GUMRA LAGAW HTE HKOIZE
Maru Gawng
Moi Myen amyu ni laika ngu ai rai n lu ma ai prat hta, Myen hkawhkam wa gaw bungli lama ma hpe bawnu hte sha n dang matsing zumhting rai, malap mali ai lam law law byin pru ai manghkang ndai hpe ganing di, nhpa baw hte matsing yang she n chye malap kau na kun? Ngumyit jin ai hpang, kaga hkawmhkam ni ganing di matsing nga ma ai kun ngu, Miwa hkawhkam wa kaw sa du nu ai da. "Hkungga dik ai hkawhkam e, nanhte gaw mu rai hpe hpa baw hte matsing ma ni?" Ngu san ai shaloi, Miwa hkawhkam wa gaw gawk de na lachyit ri hte chywi gyit da ai kawa chyen shabawn hpai pru wa nna: "Anhte gaw ndai zawn re kaw ka matsing ga ai, ndai gaw anhte a laika re, anhte gaw laika hte she baw hkum sumhpa myu gagup ka matsing ga ai." Ngu tsun danu ai.
Myen hkawhkam wa gaw: "Myitsu ai Miwa hpunau hkawhkam wa e, dai nang a laika hpe ngai e mung sharin yarit." Ngu hpyi shawn nu ai. Miwa hkawhkam wa: "Ngai na laika, nanhte Myen gan mai ka ai. Raitim, nang sha ra jang gaw ngai mai galaw ya ai, dai majaw nang a ningsha hpe ngai na laring gumra masum ning sa rem shangun na tai ai, shaloi ngai shi hpe laika sharin ya na. Ngu sai. Myen hkawhkam wa gaw grai na kabu ai hpraw nsam hte kasha Ma Gam hpe Miwa hkawhkam hkaw kaw tawn da sanu ai. Kraw hta myu langai ngu ai madu a laili laika n lu yang galu kaba wa na grai yak ai, ngaisha masum ning Miwa hkawhkam wa na gumra rem ya ai lam gaw n shut na re ngu myit la nna, shi gaw salung sala ni hpe woi rai nhtang wa mat nu ai.
Daihtawm, Miwa hkawhkam wa gaw Myen hkawhkam kasha hpe: "Nang laika lu la mayu ai rai yang, ngai a hpang kaw masum ning tup hkan ra ai hta n-ga, ngai tsun ai ga madat ra ai." Ngu sadi jaw let, galaw du ra ai lam ni hpe mung ja ja tsun lajin gadi da sai. Langai: Ra sharawng, tsawra ai myit rawng ra ai. Lahkawng: Na zen ra ai. Masum: Myi zen ra ai. Mali: Lani mi gumra lagaw hka 2000 hti du ra ai. Myen hkawhkam kasha nsa kaba shaw let hkam la nu ai. Laning mi a hpang, Myen hkawhkam kasha gaw gumra lagaw hka sha hti jin mat rai nna, Miwa hkawhkam wa hpe: "Hkawhkam e, ya laning mi du tim, nang ngai hpe laika n sharin ya ai gaw, ngai nta wa mat na ni ai." Ngu tsun jang, Miwa hkawhkam wa gaw: "Hkum tin, dai gumra du, gumra daw, sai hkang, du dai, sai dawng yawng hte ngoi ai nsen ni naw madat maram matsing, hti shaman ra ai." Bai ngu sai.
Shing rai, Myen hkawhkam kasha shani shanang gumra daw kaw lang ra aihpri sai dawng, sumri ni hpe ganing rai majaw, mahkai ai ni hpe hti, yu la, hkawhkam wa jawn ai gumra hpe dun let hkawnglawng dingsi ni ngoi ai nsen hpe madat maram, na la rai masum ning nga shatup nu ai. Daihpang, Miwahkawhkam wa gaw: "Nang e sharin ai laika sharin ma sai, dai gumra lagaw hka, hpri sai dawng, chyinghkyi ni hpe nhti nhtang lawulahta, gatantsa, mara machya di nna gumra lam hkawm nsen ni hpe bang nai pawng jahtuk la u." Ngu matsun dat sai. Shing rai, Myen hkawhkam kasha gaw Miwa mung kaw Myen laika hpe lu jahtuk pawng la nu ai.
Maten daini du hkra Myen laika gaw gumra lagaw hka zawn rai ai re nga ma ai. Myen hkawmhkam kasha madu a mungdan de du wa ai shaloi, hkawhkam hkaw na du gyi salang ni yawng shi hpe kabu kara hte hkap tau hkalum la ai hta n-ga, grai shakawn shagran ai hkrup nu ai. Madu a laili laika lu ai hpang, Myen hkawhkam wa gaw kabu chyeju dum ai myit hte chyeju htang kumhpa ngu nna, Miwa hkawhkam wa hpe masum ning lang na maidang gatsut shingna mali shagun u ai. Dai maidang gatsut shingna grai grai manyen tsawm ai majaw, shat lu sha si mai lakap sha ai kaw mahtang lang kau masai. Dai rai, Miwa gaw Myen e gara hku masu hkalem timung grai kam madat ai re nga tsun hkai chyai ma ai.
