Ganoi Ngu Ai N Nga Yang

"Htaw bum tsaw de she marang htu ai ngu yang, nang tinang a myikaw ntsa de she marang si gahte." ngu ai ga malai gaw shinggyim sak hkrung lam hta mau na zawn re ai mahkrum madup mabyin masa ni wa masha ni ka tawn ai lik laika hkan she mu hti, na hkrup ai ngu yang tinang kaw mung bai du wa chye ai hpan rai nga ai i! "Mahti yang gyi, shatan yang ni." ngu ai ga malai gaw teng nga ai. "Mungkan ntsa pra sha n lagawn yang hpa mung mu wa, hkrum wa ai baw re." nga nna amyu sha ningbaw gaba Nban La Ong tsun tsun re ai ga hpe dum dat shagu, tinang kaw byin lai wa sai laklai ai mabyin langai hpe bai sumru yu yang, daini du hkra mau mau ngu hkam sha nga ga ai. Maga mi gaw mani mayu na zawn mung ngu ai.

Hkam sha lam gaw ganoi ngu n nga yang, gabu hpa lam she rai na mi re, sum machyi gaya hpa lam she rai na mi re shing nrai, manang wa tinang hpe grai kamhpa ai lit hprai kau ya ai majaw, prat tup myit n pyaw taw na hku byin na mi re n tak sawn lu ai masin gahpra na zawn re ai mabyin langai hpe dum dat aí lam rai nga ai. Maga mi lagu mani mayu ai lam mung ganoi ngu n nga yang, shawa man e tinang hkum ganoi anya shadawng la ai tai sai ngu lagu sumru mani mayu ai lam rai nga ai. Raitim lagaw mali tu ai magwi pyi gataw ai nga majaw bai myiman n-gun sharai la lu nga ai. Nsa sa lagawn na aten gaw grai naw tsan ai. Shat sha n lagawn nna pyi n tau ai mabyin masa ni byin hkrum nga saga ai. TV, Radio, gyenan shiga ni hkan mung shawoi n na yu ai shiga ni na nga ai. N mu yu ai mabyin masa ni mu nga ai. N hkrum yu ai masha hpan hkum hte mung hkrum nga saga ai.

Dai hta grau sawng ai gaw, ya prat gaw tatut hku na hkringdat n chye ai masha chyasam ni tinang dum nta, nhku gata, yup gawk, yup-ra de du hkra n saw shaga tim pyi shang bang wa ra ai prat du wa sai re. Dai zawn shim lam n nga ai mungkan banbang bak shinggyim sak hkrung lam prat masa a myit hkalem hkalau ai moru hta gade sadi sahka nga shakut yu tim gadai mung n lawt lu nga ai. Daini lawt lu tim galoi kun gaw yawng hkrup naw sha chyalu sha rai nga ai. Shara mi hta n rai yang shara mi kaw gaw gatut sha na sha rai nga ai. Ja gumhpraw hte n rai yang arawng aya, gawng shingyan hte n rai yang tsawra matsan dum myit amyu myu hku hkalem hkrup sha nga ga ai. Ndai hka leng hta gade sadi sahka maja nga tim, ngai mung kaga mi n lawt lu mat ni ai. Ganoi ngu ai n nga yang, chyan yu ai ngu yang gadawng bang, baw hpye ai wa hpe majap kailang e nan, ngu ai hpa she rai sai. Hpara wa e madat, nat wa e matsat re majaw sha lawt wa lu saga ai.

Mungkan a zinli zindam sinwawp ana ngu ai mungkan ting byin hkrum nga ai, 2021 ning du hkra rai yang, laning mi shata matsat du wa sai re. Shinggyim masha ni mung seng ang ai mungdan asuya ana ninghkap tara masing ní a majaw, shawoi na zawn hkawm sa hkawm wa n mai mat, tinang a nga shara, dum nta, mare shinggan pru hkawm sa lam ni pat hkum, jep jen ai ten gadai mung gadai tinang a nga shara dum nta wang gata rawng nga let, yawng sadi maja nga ai ten rai mali ai. Ang shaa shaning 2021, shata man matsat ten hta, n myit mada ai Afuganisatan mungdan de Htaliban rawt malan ni mungdan daru magam ahkang aya gashun hkat ai manghkang shiga ni mungkan ting she mawng pru wa ra ai. Ngai mung asuya sinwawp ana tara a majaw gawk rawng shaja, wang gata hkawm jin nna hpa n chye galaw jang, TV shiga ni bai hpaw yu, gyenan ni ahpre mayut chyai yu rai aten shalai shakut nga ai. Gyenan kaw chye hkat ai ni, n chye hkat ai ni mung matut mahkai hkrup jang, gamung dup kam jahta ai ni hte matut mahkai chyai rai lagawn shabran nga ga ai. Dodap na nye a dung lahkum galu kaw galeng let, gyenan mayut chyai nga yang she ngai na nhung shingwang za-dek kaw, "Hi... nga nna masha langai matut pru wa ra ai. Dai zawn "Hi..." galaw ai masha chye hkat ai, n chye hkat ai mung dingyang nga nga ai re majaw grai wa mau shara n nga ai. Gadai wa rai kun ngu shi a za-dek hpe mayut alai yu yang, ndai lang gaw loi laklai ai amyu n bung ai sumtsaw sumtsan maigan mungdan shara de na rai nga ai. Grau nna shi gaw shanhpraw amyu rai nna amyu shayi numsha rai mali ai. Nbung shingwang za-dek hta shanhpraw amyu ni hte manang tai ai nau n nga majaw, nbung shiga kaw sha manang tai ai gaw hpa agam shara n nga ai, gaja ai ngu, ngai mung "Hi... " ngu bai htang dat ai.

