GUN JA WA
MANAM TU
MARU GAWNG
Shinggyim masha sak hkrung galu kaba na matu hkum shaman ai gaw hkamja lam hta ra ahkyak nga sai majaw, sutgan hta grau nna tsaw dik ai mung hkamja lam rai nga ai. Moi Nshawn Prangwai ga kaw Marip amyu rai nga ai Manam Tu ngu ai wa gaw, nta kaw na la hpungdim wa rai nna kaji kawn nga sha rem rai kaba wa u ai. Rai yang shi gaw shani shanang nga wadat kawng kaw hpa nchye galaw ai zawn nga nna, nhtu n-gang hpye kau rai nam hkyen, hpun gahtam, Wulawng hkaraw ngu ai kaw nlung kaba ni hte nga wulu kaw nga kasha ni hte daru hkat, nga ni hpe gan tawt chyai rai nna lani hte lani kaba wa, n-gun ja sam tsang wa rai nga lu ai. Shi lagaw lata ni kaba hpum sau rai nna tsawtsaw raprap rai nhtawm, sinda mung papa rai nna chyu lahkawng hkawnji ni a chyu daram ganoi kaba nga u ai hta lai nna, ginsup n-gun dat lam de grai sharawng kam ai la langai rai nga ai re majaw, poi shingra dingshawn htingmawn shara hkan du hkawm timung, ram manang ni hte htu hkat, gan tawt shingjawng shaman re majaw, Jinghpaw nta npan, nta numdan ni hpe shi hpa zawn nnawn ai lu gan tawt kau kau re ai hta n-ga, myi zen lagaw lata laram lawan rai nga ai. Lani mi Prangwai lawu gahtawng na Lasam ni a nta kaw shani shingtung e sharaw wa hpai sha mat wa sai, dai hpe ganing rai nna myit dum hpaji daw lu ai mung nchye, dai nta ni a gwi hpe shaga la nna, gwi a n-gup gang mahka ya nhtawm hpun htingkan gwi a n-gup kaw shadawn la nna, gahtam daw lang in sharaw wa hpai mat wa ai de nhtu ningyan mung lang rai hkan sa wa yang, sharaw dai wa hpya sha taw nga ai hpe sa mu nu ai, shingrai sharaw a shingdu maga hku mayun sa wa yu yang she, sharaw shi a sharat nsen hpe na kau dat ai hte ma-ja e shi hpang de htim gawa wa ra ai, aga mang nang gaw i ngu ai hte shi lang ai kawa htingkan sharaw a n-gup kaw chya di ya nna, sharaw a du kaw hprut di gahtam sat kau ai shani kaw nna, Prang wai kawng ting gade nta kaw sharaw nga wa gwi la sha ai nga yang mung, Manam Tu sharaw chye gahtam sat ai da nga nna, shi hpe hkrai sa shaga tsun tsun rai masai.
Manam Tu ndai zawn re lam hpe shara shagu tsun gumhkawng nga ma ai hpe Nshawn pa Sam Mawa ni bai na la ai gaw, Prang wai ga kaw Jinghpaw alawng paw pru sai da, nta ni hpe mung ndut ndang lu gan tawt, sharaw gade matse ai hpe pyi manu mana lu gahtam sat kau sai da! ngu bai tsun garu nga ma ai. Jinghpaw ga malai:Wa hpum hpe majoi sat, masha mying danhkawng ai hpe, majoi azat ngu ai byin wa sai. Shingrai Sam Mawa ni loi mi kung dum ai ni a my hta lani hte lani myi chyu wa nga sai re majaw, Manam Tu hpe sat kau na she sawn hkyem wa nga ma ai. Lani mi hta shi gaw nga chyahkri sha mayu nna Chyinghkan gat de gat sa wa nu ai. Gat kaw du yang nga chyahkri dut ai Sam num ni rai n du nna, tsa dut ai ni kaw tsa palin lahkawng nhpye kaw mari gun let tsa mai di na matu nga chyahkri dut ai hpe la nga nu ai. Tsawmra mi na ai hpang nga chyahkri dut ai Sam gumgai ni du sa wa mara ai, Sam gumgai langai shawng lit shayu tawn dat ai hte: Myeba, su ba sum nwan? Ngu san jang, lung, au le au le, chyam gan le, wan tete au, nga nna gaja wa chyim yu yang gaja ja mu ai majaw, lagawk hkai ling? Ngu bai san jang, lagawk sawng byek nga nna, demdem sai le gau au, ha gawk ngu Sam ga hte Zi ga gayau gaya ngu tsun let Sam num gumgai jan hpe gumhpraw hte mi shaw ya nna, nga chyahkri kawk manga hpe dawngmu lap hpe lahkawng htap di gayawp kau hkra di nhpye kaw baw gun rai, gat htumpa na lagat hpun pawt kaw rau gahtawng na Maru Brang Shawng dingla hte nga chyahkri mung hpaw tawn rai tsa jawm lu nga yang, Samla marai manga palawng mung nhpun, hkum ting mak htu maka ka ai, kandang langai hpra lang kau rai, ma-ja e wa mi, hpa shut shai hkat ai lam mung nrawng yu ai kaw, chyai lung wa mara ai, jau hkyen chyam gan le, nga nna lagat gat shang ngoi gadu ai zawn she nga hkra htim ning wu hkrat wa mara ai hte rau, Brang Shawng dingla hpe Tsa ba Sam yumti ndai ni gaw matu nmu ai ndan are ai gaw si mayu sam nga ma ai, nang lawan hprawng yen u, ngu nna n-gang na nhtu hkrawt garawt shaw la nna, Sam marai manga a kandang lahkawng masum hkrawng di dumhpyawt di kau ya nhtawm, gatbaw maga de gat kinsum langai ngai di gan tawt kau da nna gat baw na lagat hpun kaw hpaumaw nhtu hte wa gahtam jung tsat kau da nna, n-gang gaman hte nhpye sha hpye nna nta lam de hprawng atun mat wa sai da.
