HKRAI NAW YAN HKRAI GAM A MAUMWI

Tsawm Htum Shayi Ngu Ai Nga

Hkrai Naw Hkrai Gam Ngu Ai Pra

Moi shawng de dam lada ai shagawng bum langai hta hpunnu hpungam she gangu, majawm wahpang she hpungyawt nga ai. Dai nhprang maling hta akrung sinwa shagu asin amun nga, lamu de mada yang ninghkawng jan pyi n mu mada ai maling dinggram kaba rai nga ai. 

Dai maling kata hta nampu nampan amyu myu, namsi namsaw hkum sumhpa sawng nga ai rai nna, dusat dumyeng hte namji namchyoi hkum damyin ni mung pyaw chyai shanu nga ma ai. Dai maling kaba kaw hka kaba langai mi lwi nga ai. Dai hka gaw krung sinwa, lunghtawn lungma law law hpe jahtau marawn lai kau da nna, pa layang maling kata e nsa kaba shaw let azim sha lwi mat wa nga ai. 

Bum lagaw hka kau yang, gahtawng langai mi nga ai. Dai hka gaw gahtawng makau kaw lwi gayin nna, la-ing kaba langai byin nga sai.

Dai gahtawng hta tsawm dik ai shayi num sha langai nga ai. Shi gaw hpraw nsam tsawm la ai hte gawng shingyan htaphtuk dik ai shayi hkawn sek rai nna, brang zet shadang ni shi hpe mu yang, bai n gahtap yu ai n nga ai. Hkrum shaga yang n dum shami aten shalai kau chye nga ai hte maren, yawng yawng e sharawng marit nga ai da.

Dai tsawm shayi gaw asak ram ram kaba hkra myit dik ai shadang brang n mu nna, num rai n wa ai shayi hkawn tai nna Naw nga nga u ai. Dai ten hta shi gaw baren la-ing makau kaw yi galaw u ai da.  Dai yi kaw kahkum kumgyin, shagyi hkauyu hkai nmai hkum sumhpa hkai tawn nga u ai.  Htawngseng mangai du wa ai ten hta, htoi hkye tsawm ai kahkum kumgyin pu ni hte tsit lali ai mam nhpun ni gayau gaya rai tsawmhtap la nga ai. 

Yi ya kaw mam myin wa ai nngawt bat hte kahkum kumgyin pu ni manam pyaw ai sama gaw yi ya ting pri rai nga sai. U numji numchyoi ni kabu gara hte yi shingNawm hkan pyen shinggrup hkawm nga ma ai. Numroi gatnyen hte palam la ni mung yi ya hkan hkai nmai pu ni tam chyu let pyen htinglet hkawm nga ma ai.

Shayi num sha gaw shani shagu u gawn machya ntsa na kahkum byap shingnyip kata kaw sa dung nna u gawn let kabang ri sa ri ri rai nga ai.

Dai yi makau na la-ing kaw baren shadang langai nga ai. Yi de na manam pyaw ai nngawt bat ni gaw baren htingnu kaw du hkra mawng shang wa ai majaw, baren shadang wa mung htingnu kaw rawng nga n zim nga ai hte maren, jahpawt manap jan nnan shui rai wa ai ten hta, lapu kasha tai nna yi ya hkan na punghkaw hkan lung man hkawm, shani aten hta gaw numroi gatnyen tai nna u gawn machya makau hkan kahkum kumgyin pu ni tam chyu hkawm re nga yang, dai tsawm dik ai shayi num sha hpe mu chye la nu ai da. Shi a tsawmhtap ai gawng shingyan hpe mu nna, baren shabrang wa yu marit nga sai. Shingrai shani shagu u gawn machya de hkrai gahkrang, shayi num hte hkrai sa chyai chyai rai nga ai. Galang lang gaw numroi gatnyen tai, galang lang gaw palam la tai nna hkan kap nang nang rai nga ai. raiyang shayi num sha gaw shi a hkum hta hpa byin wa ai shi n dum, u gawn machya hpe chyu marit mat nga ai.

Dai shayi num sha gaw u gawn nga ninglen yup hkrai yup mayu, gawng ri ri nga yang mung yupsha shamui hkrai mu wa rai nna, galang lang gaw grai pyaw hkra yup malap mat wa wa rai nga ai. Galang mi na shi yup nga yang, yupmang hta tsawm la ai shabrang kunglung langai u gawn machya de lung wa nna, shi hte htep sha rai dung let manyi sumsai hte pyaw hpa lam amyu myu tsun jahta chyai nna, shi mung n dum shami aja wa manyi tat dat nga ai. Dai shabrang gaw grai tsawm ai nampan di la nna shi hpe kumhpa ai, shi gaw kabu ai hte gaya ai hte rai hkap la ai mu u ai da.

Dai hpang kaw nna dai num sha gaw mali shata gu, shangai nhtoi du nna, shangai chyinghkai dat u yang, shadang sha marun shangai la sai da. Dai shadang sha yan gaw gawa n mu ai kasha rai nna, shawng nga ai hpe Hkrai Gam ngu, hpang nga ai hpe Hkrai Naw ngu wunchyen amying shamying ya sai rai.

Hkrai Naw yan Hkrai Gam gaw lani hte lani abawng alang rai kaba wa masai. Shata masum raiyang ga chye shaga masai, kanu gaw shannau hpe yu nna kabu nga sai. Mare masha ni mung shannau hpe yu nna, alawng po hkyem ai re nga tsun shajang nga ma ai. Shannau hta na Hkrai Naw mahtang grau kung grau zen, n-gun mung grau ja nga ai. Kahpu Hkrai Gam gaw hpa lam hta raitim, kanau Hkrai Naw hpe n dep nga ai, n-gun mung Hkrai Naw daram n ja, masin mung Hkrai Naw daram n kaba nga ai. Raitim Hkrai Naw gaw myitsu nga ai rai nna, kahpu hte ga-li ga-law n nga ai sha, ganang sa tim rau sha yep yep rai gaNawn mazum chye nga ai.

Ya Hkrai Naw yan Hkrai Gam gaw galu kaba wa nna, chye myit chye mang wa ai shaloi, masha ni hpe yu yang, kanu gawa hte hkum hkum num num rai, shannau gaw kanu sha lu, gawa ngu ai mi n mu yu, myit yu magang mau nna, kanu hpe "nu, annau a wa gaw kadai re" ngu san yang, kanu gaw "ma yan e, nannau gawa n lu ai, nannau hpe nu hkrai bau kaba ai re" ngu htan u ai. Shingrai kasha yan mung mau let akatsi ngu masai.

Shannau kaba wa magang mare hkan na ma ni gaw shannau hpe lagu shatan nga ai, langai ngai gaw "gawa n lu ai jahkrai ma" nga, bai langai ngai gaw shannau hpe mu jang "nannau a gawa gaw rang" nga san shala nga ai. Dai rai Hkrai Naw gaw gaya ai hte masin pawt ai hte rai kanu hpe "nu, annau a wa hpe lawan tsun dan rit" ngu wa shagyeng nga ai. Shaloi kanu gaw kaning n chye ngu nna "ma yan e, nannau ningwa hpe mu mayu sayang gaw le baren la-ing makau na yi de sa yu masu, ngai ningnu gaw dai yi na u gawn machya kaw u gawn nna sha nga ai raiyang, n dum shami nannau hpe shangai la ai re. Ningwa kaning re ai ngai ningnu mung n mu yu nngai”ngu sai da.

Hkrai Naw yan Hkrai Gam gaw kanu matsun ai hte maren, baren la-ing makau na yi de sa yu ma ai, raiyang hpa lama mi hkawm pru ai mung n mu, lahpawt mi na jan pru wa ai ten hta baren la-ing kaw baren langai pru wa ai sha mu ma ai. Shingrai kanu hpe wa tsun dan jang, kanu gaw "ma yan e, baren hkawm yang gaw, ningwa gaw baren she nre dawng, nu gaw hpa mung n chye mat ni ai" ngu u ai.

Dai hpang Hkrai Naw yan Hkrai Gam gaw yi de bai sa nna, baren hkawm ai mu jang "baren du e, annau a wa gaw kadai re ta? Tsun dan rit" ngu san yang, dai baren gaw ga lahkun mi mung n htan ai akatsi sha hka de gumhtawn shang wa mat sai da. 

Dai kaw nna Hkrai Naw yan Hkrai Gam gaw masin pawt sai "baren ndai hpe gaw gyit dun tawn nna she san yu ga. Hpawtni kaw nna gaw baren gyit na hpri sin-yu she hkyem saga" nga myit tawn masai da.

Hka Kau Kaw Ndup Dup

Baren Du Hpe Rim Anut

Ya Hkrai Naw yan Hkrai Gam gaw baren gyit na hpri sin-yu dup ga ai nga, hka la-ing makau kaw kinsum gap la hkra rai ndup dup bang wa masai. Hpri dup ai nsen wa "dun dun dan dan" hka hkin-gau pyi gyi na zawn she nga, hka hpunla mung hprim hprim she rai wa hkra, nnang Nawn Nawn ai zawn she nga sai. Hpri hkyep gamang wa ai gaw hka ga-ang de "shaw" she nga, baren wa gaw hpri ningsing n rawn ai amyu rai nna, abaw chyu sin, akraw hkrai galau, baren htingnu kaw kaning di n nga lu mat nga ai. 

Baren du wa masin pawt nna, salung sala ni hpe shaga gahkyin sai, chyahkring mi raijang, hpyen du jaubu ni yawng du hkum masai. Sumrawn ja gam, samyin tang gun, chyahkan jaubu, hkatsu salang, warat yan walai hpyen du agyi ni yawng du hkum masai. Baren du wa gaw "ya nanhte sa yu masu, hka kau de "dun dun dan dan' nga ai hpa rai kun? Hpyen mahkoi du sai kun? Ri sanat lawan hkyem lajang mu" nga aming jahkrat nu ai. Shaloi warat hpyen du wa "du wa e, hpa baw hpyen du ai mung n re, ngai shinggan de pru hkawm let sa yu yang, jahkrai ma lahkawng ndup dup nga ma ai" nga jang, baren du wa gaw "htaw lawan wa shachyut kau masu, dai kaw ndup hkum sa dup ngu masu" ngu aming jahkrat sai. Ya chyahkan jaubu wa shawng rawt ngoi, hkandau galaw garang la hkra rai rawt share pru wa sai.