Shi a sumla langai lahkawng mara da ai hpe yu yang, ram daw tsawm ai numsha gaw rai nga ai. Tsawm ai ngu ai hta hkumhkrang bawng ring nna sai shan hpring azet atsang san ai hpe grau tsun mayu ai. Mying hpe hti yu yang Devis Lexi ngu ai jan rai nga ai. Ngai mung tatut mi shi hte hkrum lu na n rai tim, myit mada ai lam gaw chyi pa n shayawm. Jinghpaw sai gaw arawng mala wan yam shama ngu ai ga malai nga ai hte maren, ngai maga mung shanhte maigan masha ni hte hkuhkau tsun shaga chye ai, manang tai, mai jahta ai lam chye shangun mayu nga ai. Dai ten kaw na numsha jan gaw ngai hpe grai myit shang sha ai zawn shani shana jahta bang wa sai. Jahta ai ten nhtoi ni hta hkan nna ngai na hkringdat ni, asak ni, ngai hpa bungli galaw nga ai lam ni, hpa baw hpaga yumga galaw nga ai, gara mungdan kaw na re lam ni san hkrai san jahta hpang wa sai. Ngai mung shi san ai hpe gaw mai byin ai made namhtun chya shatsawm let htai ya nga ai. Hpa majaw nga yang, Amerigan mungdan hte Myen mungdan a madang gaw n tsun tim pyi gaw wa shakap shai re ai lam mungkan ting chye nga ai. Mungdan madang mi n bung tim myit hkam sha madang bung yang gaw mai jahta na re ngu sawn la ai rai nga ai.

Shinggyim masha ngu ai gaw, gade madang shai hkat tim, yawn ai, gabu ai, myit dum ai, tsawra chye ai, nju ndawng ai, machyi makaw hkam sha lam ni gaw yawng maren sha rai nga ai. Numsha jan dai dai wa mung, madu wa tam shamat ai zawn chyu nga nna ngai hpe dinghku de, n de lam chyu nau san wa wa re majaw, ngai mung shi a dinghku lam ni bai gahtap san dat yu ni ai. Shaloi shi gaw ma shingtai re lam, gaji ten kaw nna ganu gawa (Modaw hkala si) n lu mat sai rai nna, mayu ni kaw machyu nga ai lam, gatsa ni kaw wa nga yang, gani yan gatsa dinghku n rum n ra ai majaw, asuya a jahkrai ma bau ginra de wa sa kau rai jahkrai bau ginra hta asak shi kru ning du hkra nga nna, hpyendap shang wa ai nga nna galu galang tsun hpyan dan nga ai. Asak gaji kawn hpyendap shang ai majaw, myit ja ai laikyang ni kap wa nna yak hkak lam amyu myu mung hkrum gadup wa sai da. Ngai mung shi a ma prat hkrun lam shingdu labau hpe madat yu yang, nye myit kraw gata grai n-gaw nwai matsan dum myit ni rawng wa ai. Shi dai zawn matsan mayan nga tsun jahta dan ai hpe hkam sha ya ai hte hpa lu garum, hpa hpaji jaw lu na gaw n rai ngu galang lang zim di tawn da yu tim, shi kaw nna mahtang bai gamung jahta matut wa wa rai nga ai.

Ngai mung maigan masha ni hte jahta ai gaw shawoi na hte n bung aí majaw loi maumau ngu wa sai. Shawoi na maigan manang ni gaw ga hpungdim matu shakra dat jang hkring mat ai. Raitim ndai lang gaw gade shakra shakut yu tim bai matut wa wa re ai. Je magang hpre magang, tsun magang shanang magang, yet hte yet jahta wa yang, Wunpawng myu sha ni a n la dap gamung namchyim maga de she krawn bang wa nga ai. Ga si ga hkaw ni wa matsan dum lit la garum ra na zawn, mai byin na zawn, n mai byin na zawn gayau gaya, ma-u ma-a hku she hkam sha hpang wa sai. Shi tsun ai, shi dinghku galang de yu sai da. La dai wa hpe shi grai kam lai wa sai re da. Numsha jan shi asuya hpyen magam gun ai kawn mahkawng da ai shata shabrai ni hte Gyalifuniya mare gaba kaw shan yan nga na nta mung lu mari da sai da. Madu wa jawn na matu manu hpu dik ai Mercedes modaw langai mung mari da ya sai da. Shi gaw dai la wa hte hkungran ngut nna dum nta ra n rawng hkra jahkum da sai. Gade nna yang Irak mungdan de hpyendap bungli hte seng nna rawt sa wa masai da. Shata kru na ai hpang bungli kaw na bai du wa ai shaloi, shi madu wa shi manang jan hte labau shuk taw ai lam chye wa nna jahka kau ai nga.

