DINGHTA HPWI HTE SHAWAW NENG
Htoi Man
Moi shawng de, Dinghta Hpwi ngu ai la langai mi gaw shi a dum nta hta matsan nga ai re majaw, shi a sam ai nyan hpaji, kyet shawp ai marai hte tinang a nga pra lam hpe shakut nga ai. Shi gaw tut e mahkam hkam, dumda htung, shan gap rai nna kan bau nga ai. Dinghta Hpwi gaw shi gade wa mi kunglet magrau grang tim gumrawng gumtawng re myit n rawng u ai hta n-ga, matsan mayan re ni hpe mung matsan grai chye dum ai wa rai nga ai. Galang mi na jahpawt mi hta shi gaw shi hkam da ai mahkam hpe sa yu ai shaloi, ma kasha langai mi mahkam hta matsan mayan rai noi nga la ai hpe sa mu nna, matsan nau yu dum ai majaw, shi a nta de woi wa nhtawm atsawm sha wa woi nga kau nu ai. Aten tsawmra ning rai mat wa sai hte maren, ma dai mung lani hte lani gaba wa sai da. Ma dai gaba wa magang shakum shakap chyu noi, rapding raphkaw chyu gumgoi re da, shawng nnan e gaw garap kaw noi nna goiwat, loi mi bai gaba jang rapding kaw noi nna bai goiwat, hpang e nta npan na htingkan kaw noi nna: "N-goi e wat wat, nu yan wa kaw tsat tsat." Nga tsun let shani shanang noi goiwat chyai chyai rai nga ai. Hpang jahtum lani mi na lang hta dai nta htingkan kaw noi nna: "N-goi e wat wat, nu yan wa kaw tsat tsat." Nga ai lata "Wut wut..." nga pyen mat wa sai da.
Ma dai shing rai pyen mat wa ai hpang, Dinghta Hpwi hte madu jan Shawaw Neng gaw shan Palawng kasha bau maka ai re lam chye lu ma ai. Palawng kasha dai pyen mat wa ai tsawmra ning a hpang, Dinghta Hpwi hte Shawaw Neng gaw hka kau kaw yi galaw ma ai da. Shing rai yi galaw nga yang, lani mi hta, Shawaw Neng yi htumpa na hka kaw baw sa mahkrut ai shaloi, shi a kara hka nam de yawng yu wa nu ai, ang shaa Palawng wa mung mare gahtawng hkan u wa sa rim sha hkawm nna dai hka kaw lai wa yang, Dinghta Hpwi jan Shawaw Neng a kara re hpe hkap yu chye ai hte maren, chyasam myit rawng ai Palawng sanam gaw shi hpe bau maka ai Dinghta Hpwi jan Shawaw Neng hpe rim la nna madu jan shatai na myit u ai. Shing rai, hka hkan nna pen lung wa nhtawm, Shawaw Neng baw mahkrut nga ai kaw na wa rim hpai mat wa sai da. Dinghta Hpwi gaw madu jan hpe la jin nna, hka de sa yu yang, madu jan mung n nga nga la, lunghkrung kaw madu jan lang ai pasi daw mi sha sa mu u ai, pasi taw ai lunghkrung kaw tsap nna shaga yu yang mung n htan, hka hku de lung jahtau yu, hka nam de hkan jahtau yu yang mung htan ai mi n na, hka shi hkanu rim hkrat ai hpuntang sha she na mat sai majaw, mu byin sai re hpe chye nna, Dinghta Hpwi gaw ta maga mi ntawng nhtu langai ngai lang kau rai, hkrapngu hkrapngoi nga let: "Ngai a nja jan Shawaw Neng e, mali ginding de wa hkan mat wa sani e, ngai a nja jan hpe gaw, bumlang sumshi tawt tim hkan woi na, mali ginding wa mi shang mat wa tim hkan sai na." Nga nna hka nam maga de hkan shachyut mat wa sai da.
Shing rai, hkan shachyut mat wa yang, Shinglang Galu ngu ai wa hte sa hkrum nna: "Ngai a nja jan Shawaw Neng hpe n mu nni? Ngu san yang, Shinglang Galu gaw: "Lai wa sai, nang na a num hpe she alu woi la yang, ngai nye a shinglang hte Mali hka mahkrai hkrai dan na." Ngu sai da. Shaloi Dinghta Hpwi gaw: "Mai sa!" sha ngu nna bai lai mat wa yang, Myihkyi Gumbung ngu ai wa hte bai hkrum nna: "Nye a num lai wa ai n mu nni?" Ngu san jang: "Lai wa sai, nang na a num hpe she alu woi wa sayang gaw, ngai nye a myihkyi hte Mali hka zingrau ru dan na ngu sai da. Dinghta Hpwi gaw: "Mai sa!" sha ngu kau da nna bai lai mat wa sai. Matut nna bai tam mat wa ai shaloi, Baw Laja ngu ai wa hte bai sa hkrum nna: "Baw Laja e, nye num lai wa ai n mu lawm nni?" bai ngu jang: "Lai wa sai, nang na a num hpe she alu woi wa yang gaw, ngai ndai nye a baw kaw sanit ya sharaw wan nat dan na." bai hkap ngu sai da. Dinghta Hpwi gaw: "Mai sa!" sha ngu kau da nna bai matut hkawm mat wa sai da.
