PUMSHI DU KASHA NANGDOI SAMA RIM JAHTUNG NI KAW NUM WA AI MAUMWI

PUMSHI DU KASHA NANGDOI SAMA RIM JAHTUNG NI KAW NUM WA AI MAUMWI

SAWK KA AI: HTOIMA MA RIP

Ya Mawa gumsan mungdan yinnan mungdaw kaba Sakhkung Sam Jinghpaw madu uphkang mungdaw Yinkyang ginwang Htaihpyin ginwang daw Share ninghtawn rai nga ai Pumshi buga, ya ten hta masha n-nga mat sai mare grai law ai mare kaba re, 1950 ning daram kaw nna lawu lahta ni gahtep ai mare buga ni rai nga ai, Share Lakang mare, Yindung mare, Man yau mare, Man ying gat mare hkan htawt nga mat ma ai majaw, daini masha n-nga mat ai re. Ndai Pumshi mare dingsa, ya ten hta Gadu Namkawn maling lawk masat da hkrum nga sai, Namkaw gata rai nga mat nu ai ndai Pumshi buga mare dingsa kaw byin lai mat wa yu ai maumwi rai malu ai hti yu ga. Moi, anhte Pumshi ga hta Pumshi du kasha Nangdoi ngu ai mi pra lai wa yu sai rai nna, Pumshi du kasha Nangdoi gaw ma kasha naw rai nga ai ten kaw na grai laklai shai ai, kaga alak mi tsawm la ai shayi numsha rai malu ai da, ahkum shingyan galu tsaw tsaw rap rap sha rai nna, hpraw nsam atu asan sha rai nna tsawm dik la ai da, mare buga na la shabrang ni yawng mung grai yu tsawra mayu la ma ai rai tim, kaga masha ni gade mi tsawra tim, moi gumchying gumsa prat hta gaw, du magam ni, du magam shada da sha nai yang, kaga yu maya masha ni hpe num jaw num ya hkat na grai yak nga ai, jaw ya na ankaw ahkang nga malu ai re.

Du ni na kasha ni hpe mahkawn shabrang shada shut hkra hkat ai lam mi nga yang, tawngban tawngsi rai nna sha nmai hparan nga malu ai re. Dai majaw rau mare na la shabrang ni kadai mung nsa tsawra gwi nga ma ai da, tsawm la ai Nangdoi ahkye akang rai mahti yang baw na zawn, myi-tum myisha mada dat ai shaloi shi na mani sumsai re nsam ni wa, a-ningtsing sha rai nna ra marit na zawn sha rai nga ai da. Gade tsawm tim mung kadai e mung n-gwi ra ai majaw, Nangdoi mung asak kaba lai mat wa nu ai, Nangdoi tsawmra kaba lai wa ai majaw, kanu yan kawa dama kadai hpe jaw sha na grai naw myit yak nga yang, aten gaw laning hte laning lai mat wa nga sai. Yinam ta marang kaba htu ning yit nga ai lana mi hta, samwi htinggrup nna hkawmsa hkawmwa grai nmanu ai shana e, Nangdoi gaw dai shana kaw nna gade sa mat wa ai re nchye ai, mat ai hpang, makau grup yin mai byin ai shara shagu na jinghku jing yu ni yawng hpe san tam yu yang mung nmu tam nna, myihtoi shayu chyaba wawt, hkringwa dumsa kaba shaga nna mung tam yu tim nmu tam ma ai, yawng tam jin nna nmu tam ai majaw zim sha nga mat ai hpang, laning mi daram na mat ai hpang, shi hkrai sha bai nta pru wa sai da. Nangdoi du wa ai hte maren nta masha ni yawng shi hpe ganang sa mat ai i, hpa baw byin mat ai ngu san yang, le hkan chyahkring hkawm chyai ai sha re ngu nna htan nu ai da.