Ya shi gaw shi hkrai bai rai wa sai. Matut nna shanhte amyu shada dinghku de na myit mung n rawng mat sai da. Shi hpe teng sha tsawra ai, kamhpa mai ai, Karai Kasang lam madun ai kaga amyu shadang ni hte raitim, dinghku bai de na she myit wa sai nga tsun ai. Ngai mung shi dai zawn nga tsun jahta dan ai hpe na nna, nye myit kraw kata, oh... Ngai lama dinghku n de shi ai rai taw gaw, shi tsun ai teng yang gaw mai byin na nhten ngu lagu myit kau se ai. Hpa majaw nga yang ngai mung nye ganu gawa dum nta buga hte tsan gang nga nna, nye a myit hte ngai hkrai wanglu wanglang nga hkawm ai bu hkawm brang wa mung rai nga ai. Bai nna hpaji chye, madang nga ai masha, madang nga ai mungdan amyu ni hte mahku mara matut mahkai lam galaw ai mung gaja ai lam, galu gaba lam langai rai nga ai ngu sawn la ai. Raitim, shi hpe ngai dinghku de n de lam ni hpa n tsun dan shi aí. Hpa majaw nga yang mu pyí n mu ga ai masha chyasam, majawi nbung shiga ntsa jahta chyai ai gaw tinang a lam grai ahkyak ai zawn nga tsun dan nna, hpa lachyum n pru ai ngu sawn la nngai. Majawi, lera wora jahta chyai jang rai sai ngu sha myit la ai. Ya ngai hte shani shana jahta ai mung masum mali ya rai wa sai.

Shi a tsun shaga ga manawng nsen ni hpe madat yu yang, lani hte lani shani wa ai zawn, ngai hpe ganu gawa kam ai zawn, ga manawng nsen ni mung shi a myit kraw gata kamsha lam ni, byin mayu ai lam ni hpaw tsun dan wa nga ai. Shi a akyu hpyi ai mahtai gaw ya she ngai hte hkrumtsup wa lu ai lam, shi hpe garum lu na masha gaw Karai Kasang nan jahkum ya ai re lam ni tsun wa sai. Ngai hte masum mali ya laman jahta yu ai shaloi kam mai ai masha re lam atsawm chye wa sai re da. Ngai mung, e anhte ni mi gaw hpa laklak lailai re ni n rai ga ai law, yuyu sisi pra nga ai mare masha ni she rai ga ai law ngu htan dat ai. Ya shi grai ahkyak ai lam lama mi ngai hpe tsun dan mayu nga ai nga nna tsun wa sai. Hpa baw ahkyak wa rai kun tsun dan rit ngu hang dat ni ai. Dai ga gaw an lahkawng lapran sha mai chye ai da. Kaga gadai hpe n mai chye shangun ai rai wa sai. N chye shangun na matu ngai hpe akroi anoi ga shaw lajin wa ai. Ngai hpe, gadai hpe n tsun dan na matu shawng ga sadi hkamla shangun ai. Ngai mung, nang dai ram ahkyak ai rai jang gadai hpe n tsun ai. Manang wa lam masha hpe majawi jawi tsun dan ai baw hpan ma n re ngu ngai bai htang dat ai. Bai nna, ga sadi lahkawng gaw ngai, shi hpe myit n mai shayawn ai da. Ndai lam gaw shi a matu grai ahkyak ai prat hpe shading sharai la na ahkaw ahkang gaba langai tsammari lu da ai re da. Dai majaw ndai ahkaw ahkang hpe n tat kau hkra shi hpe chyeju hte nshut nshai garum la shangun mayu nga ai re da.

Ndai bungli byin wa jang an lahkawng a yaw shada lam ni mung awngdang wa na re nga nna grai myit makam gaba hte tsun wa ai. Ngai mung shi hpe, na matu dai ram ahkyak ai, mai gaja ai bungli she rai yang ngai lu garum ai hpe gaw garum na, n lu garum ai hpe gaw ganing n chye di sai ngu laika ka htang dat ai. Shi mung shala chyai ai n re gaja wa tsun nga ai, nang atsawm myit yu u hkrai nga. Hpa majaw nga yang ngai mung galang lang shi ngai hpe majawi shala chyai shadu nna laika htang ai lam ni nga ai. Shi a ga manawng ni hpe ngai bai sungsung sumru deklek yu yang, majawi shala chyai ai zawn gaw n rai nga. Ngai hku na bai myit lu ai lam gaw, numsha jan ndai Mungkan Wunpawng Hpung Rapdaw shing nrai, sinna mungdan de na shi sawk kinyu langai ngai rai sam ai kun? Shiga lama ma sagawn hkawm ai rai kun ngu myit sawn yu ai. Hpa majaw nga yang, hpa n seng ai ganang ga na masha chyasam, galang pyi n krum yu ai wa hpe anhte hku na garum lu na lam gaw shiga ginlen ya ai lam sha mai byin ai. Bai nna shi a hpaji madang hpe san yu yang, shi gaw hpyendap dakkasu kaw na shinggyim wahpung wahpawng tara tawt lai, lagu lagut masha sat amu sagawn ai machyawi hpaji janmau lu da ai jan wa mung rai nga.

