BUNGHPOI HTE JAHKRAI MA A MAUMWI
Alat Gun Awng
Moi, Shingra gang ningnan ring, Kumdai htawng wa yang ningnan chying wa yang, shinggyim masha gaw Hpan Sagya hpe kam hpa nna nga pra brat mayat maya wa ai re da. Shinggyim masha ni a sumri sumdai mung matsaw ningtsang ga nna jum da ai re da. Dai prat hta aji madin ngu ai n nga ai, Matsaw Munu du wa Amu Tu gaw matsaw ningtsang du shannau ni hta ahkaw ahkang mung grau kaba ai wa rai, shinggyim masha ni hpyi ai, ra ai asut agan hpa mung shi ma hkra atsawm lu jaw u ai da. Dai ten hta, Shingra gaang ga Kumdai htawng wa yang ga wa ring chying wa yang, gahtawng langai kaw grai gumshem ai la law ma shannau ni mi nga ma ai. Matsan mayan re jahkrai ma shanwoi dwi mi mung nga ma ai da. Jahkrai ma gaw grai myitsu myit kawp ai wa re, gawoi dwi hpe atsawm sha woi lahku lanu u ai rai, bai gawoi dwi mung gashu wa hpe grai tsawra let maka kaba tawn nu ai. Bai, dai la law ma ni gaw galoi mung jahkrai ma hpe hkrai roi rip ma ai da. Lani mi hta, la law ma ni gaw jahkrai ma hpe hka de atsing htim nga hkwi sa ga ngu sa saw woi mat wa ma ai. La law ma ni gaw shani tup jahkrai ma hpe atsing woi htim ma ai da.
Rai yang, jahkrai ma hpe tingraw, arit ni hka hku de shayawn nna n ja shangun ai, shani tup jahkrai ma hkwi lawm ai, lu hkwi ai nga ni ma hkra mung, shannau ni hkrai gun sha mat wa ma ai da. Jahkrai ma gaw shana de la law ma ni wa mat ai hpang yawn yawn ngu let kawsi hpang gara ai hkam sharang nna, jahkrai ma shi ja da ai rithtang sa yu yang, rithtang kaw ahkye re grai tsawm ai nga gasha mi rawng nga la ai da. Jahkrai ma gaw nga gasha dai hpe atsawm sha la wa nna jahka dap hkawawt maga shingjut kaw yam mi shadun nna, dai yam kaw hka ja bang rai nga hkye gasha dai hpe rem da sai. Ndai jahkrai ma rem da ai nga hkye gasha gaw Matsaw du Munu shayi nga gasha tai nna jahkrai ma shanwoi dwi hpe bau na matu, Shingra gaang ga du sa ai rai nga ai. Shing rai, shani shanwoi dwi ayi sa nna shana de nta du shang wa yang, jahka dap e shat simai grai grai mu nna agahtet htet sha ngu shadu da ya nga la sai da.
Shanwoi dwi gaw grai mau let, masha mi gaw n mu re ning rai shadu jaw da ai hpe grai wa mu kabu mau let sha la nna mare na gadai myitsu wa sa shadu jaw kun ngu myit la nhtawm, mare masha ni hpe hkan san hkawm yu yang mung gadai mung n re ai nga, shanwoi dwi gaw shat si mai dai ni atsawm sha hkru hkru kat kat sha la nna yup mat wa yang, hpang jahpawt shanwoi dwi rawt yang mung dai zawn sha shat simai ni agahtet htet sha grai grai mu nna bai shadu tawn da ya nga la sai da. Dai zawn byin ai majaw hpang shani shanwoi dwi yi sa ai ngu nna jahkrai ma gaw a katsi sha dingla lagan kaw nna wa nhtang lagu yu nga yang, dai ayam kaw nna grai tsawm la ai shayi sha mi byawn rai pru wa nhtawm, ding ye ret rai adun ni ye, baw kara ni masit satsawm kau, ta shin man myit kau rai, jasan satsawm kau nna, jahka dap e shat shadu bang wa u ai da. Dai zawn re mu ai hpang, hpang shani gaw shanwoi dwi dai Matsaw Munu du shayi shadu da jaw ai shat rawt sha la nna yi de sa ai ngu alam kaw atsawm jawm dup la nna npan chyinghka lam dingla lagan kaw wa nhtang lagyim nga masai da.