Shing rai, Maling tinghkring ga ngu ai galang nhprang grai ju ai ga kaw sa du sai. Raitim Dinghta Hpwi gaw nhkrit nkang myit hte dai maling gaang hku ga lai mat wa yang, galang tsip langai mi kaw galang kasha ni shat n mu sha, hka n mu lu rai, n-gup ap ap rai lau si wa hkyem ai hpe sa mu nna, matsan nau yu dum ai majaw, shi gun ai shat makai gang gyi jaw, shi gun ai dinghkru na ntsin ru jaw di nhtawm galang kasha hpe sa hkye shaprawn tawn nu ai. Shana de jan du wa mahka e, galang ganu wa ra ai, galang tsip kaw wa du ai hte: "Dinghta Hpwi manam ai, sha kau na!" Nga sai da. Shaloi galang kasha ni gaw: "Nu e, Dinghta Hpwi hpe n mai sha ai, daini annau ni kawsi hpang gara ganoi si mat ai re, Dinghta Hpwi e sha shi a shat ntsin jaw nna shaprawn tawn ai re." Ngu sai da. Galang ganu mung Dinghta Hpwi hpe chyeju grai dum nu ai hta n-ga, nang dai de hpa rai sa nni? Ngu san ai shaloi, Dinghta Hpwi gaw: "Nye a num hpe sa hkan tam nngai, n mu lawm myit ni?" Ngu u ai. Galang ganu gaw: "Mu ai, Palawng sanam wa e rim hpai mat wa nu ai, raitim nang hkum tsang, ngai mung hkan tam lawm na, ngai hpe kawa wuhtoi roi langai daw ya rit, nang gaw ga hku hkawm, ngai gaw ntsa hku wuhtoi roi dum nna nang hpe la la di na." Ngu sai da. (Mateng ya du galang bum kaw pyen gayin let "Tiyaw, tiyaw..." nga shaga ai gaw moi wuhtoi roi dum nna Dinghta Hpwi hpe gayin la ai ga madat re da.) Galang hte Dinghta Hpwi Shawaw Neng hpe tam mat wa masai.
Bum gaba sanit du jang, Palawng wa nga ai lungpu kaw galang shawng sa pyen du sai da. Galang gaw Palawng wa nga ai lungpu mahka kaw Shawaw Neng gaw shi a nja wa Dinghta Hpwi hpe myit nna hkrap dung nga ai hpe sa mu u ai hte maren, Dinghta Hpwi hpe wa nhtang tsun dan sai. Dinghta Hpwi gaw madu jan lang ai pasi daw galang hpe ya dat nhtawm, lamu ntsa hku Shawaw Neng hpe sa jahkrat ya da nu ai. Shawaw Neng pasi mu la ai hte, madu wa Dinghta Hpwi sa wa ra ai re hpe chye lu nu ai. Shing rai, gabu gara myiprwi hte madu wa hpe sa tam la nhtawm: "Palawng wa ya n nga ai, shi jahpawt nhtoi mahka de she shi a singkaw gata e u wa re ni rim matep hpai nna she wa wa re, shi yup jang n-ga hkala hka nna yup ai, shaloi nang hkra gunghtu grat di, ngai gaw pai gunghtu grat di na, nang nhtu lahkawng dai dai garang tawn u." Ngu jawm bawng ngut ai hpang, Dinghta Hpwi hpe nra sumpum kaw makoi tawn nna nga nga sai da. Jahpawt nhtoi mahka du wa ai hte bum sanit naw din ai shara kawn Palawng sanam galang mi wa puk dat nhtawm: "Wut wut wut" nga pyen wa ra ai. Lungpu du ai hte Palawng wa gaw: "Dinghta Hpwi manam ai, Dinghta Hpwi manam ai!" Nga wa hpu sai. Shawaw Neng gaw: "Nang Dinghta Hpwi a madu jan hte nga nga nna me, Dinghta Hpwi manam ai nga ai gaw." Ngu masu nu ai. Shaloi, Palawng wa agatsi sha yup mat wa sai da.