Dai nga yang ngai gaw shi hpe shi sawk hkawm ai she mai byin ai ngu sawn la ni ai. Shi akroi anoi myit kam gaba ai hte jahkring hkring ga shaw tsun wa ai majaw, ngai mung gaja sha nang hpe myit n shayawn ai ngu htang dat ai. Rai yang shi hku na tsun wa ai gaw: Ya shi Afuganisatan mungdan mare daju Kabu kaw du taw ai shata kru rai wa sai da. Taliban rawt malan ni mungdan daru magam ahkaw ahkang zing, gasu gabrawng byin ai majaw matut nna, Afuhan mung shawa hpyen yen ni hpe Amerigan mungdan de htaw lahka ai bungli hpe Amerigan hpyendap magam lit hku bai shatsam hkrum aí kaw lawm nga ma ai. Dai zawn asak ram nna laksan bungli shakut nga ai ni hpe dai ten na mungkan Afuhan mabyin masa yu reng kawmiti kaw nna, laksan ja gumhpraw salat gatsut kumhpaw kumhpa hku shagrau ai hpe hkam la lu ma ai. Marai langai hpra hpe shanhte a shata shabrai hte hpawn Amerigan dawla sen jahku mun masum shagrau jaw ma ai da. Matut nna shanhte ni bat lahkawng hpang Afuhan kaw na kaga mungdan de bai bungli htawt sit na hkyem nga sai da. Shi lawm ai hpung gaw Siriya mungdan de rai na re nga.

Ndai gumhpraw hpe shanhte ni nbungli kaw n mai lawm wa ai majaw, bat lahkawng laman, gadai mung gadai Afuhan mungdan shinggan, tinang hte seng ang kam ging ai jinghku jingyu, gahpu ganau, dum nta masha ni hpang de tinang a ja gumhpraw shagrau kumhpa hpe ading tawk nta di sa ya ai mungkan ga daga arung arai htet ai hpe shalai sha ai rai htinglet shalai hpung ni kaw bang shagun dat ya na hkyem shajin nga masai re da. Ndai hpung ni gaw mungkan grup grup arung arai htet ai hpe ading tawk nta di hkam dahka hte hkrak ginlen sa ya ai arung arai htet shalai kumani hpung ni rai ma ai nga. Ndai bat lahkawng gata shi Afuhan mungdan shinggan garai n pru mat ai laman, dai gumhpraw hpe shinggan de n lu sa kau dat ai rai yang, tawn kau da na lam sha nga sai da. Dai majaw shi gaw ndai gumhpraw hpe hkye la lu na matu ngai hpang de gan htawt sit hkap la da ya na matu, ngai kaw shagun ap da mayu ai rai ma ai. Shi manang ni mung yawng dai hku tinang a ja gumhpraw sutgan hpe Afuhan mungdan shinggan de htawt sit taw nga masai re nga. Dai hte maren, ngai kaw dai kumhpa du wa ai hte atsawm hkap la zing da ya na hte grai shim ai hku lit la da ya na gra lagra numhtet shatsam tsun shadum wa sai.

Dai gumhpraw sadek hpe kaga ngai na matu buhpun palong kumhpaw kumhpa arung arai ni hte hpawn makai nna dinghku rai hku ngai nga ai shara nta di du wa na re lam numhtet shana wa ai. Shi bungli ngut jin ai hte Myen mungdan du shang wa nna, ngai kaw du pru wa na re da. Shaloi, dai gumhpraw kaw na gambum 15% hpe lit la ya a i ngai hpe shabrai hku kumhpa garan jaw na raí ma ai. Dai gumhpraw du wa ai shaloi majawi jawi shana pyaw chyai ginra, kara-oke, hpaida gasup ayai hkawm ai n galaw na matu mung jahkring hkring sadi jaw numhtet shadum wa ai. Shi ngai kaw du wa nna hkrum hkat ai shaloi myi hte myi chyaw masin salum hte seng ai lam ni mung prat shawng lam a matu jawm bawng- ban jahta ta gindun sa wa na re da. Ngai gaw shi a matu myit mada shara nan rai sai re nga ai. Shi dai zawn nga tsun wa ai hte ngai gaw jit she tat na daram nshung si rawng mun she jawng mau gajawng mat ni ai. Ja gumhpraw akyu myit nna mung n rai, masin salum hte seng ai lam mung n rai.