Chyahkan jaubu wa gaw tsaw tsaw rap rap wa rai, lagaw gaw marawng marang, shinglang galu galang rai, gramgri gramgri rai kagat sa wa let, Hkrai Naw yan Hkrai Gam a makau kaw du ai hte“htawra kadai jahkrai ma yan re? Masin dai daram wa kaba ai gaw, si mayu ai re ni? Dai kaw ndup hkum sa dup mu, du wa baw gara machyi ai da" ngu jang. Hkrai Naw e "hpa baw du wa, hkawhkam wa raiyang rai, nang de pru wa yu na da ngu wa tsun su" ngu hkap share dat nu ai. Shaloi chyahkan jaubu wa gaw hkandau sharawt hpai nna htim abraw hkrat wa ai, Hkrai Naw e hpri sumdu ret, chyahkan shingma she brep di adup lagyaw tawn jang“aka law, n rai sai law”nga jahtau let lahkap pyi n lu shapyan ai ndi nda rai hka de kagat bang mat wa sai. Shingrai chyahkan gaw ya du hkra pyet pyet rai nda hku hkawm mat ai re da.

Chyahkan jaubu wa madai hte hum nga shang wa jang, hkatsu salang wa bai rawt sai. Hkatsu salang mung grai pawt ai hte hka kau de hkroi, du galu gaw shawn shawn rai share hkrat wa nna "htawra jahkrai ma yan, dai kaw ndup hkum dup ngu yang, du wa baw ganan machyi ai da, ndup shara lau htawt mu" nga jang, Hkrai Naw gaw "hpa baw du wa du wa! Nanhte a du wa hpe lawan pru wa na da ngu su, n pru wa jang, hka hkin-gau adup gyi kau na re da ngu wa tsun su" ngu bai hkap share jang, hkatsu salang wa gaw n-gup hkumbawp she lawu hkra pawt ahprup wa let, ta lahpan kaw mayen she sap la hkra rai htim hkrat wa yang, Hkrai Naw grau lawan, ju jahkye tawn ai hpri lakap ret rai hkap lakap shahkyek tawn nu ai. Shaloi she "aka law, she dat dat rit law, wa tsun dan na law" nga jahtau wa nna dat kau dat jang, hkum ting wan hka hkrai ahkye rai kagat gadau mat wa sai. Shingrai hkatsu gaw ya du hkra ahkye rai wan hka hka mat ai re da. 

Ya hkatsu gaw gahtan hkrai gahtan, kawhtawn hkrai kawhtawn shang wa yang, baren htingnu pyi rai n du ai kaw nna nsa hte he nga "du wa e, n hkraw ma ai law, nang sha n pru wa yang gaw hka hkin-gau adup gyi kau na rai ma ai da" ngu jang, baren du wa masin grau pawt wa nna, myi galaw shagan dat, akaw sharawt hpai rai gahkrang hkawm nna, warat hpe bai shangun dat nu ai. Warat gaw manang yan hpe hkap shakrip dat ai mu nna, loi maja maja rai, hka kau mayan hku hpungyawt ningwan hkawm nna "jahkrai ma yan e, ndup shara lau htawt mu law, du wa baw gara machyi ai da" ngu jahtau tsun ai ga sim n sim raiyang, Hkrai Naw wa hpri lakap ret rai "hpa baw du wa du wa, pru yu she ngu yang" ngu hkan matep dat yang, warat gaw lawan ai rai nna, hka de nhtang chyung rai shang mat wa ai hte Hkrai Naw mung grau bai lawan hpri lakap hte shawn hkan di dat yang, warat a ningmai hkan matep di ya sai da. Shingrai warat gaw ya du hkra ningmai wahkram mat ai re nga ma ai.

Ya warat gaw ningmai machyan shamat kau nna, gadau shang wa jang, walai wa bai share lung wa sai. Walai mung manang ni hpe yu nna, maja let hka kau de pyi n pru kui ai baw daw sha shakra nna "jahkrai ma yan e, ndup shara lau htawt na da law, du wa baw gara machyi ai da" ngu jahtau tsun nga yang, ga tsun htum n htum re hte Hkai Naw wa hpri sumprang ret rai shawt shawt di hkan achyo dat yang, walai a ladi ndaw hkan achyo jahpye kau dat ya sai da. Shingrai walai gaw ya du hkra ladi ndaw e sumprang hte ashawt hka hka mat ai re da.

Ya walai ladi jahpye kau nna bai pru wa jang, samyin tang gun bai rawt mat wa sai. Samyin tang gun mung grai maja let, nlung kaw shingbyi nna "htawra jahkrai ma yan e, ndup shara lau she htawt mu law, du wa baw gara machyi ai da law" ngu jahtau marawn nga yang, Hkrai Naw wa hpri dup sumdu ret rai "hpa baw ndup shara htawt, nanhte a du wa hpe pru wa yu she ngu yang me" ngu hkan adup dat yang, samyin a baw hkan adup apyet kau ya sai. Shingrai samyin gaw ya du hkra baw pyet pyet rai mat ai re da. 

Shingrai samyin tang gun gaw baw pyet pyet rai mat nna, baren htingnu du wa tim ga pyi n wa lu shaga ai she wa dung shamyet mat sai. Shaloi baren du wa gajawng nna, rawt gadau wa sai. Chyahkring sha lamu nyip wa, marang kaba htu wa rai nna, hka tung hpungnung wa sai. Hka leng hta wa ai gaw hka hkin-gau kaw "bung e bang e" nga wa ahtu taw nga sai. Hkrai Naw yan Hkrai Gam a hpri dup kinsum hta mung hka hpunla hprwi hprwi rai ganoi noi gun hpai mat wa na zawn she rai wa sai. Hkrai Naw gaw hpri dup sumdu hkyem, mayoi sumprang lang rai la nga yang, nbung wui wui nga let hka hpunla galang hprwi rai wa ai hte baren gumtsawt pru wa ra ai. Galu de nga yang lalam sumshi daram galu, kaba de nga yang kaba hpunnu zawn marawng, pungding jawban she galam ai, ta nga yang htingra lahpri hta grau magra, n-gup kaw akaw mung kra, myi tum gaw tauba si daram kaba ai baren manggang gumhtawn pru wa ra ai. Dai myi grip mi na laman hta Hkrai Naw galang tsat raiyang, baren ladi kaw gra chyit, mayoi sumprang hte hkrawn hkrawn, ahpri sin-yu hte kyit kyit, gang sharen tawn sai. Baren gaw bukbak hkrai bukbak, gadau hkrai gadau "dun she bang she" nga hta taw nga sai. Hkrai Naw yan Hkrai Gam gaw jawm gang shingdang tik tik, akawng de gang magyi mat wa, hkaraw de dun gayin mat wa, nhkap de gaw gumshut mat wa, ganang du ganang hpri sin-yu n tat ai hkan gang tik tik rai nga masai. Raitim hpun pawt kaw gyit dun yang, hpun pawt gang baw galang mat wa, nlung kaw gyit dun yang, nlung chyai galau mat wa, bum kaw gyit dun yang, bum mung gyi ru mat wa rai, hpun daw wa ai “chyep”she nga, nlung galau wa ai "wum”she nga ngoi gadu nga sai. Dai rai Hkrai Naw yan Hkrai Gam gaw kaning n chye di nna, hka kau na numri hpun kaw gyit dun tawn jang, lahkawng masum lang abrut yu yang, wam wam nga n shamu lu mat sai. Shaloi she baren gaw myiprui si raw, nsa kaba shaw let "ma yan e, she raw dat marit law, galaw ang ai hte galaw na law”nga tawngban nna, Hkrai Naw yan Hkrai Gam hpe ja shingwoi mi ya nna, kasha masat la sai da. Dai rai, Hkrai Naw yan Hkrai Gam mung hkyamsa jaw nna, baren hpe hka numri hpun kaw nna raw dat manu ai rai.

Dai hpang Hkrai Naw gaw ntawng nhtu hpye, nhkrang kungli hpai, Hkrai Gam gaw ja shingwoi gun rai nna, hka kaw langa wawn shachyo jawn nna chyai hkawm shatai yo yu mat wa ma yang, baren gaw Hkrai Naw yan Hkrai Gam e gyit dun ai hpe myit n pyaw nna, shannau hpe bai hkan gyam kau na myit nga u ai.

Ya Hkrai Naw yan Hkrai Gam langa wawn jawn nna yu wa nga yang, chyahkring hkring sha nbung hkrai bung, hka hkrai tung, hka leng hkrai hta rai nna, langa wawn pyi gale galau she rai wa ra ai majaw, Hkrai Gam gaw hkrit nna kanau hpe "kanau e, hka kau de lawan she pru mat wa saga" nga jang, Hkrai Naw gaw "hpa hkrit da nu, kaning rai wa ai mung Naw yu yu ga" nga let, wawn ntsa kaw nshang madi kau nna tsap nga yang. wawn ntsa kaw hka leng hprwi hprwi rai wa ai hte baren langai wawn ntsa kaw nda hpat rai rawt gumtsun pru wa ra ai. Shaloi Hkrai Naw gaw gajawng ai lata ntawng nhtu hkret gahtam numrat dat yang, baren mung lahkawng hkrawng, langa wawn mung ga-ang e tek hprut rai daw garan mat wa sai. Dai rai Hkrai Naw gaw ntawng nhtu hpye, nhkrang kungli hpai rai hka-nam maga de yu mat wa, Hkrai Gam gaw ja shingwoi gun nna hka-hku maga de lung mat wa nna, maling mala, krung sinwa hkan nga hkawm mat wa sai da.

Hkrai Naw Hka-nam Mung Hproi

Nhprang Matse Sat Jahkoi

Ya Hkrai Naw yan Hkrai Gam hka-hku hka-nam rai kaga hkawm mat wa ai hpang, Hkrai Naw gaw langa wawn daw jawn nna, hka-nam de yu hkrai yu mat wa yang, hpunggaw gade lai, bum lang gade tawt ai pyi n chye sai. Dingyang yu hkrai yu mat wa yang, shara langai mi kaw hka zahpo sumpum jawng nga ai ntsa e langa wawn wa mara mat jang, hka kau de pru wa nna, nam mali mala de shang mat wa sai. Shingrai hkawm hkrai hkawm mat wa yang, kawsi jang namsi namsaw tam di sha, yup mayu jang lungpu kata hkan shang yup la rai nam maling mala hkrai ashep, hkaraw nhkap hkrai tawt mat wa sai. 

