GUMHPRAW LATSA
NHKUM YAW
Namwat mare na Mungji La gaw, Naseng gat kaw di kasha langai mari ngu nna gat yang ting lung lung yu yu rai hkawm nga yang, ga kaw gumhpraw latsa taw nga ai mu dat nna, agatsi sha sumbu kaw hta bang kau nu ai. Mungji La gat kaw hkawm nga yang, shat kan mung garu gara atit abung nga gatu machyi wa nna, gat yang hku nam dum tam let hkawm gayin machyi lung wa yang, gat baw kaw namdum langai mu dat nna kagat shang wa sai. Namdum dai gaw magawn mi gan gap da ai rai nga ai, Mungji La gaw loi san seng ai shara tam la nna, tin shapun hte dung bang wa sai, sumbu na mai sau shaw ai ngu yang, mi hta gun ai gumhpraw latsa mung bai shaw lawm dat nna, gumhpraw latsa dai gaw n-yak ai namdum nhkun de pya rai hkrat bang mat wa sai.
Gumhpraw nam-dum de hkrat galam bang mat wa ai hte nbung hpyi nga bai bung dat ai nga yang, gumhpraw dai gaw num ni a namdum nhkun maga de loi poi sit mat sai, raitim, Mungji La yu yu yang, lu matep hta shaw la na zawn sha rai nga nna, grup yin mada yu yang, masha kaga mung chyawm nhkawm nga ai, rai yang she, gumhpraw ahpre lahkat shaw la lu na zawn re shingna langai mi pyi ntaw nga ai majaw, lagaw lahkawng hpe lagram kau nna, ta hte chyan gum manaw shaw dat yang, gumhpraw mung lu masawp sai, rai yang, agajawng sha num namdum n-ga de nna, Mungji La a ta hpe aja wa magra tawn ya ai masha nga sai. Karai e, ndai gaw num lata she rai nga ai, num ndai mung gumhpraw latsa a majaw rai na sai, ngai a gumhpraw she rai yang, shi anga laban namdum shang ai jan la kau ya mayu ai gaw ngu nna, Mungji La aja wa gang dat yang, wawra maga de na num jan a n-gun mung ram taw nga ai majaw, nlu gang shaw la sai.
Mungji La jahtau dat ngu yang gaw namdum kaw bai rai, lama kaga masha e sa mu kau yang mung ntsawm dum rai nna, gumhpraw hpe aja wa manat tawn nhtawm, nang gang dat, ngai gang dat, zingret ret ai yan zawn gang galai noi nga masai. "Kadai ndang e garawt na jan wa rai i?Manang a gumhpraw she rai yang me. . . . "Mungji La a matu nga yang, matsan mayan she rai sai, ya sha kan machyi nna, hkum pyi akya nga hkra kan mase kau nga yang she, ta n-ga mi mung num namdum n-ga hta sa chyat mat ai hta n-ga, n-ga mi gaw madu a labu gang tawn rai, shi hkrai namdum kaw salat hte grit rai chya htingkaw magaw rawng nga sai. Mungji La shi mu hta ai gumhpraw latsa masha ni a ta kaw alaga shang mat na hpe sha myit masin nsi nna, nsa kaba shaw la kra rai galang bai gang dat ai nga yang, wawra maga de na num jan mung, chyu chyu ai mangai n-gun du hkra bai shaw dat ai majaw, Mungji La hpe gahtan she ahtu la kra gang galau dat sai. Mungji La a ya yang na hkrang wa ntsawm taw nga sai, shi madu hkrai pyi myit yu nna pawt mayu nga sai. Lama langai mi e sa mu yang gaw, shi hpe nam sa ai num ni a mai dang la-gu masawp shadu chyalu rai nga ai, madaw gaw shi a lata n-ga mi teng sha num namdum nhkun maga de shawn ladawn taw nga ai.
Mungji La myit yu njaw dum nna, akya nga mat wa ai ta hpe aja wa ari di kau nna, gumhpraw mung tat ya kau rai ai pang, labu sha galaw shalun la rai, num ni a namdum chyinghka lam maga de sa wa nna "Ndang e garawt na num nang gaw, sha naw pru wa yu rit! ai di pye la na. " nga sa pawt tsap nga sai. Mungji La namdum shinggan kaw grai na hkra la yu timung, num namdum de nna masha kadai mung npru wa rai mau nga sai, shang matsa shing nrai, gumhpraw shang gashun la ngu yang gaw, gumhpraw dai shi a re sakse bai nlu, myit yu yang nhtang de madu she mara bai tam sha na tai rai nna, gawm gawm nga ai myit hte gat yang hkan lahkawng masum lang grup nna gawam la ai hpang, shat kawsi wa ai hta lai nna, jan mung bai shang shadut wa rai, namdum kaw adawt shabawng kau ai gahtan sha masawp yu rai, di mung nmari gun lang ai nta wa mat sai. Myit hta ra ra yawm yawm nga ai Mungji La nta sha naw du shang bang wa ai hte madu jan gaw, kabu myi man nsam hte shi hpang de sit hkrat wa nna "Ning wa e, daini ngai chyawm gaw kam grai gaja ai. "nga tsun gahte dan sai. "Hpa mu pru a?" , "Dai hpawt nang pru mat wa ai hpang, ngai mung gat bai sa ai, gat baw na namdum nhkun kaw, la langai mi gumhpraw latsa ladawn jahkrat bang dat ai. . . . . ", "Nang. . . . . "Mungji La ta sharawt hpai nna, madu jan hpe aja wa pye dat na zawn nga ai myit hte lahkum kaw kya dung mat wa sai.