Mu pyi n mu ga, hkrum pyi n hkrum ga ai masha chyasam lahkawng a lapran, dai zawn aten gadun laman sutgan hte masin salum ap na dawdan gui ai myit hpe mau mat ai lam rai nga ai. Grau nna shi a ja gumhpraw sutgan hpe tinang pyi n du ga, n chye ga ai mungkan jut shara mi de, pyi n hkrum ga ai masha wa a lata kaw shagun sa ap tawn na dawdan gui ai lam hpe gadai wa n mau gajawng na rai ta! Raitim, nye myit hpe amai sha tawn da nna, shi hpe dai zawn kangka ai hte mungdan magam bungli gunhpai lu ai hpe shakawn nga ai. Bai nna dai zawn shabri shabrai lolo chyeju hkam la lu ai hpe mung gabu lawm ai, awngdang nga u ga ngu laika ka htang dat ni ai. Matut nna ndai ten na ayak ahkak n manu taw ai lam hpe mung chye ya nga n ngai. Raitim, garai hkum rai shi ngai hpe naw myit yu na ten jaw rit ngu, shi hpe bai galang htang dat we ai. Shi a ga manawng nsen ni hpe madat yu yang mai byin na zawn gaw rai nga ai. Hkalem ai mi n rai kun? Ginhka la na yak nga ni ai. Tsawmra na hkra myit sumru mat ni ai. Hpa majaw nga yang, ndai zawn re mabyin masa ni grai na ga ai. Raitim, n teng ai ngu mung n kam na zawn gaw n rai.

Shi a hpyen hkring hte re aí sumla ni mung sa ya ai. Afuganisatan na manghkang mung teng byin nga ai. Ngai shani shana TV shiga sumla hta Afuhan mung a mabyin masa shiga ni hkrak yu nga ai. Dai majaw shi a ga manawng ni ya na zawn tsun shakra wa aí kaw nna, ngai shi hte ga shaga grai sadi wa sai. Manang wa hpe, mai ai mung n tsun ai, n mai ai mung n tsun ai. Hpa majaw nga yang, shi tsun ai teng ai raí yang mung, ngai lama mai ai ngu ga hkap la kau dat jang, masha ni a matu n byin na byin wa, n sum na sum wa rai, masha a prat hten wa ai baw, hkrat sum shangun ai baw n byin shangun mayu nga ai. Shi kaw na ja gumhpraw kumhpaw kumhpa garan jaw na, n jaw na gaw ahkyak n rai nga ai. Myen mungdan hta dai zawn maigan kaw na sutgan gaba ginlen hkat na mungdan madang hkam dahka hpa n nga shi ai. Grau nna maigan mungdan hte seng ai lam hta grau n mai kam ai hpe masha yawng chye nga ai. Ang shaa dai ten, shing nrai ya du hkra ngu mai tsun ai, munghpawm Myen mung mung masa shuk shanut, du daw sai hkaw taw ai manghkang hpungtun gaba mung galup hpang wa nga sai ten rai mali ai. Sumtsaw sumra lam gaw n byin mat tim n ra ai, dai gaw masin salum hte seng ai hpan re majaw bai mai tam, mai lata la ai sha re.

Raitim, nhtoi gam maka gaja ai ahkaw ahkang gaw bai gayin du wa na yak ai, lata la mai ai hpan n rai, manang wa a matu myit ya ai daw re. Shi dai lam hte seng nna ya na zawn aja awa matut mahkai wa ai lam, ganu kam, gawa kam, lit shatsam wa ai majaw, ngai gaw dai shani kaw nna nye baw ntsa nat lung jawn hkrum ai zawn nchyi nmu she hkam sha wa sai. Hpa majaw nga yang, shi a matsan mayan pra sa ai lam hta tsawm mari gam maka shading sharai na lu ai ja sutgan ahkaw ahkang hpe n tat kau shangun mayu nga ai. Gadai hpe raitim tinang hpe grai kamhpa nna garum hpyi ai hpe gaw nye myit hta ningdang kau n lu ai lam rai nga ai. Bai maga mi teng ai mi re, n teng ai mi re, dai mung myit yu ginhka yak nga ai. Dai majaw nye myit hta nni nhkri hkam sha ai lam gaw shi hte matut mahkai lam tsep kawp dan di kau sana kun? Ganing di na kun? Garum la mai baw kun? N garum la mai ai baw kun? Agatsi sha tawn kau na kun? Manang wa lam hpe chye nga ninglen kawi yen kau ai tai na kun? Ngu nhti nhtang myit shuk wa sai. Shi hte matut mahkai ai ten gaw 2021 ning shata man 8 nhtawi 23 hkying 23:26 shana ten du hkra rai wa sai.