Lana de mi na jan shang n shang re ten hta, kawng marawn langai kaw tsap nna mada dat yu yang, mare buga langai mi hpe mu mada nu ai. Dai mare hta hpun maling htingrum ai kata kaw nta nchyun law law kra nga ai mu nna, myit hta kabu kabu nga let hkawm shang wa yu yang, mare ting akatsi gatsang, masha nga ai shingran n ran, gui wau ai mung n na nga ai. Masha n nga ai kun ngu mare ting shang gawam hkawm yu yang, nta langai mi kaw wan nyipla nyipla rai tu ai mu nna hkawm sa wa let "e, nta madu ni e, yi nga nga myit ni? Chyinghka hpo la marit law”ngu shaga yu yang, nta madu salang wa gaw chyinghka loi galap hpaw nna, hkum daw mi sha shakra let "e, nang kadai rai nta? Masin dai daram kaba ai gaw, ningsin sin wa sai, nhku de lau lau shang wa rit, sharaw nhprang ju ai" nga tsun ai. Shaloi Hkrai Naw gaw nhku de shang bang wa yu yang, num sha shanwa hkrai rai nga ai hpe chye u ai. Dai num sha gaw gawng shingyan htuk, ga maNawng pyaw la ai num sha rai nga ai. Num sha shanwa gaw sharaw hkrit nna myit pu rawng nga ai re majaw, Hkrai Naw hpe mu jang, uhkai ni u kanu hpe mu tam ai daram kabu nga ma ai. Shingrai Hkrai Naw hpe "myitsu e, ndai ga gaw sharaw nhprang grai ju nna, masha law law rim sha kau sai. Mung ting masha nli pyi htum ma daram she rai mat wa sai. Anhte a nta na masha hpe mung sharaw e rim sha kau ma ya nna, an wa hkrai sha ngam mat saga ai" ngu byin ai lam tsun dan nga ai. Dingla shanwa gaw tsun dan magang myiprui si hkrat wa ai raw raw rai nga ma ai. Shaloi Hkrai Naw gaw "hkum hkrit mu, ngai gyam sat kau ya na. Ngai gaw hka-hku ga de nna du ai rai nngai, ngai ntawng nhtu hte nhkrang kungli lu ai, dai sharaw galoi yang du pru pru raia ta" ngu san yang, dingla shanwa gaw "shana shagu ningsin rim, hpatsip hprim re hte du pru pru re" nga tsun mu ai.

Gaja wa dai shana Hkrai Naw sa hkap nga yang, ningsin nnan rim nga wa ai kaw nna, maling de madaw dingshan htekhtak shara ai na lu sai. Kawa tawng gabye grawp ai mung grawp she nga nga ai. Sa wa re ra ai ngu yu nga yang, shata jan dan n dan re kata kaw marim mangam re ai sharaw nhprang pru wa ra ai. Myi gaw ahkye rai, n-gup mung mahka tawn, akaw mung galu galang re sharaw hkawm pru wa ra ai. Dai sharaw gaw masha bat manam ai na nna, shara magup manam hkawm wa yu, ahpre hkawm wa yu rai wa sai. Shaloi Hkrai Naw gaw nhkrang kungli yet sha shachyen la nna, atsawm sha shading la hkra rai gap bun dat yang, hpadip kaw nan lup rai nna, dai kaw nan galau agrawp lashan wa sai. Hkrai Naw ntawng nhtu hkret, galang bai gahtam dat yang, lahkawng hkrawng rai sai she hpin-ya jawng mat sai. Shingrai dai shana gaw dai sharaw nhprang hpe lu sat kau nna, shanhte masum gaw apyaw sha shaga chyai let nhtoi shalai masai da.

Hkrai Naw e sharaw nhprang sat kau ya lu sai majaw, sharaw hkrit nna nhkun hkan lagyim rawng ai ni pru wa shajang, kaga shara hkan hprawng hkawm mat wa ai ni mung bai nhtang wa shajang rai ngwi pyaw lu masai rai. Shingrai shanhte gaw Hkrai Naw hpe shagrau sha-a, hkungga lara let mungdan hkawhkam galaw u, ra ai tsawm shayi lata la u ngu masai da, Hkrai Naw gaw shi nnan du manam ai nta na shayi num sha hpe myi sai yu htuk nga ai re majaw, dai shayi num sha hpe lata masat la nu ai da. Shingrai dai mare kaw tawng marang ya mi nga la nna, lawu hka-nam mung de kaning re matse labye mi Naw nga ai nhten nga bai rawt hkawm mat wa sai. Shi a tsawra jan hpe mung n hkru matse labye yawng hpe sat shamyit kau ai htawm she bai wa woi la na ngu shakram kau da nu ai. Mung masha ni yawng gaw nbaw nnyeng, udi tsa hku hte hkan hkungga shakram dat shajang ma ai. 

Ya Hkrai Naw gaw hka-nam mung de dingyang bai hkawm mat wa yang, bum jahku lai kau da nna, mare buga langai kaw bai sa du sai da. Chyinglaw aten hta, tsan tsan kaw nna sa yu dat yang, mare kaba langai gaw she rai, raiyang nta nchyun hku wanhkut mawng ai mi n mu, masha langai mung n hkawm pru nna, mare kata de hkawm shang wa yu yang, mare ting akatsi gatsang, masha nga ai shingran mi n ran, hkakrik hkadawn chyu sha she garu nga ai da. Mare shingNawm de hpun kaba tu jawng, mare kata de hpun lap hkrai hkrat jawng, hpun lakung mung she daw jawng, nta shangu ni shanut shanat rai, nbung laru lai ai zawn, u ahpre ai zawn, n hkru damya lai ai hpang na zawn rai nga ai. Shingrai Hkrai Naw gaw shi hkrai sha mare ting shang gawam hkawm wa yu yang, hkin-gau yang chyinghka zawn re mi mu nna sit sa wa yu yang, masha dum dum nga shaga ai zawn nga ai mi na dat nna, atsawm galaw madat yu yang, dai chyinghka gaw nyau pyi n shang lu na daram hpun si hpun tawng hte kum shachyip tawn ai rai nga ai. Hkrai Naw gaw shinggan kaw nna "e, nhku de dum dum nga ai gaw masha wa re ni" ngu shaga dat jang, nhku kata de nna "e, anhte wa shaga rawng nga ga ai law, nang kadai wa rai nta? Nang hkrai hkum hkawm law, palawng sanam ju ai law, lani mi masha langai ngai rim sha mat wa wa re majaw, anhte pyi hkrit nna ndai kaw lagyim nga ga ai law" nga htan nga ai. Shaloi Hkrai Naw gaw "e, nanhte hkum hkrit mu, ngai gap sat kau na, katawng sat kau na. Ngai ntawng nhtu lu, nhkrang kungli hpai nngai. Palawng sanam galoi ten hta du pru pru re sha tsun dan marit" ngu jang, dai masha ni gaw "jahpawt de du ai law, jahpawt wa-ka hkun ten hta du pru pru re law" nga tsun dan masai da.

Hkrai Naw gaw dai shana dai kaw na masha ni hte shaga chyai nna, hpang jahpawt jau jau kaw nna, nhkrang kungli hpai nna la nga sai. Shingrai hkap nga yang, chyinglaw tsan du n du re hte nbung kaba zawn nga ai mi bung lai wa, lamu mung nyip wa rai "wut wut" nga ngoi gadu wa ai na nna lamu de mada dat yu yang, palawng sanam du ra ai. Dai shara hta gaw hpunnu hpun-gam she gangu nga ai hta n-ga, hpun shagu hta jahku hkam kaba ai maidum ru ni ahkri nga ai majaw, palawng sanam hpe ya sha shingga kau kau rai atsawm n mu hkraw nga ai rai nna, Hkrai Naw gaw nhkrang kungli htawt shading htawt shading rai nga ai. Palawng sanam gaw pyen magang nyem wa magang rai, Hkrai Naw mung nhkrang lungli shachyen ai dingyang rai, loi hkring dai hpun lakran hku lai wa ai hte hpre di dat yang, singkaw maga mi htawk hprang, hpun ndung hku pyen gahprup dawyin mat wa nna numru sumwum kaw wa dung lagyim mat sai. Dai maidum ru asin amun wum htinggrum nga ai re majaw, palawng sanam dung ai mung n mu mada nna kaning di n lu sat shakre sai da. Shingrai Hkrai Naw gaw ntawng nhtu hte maidum n azat hkrai azat shajawng kau nu ai. Dai rai lani nini jan e hkraw kyip mat wa sai re majaw, palawng sanam hpe adan sha bai mu nna, Hkrai Naw gaw amanu sha gap bun dat yang sinda kaw nan lup rai ga de hkrat gahprup yu wa ra ai. raiyang rai n si nga ai re majaw, dai yang e numhpu hte dun, hpun dingshan she mawng, lungdin lungsha she poi jawng hkra gahprup hkrai gahprup nga sai da. Dai rai Hkrai Naw gaw ntawng nhtu hte gahtam hkrai gahtam, azat hkrai azat bang wa ai, galang gahtam dat yang lagaw lahkawng htawk hprang, lahkawng lang gahtam dat yang singkaw hprut, masum lang gahtam dat yang adu hprut, abaw hpyai rai sai da.

Ya palawng sanam sat kau lu sai nga ai shiga gaw mung ting chyam mat wa sai. Mung masha ni garu hte chying, lahpok hte pre nga, Hkrai Naw hpe sa shakram ai hkrai, shakawn shagrau ai hkrai rai shajang nga masai. Shanhte gaw Hkrai Naw hpe“ndai mungdan uphkang u, tsawm ai shayi num nang lata la u”nga masai. Raitim Hkrai Naw gaw lawu hka-nam mung de Naw du hkawm na, n hkru matse labye sat jahkoi kau jang she bai nhtang wa na, tsawm shayi mung shaloi she bai wa lata na ngu kau da nna, lawu hka-nam mung de dingyang bai matut hkawm mat wa sai da.

Bum jahku bai tawt kau da, hkaraw jahku bai lai mat wa, maling chyinghkring hkrai ashep lai mat wa, mung langai kaw bai sa du pru sai da. Gahtawng ninghtawn shagu nta law law gaw nga, raiyang shang hkawm wa yu yang, akatsi gatsang, gahtawng mare hkan nam hkrai shim shim, masha nga ai zawn n rai, nat gawam na shara zawn re hkrai. Shara magup nam gayen ai hka hkrai hkrai, sharut gyi ai zawn gaw rai,lapu ningsing hkrai wa wa, ningshung si hprwi hprwi nga ai shara she rai nga ai.  

