CHYAMANG KABRANG
MAUMWI HKAI AI: DAU NI,
KA LAJANG AI:HTU LUNG
Masu ka Gam wa gaw masu mung grai chye masu sha ai hta n-ga, sun kum, mam nka wa, shingnoi singga wa rai, ta mu mung grai naw chye galaw nga u ai. Shi gaw ta bungli kyin ai wa rai nna galoi mung shinggan ngu ai nau npru hkawm ai nta kaw sha chyu up rawng nga da nu ai. Masu ka Naw wa bai rai jang gaw shani shana mare hkan hkrai masu ahpyawp sha hkem nna nta ngu ai kaw gaw nau nnga ai wa rai nga u ai. Lani mi hta, masu ka Naw wa gaw shara magup lam hkawm ai ngu yang masu ka Gam a nta hku lai ang nna nta nga nga ai masu ka Gam wa hpe sa mu nna san ai: "Eh, kau e, nang gaw hpa rai nta kaw nga nga nta?" Masu ka Gam wa htan ai: "Ya hte myit npyaw nna nta nga nga nngai law. " "Hpa majaw myit npyaw nta?" Masu ka Naw wa gaw loi na mau nna san sai. "Eh e, du wa shi a tsawm htap shayi sha hpe jaw ya kau na, jan garai npru yang sa hprawn la nga ai majaw, myit yak nga nngai law. "Masu ka Gam gaw masu ka Naw wa hpe yu yu nna, "Hkau nang gaw hpa rai nna ndai hkan du hkawm nga nta?" Ngu bai san nu ai. Masu ka Naw wa bai tsun ai: "Yahte gaw grai nga yak nna, yup nmu sha nmu rai nga nngai, dai rai nna shinggan hkan shalan hkawm ai wa rai nngai law. " "Hpa majaw nga yak nta?"Masu ka Gam wa san ai. "Hpa rai nna wa rai na law we, ngai ya hte n-gyin yi chye ai kaw wa she aja dibu mi lu htu shapraw la nna, ganang makoi yang she mai na re nchye mat ai majaw myit law hkawm nga nngai law. "Masu ka Naw wa htan ai.
Masu ka Gam wa gaw aja dai hpe ra mayu si wa nna tsun ai: "Na a ja dibu dai gaw le nye asun kaw na mali ka hpun nhpang hta sa lup tawn da su, dai kaw gaw kawa numhpang mi mung tu shingga re majaw, masha ni gadai mung nmu lu ai, dai kaw lup tawn yang grai hkrak sai. " Masu ka Naw wa bai rai jang gaw Num ra mayu nna, "Hkau e, ngai nta kaw nu gumgai chyu sha nga ai, shi hpe shat shadu jaw na masha mung nnga re majaw, ngai anum langai lu hkungran la yang grai mai na wa, law an chyawm gaw dai nye aja dibu mi hte nang a du shayi galai la ga, nmai yi?" ngu san nu ai. Masu ka Gam wa gaw shi pyi aja ganang nsa tam la si nga yang, aja dibu mi ting lu na tai ai majaw mana maka na gabu ai hte "She nmai u ga e. " ngu hkraw ya nu ai. Shingrai masu ka Naw wa gaw dibu langai sa la wa nna, masu ka Gam wa a sun htumpa na mali ka hpun nhpang hta sa lup tawn da ya nu ai. Dibu lup ai shaloi, masu ka Naw gaw masu ka Gam wa hpe tsun ai: "Ya aja ndai hpe gaw Mali ka hpun apu pu, asi si ai shaloi sa htu la yang she aja kung ai, dai sha nrai yang aja nkung ai lu yaw"ngu u ai.
Masu ka Naw gaw "Aja" dibu htu lup bang kau da nna hkawm mat wa sai. Shi jan garai npru yang du ni nta kaw du shayi hpe hprawn la sa wa ai shaloi, du shayi hpe shi aja dibu mi hte galai la sai rai nngai ngu tsun jang, du nta ni gaw na pawt mayu ai hte na mau ai hte rai nna, num ya na gaw galaw shingga, sanat nhtu hte hkan shachyut shamawng kau dat ai hta n-ga, du ni hpe sa shut ai majaw, Nga mung langai mi shawa sha kau manu ai. Masu ka Naw wa gaw shawoi pyi shi she masha masu ga yang me daini gaw masha ni e masu sha kau ai hkrum sai re chye nna mana maka nrai dum ai hte pawt mayu ai hte rai, shi hpe masu sha kau ai masu ka Gam hpe naw wa lajang na ngu myit na, masu ka Gam a nta lam de tung tung sa wa sai. Masu ka Gam wa gaw gumhpraw nau ra mayu na, masu ka Naw wa tawm re hte Mali ka hpun nhpang na "Ja" dibu sa htu hpaw yu yang, hpa mung nrawng ai dibu gaman sha rai taw nga la ai majaw, masu sha hkrum sai re chye nna, shawoi pyi tinang she masha ni pe masu sha sha rai yang me, daini gaw masha ni tinang hpe asa masu sha ai gaw ngu pawt mayu si wa let, masu ka Naw hpe mu jang atsawm naw lajang na ngu nna naw pawt lawut bu nga yang she, masu ka Naw wa shi nta kaw du sa wa ra ai. Shan lahkawng shada mu hkat ai hte, gadai mung nang ngai hpe masu sha ndai nga nna pawt matsa hkat bang wa masai.