Nye myit hta lama mi dum dat ni ai. Masha langai ganing re masha re gaw, shi manang ni hpe loi maram yu yang chye lu na re, nga ai hte maren, shi a manaw manang ni a za-dek hpe bai galang ahpre mayut jep yu ni ai. Shi a za-dek hta ganing re manang ni hte matut mahkai nga ai kun? Manang gade law nga ai kun? Jep yu yang mau na zawn manang lahkawng masum sha matut da ai hpe mu lu ai. Dai manang ni mung yawng anhte Wunpawng amyu hkrai rai taw ai. Dai ni hta na ngai chye ai hpung sara langai ma lawm nga ai. Shanhte ni gaw Inglik ga nau n lu shaga ai majaw ngai hte matut hkrup, ga shaga manu ai hte gaya ai kaw mahti jahkawi hkrup rai ang na masa rai sam ai. Ngai grai myit yu ai hpang, shi hpe hpaji langai daw ya ai. Shi hpe tsun ai: Na gumhpraw hpe Amerigan de mahtang nang kam mai ai jinghku langai ngai kaw sa dat u. Dai n rai yang nanhte Amerigan kaw ngai na Jinghpaw amyu sharin sara ma gaba langai nga ai. Shi hpe ngai, na a lam atsawm tsun dan ya na shi hpe garum hpyi mai ai. Shi a gumhpraw hkap la lakmat za-dek kaw nang na gumhpraw hpe tara shang asuya gumhpraw dum hku sa dat u. Nang Amerigan du ai shaloi sara ma gaba kaw na gumhpraw hpe shaw la u.

Nang shi hpe chyeju dum kumhpa gade jaw mayu ai gaw na myit sha re, nye matu kaga mi n myit ra ai. Ngai mung nang hpe lam madun garum dat lu jang myit pyaw sai. Nye matu hpa n tsang ra ai ngu hpaji jaw dat ni ai. Shi bai tsun wa ai gaw: Ndai ten Aluganisatan kaw na Amerigan de tara shang gumhpraw n mai shagun ai da. Kam na jinghku mung n lu ai nga. Nang hpe sha kam sai. Bai nna Afuhan mungdan shuk shanut nga ai majaw Afuhan asuya gumhpraw dum ni yawng hkring mat sai. Dai majaw lahta e tsun lai wa sai Mungkan ga daga ading tawk nta di ja gumhpraw, arung arai shalet sha ai kumani hku na sha Afuhan mungdan shinggan lawan dai gumhpraw ni hpe tinang sa mayu ai de sa kau na lam sha nga sai re. Dai gumhpraw hpe hkye la garum na matu ngai sha nga sai nga nga nu ai. Shi hku na ngai nga shara hkringdat ni, gyenan nambat ni, nye mying ni hkumtsup hkra ka shagun dat ya na jahkring hkring hpyi atet wa sai. Raitim ngai hku na shi shatsam ai lam hpe n gui hkap la ai majaw hkringdat n jaw nngai.

Ngai hku na shi hpe, hkum di u, n mai byin ai, nanhte na mungdan zawn galu gaba ringchying sai mungdan n rai ga ai. Myen mungdan gaw lam shagu matut mahkai, hkawm sa hkawm wa yak hkak ai mungdan re. Ngai nga shara gaw mungdan asuya kaw na shagyip shagyeng hkum pat tawn ai rawt malan ginra re. Gyenan matut mahkai lam hpa n nga ai. Ndai ginra kaw tara shang ja gumhpraw hkap la shara asuya gumhpraw dum mung n nga ai. Ngai kaw mung gumhpraw dum shaw bang hkap la lakmat hpa n lu ai. Shinggan masha pru shang yak ai ginra re ngu gade tsun tim hpyi atet tiktik rai nga ai. Shi tsun ai gaw hkum tsang u, gumhpraw dum hku shagun na n re, na nta chyinghka di ading tawk sa ya na ni re. Dinghku arung arai re ngu hku shalai mat wa na re. Ndai rai htet shalai sha ai kumani ni gaw Mungkan wunpawng hpung rapdaw kaw na tara shang ahkang lu da ai hpung ni re. Gara asuya hte mung tara shang mungkan ting hte seng ai hku re. Arung arai shagun ai shani kaw nna hkying hkum 48 laman gara mungkan jut de mi raitim, nta di arung arai sa ya ai ni rai ma ai nga nna bai gahtap tsun sanglang wa ai. Nang hpe sha kam sai law lawan hkringdat ni shagun ya mi law chyu nga atet shatsang wa ai.

Nang ngai hpe n kam ai i? Nkam garum la sai i? Matsan mayan nga nau atet shatsang wa ai majaw, ngai mung ga di n jat nna, mai ai nye hkringdat ni jaw dat na raitim, Laiza shara a lam, Myen mungdan ya ten Afuganisatan zawn gade shuk shanut nga ai lam, nang mung mungkan hproi hpaji ningchyawi ninghkring ningtawn ai masha, nanhte sinna masha shanhpraw amyu ni she grau bawnu hpring mu mada ai ni re majaw, mai n mai shawng sagawn yu nna she atsawm myit yu u yaw ngu, nye hkringdat, mying ni, nambat ni ka jaw dat ni ai. Anhte gaw Myen nambat mung n mai lang ai shara Miwa nambat she lu ga ai ngu, Miwa gyenan nambat mahtang ka jaw dat ni ai. Nye myit hta, she teng ai rai yang gaw nta di she du wa na me gaw, du wa jang atsawm hkap la tawn da ya jang rai sai me gaw, hpa myit pu ra ai ma ngu myit la nna, shi hpyi ai hkringdat ni ka jaw dat sai. Raitim ngai shi hpe chye shangun mayu ai gaw hkringdat gaw jaw dat na raitim, na a ja gumhpraw arung arai ni shagun dat u ngu nna ngai n tsun mayu ai yaw. Ngai, dan re bungli galang mi mung n galaw ga yu ai majaw dai hte seng nna mahkrum madup mung n nga ai.

