Bya gaw: "Du wa e, ngai gaja sha wa nang hpe n masu lu ngai law. "Ngu grai hpyi nyem nga u ai. Masu rit ngu nga yang me n masu ai chyu anga taw nga ai majaw, du wa mung grai pawt mayu wa nu ai rai nna: "Nang dai zawn nye aming hpe ninghkap na, ngai hpe galang mi pyi n masu jang gaw, nang nta nmai wa ai, ndai nye nta kaw bungli alaga laning mi galaw jaw ra ai! "du wa jahkrit dat sai. "Nmai na re law, du wa e, ngai nta kaw sak matsat shi jan du sai nu gumgai sha nga ai, lama ngai na nta kaw laning mi ting amu galaw jaw mat jang gaw, nye nu hpe kadai n yu ya sai law. " Nang Bya gaw ta hte lang rai ningdang taw nga sai. Du wa tsun ai: "Nta kaw kadai nga tim nmai byin ai, nye aga madat ra ai! " Nang Bya gaw dai shaloi she: "Du wa e, nang dai zawn nga nna, ngai hpe gaja wa masu shangun mayu jang, gaw, ngai hpe nta naw wa shangun rit. "
Nang Bya du wa kaw hpyi nyem u ai. "Hpa majaw nta wa na nu ta?" du wa san ai. "Dai hpawt na a shangun ma ni ngai hpe sa shaga ai shaloi, shanhte ngai hpe hpa majaw sa shaga ai lam ntsun dan ai majaw, ngai nye masu ndum mung nhta gun ai she hkan nang mat wa kau ni ai, shingrai nna du wa nang hpe masu na rai jang, ngai nta de nye masu ndum naw wa la na, masu ndum lu jang she, du wa nang hpe mai masu ai gaw e. "Nang Bya grai wa mi la re ai zawn nga hkra tsun dan nga u ai. Du wa tsun ai: "Mai sa rang, lawan wa la nna lawan wan bai sa wa rit, ngai la nga na! " Du wa a ga lu ai hte Nang Bya gaw shi nta de tung tung wa mat nu ai. Du wa bai rai jang gaw Nang Bya galoi wa she sa wa wa ngu nna la taw nga, shi a myit hta Nang Bya ganing di wa sa masu na nu ai kun ngu myit let la taw nga sai. Shi gaw U hku a masa si la hku la chyu la dingda nga nu ai. Raitim, Nang Bya gaw mye sha rai mat sai, aten pyi masum mali ya lai mat wa satim Nang Bya mi n gale pru sai, shaloi, du wa gaw dai zawn san ai Nang Bya e sha wa mi shi zawn re bum du wa hpe masu sha kau da nna, mye rai mat ai gaw ahtung pyi n nga ai, nau wa ladu lai hpyau sai ngu nna myit yu magang masin shin shin nga pawt mayu wa ai hte, Nang Bya dai gaw gaja wa nkam hkrung mat sai she rai ang sam sai ngu nna, shi shangun ma ni hpe Nang Bya a nta de Nang Bya pe sa tam rim wa na hku shangun kau dat nu ai.
Du wa a shangun ma ni Nang Bya a nta kaw sa du yang, Nang Bya gaw lamu shaming sha rai na nga nga ai hpe sa mu nna, shangun ma langai wa shawng Nang Bya hpe san ai: "Nang Bya, nang gaw nkam hkrung sai wa mahkoi rai nta?Du wa hpe mung masu gwi re gaw! Du wa da nga yang shi kaw sa wa yu na re da! " Shaloi Nang Bya gaw hpa ra ai zawn nrai ai nga taw nga ai majaw, du wa a shangun ma ni grai nan pawt mayu nga ma ai. Shangun ma langai wa Nang Bya hpe wa yu gaya si wa nna bai pawt dat ai: "nang ya mung dai kaw lamu shaming sha rai nna naw nga taw nga i? Ya lawan hkawm nu le. . . "Du wa a shangun ma ni shadut jahkat ngu si wa manu ai. Nang Bya gaw du wa a shangun ma ni gade wa shadut jahkat nga tim, gachyi mi pyi hkrit gamin ai lam nnga ai sha tsun ai: "Manang ni e, ya daini ngai kumhpa garai lu ai, ya na gat shani she gat de chyaru re sa mari la nna, du shayi sa hpyi na hkyem nga nngai, nante du wa hpe garai hkum tin na da ngu nna naw wa tsun masu. " Du wa a shangun ma ni gaw grai na pawt mayu nna wajen dat ai: "Nang sak pyi htum wa nga da nna, dai zawn sha naw anga nga yi? Lau hkawm u! " Nang Bya bai tsun ai: "Nanhte hpa aga kaga ntsun ra sai, ngai du shayi la nla gaw du wa chye na re, nanhte nkam yang gaw du wa hpe san yu jang chye na re. " Du wa a shangun ma ni gaw Nang Bya hpe nlu tsun dang ai majaw, Nang Bya hpe mung nrim gwi rai, ganing nchye di nna tung tung bai nhtang mat wa manu ai. Du wa a shangun ma ni nta du wa nna, Nang Bya ganing ganing nga dat ai aga ni du wa hpe wa tsun dan jang she, du wa gaw Nang Bya e masu sha kau sai re chye nna, shi tsun shut kau ai aga hpe shabai la nlu mat nu ai majaw, shi a tsawm la ai shayi sha hpe Nang Bya hpe jaw ya kau nu ai rai.