Shaloi, dai Matsaw Munu du shayi gaw dai ayam kaw nna bai byawn rai pru wa ra ai da, shaloi shanwoi dwi gaw jawm jahkrup da sai hte maren, agajawng sha lawan wan kagat shang wa nna jahkrai ma gaw dai shayi sha hpe ahpum chyit rai manat da, gawoi dwi gaw dai ayam hpe wa abyen ga kau di masai da. Dai zawn galaw yang dai shayi sha gaw: "Jahkrai ma e ngai hpe dat u, ngai nang hte nga na matu, nan woi dwi hpe bau na matu matsaw ningtsang ga de nna yu hkrat wa ai rai nngai. " Ngu tsun u ai da. Dai shani kaw nna gaw shanwoi dwi ni masum yi wa yi sa rai grai pyaw nna jawm nga nga masai da. Shing rai nga nga yang, walang ginhtawng bai tawng, yi hkyen aten bai du wa sai rai, Matsaw Munu du shayi gaw jahkrai ma hpe htaw matsaw ningtsang ga de, ningtsa wa kaw nhtu naw wa la su, kru lam na jaw dat ngu wa tsun su, sanit lam na mung hkum la jahku lam na mung hkum la, kru lam na la yu wa rit ngu htet dat sai da. Shaloi jahkrai ma gaw Matsaw ningtsang ga du ai hte grau tsaw yang grau mai na re ngu, gatsa wa hpe sanit lam na jaw dat nga ai re ngu wa tsun sai da. Gatsa Matsaw du Amu wa gaw, mahkoi n rai, kru lam na mahkoi she nga ngu yang, jahkrai ma gaw n re law, sanit lam na nan she nga ai law ngu sai da.
Shaloi Amu wa gaw jahkrai ma hpe dai sanit lam na nhtu shaw ya dat nna, ndai nhtu hte ningsha ganu dung ai kaw, nta na asut agan u wa yamnga ni nga ai kaw "Shwi " ngu shum ningwut dat lu yaw ngu numhtet dat sai da. Shing rai jahkrai ma gaw dai sanit lam na nhtu la du yu wa ai hpang, ayi hpe dai nhtu sa dawn ai hte, shi hkrai hkrai hkyen jasan kau ya, htingra ta e htingra yi yang na htingra ahkran mung shi hkrai hkrai sawm jasan mat wa, mam mung shi hkrai hkrai ting nna shi hkrai tu tsawm mat wa, yinam ta e yi mung n magang ra, mut mangai du yang, mut ntam naimam ni shi hkrai hkrai shu la mat wa, nta e mam nka kaw e shi hkrai hkyawm rai wa htun rawng nga nga rai sai da, shaloi shanwoi dwi ni gaw, grai pyaw nna nga nga masai da. Dai zawn rai nga pyaw nga yang, lani mi hta madu jan Matsaw du Munu shayi gaw npan e walang htumbyen kaw yoilu hte kring ngu amam htu nga yang, jahkrai ma gaw pan shinggan na pinra e mam lam da ai kaw u yu let ri pali mali dung nga u ai da. Dai shaloi, u ni pinra ntsa e lam da ai amam sa sha wa yang, jahkrai ma ndum shami gatsa wa htet dat ai ga hpe malap kau nna dai nhtu hte " Shwi" ngu u gau shapyen dat ai wa, htum htu nga ai madu jan a du tek hprang, makau hkan na u wa yamnga ni a du mung ma hkra tek tek rai mat sai da.
Shaloi dai nhtu mung htaw matsaw ningtsang ga de mi shi hpe bang da ai sanit lam kaw " Hkrawk!" nga hkra ngoi nna bai wa n htang shang mat sai da. Mu wa gaw dai nhtu wa nhtang shang ai nsen hpe na dat ai hte, "Mawk! daini chyawm jahkrai ma rai wa mi di dat re sai!" Ngu nna tsun nhtawm, jahkrai ma pyi naw mau nga yang, Mu wa gaw chyahkring mi na lapran sha samwi ni mu yu wa nna u wa yamnga ni a du mung matut da ya, dai matsaw du Munu shayi a moimang hpe mi na raw di du hte hkum chyaw raw sa shachyaw matut la nna matsaw ningtsang ga de shapoi la mat wa masai da. Dai rai, jahkrai ma gaw grai yawn jin nna, madu jan hpe mung grai dum rai, matsaw ningtsang ga de nbaw nnyeng shat lit ni gun rai matsaw du Munu shayi hpe bai wa woi u yang, dai matsaw du Munu shayi hpe Mu wa gaw jahkrai ma hpe n jaw sha mat ai sha, Ajin shagawng e Ajin wa hpe mahtang jaw sha kau sai da.
Dai rai, mateng daini du bunghpoi ngu ai ayi awawn hkan nbung bung gayin yin re gaw dai bunghpoi shayi jahkrai ma hpe dum, shingra gaang ga hpe marit rai nna sa du hkawm hkawm re re da. Ajin Nawng mung mi gaw shinggyim masha re ntsang ni a abawng byin mat ai hpang, matsaw ningtsang bai tai mat nna shi hpe Ajin ga e sa up shangun mat ai da. Ya anhte Jinghpaw Wunpawng amyu sha ni mateng daini du hkra mu hte bunghpoi shanwa hpe yep di jawjau nna asut agan hpyi hpyi rai, shanwa hpan ya ya rai, anhte Jinghpaw Wunpawng sha ni amu hte bunghpoi hpe jaw jau yang asut agan ni grai lu sut lu su wa wa re majaw htinggaw shagu jawjau ma ai rai. Shing rai bunghpoi hpe Matsaw Munu shayi Jin jan jinghku ngu shingteng amying gang nna dumsa jaw ma ai rai.
