NAYI ZAWN RAI GAYIN WA CHYE

NAYI ZAWN RAI GAYIN WA CHYE

(MAUMWI KA AI: BAWMLI TOI)

Moi na jahkrai ma la sha langai mi gaw kanu kawa ni e si htawng kau tawn da ai majaw, hpa mung nlu mat nna, ningchyang sha mung chyang sha jin rai, tsahte du ni a htingnu makau kaw nta kaji langai mi galaw tawn nhtawm, ka hpyi ka tawng ni madum sumhpa ni tingse pyisun ni galaw wawt tawn rai, chyahpung shachyang hkan simai simaw namlap namlaw ni hkum hkra hkai tawn nna nga nga yang, jahkrai ma a makau na tsahte du shayi sha masum gaw grai tsan ai gahtawng de manau kaba mi nga ai, dai manau poi hta gaw tsawm shayi lata la ai poi kaba re da. Dai majaw tsahte du jan du wa ni gaw kasha masum hpe buhpun palawng grai grai tsawm ai shabu jahpun dat nna, sa wa shangun masai da.

Shingrai shannau ni masum galang ta arau sha pru wa jang, kanau Ma Roi gaw jahkrai ma a nta de sa nga mat nna, jahkrai ma a nta na hkum sumhpa sa yu chyai let shi hte jahta taw nga yang, gana yan gaw kanau jan grau tsawm la ai re majaw, dai tsawm lata poi hta, shi nlawm yang she shan hpe lata la lawm nhten nga nna, shann hkrai rai mat wa sai, kanu kawa ni gaw gana yan hpe hkap san nhtawm, gana yan gaw an nau mung shi hpe nmu ga ai gade sa mat wa sai mi re ngu nna tsun dan mu ai. Shanhte yawng mau mahka masin gahpra nga yang, kanau jan bai pru wa nna, kasha hpe kanu yan kawa haw e ma nang gaw gade wa sa lam mat nta e?ngu nna hkap san jang kasha jan gaw waw ra kaw nga ai jahkrai ma hte sa nga taw nga nngai ngu nna wa tsun dan jang, kanu gaw anhte lusu du ni gaw waw ra zawn san ai matsan mayan jahkrai ni hte gaw nmai ganawn ai re lu ngu nna hkap daru jang she, kasha gaw nu yan wa e, madat yu mu, lu su ai hte matsan ai ngu ai gaw na- yi zawn rai gayin wa ai da lu nga nna tsun jang kanu kawa ni hte gana yan gaw na mau nna, kanau jan hpe nang gaw dai zawn nga ai aga mung she achye tsun yi? ngu nna naw mau dung nga yang, kanu yan kawa a sak poi bai galaw ya na aten bai du mat ai majaw, shannau ni hpe ndai lang na ningnu hte an a sak poi kaba re majaw, panglai de sa nna nan nau ni langai hte langai manu dan ai baw lama ma an kanu yan kawa hpe wa jaw jang, sutgan mung garan ya, hku hkin ja gumhpraw ni garan jaw na ngu nna mang gala ga tsun dat manu ai da.

Shannau ni lusha ni jahting gun nna sa wa ma yang, kanau jan gaw jahkrai ma la sha kaw bai sa wa nna, e jahkrai ma e nu yan wa a sak poi kaba galaw ya na matu sanghpaw jawn nna manu dan ai arai sa tam na matu ya lusha ni gun rai sa wa sana re, dai majaw nang shanhte shat shadu jaw na matu hkan sa su, ngai gaw na nta sin ya na ngu jang, jahkrai ma gaw hkan nang sa wa sai da.  Shingrai sanghpaw jawn nna panglai rap nhtawm, zaibru jang kaw du jang, shanhte gaw, gadai mung tinang ra ai hku tam bra mat wa masai da, shaloi jahkrai ma gaw, shanhte hpe shat shadu jaw na matu hpun tam sa wa yang, zaibru jang kaw Utawng ni manau manau nna, Utawng langai mi a ningmai hpe zaibru hte ahpre gaput kau ya ai majaw, nlu pru wa nna ganoi si mahka wa nga yang, jahkrai ma e sa mu nna zaibru grai htat hkra re hpe ashap hkrai ashap shaw dat ya jang, Utawng a n-gup na taiyu daram law ai lungseng atsit nsan ai prat jahkrat da ya nna, manang ni hpang de pyen mat wa sai da.

Shaloi jahkrai ma gaw lungseng mung hta la, hpun mung tam lang rai sanghpaw de bai du wa jang, shat shadu let aga zaini hte singgyin taiyu yu nna shi a lungseng hpe gaw matsing na hku gyin lam gun kau rai nna nga nga yang, shanhte bai pru wa nhtawm, shat ni sha la rai nna bai wa mat masai da.  Nta du wa jang kanu yan kawa a sak poi galaw bang wa masai, shingrai shanhte gaw tinang la wa ai arai ni hpe kanu yan kawa kaw wa sak jaw ai shaloi, jahkrai ma a lung seng wa hpyan dat jang tsahte htingnu ting gabrim ala wa nna du wa gaw mana maka kabu ai hte kasha hpe mung sutgan lamu ga ni arung arai ni garan jaw nna jahkrai ma hpe shagrau shatsaw kau sai da. Dai majaw lusu ai hte matsan ai ngu ai gaw na-yi zawn rai gayin wa chye nga ai da.