Shana nta du wa yang she Brang Shawng dingla mung bai hkan du nang wa ra ai, Ma Tu, Ma Tu nang ganing nai a ni? Ganang ningma nkap a ni? Ndai na nhtu daini Sam ni marai lahkawng gang paw si ma ai, ngai shanhte hpe grai tawngban nna hpyi la wa ai re, ngu tsun dan u ai. Tsa ba, Sam woi ndai ni ginrai nna ngai gat sa ai chye ma ai kun? Ma Tu e, daihpawt antsa sa wa ai shaloi, dai Nawngtau na jauhkyen sara wa hkan mu dat nga ai mu, ngu tsun dan nu ai. Shaloi, Sam ndai ni Jinghpaw roi ai. Ya kaw nna gaw gat n mai sa sai, tinang a hkum makawp ai ngu yang, mu kaba pru na she tai nga ai, ngu myit du nu ai.. Dai hpang kawn Sam Mawa ni hkrit gari, gajai gumhkawng, Jinghpaw alawng paw sai da! Nga, nsat kau yang n mai sai nga nna, lu su share shagan ai ni yawng yawng ndai Manam Tu hpe ganang mu ganang sat ngu masai da. Dai ten gaw Myen mung Inglik prat rai nga ai. Manam Tu gaw Myen mung gat sha mai shang mat nu ai. Shi mung dai hpang kawn gaw hkrit maja let, ganang hkawm sa tim, makoi magap let sha lahkawng ning daram nta kaw pyi nau n yup ai, nam hkan hkrai tam yup hkawm rai nna nga lai wa nu ai.
Dai hpang lani mi gaw, Na seng mare kaw na shi hte grai hkuhkau ai Sam jinghku ni gat shagu wa sa jahkrum nga nau htet ai majaw, Na seng gat jahpawt manap jaujau Na seng gat Sam jinghku ni a nta kaw sa du nna, gat de chyahkring mi sa shang hkawm ai nga yang, shi hpe gyam ai ni mu kau sai. Raitim masha ni shi hpe gyam hkawm nga ai lam nchye ai majaw, Sam jinghku ni a nta kaw bai nhtang shang wa nu ai. Shana de jan gaw du wa rai nna nta wa hkyem ai shaloi nta madu wa gaw shi hpe: Ma Tu daina nang hkrai nta hkum wa sa, daini gat kaw Kawnglawt na Mawa ni Prang wai na Manam Tu gat nsa a ni nga san hkawm ma ai, daina nang kaw naw yup ga, hpawtde manap jaujau she wa u ngu nhkum ai majaw, dai shana gaw Sam jinghku ni a nta kaw yup kring nga sai. Rai yang shana yuptung yang e Sam ni a gwi wau she wau nna dum prang wa ai shaloi, Mawa marai mali htim shang wa nna, nang kadai re? Manam Tu ngu ai nang nre ni? Re le, hpa baw re ta? Ngu san dat ai hte ga pyi rain ma tsun yang, shi hpe jawm gahtam wa masai, shaloi shi mung ganing ndi si ntsang rawt gahtam mat wa yang, Sam ni a rapdaw hkan sai she agat hkra, ta di ai gaw di, baw di ai gaw di di masha marai mali hpe azat shajawng kau da nna, dai shana nhtoi mahka la de nta kaw du yang, u masum lang goi sai.