Shingrai Hkrai Naw gaw shi hkrai sha mare ga-ang hkan Naw gahkrang hkawm nga yang, dingla langai hkrit hkrit rai hkawm mat wa ai hkan mu dat nna "e, wora myitsu wa nang hpa rai tin tin rai hkawm, hkrit hkrit rai hprawng nga nta" ngu san jang, dingla gaw mau mau rai gayin mada yu let "hkawp myitsu e, nang kadai wa rai nga nta? Nhkrit nkang rai abui asi sha hkawm nga ai gaw! Sa sa, lawan she hprawng ga, ndai ga lapu nhprang nga ai, masha mu n mai, mu ai hte galang ta ma-ut kau kau re. Masha hkrai mayu kau kau re majaw, anhte hkrit nna nhkun kata hkan she lagyim rawng shajang nga ga ai”ngu tsun dan u ai. Shaloi Hkrai Naw gaw dingla wa hpang de galaw sit hkrat wa hkra rai "hkawp myitsu e, hkum hkrit mu, ngai ntawng nhtu lu ai, nhkrang kungli mung hpai ai, lapu nhprang hpe ngai hkap sat kau na, hkap katawng kau na. Dai lapu nhprang galoi aten hta pru ai sha tsun dan rit" ngu jang, dai dingla gaw mau ai hte rai "e, sat kau lu yang gaw she sat kau ya rit law, lapu nhprang gaw jahpawt jan nnan shui rai wa ai hte sa wa wa rai ai, manu mana kaba ai re”nga tsun dan sai.

Hkrai Naw nhkrang kungli hpai nna hkap nga yang, gaja wa jahpawt jan pru wa ai chyahkring mi re hte mare shingNawm hkaraw nhkap de“chyep” she nga, "grawp" she nga shara wa ra ai. Hpun kaba daw agrawp wa ai zawn gaw nga, nlung kaba chyai galau yu wa ai zawn gaw nga, mu mada na zawn gaw nga, mu gaw bai n mu rai atsawm sha yu nga yang, punghkaw zawn re mi kra wa, hpunnu zawn re mi galang wa nna atsawm bai galaw yu dat yang, lapu nhprang a baw wa rai nga ai. Ningmai gaw wora hkran bum kaw Naw hprawhpra shara nga ai. Lapu nhprang gaw mare de baw shadap nna shang hkrat wa ra ai. Myi grip mi raiyang, myihtan tu kashawi wa ai zawn, wan numya gapya hkrat wa ai zawn, shinglet shaw dat yang hpri sin-yu abya wa ai zawn, myi gaw le le, shinglet gaw lam lam rai shara magup asoi yu yu rai gumtsun hkrat wa ra ai. N-gup hku ahprup dat ai hkumbawp gaw saiwan zawn she mawng htinggrum wa nga ai.

Hkrai Naw nam sumwum kata kaw lagyim nga nna, mada yu nga let "masha sha ai lapu nhprang nang, daini gaw hkrup na nit dai" ngu let nhkrang kungli yet sha shachyen la nna, lapu baw kaw nan shading nna gap bun dat yang, myi tum langai lawk hprang rai sai. Shaloi lapu nhprang gaw baw grau shadap nna htawt gamyet htawt gamyet rai hkrat wa ra ai. Hkrai Naw rawt ngoi, ntawng nhtu hkret, gahtam hkrai gahtam chyai bang wa sai. Lai wa sai aten hta baren pyi rim anut kau yu sai la rai nga ai majaw, gasat magang ja magang, gumjawt magang tsaw wa magang rai wa sai. Pai de gamyet wa yang, hkra de yen mat, hkra de gamyet wa jang, pai de yen mat rai, chyan nna azat, gumjawt nna numrat, lapu sep gaw digap kabai jahkrat dat ai zawn nga, lapu ningmai kabat wa ai hpunlap she adup sharun ma nga ai. Ga karing she di, hpundaw punghkaw she daw agrawp jawng ma hkra gahtam hkrai gahtam azat, ningwut hkrai ningwut bang wa yang, lapu nhprang gaw lahkawng hkrawng, masum hkrawng, mali hkrawng rai mat sai.

Ya lapu nhprang sat kau lu sai shiga gaw mung ting na lu sai rai nna, hkrit nna hprawng hkawm ai ni mung bai nhtang wa, nhkun kata hkan makoi rawng nga ai ni mung pru wa rai nna Hkrai Naw hpe shakawn kungdawn shajang nga ma ai. Shingrai mung masha ni gaw Hkrai Naw hpe dai mung uphkang u, ra ai tsawm shayi mung lata la u bai ngu sai da. Raiyang Hkrai Naw gaw lawu hka-nam mung de Naw du hkawm, gumshem ai matse labye nhprang sat jahkoi lu jang she bai nhtang wa na, tsawm shayi mung shaloi she bai wa lata na ngu da nna bai hkawm mat wa sai da.

Lawu hka-nam mung de gaw n htum n ya, maling mala hkrai rai mat wa nga ai. Hkrai Naw gaw bum pa layang, hkaraw nhkap law law bai tawt lai kau da nna, hkawm hkrai hkawm mat wa yang, lani mi na jan du n du re ten hta, mare ninghtawn langai kaw bai sa du sai. Kaga kaw nna yu yang mare kaba wa rai nga ai, raiyang mare kata de shang hkrat wa yu yang gaw nta htingkraw hkrai, masha shaga ai mi n na, u goi ai shingran n ran, akatsi gatsang, nta shagu chyinghka hkinding ngang ngang re hkrai rai nga ai. Hkrai Naw gaw yu yu lung lung hkawm yu let“e, ndai ga gaw masha n nga ai buga wa re ni? Shingran gatsi la ai gaw" ngu jahtau dat yang, mare baw de nta langai kaw masha langai mi hkawm pru wa ra ai "e, nga ai law, nang gaw kadai wa rai nta? Lawan she lagyim ga law, sha lawa nhprang ju ai law" nga ra ai. Shaloi Hkrai Naw gaw dai masha a nta de hkre hkre sa wa nna sa shang dung let "sha lawa nhprang gaw galoi kaw nna nga sai re" ngu san u yang "maning moining hkan nna nga sai. Sha lawa nhprang dai du pru nna, shana masha hkrai shang garawt mat wa wa rai, asai gaw chyup sha kau, atsawp sha tawn kau da rai, ndai mung hta masha nli pyi htum na daram she rai mat wa sai, dai rai anhte gaw jan rai n shang ai kaw nna chyinghka hkinding shangang kau nna she rawng nga nga rai ga ai" nga tsun dan u ai. Shaloi Hkrai Naw gaw "nanhte hkum hkrit mu, ngai sat kau ya na, ngai nhkrang kungli hpai, ntawng nhtu hpye nngai" ngu u ai. Dai shana Hkrai Naw gaw jau jau kaw nna hkap nga sai. Loihkring ningrim kaba lai nsin sin, yuptung du n du re hte, mare shingNawm de nna "buk" she "bak" she nga shara sa wa ai na sai. Shata jan kata kaw Hkrai Naw atsawm hkap yu yu yang, dai sha lawa nhprang gaw masha zawn gaw rai, lagaw lahpan gaw hkuwawn daram pa, ta lahpan pyi nga magyi daram kaba, amun gaw tsung tsung, akan gaw pung pung, sawum sawam re mi gawam hkrat wa ra ai. Masha nga ai de ang ang sa wa, nta shakum hkan "dun”she nga sa lahtum hkawm wa sai. Hkrai Naw nhkrang kungli shachyen la nna, atsawm shading let hpre gap bun dat yang, sinda kaw nan lup, dai yang e gadau bukbak wa sai. Lahtum hkrai lahtum chyai wa, hkindit hkrai hkindit ayai wa nna, Hkrai Naw hpang de htip kap rai wa ra ai. Shaloi Hkrai Naw gaw ntawng nhtu hkret rai gahtam chyi bang wa sai. Htim hkrat wa nna azat, htingnut nna numrat,“kawk”she nga“kak”she nga, nta shakum ni hkindit malawng kau, hpun tawng hpun daw she mawng jawng sai. Hkrai Naw a ntawng nhtu wut raiyang, sha lawa a du hprut rai sai.

Ya Hkrai Naw e sha lawa nhprang sat kau sai nga ai shiga gaw mung ting chyam mat wa sai hte maren, hprawng hkawm ai ni mung bai nhtang wa, makoi nga ai ni mung pru wa nna, yawng gaw mau ai hte "ndai daram wa kung ai masha gaw alawng po ai she rai ang ai" nga shakawn shagrau nga ma ai. Shingrai Hkrai Naw hpe dai mung uphkang u, ra ai tsawm shayi mung lata u bai nga masai da. Raitim Hkrai Naw gaw lawu hka-nam mung de Naw rawt na, n hkru gumshem matse labye sat jahkoi lu jang she bai nhtang na, tsawm shayi mung shaloi she bai wa lata na ngu da nna bai hkawm mat wa sai da. 

Ya Hkrai Naw gaw dai shara kaw nna bai lai mat wa yang, gala nhprang ju ai mung kaw bai du pru sai da. Dai mung hta gaw gala nhprang chyu ju nna masha hkrai magra sha ai majaw, mung masha ni mung hprawng hkrai hprawng bra, makoi hkrai makoi bra, ngam ai ni mung marai langai hkrai n wam hkawm, nta chyinghka ngang ngang hkinding nna chyu nga ra rai, grai sadi maja let sha nga pra shajang nga ma ai rai. Ya Hkrai Naw gaw mare langai mi kaw shang hkrat wa yu yang, nta nhku kaw makoi nga ai masha e hkap mu nna “wora kadai rai nga nta? Nang hkrai hkum hkawm, gala nhprang ju ai, masha hkrai magra sha ai" ngu tsun dan ma ai. Shaloi Hkrai Naw gaw shanhte hpang de sit sa wa hkra rai "nanhte hkum hkrit mu, ngai ntawng nhtu lu ai, nhkrang kungli hpai ai, gala nhprang hpe ngai gap sat kau ya na" ngu u ai. Dai rai mung masha ni gaw kabu nna Hkrai Naw hpe "e, she gap sat kau ya rit law, dai gala nhprang gaw shani du ai, shani ga-ang yang du pru pru re ai" ngu tsun dan manu ai.