Raitim loi mi hkring re hte: "Dinghta Hpwi manam ai, Dinghta Hpwi manam ai." bai nga sai, Shawaw Neng gaw: "Hpa wa jawp da nu e, Dinghta Hpwi jan hte nga nga nna me!" bai ngu sai da. Hpang e, Palawng wa gaja sha yup malap mat wa sai. Palawng sanam yup pyaw malap mat wa ai ten hta Shawaw Neng gaw Dinghta Hpwi hpe nra sumpum kaw nna sa alai shapraw la nhtawm, shawng e bawng tawn ai hku Dinghta Hpwi gaw Palawng wa a hkra gunghtu grat di, madu jan Shawaw Neng pai gunghtu grat di jawm gahtam sat kau da rai, gabu gara myit hte Palawng singkaw langai mi sha gahtam hpai rai nta wa lam de nhtang mat wa masai da. Shing rai, nhtang wa ai shaloi Baw Laja ngu ai wa kaw wa du sai hte maren: "Baw Laja e, nang ngai num lu woi wa yang baw kaw sanit ya sharaw wan nat dan na nga ai gaw ya nat yu u!" Ngu u yang, Baw Laja wa gaw n lu nat dan ai majaw, Dinghta Hpwi e gatawng kau da sai da. Matut nna Myihkyi Gumbung kaw bai wa du sai majaw: "Ya nang a myihkyi hte Mali hka zingrau ru yu u!" Ngu yang, zingrau n lu ru dan ai majaw, Dinghta Hpwi e bai gatawng kau da sai. Shinglang Galu kaw bai wa du yang, Dinghta Hpwi gaw: "Ya ngai nye a num lu woi wa sai, na a shinglang hte Mali hka mahkrai hkrai yu u!" Ngu ai shaloi, Shinglang Galu gaw shi a shinglang hte Mali hka mahkrai n lu hkrai sai majaw, Dinghta Hpwi e bai gatawng kau da ai hkrum sai.
Dinghta Hpwi gaw shi hpe yu gaji asang ai ni hpe sat kau da nhtawm, hkawm hkrai hkawm wa yang, nau ba mat rai, Majoi wa-lam hkyet ngu ai shara kaw wa sa nga ai shaloi, jan nau ja ai majaw, shan gahtam hpai wa ai Palawng singkaw hte salat yit ma ai da. (Dai shani kawn she shinggyim masha hte Wunpawng Jinghpaw amyu sha ni yawng gaw layit ngu ai hpe chye lang wa masai da.) Dai sa-ra kaw nna bai lai wa yang, ntenren si grai myin nga ai shara kaw bai wa lai hkrup ma ai da. Shaloi madu jan Shawaw Neng gaw Palawng wa a hkritung lawt mat sai majaw, namsi sha mayu nna, madu wa hpe namsi sha mayu nngai, ntenren si naw lung di jaw rit ngu u ai. Dinghta Hpwi namsi hpun de lung wa nhtawm namsi hpun lung gahtam ai ngu yang, shi a ta mahtang gahtam di kau dat nhtawm, ga de di hkrat yu wa mat u ai hta n-ga, asai nau htaw mat ai majaw, nsoi nsa di mat wa sai da.
Shaloi madu jan Shawaw Neng jahtau hkrap let: "Dinghta Hpwi e, nang daini ngai hpe aprat ningsang rau nga, punghpraw punglaw rai hkra rau pra ga nga nna, ngai hpe Palawng lungpu na hkan alai, Sanam lata na hkan mawai la rai, ndai zawn re gaw ngai hkrai mungkan ntsa kaning di nga, dinghta aga e kaning di pra na!" Ngu hkrap ai. Dinghta Hpwi gaw madu jan Shawaw Neng hpe: "Pu hpaw tsawm ai pan hkyeng, marit shingni rawng ai nja Shawaw Neng e, gaang ga n rum tim, ntenren si nhpang e rau hkrum ga, nang ngai kaw hkan nang na rai yang, ngai nsoi yawm nsa htum ai hpang sanit ya ngu na shani ndai dari ninghkyi lang rai, htaw kasen yan kinla ningdung e ninghkyi shadun tawn, nang gaw npawt ninghpang e n-ga de galeng sawng rai u, bungsi nga ai shaloi wa woi la na." Ngu ga madat tsun let ninghkyi langai mi shaw ya da rai si mat wa sai da. Sanit ya du ai shani, Shawaw Neng madu wa a ga madat hta hkan nna, kinla ningdung kaw ninghkyi sa shadun tawn, shi gaw kinla nhpang e n-ga de galeng nga rai yang, hka nam nbung si nga bung wa ai hte ninghkyi hkrat yu wa nna Shawaw Neng hpe wa achyaw sat kau sai da.(Mateng ya du Wunpawng Jinghpaw amyu sha ni sa-wa nat shabawn yang dai Dinghta Hpwi yan Shawaw Neng si ai shara ntenren si hpun nhpang e shabawn ma ai.) "U jahkrai maka sangau manam, masha chyasam maka du baw laman" Ngu ai ga malai mung ndai maumwi kaw nna byin wa ai re.