Nangdoi nta bai du wa ai hpang, shi hkrai hkrai shaga mani taw nga nga re hpe mu mada ma ai, manang langai hte shaga ai zawn zawn rai, kanu yan kawa mung grai mau mat rai, dai hpang gade nna yang kanu yan kawa hpe tsun dan ai, nta kaw manam ni grai du shang wa nga ma ai ngu tsun dan nu ai, kanu yan kawa hpe gade hkum sa, shum hkawm shamu, manam ni hpe hkra na nga tsun ai, Nangdoi rai jang gaw nbang npan, dawdap hkan e manam hkring sa, shara masat ya nga nu ai, shat shadu tawn nna bai jaw rai nga nu ai, kanu yan kawa yu yang gaw manam ni hpe mung nmu mada nga ma ai, Nangdoi kanu yan kawa hpe tsun ai, simaw simai shadu ai shaloi shakau shanam shum lang mu ngu tsun ai. Nangdoi manam grai hkap tau ai dai shana, Pumshi du wa Zau Seng hte du jan Nang Seng mu ai yupmang gaw dama ni grai law nna yan sa wa ai yupmang hpe mu ai da, kasha Nangdoi hpe sa hpyi ai yupmang hpe mu ai, dai yupmang mu ai shaloi, dama ni Nangdoi hpe hpuja sa bang ai nga nna, nga, gumra, dumsu, sagu, bainam, u wa ni amyu baw hpan jahkum nna, grai law hkra dun sa ya ai, u lawng, wa lawng, yawng hpring chyat mat hkra re yupmang mu masai. Hpang jahpawt yup rawt ai hpang, du wa yan la shana na yupmang rawt jawm hkai ma yang, shan lahkawng mu ai yupmang grai bung taw nga ai da.

Dai shaloi du jan Nang Seng gaw mare hkawm nna, htingbu htingpyen ni hkan sa chyai nna yupmang mu ai lam hkai chyai ai shaloi, mare masha ni yawng mung dai shana mu ai yupmang gaw maren re yupmang mu ai majaw, yawng gaw grai naw mau nga yang, dai mare buga na la wa- ngan ni, nam de, hkwi lu hkwi sha, jau gawng, makhkyu la ni shu shan grai gap wa masai da, chyahkyi shan nga ni mung nta hting ye sa chyu ai mung nga sai da, shadu lu shadu sha ai nu num ni mung, mam htum mun hte chyahkyi lu abyen sat rai masai da. Dai shaloi kaw nna, dai mare buga ni shu shan hkwi lu hkwi sha ai lam, kaga buga hta grau jan nna shan lu gap sha lai wa masai nga, raitim hpang e yawng bai mu ai yupmang gaw, dama ni hpuja dat ai lam re majaw, sutgan yamnga dun jaw dun ya ai lam. ndai hte naw ram sai ngu ai yupmang bai mu ai hpang, shu shan dai daram nnga mat, dai daram bai nlu hkwi sha mat masai da. Pumshi du wa yan htinggaw Sama rim na jahtung dama lu ai majaw lam shagu hta jahtung dama ni garum la ai hkrum ma ai da. Yi hkyen wa ai ten hta, Nangdoi jahtung dama ni hpe woi wa nna, yi hkyen ya, yi hkyen nga ai shaloi mare masha ni tsan tsan kaw nna yu dat yang, masha nga ai gaw nmu ai raitim, yi hkyen ai yi ngam grai sa ai hpe mu lu ma ai nga.

Dai hpang yi nat, yi sawm, mam ting, yi magang, mam dan mam bai shu la ai kaw du hkra, jahtung dama ni sa garum ai majaw, yawng a shawng kaw bungli ginchyum dat lu ma ai. Pumshi du ni hte Sama rim na jahtung ni mayu dama rai nga ai tsawm ra ning re hpang, Nangdoi ma chyangai ba nna nta bai du wa ai shaloi, nbang dap kaw ma shayup da nna, hka sa ja ai shaloi, Nangdoi gaw kanu hpe ngai hka ja sa mat wa ai ten kaw, ma hkum wa hpaw yu ngu tsun da sai. Nangdoi hka ja sa mat wa ai hpang, kanu myit sumru yu yang, ndai gaw shum hpaw yu mi a-nga ai gaw ngu nna, du gumgai gaw ma sumdaw jahpun da ai hpe wa gayen yu dat yang, ma baw bungding kaw myi-tum langai sha re, myi gaw datmi baw daram kaba ai hpe mu dat nu ai. Dai majaw du jan grai gajawng mat nu ai. Loi hkring mi rai jang, kasha Nangdoi hka ja sa ai de na bai du wa ra ai. Kanu hpe wa pawt ai da. Ma hpe shum hpaw yu ngu tsun jang she wa lagu hpaw yu ai, ma machyi mat sai ngu pawt nu ai, kanu hpe pawt let tsun ai, ya kaw nna gaw nta nkam wa sai, nanhte ngai hpe hkrum mayu jang gaw, mare de numhkaw dang 10 sa lahkawn wa marit, ngai hkawm mat wa ai lam kaw hkan nna ngai hpang sa wa marit ngu tsun htet da sai.

