MATSAW SHAYI GAANG GA SA NGA AI LAM
Bawk Tawng
Amoi, Gaang ga hta lamu marang n htu ai jan hkrai kri ai majaw, Gaang ama ni kawng marawn de ga chying htu let marang shaga ma ai, ga chying hkrai garing nna Matsaw Mu Du dingla wa a baw hkrai gara ya ai nga yang, Matsaw dingla Mu Du wa azim sha n mai galeng rai, kasha Matsaw shayi hpe: "Le Gaang ga sa yu su, wa a baw nau ganan ai." Ngu, shayi sha hpe Gaang ga de yu hkrat wa shangun yu nu ai. Matsaw shayi gaw Gaang ga na ni ga chying mayut dat dat rai, kawa a baw hkrai gara ya ai sa mu chye la nu ai, rai yang Matsaw shayi gaw Matsaw ga de n htang wa ai, Gaang ga sa nga len mat nhtawm, Gasang wa ngu ai hte sa nga nan mat nu ai. Dai htawm, Mu Du dingla wa Gaang ga sa yu shangun ai Mu Du shayi n pru wa mat ai majaw, Mu Du shayi a gayung ni hpe bai yu wa shangun u ai. Mu Du la ni Gaang ga de bai sa du ai shaloi, Gasang wa hte ganau jan nta ngauring hkri ai ten kaw sa mu hkrup masai. "Aga, awa a baw nau ga- nan ai ganing re rai kun sa yu su she ngu yang me, Gaang ga wa sa nga nan mat ai gaw." Ngu sa shara ma ai. Raitim, Matsaw shayi Gasang wa hte dinghku de mat sai majaw, chyahkring sha Matsaw ntsa ga de ganing di n lu wa ппа, Matsaw shayi gaw: "Ahpu ni e, nanhte Gasang wa hte ngauring garawt shaw dang jang, ngai hkan nang wa na." Ngu shingjawng hkat shangun na nyan shapraw u ai.
Shing rai, Matsaw shayi gaw Gaang ma ni garawt shaw na nta ngauring hpe gaw, ari ga la nna, ginchyan hkrai ginchyan, kukkuk kakkak di gyit shajum shangang da shangun nhtawm, madu wa Gasang wa gang shaw na ngauring hpe gaw, gata maga hku nna nhtu hte hkan lagu akak hka di kau ya nu ai. Ntsa lam hku yu yang, yawng maren di ginchyan da ngut ai hte shingjawng bang wa shangun sai. "Gai, Gasang wa nang shawng gang shaw yu su." Ngu, madu wa hpe shawng ngauring gang shaw shangun dat ai shaloi, Gasang wa gaw galang ta hkren di gang shaw gabai kau dat nu ai. Matsaw Mu Du la ni nta she galap wa hkra gang tim, ngauring n lu gang shaw ai majaw: "E, Matsaw n-gun she ja ai ngu yang, Gaang ni she grau ja ma ai, ngainau jan a madu wa she grau ja ai, ngauring pyi garawt jinghkyen kau lu ai." Ngu sum hkam la manu ai. Matsaw ma ni Gaang ga gaya sa hkrum mat wa ai hpang, myit n-gun masin nsi ai majaw, galang bai shingjawng na hku gadi da masai. Hpang na lang hta nlung hpai shingjawng ma ai. Rai yang, Matsaw shayi gaw gayung ni hpai na рип lunghkrawn ngu ai hpe gakang shachyang kau nhtawm sau chya da ai hta lai nna, ga hkan n-gawng bai gat da rai, madu wa hpai na gaw lung zep hkyem da rai u ai. Madu wa hpe shawng hpai shangun yang, Gasang wa gaw galang ta hpai kawaw kau dat sai.
Bai Mu Du ma ni n-gun gade dat let hpai yu tim n lu hpai kawaw, tsam mari ahpum sharawt dat sai ngu yang, n-gawng kaw bai gabye kashawt dat nna, lagaw gayaw jahten kau ai majaw, Mu Du Nawng lagaw labye mat nu ai. Dai shani mung Matsaw ma ni gaw gaya hkrum nna bai wa mat masai. Shing rai, Gaang ga na ni gaw Matsaw ma ni hpe hpa lam hta mung dang lu sai ngu, badang manau nau masai. Matsaw shayi gahpu gayung ni hpe htet shaga ai majaw, Matsaw ga na ni manau sa ma ai. Manau shani, nau wang hta Mu Du Nawng manau shang ai shaloi, Gaang masha ni gaw Mu Du Nawng lagaw labye let manau nau ai mu jang: "E, Mu Du ma ni lagaw labye ai wa le." Ngu yawng e hpu dat ai hkrum nna, gaya dum nhtawm gahpu ganau ni hpe woi nna tawm rai hprawng mat wa ai shani, Matsaw shayi gahpu gayung ni hpe kumhpa hkan jaw ai ngu, daini anhte tsun galaw ai lahkan nga(Bung du, bung chyen) hkan jaw u ai, wunba hkan jaw ai shaloi, gayung Mu Du Nawng gaw prawng let, ret rai nga baw nga mai sha kret rai makrut sha nna gabai kau, tsa bang ai ndum hpe mung kawa tu ai hku lang mat wa nu ai.
Dai majaw, maten daini du anhte mu jawjau ai kaw lang ai hkaitsu gaw nga baw hte nga mai sha lang ai npawt gaw ndai kawn hpang ai rai nga sai. Gaang ni badang manau nau ngut ai htawm, Matsaw shayi gaw: "Ya gaw wa kaw shakau ja wa hpyi la na re, htaw wa a sanit hpunlam na nhtu n ya n mai re ngu wa tsun su."Ngu madu wa hpe tsun u ai. Bai madu wa Gasang wa gaw grau gaja ai ra mayu ai majaw, gatsa wa a jahku hpunlam na mu n-ga wa hpyi la nu ai. Gatsa wa gaw: " Nhtu ndai grai matse ai, hkum rai lu, shi sha pyi n mai nga ai re."Ngu matsun dat sai. Lani mi hta, Matsaw shayi ndaw kaw mam lam da nna, Gasang wa hpe u gawn let nta nga shangun u ai. Gasang wa gaw jahku hpunlam na nhtu hte ari mali na ngu, ndaw kaw ri mali let u sin u ai. Nta na u ni lam da ai mam hkrai sa ahpre ai majaw, nhtu hte: "Shi." sha ngu dat yang, u yawng gatawk kau dat nu ai, "shi" nga ai nsen hte rau u mang mam lam tawn ai chyahtai ntsa hku garai jawng mat sai. Shana de Matsaw shayi u si jawng ai wa mu nu ai, madu wa hpe: "E, daini nang hpe nta nga let u sin she ngu yang me."Ngu wa shara ai shaloi, Gasang wa gaw: "Shi "sha ngu nngai ngu nhtu hte madu jan hpe bai shalai dan ai ngu yang, madu jan hpe bai agret sat kau dat nu ai rai.