Nang she madung re yaw. Nang ja ji ja gang hpyi atet wa ai majaw sa dat ai lam she re. Lama na ngai kaw n du ai sha lam lapran e ganing kana byin wa yang, ngai hku nna kan sagawn la na gaw n loi na re. Bai nna ngai kaw du wa ai hpang raitim, ngai hpe lap mi mung n jaw ra ai. Nang hpe garum la mayu ai myit san san sha re. Nang ngai hpe jaw mayu yang kaga arung arai kumhpa ni jaw jang rai sai. Na arung arai sadek hpe mung ngai tsep kawp n hkra ya na n ngai. Nang hkum nan du wa ai shaloi she nang hpaw jep la u. Madu n lawm ai sadek hpaw yu na tsep kawp anhte hta htung n nga ai, ngai n galaw na n ngai ngu gahtap tsun dat ni ai. Shi hte hkrum jahta ai gaw bat mi du wa sai. 2021 ning shata man 8, nhtoi 24, Miwa mung hkying aten 15:13 hta shi kaw na laika shang wa sai. Shanhte gaw bungli lit prai nga ai ni re hte maren, majawi jawi shinggan n mai pru hkawm ai majaw, Wadang hkye hpung na magam gun num pawmi jan langai hpe garum hpyi nna, shi lata kaw nye hkringdat hte re ai arung arai hpe rai htinglet shalai sha ai kumani ni kaw wa ap dat shangun sai nga laika ka shana wa ra ai.

Nye myit hta, nang pyi sa ap gui jang, ngai mung n garum la nna gaw n nga lu sai. Wang chyinghka nta di she du wa na me gaw la la na lam sha nga sai ngu myit hpe amu sha tawn let sumru nga ngai. Shi bai laika htang ai: Nang gaw Karai a tsawra ai lata la ai gasha majing re hpe ngai atsawm chye lu sai. Karai nang hte jahkrum ya na matu wenyi shadut ai lam re hpe ngai shingran prapra mu ai, dai majaw nang hpe ndai sadek sa dat gui ai re. Ndai sadek hpe sa ai jahpan laili laika nambat ni yawng ka jahkum ngut ai hte rai ndai sa ai nambat ni, gyenan jinghkri kyit hkai za-dek kaw hpaw yu nna, gara kaw du nga sai gawn yu na laika hkringdat nambat ni bai sa dat ya na. Arung arai sadek nang kaw du wa ai hte ngai hpe galang ta lawan shana wa rit. Dai sadek hpe gara hku hpaw na ngai bai tsun dan na. Ngai shi hpe laika bai ka htang dat ai: Galang lang ngai nang hpe grai myit yu mau ai, mani mung mani mayu ai, matsan mung dum ai. Hpa majaw nga yang nang zawn re kamsham ai masha hte ya na zawn galang mi mung n hkrum ga yu ni ai.

Yupmang hta pyi shingran n mu yu ai masha wa hpe mahkup saiwan htat ai lapran ginhka yu yak ai pra n pra soi sam hku sha mu lu ai hkrang zawn re masha wa hpe na a ahkyak dik ai arung arai sa ap gui ai ngu gaw, ngai mahtang bawnu sai hten nna yupmang mang taw ai kun she ngu hkam sha nngai. Nang gaw moi prat na Hkahtebawlui maumui na gara kaw na gale pru wa nna, gara de agajawng sha mat mat ai nat kun she shadu kau nngai. Shi bai laika htang wa ai: Tsawra e, ngai nat n re law. Karai Kasang wenyi ngai hpe nang maga de lam madun dat ai she re. Dai majaw nang ngai hpe myit n shayawn na re ngu kam ai. Ndai http://www.oceanicexp.com kyit hkai jinghkri kaw lawan hpaw yu u. Hpaw yu ai shaloi ndai laika gawn yu nambat 043575892190 kaw gayat dat jang arung arai sa ai long lam yawng chye lu na re. Ndai mu na jinghkri kaw arung arai sadek dai gara ra shara kaw du nga sai yawng gawn lu ai. Hpawtde arai sadek du wa ai hte ngai hpe galang ta shana wa rit yaw. Ya hkying 10:45 du wa sai. Yuptung tung sai yup sana. Ngui pyaw ai shana rai u ga tsaw nja e. Ngai dai shana tup yup n mai, yuptung lai mau nga yang hpang jahpawt u gawi mahka, 2021 ning shata man 8 nhtoi 25 ya, Myen mung shani na ahkying 2:30 hta kyit hkai jinghkri za-dek hpaw yu yang, gaja wa arai sadek sa dat sai laika mu hpaw hti hkrup sai. Raitim nye myit hta shi tsun ai hte maren ngai nga ai Laiza nta di she du wa na re majaw, du wa jang hkap la da ya na sha re majaw myit shajin let la nga sai.