Masu ka Naw gaw masu ka Gam wa hpe nang ngai hpe num sa tau la nga masu ndai ngu sai;Masu ka Gam mung masu ka Naw hpe dibu gaman sa lup tawn da nna aja dibu mi re ngu masu ndai ngu rai, shan lahkawng shada ga-law shara kat taw nga masai. Masu ka Naw shawng masu ka Gam hpe ahkre dat nu ai: "Ngai nang hpe mali ka hpun pu pu, asi si ai shaloi she aja dibu dai sa mai htu la ai, dai nrai yang aja nkung ai ngu nna tsun dan shangai le, nang hpa majaw ngai tsun ai hku n-galaw ai ta?" "Hpa baw apu pu asi si jang sa htu shaw, dai dibu hta hpa mung nrawng ai, nang ngai hpe masu sha ai she rai nga ndai! "Masu ka Gam hkap hta dat nu ai. "Nang ngai hpe masu sha kau ai majaw, ngai ram ram sum mat nga nngai, dai kaw nau hkum ajawp masu sa, nang ngai hpe Nga langai mi wa ra sai. " Masu ka Naw wa mung grau pawt mayu nna bai hta dat sai. "Nang ganang na du nta kaw num sa woi ndai rai rang? Nang ngai hpe gara du nta re mung nsan la, gara du shayi hpe sa tau woi na re mung nsan la re mak mak a majan jan rai sa hprawn yang gaw, ganing nga tim ngai sa hprawn hkyem ai du nta nre ai kaw sa kau hkrup jang gaw ganing rai num sa mu hprawn wa na nu ta?"Masu ka Gam wa mung grai wa mi la re ai zawn nan nga hkra bai hkap hta dat nu ai.
Dai shani kaw nna shan ga-law chyu ga-law ai gaw kre lake ngu ai mung nnga hkraw mat manu ai, shan gaw ga-law hkat ai lam hpe ganing re myit su salang wa hpe hparan shangun yu tim nu hparan ya lu ai majaw, hpang jahtum e gaw Nang Bya hpe bai paran ya na matu shaga nna, madat lawm na masha mung tsawmra shaga shadun tawn rai salang wa hpe la nga masai, rai yang shanhte gade na hkra la tim salang dai wa ndu hkraw ai majaw, masha ni pyi nau la jin nna masin pyi ma pawt mat sayang she, salang dai wa gaw lamu shamying san nna, gachyi sha law ai Chyamang kabrang kasha langai daw lang nna masha hpawng de du sa wa ra ai. La jin nna masin pawt mat sai masha ni Nang Bya pe hpa majaw ya malaw e she du sa wa nta ngu hkap san jang, shi gaw masha ni hpe shi ta hta lang tawn ai Chyamang kabrang madun dan nna tsun ai: "Eh, nanhte hpe she tsun dan made ga, ngai lam kaw hkawm nga yang wa, lam makau hkan na hpun hta U nau pyen gasu nna ndai nye Chya -mang kabrang lahpaw hte gap ai rai yang, langai gap yang lahkawng hkrat, langai gap yang lahkawng hkrat sha arai wa wa rai nna, gap taw nga ai nga yang lau nlu du sa wa ai wa rai nngai law, dai nrai yang chyawm me gaw jau nna du sai gaw e. "
Masha dai ni gaw dai zawn re hpa mung nkap ai Chyamang kabrang hpe sha wa me lahpaw shatai nna U gap ai nga, dai hta n-ga U langai sha gap yang lahkawng bai hkrat wa wa re nga ai hpe nkam na, salang wa hpe nang tsun ai aga gaw teng ai nre hkap ngu mu ai. Shaloi Nang Bya wa gaw shanhte aga hta hkrawn sha ngu nna: "Dai hte maren, manang ni e nanhte atsawm sha she myit yu mu, masu ka Naw wa gumhpraw lu ai rai yang ganing rai nna myit law hkawm na rai?Masu ka Gam wa mung Ganam lu ai rai yang ganing rai nna naw myit law myit yak na rai, dai gaw nteng ai lam sha she rai nga ai. " ngu nna masu ka yan a nlu paran hkraw ai manghkang hpe asan paran kau ya nu ai rai.