Gaja wa hpang shani Hkrai Naw gaw mare shingNawm kaw sa hkap nga sai da. Shingrai hkap nga yang, shani ga-ang du n du re hte lamu she nyip hkra re gala nhprang pyen hkrat wa ra ai. Dai gala myi gaw le le, du gaw shawn shawn ga de asoi yu yu rai, la malau mi rai htim hkrat wa ra ai. Shaloi Hkrai Naw gaw "ara rai sa, nang hpe sha la nga yang" ngu nhkrang kungli hte hpre gap bun dat jang, baw kaw nan lup, galang sawn rai hkrat agrawp si mat sai. Shingrai dai shani kaw nna, dai mung hta gala nhprang n nga sai majaw, mung masha ni hkrit ra ai lam n nga, ngwi ngwi pyaw pyaw hte galaw lu galaw sha lu masai rai. Dai mung na mung masha ni mung Hkrai Naw hpe dai mung uphkang u, ra ai shayi mung lata la u ngu masai da.

Ya Hkrai Naw gaw hka-nam mung tsawmra du hkawm kau da nna, sharaw nhprang, palawng sanam nhprang, lapu nhprang, sha lawa nhprang, gala nhprang ni sat jahkoi kau da lu sai majaw, ya gaw matse labye nhprang n nga na sai ngu myit pyaw ai hte dai hka-nam mung hkan mung masha ni hpe woi shakut let nga nga ai hte maren, ya gaw mung masha ni ngwi pyaw simsa sai, ngai mung kun dinghku shang sana, mi ngai nambat langai lata masat kau da ai tsawm shayi hpe wa woi la sana nga myit nga ai aten hta, hka-hku ga de nga hkawm mat wa ai kahpu Hkrai Gam hpe myit dum nna, ya daini ngai ndai daram pyaw nna she nga tim, ngai hpu gaw kaning re shara hkan mi she nga yak hkawm nga ai mung n chye nga, mung masha hte shi a tsawra jan hpe shakram kau da nna, hka-hku mung de bai rawt shamu mat wa sai. Shingrai mung masha ni gaw nbaw nnyeng, udi tsa hku hte hkan hkalum dat nga ma ai. Tsawra jan mung marawn langai gadang, abum langai gale hkra hkan sa dat nga ai.

Hkrai Naw Woi WaNawng Gasat Dang.

Hkrai Gam Hte Hka-nam De Bai Nhtang

Ya Hkrai Naw gaw hka-hku de kahpu Hkrai Gam hpe hkan tam ngu ntawng nhtu hpye, nhkrang kungli hpai rai mi na hpang lam hku tung tung lung hkrai lung mat wa sai. Hpang gara jang ntsin ja lu, kawsi jang namsi namsaw tam di sha, ashu ashan ni gyam sha rai, nsin nhtoi n masat ai hkawm hkrai hkawm mat wa sai. Bum jahku shi jahku di lai, hkaraw jahku shi jahku tawt lai mat wa yang, shawng de shannau hka bra mat wa ai shara kaw bai wa du pru sai da. Hkrai Naw dai yang na hka hpunggaw hpe yu nna matsing, hpun hpang wa hpang hpe yu nna shading let, ndai hku ang na sai nga hka-shi langai mi hku hkan nna lung mat wa sai.

Krung sinwa, maling kata e, san tsawm ai hka-shi langai "hpraw hpraw" nga lwi nga ai. Hka kau gaw woi langai mi ja shingwoi zawn re mi gun nna chyahkan hkwi hkawm nga ai. Hkrai Naw gaw hka kau de sit sa wa nna atsawm galaw chyan yu yang, shawng de kahpu Hkrai Gam gun mat wa ai ja shingwoi rai nga sai da. Woi wora gaw masha mahkoi wa she rai kun ngu nna "le ra hkri ma, dai hkaraw na hka n sung a ni" ngu shaga san yu yang, dai woi gaw gade nde mada yu nna, Hkrai Naw hpe mu jang, galaw azi yu shati let "sung sung tang tang, magyi ga-ang ang" nga htan nga ai. Hkrai Naw masin pawt nna, loi maja let "dai hka-shi n sung a ni ngu she san yang" ngu galang bai san yang mung "sung sung tang tang, magyi ga-ang ang, hi hi" ngu sha htan nna, hkaraw lakran de chyahkan bai manaw mat wa sai da. Shaloi Hkrai Naw gaw masin pawt nna“woi manya nang gaw annau a ja shingwoi gun nga da nna, ga san yang n chye tsun dan ai gaw" ngu lungdin hta kabai bun dat jang, baw kaw nan hpok, dai kaw nan si lashan mat wa sai. Shingrai Hkrai Naw gaw shat mung kawsi wa nga ai re majaw, dai woi hpe azat gapung sha kau da rai shannau a ja shingwoi sha hta hpye nna dingyang bai hkawm mat wa sai. 

Kawng langai bai hproi raiyang, nau ba wa ai zawn nga nna, hpun kaba nhpang langai kaw hkring sa shamyet dung dat u yang, hpun ntsa de nna pali shingmun pya pya rai hkrat yu wa ra ai da. Hkrai Naw rawt ngoi rai hpun ntsa de mada dat yu yang, masha langai mi hpun ntsa kaw dung nga ai mu nna "htawra kadai re”ngu dat yang "ngai Hkrai Gam rai nngai law. Ya nang gaw kadai rai nta”nga pru ra ai. Shaloi Hkrai Naw gaw "ngai Hkrai Naw rai nngai. Hpu e, ngai nang hpe hkan tam hkawm nga nngai”ngu htan u ai. Shaloi Hkrai Gam gaw“bai bai, ngai nau yi, ngai gaw nang gara hkan wa dam hkawm nga ai kun ngu grai hkan myit nga nngai" ngu hpu let, hpun ntsa kaw nna yu wa ra ai. Hpun pawt du ai hte kanau Hkrai Naw hpe shingdu aman gayin yu yu rai ja shingwoi hpye ai mu jang "ya ningrat hte hkrum sani”ngu san u ai. Shaloi Hkrai Naw gaw mau let "e, rat hte gaw n hkrum ai, lera hkaraw kaw woi myi hkyawk langai mi annau a ja shingwoi gun nna chyahkan hkwi nga ai hpe lungdin hte kabai sat nna gapung sha kau da sai" ngu jang, Hkrai Gam gaw "goi law, goi law, shut re sindai, ra re sindai law! Ya ningrat hpe wa hkala kau ai gaw, ngai kaning di sana rai" nga myipru si pya pya rai hkrap wa ra ai. Hpun ndung de woi kasha sumpum mung "kyik" she nga garu wa mara ai da.

Hkrai Naw gaw kahpu woi num hte nga mat sai re n chye nna sat shut sai re majaw, kaning n chye di nna "hpu e, hkum hkrap, hkum yawn sa, ngai hka-nam mung de shara mu da sai, num mung grai mu da sai, annau hka-nam mung de yu hkrat wa nna, nang kaning re num ra yang kaning re sa lata la u" ngu nyem u ai. Shaloi kahpu Hkrai Gam gaw "e, kanau e, ningrat gaw kahpu gayung law ai re lu, mayu woi ni na jang, annau hpe kaning nga wa na mung n dang chye sai" nga hkrit nna mau sha chye sai. Shaloi Hkrai Naw gaw kahpu hpe "hpu e, hpa hkum tsang, ngai ningnau wa nga ai, ngai htuk ai hku chye hparan ai" ngu nu ai. Dai rai Hkrai Naw gaw woi mayu ni hpe kaning di na bai sumru bang wa sai.

Ya woi num hpe sat kau ya sai shiga gaw chyahkring mi na lapran krung sinwa ting chyam mat wa sai hte maren, bum hkaraw krung ting na woi wanawng ni gaw langai hte langai, hpung hte hpung rai garu hte chyo nga sa wa mara ai da. Nkau gaw "ndai Hkrai Naw yan Hkrai Gam hpe gaw anhte yawng htim hkrat wa nna she sa jawm manat sat kau ga" nga, bai nkau gaw "hpun htum daw la nna she sa jawm kabai sat ga" nga sa jawm garu nga masai da. Hpun lakung hku gau ai gaw gau, numru hku Noi ai gaw Noi, aga hku hkawm ai gaw hkawm rai hkrit na zawn rai hkra Hkrai Naw yan Hkrai Gam hpe sa wang shinggrup tawn masai da.

Bai Hkrai Naw gaw shani ting hka-shi hkaraw hkan na nlung sa tam hpai gahkyin tawn nna, hpun chyahkraw mung tam hta gahkyin la rai, shannau shingbyi nga ai hpun pawt kaw wan wut numjang tawn, nlung hpe wanmang kaw htawm ju jahkye tawn nna, ya gaw rai sai nga ai hte woi mayu ni hpe "e, mayu ala ni e, daini nanhte a gajan hpe wa hkala hkra kau ai gaw shut ai lam rai sai, ra ai lam rai sai. Raitim adup na rai hkum myit mu, amya na rai hkum hkyem mu, ndai kaw grup rai dung nna she Naw jawm tsun ga, ra ai lam gaw galaw na re, ndai ja lahkum hkyem tawn saga ai, lungseng lahkum san tawn saga ai, lawan she sa dung marit" ngu marawn dat nna, shi mung lungdin lunghkye langai kaw lagaw sha galang kau rai dung nga sai da. Woi ni gaw masha lang ai rai shanhte mung lang mayu, masha dung ai lahkum shanhte mung dung mayu rai chye nga ai re majaw, Hkrai Naw lunghkye lahkum dung ai mu jang, shanhte mung dung mayu nna yan hkrat wa mara ai da. Shingrai Hkrai Naw woi ni langai mi du yang langai hpe wanmang na lunghkye hkap shaw ya nna "hkau ni, hkau ni, dung ga, dung ga" hkap ngu u ai. Woi ni gaw nlung kaw dung htit re hte maidang "chyo chyo" nga wa ai hte "kyik, kyik" nga rawt gahtan mat wa ma sai da. Dai rai woi waNawng wawa ni gaw maidang gapa jahpye kau ai hkrai rai nna madu sha gaw machyi dum ai hkrai, raiyang manang hpe gaw kaning ngu bai n chye tsun dan rai, hprawng lagyim mat ma masai da. Shingrai woi amyu ni gaw daini du hkra maidang krin mat ai re nga tsun hkai ma ai.

Ya Hkrai Naw gaw shani woi ni hpe wanmang kaw na nlung shaw ya nna, salat hte grit rai kyin bu nga ai re majaw, jahpawt daw garu hte chyi nga ai woi waNawng ni shana de jan du wa magang akatsi zim nga mat wa shajang masai da.