Nta du ai hte Prang wai Mayan du hpe wa shaga jasu la nna, mabyin masa lam ni hpe akri akraw atsai ayang wa tsun dan nu ai, Mayan du wa mung Hkau Tu e, dai gaw nang de nna ding sang gahtam sat ai nre gaw hpa nra ai, shum hkrit ngu sai. Raitim, Manam Tu gaw mahkoi ganing re nhten ngu myit let, nam kaw makoi chyu makoi rai, tawng numrang makoi hkawm nga yang, Loije Kawnglawt na Mawa ni mu dai tsun na matu, du ni a nta kaw lung wa mara ai. Du wa hpe wa naw hkra rai nna, du wa e, nanhte a masha Manam Tu ngu ai wa gaw anhte a masha Na seng gat Sam ni a nta nhku kaw gahtam sat tawn nga ai law ngu sai da. Shaloi du wa gaw: Manam Tu gahtam sat ai nre, shanhte she Manam Tu yup nga ai kaw sa gahtam ai she re, Manam Tu ganing ndi shi hkum lawt na matu ta htang ai she re, anhte Prang wai ni nanhte Myen mung Kawnglawt Mawa ni hte moi kaw nna, hpa amu manghkang nshut nshai yu ga ai. Nanhte a masha mali mara gata kaw hpa majaw Manam Tu gat she sa ai wa hpe hkap gahtam ai? Daini anhte hpa amu tsun hkat na lam n nga ai, kadai si kadai ma. Ngu shakre kau dat sai. Dai hpang Mawa ni gaw Sinlum bum bum du rung de bai sa shawk jang she, bum du rung na Gala du ni mung mu ndai gaw nanhte lahkawng maga na ni du dung yang she mai tsun hparan ai ngu nna, Ura bum rung kaw lahkawng maga na masha lung wa marit ngu nhtoi gadi masat dat ya sai.
Shaloi Mawa dai ni mung nhtang wa nna, Na seng gat hku ga bai htet dat masai. Shi ga na lu ai Manam Tu gaw kadai hpe wa saw yu na yi? Ngu nna gahtawng masha ni hpe hkan saw yu yang kadai mung nhkan nang hkraw rai nhtawm, hpang jahtum e gaw lawu gahtawng na Brang Shawng dingla hpe bai sa saw woi nna Ura bum rung de du sa wa yang, Kawnglawt masha ni gaw shan a shawng e wa du rau nga la masai da, Manam Tu a myit ndai lang gaw gara hku rai wa na kun ngu myit mau nga lu ai, rai yang Brang Shawng dingla shi hpe: Ma Tu e, la ngu ai ni gaw madu shawng nshut ai bungli hta hkrit myit nmai rawng ai lu, lam hkawm ai chyang chyang, ga shaga nsen hkram hkram rai ra ai, ngu nna rung ntawt kaw myit atsam n-gun naw jaw shaga nga yang, hkumgawng galu kaba rai nna, nten hkye ai sha mu nna, nra wan nhkun kawn shaw shapraw la ai ngu na zawn re manu mana chyang ai tara rung na Gala wa shaga dat sai. Rung shang na rai sai nga nna, shanhte yawng hpe nhku de woi bang wa sai, dai shaloi Brang Shawng dingla hte Manam Tu gaw, yawng a jahtum na lahkum kaw dung nga masai, hyenla lahkawng saboi kaw sagu nba sa nyep nna, hpagan kaw sha hpa muk hte htang re ni sa tawn ya ma ai da. Dai hpang, tsawtsaw raprap rai nna, kan kaba, tsuktsuk re nhka mun gaw myiman pyi ganoi n mu hkra galu nna, Lunghkat bum kaw na woi salang wa zawn re tara rung na tara agyi wa hte sateng gan sanat hpye Kau rai ai marai masum du sa wa mara ai.
Ndai masum du dung ai hpang, gumhpraw tingsan hte hpri sinyu hpai ai marai lahkawng bai sa wa nna, hpri sinyu hpe saboi kaw rang nga sa kabai tawn ai htawm, tingsan kaw na gumhpraw(Mawa ni la sa ai re da) dengga rere ngu saboi ntsa kaw ru gawng tawn rai, yawng zing, yawng zing, dung dung nga nna mying shaga sai da. Mana Tu (Manam Tu) tsap: Nang masha sat ai nrai i? Re, ngai masha sat ai, hpa majaw sat ai? E ngai Na seng gat kaw na Sam jinghku ni a nta kaw sa manam yup nga yang, shanhte marai mali ngai hpe sa shang gahtam ma ai majaw, tinang a hkum makawp, ganing nchya di nna gahtam sat kau sai, ngu tsun dan nu ai. Shaloi Gala du, tara agyi wa lata yungnu lahkawng sharawt nna, e Mana Tu grai gaja sa! Nang arawng lu sai, nga nna dai shani gumhpraw dengga tingsan mi hte jum joi lahkawng, ngachyu kawk lahkawng mung kumhpa ya dat ai hkrum nu ai. Shingrai, Brang Shawng dingla hte shan gaw Ura bum kaw nna jan du ladu kaw, jahpawt sa wa ai lam hku nrai ai sha, Jan mai bum lam hku lagaw lahkam pyi lang mi htawt dat ai gaw shawoi na lahkam lahkawng daram tsang let hkawm mat wa masai. Ndai Prang wai ga na Manam Tu ngu ai wa gaw shi prat hta masha mali sat kau yu nna, sharaw shi mung gatawng kau lai wa yu sai, rai yang hpang jahtum sharaw shi ngu na kaw, sharaw htingkan htu kashai kau ai majaw, sharaw shi hpe du kaw kap di gawa ya ai nna, sharaw mung si ai hta n-ga shi mung sak sumri sum mat nu ai. Masha ngu ai gaw hpa gun ai wa hpa kaw si nga ai ga malai hte raw rai nu ai.