Dai majaw kanu ni mare de sa nna numhkaw dang 10 sa lahkawn da ya masai. Nangdoi wa mat ai hpang loi ya mi rai jang, du jan Nang Seng gaw, Nangdoi tsun da ai ga hte maren, Sama rim lunghpra ntsa kaw sa du mada dat yang, myu mare kaba she bai byin mat nga sai da, nta hkik dik ai wutdek chyinghka lam kaba kaw, chyinghka sin ai tsap la kaba lahkawng chyinghka lahkawng maga de hpum taw nga ai hpe mu dat sai, dai tsap la kaba yan hpe mu dat ai hte rau, nta nhku na kasha Nangdoi chyinghka lam na gwi naw sa jum kau ya mu ngu tsun ai nsen hpe na dat ai hpang jang, dama la wa ngu na jahtung la wa pru wa ra ai. AWh niba sa wa rit, ndai gwi nhkrit ra ai nga, chyinghka lam makau kaw hpum nga ai tsap kaba lahkawng hpe hpri sin yu kaba hte shadaw kaw gyit dun tawn kau nu ai. Dai shaloi na lang jahtung dama ni na nta kaw 3 ya sa nga hkring ai ten, shanhte lusha ai simaw simai, malu masha ni hpe rau njaw sha, kaga laksan galaw jaw ma ai da, 3 ya nga nna bai nhtang wa yang. gahkri yan kasha, chyinghka lam loi lai kaw du hkra hkan sa dat ma ai, kasha yan gahkri hte shakram kau da nna shingdu yin rai dat ai shaloi, mi shi nnan sa du ai Sama rim lunghpra ntsa kaw bai rai nga la sai da.

Dai kaw nna nta bai nhtang du wa yang 3 ning na mat nga la sai da. Dai hpang laning mi din ai hpang e, Pumshi du wa yan lahkawng rau bai kasha Nangdoi hpe sa jahkrum na matu sa yang, Sama rim lunghpra ntsa kaw bai du sa ai shaloi, kasha Nangdoi lunghpra ntsa kaw si taw nga ai mang sha sa mu nna, jahtung dama ni hpe mung nsa mu tam sai da. Pumshi du kasha Nangdoi na mang sha taw nga sai re majaw, dai moimang hpe hta wa nna Yindung mare dingsa, Mada bum kaw wa lup da ma ai, dai lup gaw ya du hkra naw nga ai. Moi prat kaw nna ya du hkra rai yang shaning 100 jan ning daram na sai nga ma ai. Ndai Pumshi du kasha Nangdoi gaw Sama rim jahtung kaw wa ai re majaw nat hkum rai nga sa, shi moimang hpe wa hta lup tawn ai lupwa kaw, makau grup yin sharaw wan hkru mat tim, shi lupwa kaw gaw sharaw wan nlu hkru shang wa yu ai. Ya mu chye mayu ai masha ni nga yang, dai shara de sa yu chyai hkawm yang naw mu lu mai ai re. Anhte Pumshi Yindung buga kaw, ya prat, nau rai nna ai shaning hta byin lai wa yu ai shinggyim masha nam nat tsasam, Sama rim na jahtung ni kaw num wa mat ai maumwi gadun ndai gaw, ndai Pumshi Yindung buga na sak kaba ai gumgai dingla ni yawng tinang mu yu ai zawn nga hkra naw chye hkai nga ma ai re.