Shingrai Hkrai Naw yan Hkrai Gam shannau gaw woi waNawng ni hpe gasat dang kau nna, hka-nam mung de shamu shamawt mat wa hkyem ma yang, woi num a kasha ni wa bai hkan ganan bu nga masai da. Shannau rawt hkawm jang, woi kasha ni mung ashawng ahpang rai hkan garu nang nga ma ai. Shaloi Hkrai Gam gaw shi a kasha ni hpe yu nna "kanau e, le ra ngai sha ni hpe kaning di na rai” ngu san u ai. Hkrai Naw gaw "hka hka, ngai masu asawng kau da n-ga”nga let, nam sumwum hkan hkadawn sumpum mi tam rim la nna, woi kasha ni hpe wa shalen jang, woi kasha ni gaw dai hkadawn ni hkan shachyut rim chyai nna nga nan mat masai da. Shingrai Hkrai Naw yan Hkrai Gam shannau gaw shawng lam de chyang chyang rai hkawm mat wa masai rai. 

Ya Hkrai Naw yan Hkrai Gam shannau gaw hka-nam mung de dingyang bai rawt mat wa ma yang, Hkrai Naw gaw hkawm man ai lagaw rai nna chyang chyang rai hkawm mat wa, Hkrai Gam gaw hpun lakung hkan sha dung nga man ai hkum rai nna, lam hkawm yang n chyang hkraw nga lu ai. Shingrai Hkrai Naw gaw marawn mi hkroi rai jang, kahpu hpe bai nhtang la la la rai, yat yat sha hka-nam mung de du mat wa masai da.

Ya hka-nam mung sa du masai hte maren, Hkrai Naw gaw kahpu hpe shi du yu ai buga ginra shagu hkan woi chyai hkawm rai nga ai. Shingrai Hkrai Naw gaw shi lata masat da sai shawng nnan na num jan hpe kahpu Hkrai Gam e lata la kau ya na tsang nna, myiman kaw di hkama chya kau ya nna, kahpu hpe "hpu e, nang ra ai tsawm shayi lata la u”ngu sai da. Hkrai Gam bai raiyang gaw woi ni hte chyu nga man mat sai re majaw, num tsawm ai mung n chye lata, gaja ra myi hkrawk hkrawk re hpe she "ndai hpe yu ra sangai" ngu lata la nu ai da. Hkrai Naw gaw kahpu num lata ngut ai hpang she shi tsawra ai num jan hpe hka atsawm shin kau shangun rai atsawm sha woi nga kau nu da.

Hkrai Gam Myit Magaw Nyan Dat

Hkrai Naw Nbung Hku Kaw Hkrat

Ya Hkrai Naw yan Hkrai Gam gaw hka-nam mung kaw Hkrai Naw a danhkung ai mying ningsang kata e, mung masha ni hpe woi shakut nna galaw lu galaw sha nga ma ai rai. Shingrai nga nga yang, aten gaw laning lai, lahkawng ning shai mat wa sai hte maren, kahpu wa gaw woi myit kaw nna masha myit gale wa sai. Myit yu myit la ngu ai nga wa nna, tsawm ai n tsawm ai mung chye ginhka wa sai hte maren, yu magang kanau Hkrai Naw a num gaw tsawm ai zawn chyu rai, shi a num hpe gaw yu magang myi hkrawk hkrawk re ai zawn chyu rai nna, myit kaw sha "ya ngai she hka-nam mung ting yu hkawm nna grau tsawm ai lata la sai ngu yang, ndai zawn re hte mi ang mat ai gaw, kaning raitim ngai nau wa e nyan kau ai she rai ang sai" nga myit nna, kanau hpe nju ndawng ai myit hkrai rawng wa sai. Shingrai kanau wa a num shaw na myit nna, kanau wa hpe lagu gyam kau na nyan gadaw bang wa sai da. Raiyang kanau wa gaw ntawng nhtu hpye, nhkrang kungli hpai nga ai hta n-ga, mung masha ni grai hkungga tsawra shajang nga ai re majaw, dan dan leng leng gasat yang gaw dang na n rai, lagu sat kau yang mung mung masha ni shi hpe nju ndawng wa na tai nga ai rai nna, kaning n chye di nga ai hte maren, jahtum e gaw shan woi gyam nna, kanau hpe tsin-yam jahkrum na nyan daw nu ai da.

Hkrai Gam gaw maling langai kaw nbung hku hku ai shai nna, kanau wa hpe nbung hku kaw jahkrat bang kau na lagu nyan nga u ai. Shingrai shani kanau n nga ai lapran dai nbung hku kaw nam sa dan matsut bang tawn nna, shana kanau hpe "kanau e, daini ngai wadu tsip langai sa mu da sai, hpawtni annau Naw sa jawm gyam la ga" ngu u ai. Hkrai Naw gaw kahpu myit magaw ai lam dang shai ai n rai.

Dai rai, htawm shani Hkrai Naw yan Hkrai Gam shannau gaw dai maling kaw sa du masai. Hkrai Gam gaw nbung hku madun nna "kanau e, wo mada yu u, wora kaw nan rai sai, nang gaw n-gun ja ai, nang shawng htim u" ngu u ai. Gaja wa kanau mada yu yang mung wadu rawng nga ai zawn wawng wawng rai shamu nga ai majaw, ntawng nhtu lang nna, yet sha lanyan sa wa let wadu rai ang sai nga htim gahtam dat ai ngu yang, hku mahka kaw gabye kashawt nna, nbung hku de hkrat bang mat wa sai rai. Shaloi Hkrai Gam gaw nbung hku mahka de sit hkrat wa hkra rai chyan mada yu nna, tung hte tang hpa shingran pyi n ran mat jang, manyi sum rai let "rai sa, lawm sha u! Ala wa mi ya chyawm gaw kasang ga de du mat wa sindai" nga nna nta de nhtang mat wa sai.

Ya Hkrai Gam gaw nta du wa ai hte ganam jan a man e hkrap hkrai wa hkrap sharung masu nga sai. Shaloi ganam jan gaw mau hkrai mau nna "agu e, ya kaning wa rai wa sa? Ningnau wa gaw rang”ngu san jang, Hkrai Gam gaw "ngai nam e, tsin-yam hkrum ai ngu ai baw rai sam sai, annau wadu sa jawm shachyut ga ai she nbung hku hku na hpe n dang shai ai majaw, kanau nbung hku kaw gabye kashawt nna hkrat bang mat wa sai. Pru wa lu ai baw n rai sai" ngu tsun dan jang, Hkrai Naw jan gaw na gajawng ai hte lamu ga ni gayin wa ai zawn, myi pyi n mu wa ai zawn nga wa ai lata hkrap gumshut dung mat sai. Shaloi Hkrai Gam gaw ganam jan hpe "ngai nam e, nau hkum yawn sa, nau hkum hkrap u, si mat sai hpe gaw kaning di n lu shabai la, hkrat mat sayang kaning chye di sana, nau yawn yang agawng run ai, nau hkrap yang n-gun yom ai. An gu ni rau jawm nga, rau jawm galaw sha na re" nga grai myit kaba la ai zawn nga hkra nyem masu nga ai.

Dai kaw nna Hkrai Gam gaw ganam jan hpe shi hte yup gawk gahkyin na hku hkrai tsun bang wa sai. Raitim ganam jan gaw n hkraw tik tik nga "agu e, Hkrai Naw gaw ngai a hkye la madu re, shi n nga mat jang ngai prat tup kadai kaw mung n wa sana" ngu ningdang hpret hpret di kau u ai da. Raiyang Hkrai Gam gaw shi myit ai lam n shabyin lu yang tawn na n rai, galoi mung ganam jan hpe n gahkyin n mai na hku hkrai shadut bu nga ai "lanyau n nga ai hpang na yungchyin garu" ngu ai hpa she rai nga ai. Hkrai Naw n nga jang Hkrai Gam gaw wanglu wanglang rai ganam jan hpe hkrai shadut shadep shatsang nga ai majaw, ganam jan mung kaning n chye di nna "agu e, n gahkyin n mai na raiyang gaw, ngai tsun ai lam masum sha hkraw ya rit" ngu jang. Hkrai Gam grai na kabu ai hte "mai ai, mai ai, nang gu hte sha gahkyin na rai jang gaw, lam masum sha n rai, lam sumshi raitim hkraw ya lu ai, nang sha tsun u" ngu sai. Shaloi Hkrai Naw jan gaw "langai, nbung hku kaw samyen si shingwoi sanit sa ru bang na; Lahkawng, nbung hku kaw shat makai shingwoi sanit sa ru bang na; Masum, sanit ning sha n tup yang hkungran poi n shang na" ngu jang, Hkrai Gam gaw gajawng nna, n-gup she mahka hkra mau mat sai. Raitim galang mi hkraw ya na ngu sai majaw, n hkraw n lawt rai mat nu ai. Dai kaw nna Hkrai Gam gaw sanit ning du na chyu la, lani mi lai yang laning mi lai ai zawn ngu yak nga sai da.

Hkrai Naw Kasang Ga Kaw Shoihpa Chyum

Tsawra Jan Mungkan Ntsa Yawn hkyen Hkrum

Hkrai Naw gaw nbung hku kaw hkrat bang mat wa ai shani kaw nna, nhkap nchyap, lungrawk lunghpra hku chyai hkrai chyai mat wa, gabye hkrai gabye kashawt mat wa, jum hkrai jum gahprai mat wa nna kasang ga ngu ai de du hkra hkrat bang mat wa sai da.

Kasang ga ngu ai de gaw mungkan ga na hte maren, hpun kawa ni mung tu, san tsawm ai hka-shi hka-nu ni mung lwi, nbung mung bung hpawt nga, pa layang ni mung dam lada ai, jan shata mung htoi san ai shara rai nga ai da. Raiyang dai kasang ga na magup sumhpa ni gaw gaji gadun ai hkrai, masha mung gaji gadun ai hkrai rai nga ai dai ga na hpun kawa ngu na gaw mungkan ntsa na hkringmu hte sha bung nga ai. 

Hkrai Naw gaw kasang ga kaw hkrat du yang, baw sin mat nna hka-shi makau na zaibru jang kaw yup galeng taw nga ai, nbung gatsi lawt jang she dum pru wa nna, makau grupyin mada dat yu yang n chye ai shara hkrai rai mat nna, chyip hte chyap nga mat nbung hku kaw chyu sa gawan, yawn hkyen myiprui hkrat ai dingyang rai let, samyen sai hte maren, nhtang pru wa na ngu yang mung lamu masawp n dep, gang Noi shara mung n hkap mat sai re majaw, ruyak shoihpa chyum, matsan yawn hkyen hkrum nna nga nga sai da. Dai ten hta mungkan ga ntsa kaw nga da ai madu jan mung shani shagu nbung hku kaw chyu sa gawan, yawn hkyen myiprui hkrat ai dingyang rai let, samyen shingwoi sanit hta gun nna nbung hku kaw sa ru bang dat nu ai. Dai samyen ni gaw lam lapran nbung nau kaba nna gawut shamawng kau ma ai majaw, tum mi sha Hkrai Naw a makau kaw du hkrat ai da. Dai hpe Hkrai Naw hkap hta la nna nbung hku mahka ang ang e hkai tawn nu ai da. 

Hkrai Naw jan gaw shat makai shingwoi mi sa ru bang dat yang Hkrai Naw kaw shat makai mi sha hkrat du ai da. Hkrai Naw gaw dai shat makai hpe lani mi loi loi sha mahti sha nna aten shalai nga ai re majaw, hkum hkrang lasi lamun rai n-gun yom mat wa sai da.

Hkrai Naw hkai tawn ai samyen tum gaw lahkawng masum ya raijang matsun prut pru, maku ku wa, alap lap wa sai, Hkrai Naw shani shagu hka ja jaw nna hkang lajang nga ai. Samyen ru gaw lani hte lani lai lai, shata hte shata shai shai rai galu wa sai. Kaba wunhku shi dai rawt marawng, ningdung lapli shi hkrai rawt ninghkawng wa, shani ningdung lapli lawn lawn, shana kaba wunhku pon pon rai wa sai rai nna, hkin-gau ntsa de maku shawn shawn, nbung hku de alap lawn lawn kaba wa sai da. 

Hkrai Naw gaw kasang ga nga ai ten hta, shani shana hpa n chye galaw nna, pyisun pyiman hte apau ni sha wot dum nna nga chyai nga u ai. Dai rai kasang masha ni gaw Hkrai Naw dum sharung ai pyisun pyiman, apau ni hpe grai na sharawng nga mani re majaw, makau grup grup sa jawm madat chyai chyai rai nga ma ai. Kasang masha ni gaw Hkrai Naw hpe grai yu mau nga ma ai "dinghta ntsa de gaw ndai daram kaba ai masha mung nga a hka" nga sa jawm hpu nga ma ai. Shanhte yu ai hku nga jang, Hkrai Naw gaw dung dat yang lunghkrung zawn kaba, rawt tsap dat yang hpunnu kaba zawn tu nga ai. Hkrai Naw dinghta ga de na shi a num jan jahkrat shalawm dat ai bapa sha jang, kasang masha ni gaw shi hpe nlung makret sha ai nga grai mau nga ma ai. Shingrai Hkrai Naw hpe gaw mashang masha ngu shamying, alawng po ai masha re ngu shagrau, hkawhkam kaba re ngu hkungga nga ma ai.

Ya kasang masha ni yi hkyen ga saw ai kaw garu hte chying nga marawn ai majaw, Hkrai Naw sa chyan yu yang, hkringmu hpun hpe ningwa hte jawm kran nna daw wa jang“yen mu law, yen mu law, hpun kaba daw wa ra ai law”nga jawm jahtau garu nga ma ai da. Shaloi Hkrai Naw gaw ntawng nhtu shaw la nna, shanhte yawng hpe hprawng yen kau shangun nna, galang mi numrat dat yang "ngut sai law, mashang masha e hkyen shangut ya sai law" nga jawm kabu nga masai da.

Galang mi na kasang masha ni gaw nta galaw ngau hpai ai nga jawm garu ma nna, Hkrai Naw bai sa hkan hkawm yu yang, hpun dingshan langai mi hpe shadaw kaba re nga marai sanit matsat jawm hpai nga ma ai majaw, Hkrai Naw gaw yat sha hta mat wa nna shanhte ra ai shara kaw wa tawn ya jang grai kabu nga ma ai. Shingrai Hkrai Naw gaw kasang masha ni hpe nta grai grai tsawm ai galaw ya, shanhte shi hkun ya galaw na mu bungli hpe chyahkring hkring sha gan galaw kau ya re majaw, kasang masha ni gaw shi hpe grai tsawra hkungga shajang nga ma ai.

Bai, kasang masha ni gaw hkadawn hpe sha mung shan kaba re nga jawm shachyut chyut rai ma ai da. Galang mi na Hkrai Naw gaw kasang masha ni shan jawm ai de hkan nang yang "hkap mu law, hkap mu law, mashang masha kaw ang wa sai law" nga jahtau nna, hpa baw shan kaba wa rai kun ngu hkap nga yang, hkadawn langai mi gahtan pru wa ai sha mu nna, shingna dingshan hte hkap achyo sat tawn ya jang "lu sai law, mashang masha e lu sat tawn nu ai law" nga kabu marawn nga ma ai. Shingrai Hkrai Naw gaw kasang masha ni hte rau nga rau pyaw let aten nhtoi shalai nga u ai rai.

Aten gaw laning hte laning lai mat wa sai hte maren, Hkrai Naw hkai tawn ai samyen ru mung laning hte laning kaba wa sai rai nna, mu nga ninglen mada n dep mat wa, yu nga ninglen masawp n lep mat wa sai da.

Ya sanit ning du n du raiyang, samyen ru gaw nbung hku de dum preng ru mat wa sai re majaw, mungkan ntsa de yi hkrang sai kun ngu kadu hka hpe wa yu shangun yang, kadu hka lagawn gaw samyen ru gau lung wa nna, aru matu kaw du, samyen makrung wa mu jang di sha hkru hkru rai, samyen ru ntsa kaw yup gale nga sai da Hkrai Naw gaw shata gade du yang mung kadu hka yu wa ai mi n mu nna, kaning wa rai sai kun ngu samyen ru gang ashun dat yu yang, kadu hka gaw yup nga ai kaw na dum pru wa nna, alawan nhtang yu wa nna "Hkrai Naw e, ndai samyen ru gaw mungkan ntsa hkrang na lalam manga daram Naw ra ai" ngu wa tsun dan sai da.

Dai hpang tsawmra ya bai din ai hpang, hkrudu hpe bai shangun dat sai. Hkrudu gaw pyen ai rai nna, mungkan ntsa du hkra pyen lung wa nna, samyen ru hkrang sai wa mu jang, lawan wan bai nhtang yu wa nna, Hkrai Naw hpe "du wa e, ndai samyen ru gaw nhkun ntsa kaw mi ra, ga ntsa de lahkam mi kra hkra rai sai" ngu tsun dan nu ai. 

Ya Hkrai Naw gaw mungkan ntsa de nhtang lung wa na hkyem nna, shawng nnan dumsi hpe saw u ai "hkau dumsi e, ngai hpe mungkan ntsa de Naw ba lung wa rit" ngu yang, dumsi gaw "e n mai na re, ngai gaw ningjap manam ai baw amyu rai nngai, nang ngai hpe ningjap manam ai nga kau na ndai" ngu u ai da. Shaloi Hkrai Naw gaw "n ngu na law, she ba lung wa rit”ngu yang, dumsi gaw "teng teng n ngu na i" ngu jang, Hkrai Naw gaw "teng sha n ngu na" ngu u ai. Dumsi e "nga jang kaning di" ngu yang, Hkrai Naw gaw "she nga sayang gaw shaloi jang yu jahkrat kau rit" bai ngu nu ai. Shaloi dumsi gaw htan nna Hkrai Naw hpe ba nna samyen ru hku hkan lung mat wa sai. Lam lapran kaw asin chyip chyip, myi hpo tim n hpo ai hte maren rai nga ai majaw, Hkrai Naw gaw dumsi a shingma kaw Noi tik tik rai lung wa ma yang, dumsi ningjap manam ai wa ladi pyi yat mat na zawn nga, kaning nan n di, nsa satik kau yang mung n dang sharang wa rai nna, lam ga-ang pyi rai n du ai kaw n dum ai "hi, ningjap manam la ndai" ngu tsun shut kau dat ai hte dumsi e dai kaw nan yu jahkrat kau dat nu ai.

Dai hpang Hkrai Naw gaw kaning n chye di nna dumsi sidu hpe bai saw nu ai“hkau sidu e, ngai hpe mungkan ntsa de Naw ba lung rit" ngu yang, sidu gaw "e n byin na re, ngai gaw abat manam ai baw amyu rai nngai, nang ngai hpe abat manam ai nga kau na" ngu u ai, shaloi Hkrai Naw gaw "n tsun na law, she ba lung rit" ngu yang mung, sidu gaw "tsun jang kaning di na rai" nga jang, Hkrai Naw gaw "tsun jang yu jahkrat kau rit" bai ngu nu ai.

Ya Hkrai Naw gaw sidu kaw ba nna mungkan ntsa de bai lung wa masai. Dai lang mung grai sharang yu na ngu tim sidu a abat wa ahpu ahkying nga manam la nna, ladi hkrai hkyom hkyom nga, nsa pyi gara hku n sa ai zawn she nga nga ai. Raitim n mai tsun na re ngu sharang tik tik rai satik tik nna hkan lung wa yu yang, hku mahka du na gachyi sha ra sai kaw mala la n dang sharang wa nna, n dum ai "hi, manam la ai" ngu lahkun mi tat kau dat ai nga yang, sidu e dai kaw bai yu jahkrat kau dat nu ai. 

Ya Hkrai Naw gaw myit htum sai da. Kadai hpe bai saw na kun ngu myit hkrai myit wa yu yang, sharu hpe shai nna "hkau sharu e, ngai hpe mungkan ntsa de she Naw ba lung rit" ngu saw yang, sharu mung "e, nang ngai hpe abat manam ai mahkoi nga kau nhten”ngu jang, Hkrai Naw gaw "n ngu na law”ngu u ai. Sharu e "ngu jang kaning di na”ngu jang, Hkrai Naw gaw "ngu jang yu jahkrat kau rit" bai ngu sai da.

Ya Hkrai Naw gaw sharu kaw ba nna bai lung wa ma yang, abat manam na tsang ai majaw sharu ningmai kaw sha Noi nna lung wa masai. Shingrai lung hkrai lung wa ma yang, ningsin chyip chyip nga ai kaw lai mat wa, ninghtoi san san nga ai kaw du lung wa sai. Ga ntsa hkrang na gachyi mi sha ra ai kaw sharu wa hkring mat sai. Shaloi Hkrai Naw gaw "hkau sharu e, ya kaning rai hkring mat nta" ngu san yang, sharu gaw "ya hku mahka du lung wa sai, nang hkrai Noi lung wa nu, ngai gaw shani e ga ntsa de majoi n pru hkawm nngai" nga jang, Hkrai Naw gaw "e, rai sa, rai sa, chyeju kaba sai" ngu let, shi wot gun ai pau langai mi shaw kumhpa nu ai. Shingrai ya du hkra masha ni sharu pau wot ai nga tsun ai rai.

Hkrai Gam Manau Manau Ai Kaw Wa Ang

Hkrai Naw Du Wa Nna Matai Wa Htang

Ya Hkrai Naw gaw kasang ga kaw sanit ning nga kau nna, sharu ningmai kaw sha Noi nna lung wa ai, nbung hku mahka kaw wa du jang, sharu bai n matut hkawm mat ai majaw, mungkan ntsa hta utu chyangngau ngoi ai gaw na, numlang hka chyang ak ai mung gaw na rai, kaning di gang Noi pru wa sana kun ngu myit pu nga yang, nga waloi waNawng mi lai wa nna, waloi langai mi nhkun de lagaw gabye shashawt bang dat ai kaw, nga lagaw kaw gang Noi nna pru wa lu sai rai.

Dai ten hta mungkan ntsa e nga ai kahpu Hkrai Gam gaw kanau Hkrai Naw n nga mat ai sanit ning tup sai rai nna, Hkrai Naw jan hpe gahkyin la na ten du sai nga manau poi kaba galaw nga ai. Dai manau poi gaw masha ram ram law nna grai hkik pawng ai hku galaw nga ma ai. Dai manau poi hta Hkrai Gam gaw arawng mala mayu nna, kanau Hkrai Naw hpai ai nhkrang kungli hpai shapraw nhtawm, shawa yawng hpe "kadai wa ndai shara kaw shat singkrang mi sha kau lu, sihtu kahtang mi sha kau lu, chyaru nhtung mi lu kau lu, nhkrang kungli shachyen lu ai wa hpe gaw mungdan hkawhkam galaw shangun na, Hkrai Naw jan hpe mung madu shangun na" nga ga hkaw nga ai da. Shi gaw dai mung ting hta, kanau Hkrai Naw shannau hta lai nna nhkrang kungli kadai n shachyen lu ai hpe chye nga u ai.

Manau sa ai ni yawng gaw langai hte langai rai dai nhkrang kungli sa shachyen yu ma yang, kadai mung n lu shachyen nna garu hte chying nga nga ma ai.

Ya Hkrai Naw gaw nbung hku kaw nna pru wa nna, mare de shang wa ai, numshang kaw nna wa madat yu yang, nta de masha law law garu nga ai na nna, hkum kaw bu hpun palawng ashep alap rai mat sai majaw, nta de n shang wa ai, nta makau na hka lu hkaraw e wa lagyim nga sai da.

Manau poi hka ja ai num ni gaw lai wa lai sa rai hka ja gahkrang nga ma ai. Hkrai Naw gaw hka-hku kaw nna, hka ja ai ni sa wa jang, hka hkrai hkanu dat dat di u ai. Shaloi hka ja ai num ni gaw nta de nhtang wa nna, shat shadu ai ni hpe "daini gaw hka hkrai hkanu wa wa rai nna, hka n mai ja ai law" ngu wa tsun dan ma ai. Loihkring langai bai du wa ai mung "hka hkanu mat sai law”bai wa nga sai. Shingrai yawng mau shajang nga ma ai. Shaloi Hkrai Naw jan gaw loi dum dum nga let "hka hka, ngai bai sa ja se ga" nga ntsin nhtung ret rai hka lu hkaraw de sa wa sai. Ya Hkrai Naw gaw madu jan hpe hkap mu nna, shawng de shan jawm lang ai pasi shayo dat u ai. Madu jan ntsin nhtung ja tawn nga yang, dai pasi yo yu wa ai hkap mu nna, hta yu yang, shawng de Hkrai Naw shan jawm lang ai pasi rai nga ai mu nna, ntsin nhtung rap, hka-hku de lung wa yu yang, hka-hku kaw bu hpun palawng shep shep, abaw lim lim, nhka mun tsip tsip re masha mi dung nga la ai wa mu nna Naw mau nga yang, Hkrai Naw gaw madu jan hpang de sit hkrat wa let "ngai Hkrai Naw rai nngai, n chye yu kau sani”nga shaga dat ai hte, madu jan gaw yupmang kaw nna dum pru wa ai zawn nga ai lata, myiprui si pru let madu wa kaw ahpum Noi nga sai. Ya Hkrai Naw jan gaw madu wa hpe abaw kaw nna lagaw hkren mada yu yang, bu hpun palawng ashep alap rai nga ai majaw, nta de bu hpun palawng wa gan la nna galai ya kau nu ai. Hkrai Naw gaw madu jan hpe "ya nta kaw hpa galaw nga ma ta”ngu san yang, madu jan gaw "nta kaw ninghpu wa nang n nga mat ai kaw nna, ngai hpe shi hte gahkyin ga nga shadut shatsang nga ai. Raitim ngai gaw gahkyin na wa mi raitim sanit ning Naw la yu na ngu masu tawn ai raiyang, ya daini sanit ning tup nna, ngai hpe gahkyin sana nga manau poi kaba galaw nga ai. Shingrai manau poi sa ai ni hpe nang tawn da ai nhkrang kungli hpai shapraw nna, kadai wa shat singkrang mi sha kau lu, sihtu kahtang mi sha kau lu, chyaru nhtung mi lu kau lu, nhkrang kungli shachyen lu ai wa hpe gaw mungdan hkawhkam galaw shangun na, ngai hpe mung ya sha na nga ai majaw, manau sa ai wangan shabrang ni yawng gaw nhkrang kungli shachyen shingjawng nga ma ai, raitim lu shachyen ai masha n nga ai" nga Hkrai Naw hpe byin ai lam tsun dan nga ai. 

Shaloi Hkrai Naw gaw madu jan hpe "htaw madu tai ai ni hpe wa tsun dan su, le hka lu hkaraw kaw nhkrang kungli shachyen lu ai masha mi nga ai, shat singkrang mi, sihtu kahtang mi, chyaru nhtung mi gun nna, hka lam de sagu panyep nyep nna sa tau la na da" ngu tsun dat nu ai. Gaja wa madu jan mung madu wa tsun dat ai hku hkrak hkrak wa tsun nu ai.

Manau hkringmang ni gaw Hkrai Naw jan wa tsun ai hte maren, Hkrai Gam hpe "manau madu e, hka lu hkaraw kaw nhkrang kungli shachyen lu ai mi nga ai da, ra ai lam shajin nna sa tau la nga ai" ngu tsun dan jang, Hkrai Gam gaw "le nga yang gaw sa woi la yu masu" ngu dat nu ai. Shaloi manau hkringmang ni gaw ra ai lam ni shajin la nna hka lam hku sagu panyep nyep kau rai sa tau la masai da. Gaja wa Hkrai Naw gaw shat singkrang mi hprut sha kau, sihtu kahtang mi mung hprang, chyaru nhtung mi dawng hprang di kau nna, manau shara de wa sai.

Ya dai manau naura kaw du shang wa yang, masha law law hkap yu shajang ma ai, raitim Hkrai Naw gaw abaw lim lim, myiman ningmun tsip tsip rai nga ai re majaw, kadai mung n hkap chye yu nga ma ai. Hkrai Naw gaw manau naura ga-ang kaw tsap nga nna "dai nhkrang kungli la dat yu mu" ngu jang, nhkrang kungli hpai ya manu ai. Shingrai shi gaw dai nhkrang kungli ret rai mada yu let, lai mat wa sai lam ni hpe myit dum ai hte, kahpu wa myit magaw ai hpe shai dat jang, masin salum hta wan hkru ai zawn nga wa ai majaw, shawa masha hpe praw di mada yu nna nhkrang kungli hpe n yak sha hkrawn di shachyen dan nu ai da. Shaloi dai yang shinggrup nga ai ni yawng n-gup she mahka hkra mau jawng mat masai. Hkrai Naw gaw grupyin mada yu nna "ya gara de gap na re”ngu san yang, masha nkau gaw“le ra de, le ra de,le manau shadung yi hkren na kun shingte yu u” nga garu hte chying marawn nga ma ai da. 

Hkrai Gam gaw nhku kaw rupa pa nna rawng nga yang, shinggan de "nhkrang kungli lu shachyen sai law”nga garu ai na nna, masin hpra hpra nga let“aru! Ndai mung kaw ngai nau Hkrai Naw hta lai nna, nhkrang kungli lu shachyen ai n nga ai she ngu yang, ya lera zawn nga nna me garu ma ai gaw, kaning re ai wa rai wa sai kun" nga shinggan de lanyan pru wa yu u ai. Raitim shi gaw kanau Hkrai Naw nhtang pru wa chye na hpe gaw yupmang de nna pyi n shai nga ai.

Ya Hkrai Gam gaw hkrit hkrit, maja maja rai, ntawt wahku shadung kaw shingbyi nna sa chyan yu nga yang, Hkrai Naw gaw manau shadung de shading yu, kinsa hpun de gaw shading yu rai gayin gaye rai shada nga yang, kahpu wahku shadung kaw sa lagyim yu nga ai mu dat ai hte galang ta yin rai wahku shadung sha-ang nna hpre di dat yang, wahku shadung ga-ang hkren, Hkrai Gam a salum kaw lup rai, dai kaw nan rap gap sat kau nu ai da.

Shaloi she mung masha ni yawng gaw Hkrai Naw bai pru wa ra ai re chye shajang nna, kabu gara hte sa shakram shajang nga ma ai. Gahtawng ninghtawn shagu na ni nbaw nnyeng, udi tsa hku hte sa hkungga hkalum ai hkrai“anhte a hkye la madu, kung brep ai hkawhkam bai du wa ra ai" nga kabu shajang nga ma ai.

Dai shani kaw nna, Hkrai Naw yan gaw anum madaw rau rum, ala ninghtan rau hkrum let, myit mang langai sha rai mung masha ni hpe woi ningbaw nna, nga ngwi nga pyaw mat wa masai rai.

Sawk ka ai: Maru Mai

Gale hti ai: Nhkum Ja Ra