Dai jahpan laika hpe mung ningpawt ningdung hkren atsawm hti jep yu yang, arung arai sadek sa shabrai Amerigan dawla $ 3500 kap nga ai hpe mu dat sai (Gumhpraw ndai hte ka shakap ai maisau daw maga sumla dem tawn ai kaw chyen mi n lawm mat sai). Raitim ngai shadu ai gaw shi yawng zupzi jaw ngut sai shadu. Ngai loi n tsen nna shi hpe bai laika ka san yu ai. Shi maga sa dat aí manu $ 9,000 gaw jaw ngut sai re da, ya ndai $ 3500 gaw Myen mung kaw arai du wa jang nang hpe gyenan shana wa na ra ai, shaloi wechat hku na hkap la shabrai dai hpe shagun dat u, shaloi shanhte ni nta di sadek sa ya na ra ai nga nna shi kaw na laika htang wa ai. Gaja wa jahpawt hkying jahku daram hta gyenan ngawi wa ra ai. Gyenan hta yu yang shawoi na nambat hte n bung ai, Myen nambat (+) 95 9781106189 rai taw nga ai. Hta madat yu yang Myen num nsen hte Myen ga hku nang Dumsa Lot Ong re i? Na rai du sai. Wa shaw la u. Shaloi ngai bai tsun ai, Laiza kaw hkap la na matu la nga ngai. Laiza de sa dat u ngu tsun dat sai. Dai hku n re, rai hkap la shabrai $ 3500 ang ai dai shawng hkap la lu ai hpang she anhte ni rai sa ya ga ai. Ngai bai tsun ai: Ngai kaw dawla n lu ai, Myen gumhpraw rai jang gade ang na? Ngu san yu shaloi, Myen gumhpraw lap sen manga shi sanit ang ai nga tsun wa ai. Ngai bai san yu: Ya rai du ai shara gaw gara kaw rai ta? Hkringdat naw sa dat rit ngu san yu yang, nbungli daru kaw na shana wa ai re nang hpe, rai hkap la shabrai lawan shagun dat rit, nau n mai shana tawn ai, anhte n lu la ai nga bai tsun wa ai. Ngai mung Myen ga gaw n kung n kang nga shaga ai majaw, Myen num gaw hpa baw tsun nga ai i n chye na ai nga tsun taw ai hpe na dat ai. Ngai mung Myen ga nau n chye shaga ai majaw galu galang n kam tsun taw nna dawm kau dat ai. Myen num dai rai hkap la gumhpraw lawan shagun ya na matu lang hte lang gyenan atet shaga wa ai kaw na masum lang gaw gyenan hta ya sani ai.

Dai zawn bawnu shuk shanut nga ai ngu yang she dai shani na marang rang mung lamu madin wo nna, nga wuloi dinggai jit ru dumhpro, hka singgat hkaw ai zawn she nga hkra marang si ni ta lahpan ram ram gaba sumri rit manai jahkrat ai hpa she rai nga sai. Laiza hka shi gasha pyi namuk dara panglai zawn modaw lam ntsa hku she dinghkren lui bang wa nga ma ai. Dai shani marang htu nau sawng nna gyenan shaga hkat ai nsen pyi atsawm n na hkat nga ai. Shi shaga ai hpe ngai atsawm n na, ngai na aku aka nga ai Myen ga hpe shi mung bawnu sin dum nga u ai. Mi kaw na loi n tsen nga ai hte maren, dai maigan num jan hpe laika ka shana dat ni ai: Nang shagun dat ai arung arai sa jahpan laika mu hkrup sai. Dai kaw rai sa ya shabrai $ 3,500 kap nga ai. Dai nang jaw ngut sai i? Ngu san dat ai. Shaloi maigan num jan gaw dai ngai n jaw shi ai. Raitim ngai maga rai bawn makai ai hte laksan rai htaw shabrai dawla hkying jahku ($ 9,000) gaw ngai jaw ngut sai. Ya dai nang kaw du wa jang nta di sa ya shabrai $ 3,500 gaw nang kaw na gan shaw jaw dat u. Nang kaw sadek du wa jang, dai sadek hpe gara hku hpaw na ngai tsun dan na. Dai sadek hpaw ai hte na matu hpun palong arung arai kumhpa gata kaw makai rawng ai gumhpraw sadek hpe hpaw la nna nang kaw na jaw kau ai sa shabrai gumhpraw hpe nang bai shaw hti 1a u.

Nbungli daru na Myen num gyenan matut wa ra ai: Gara hku ta? Rai hkap la shabrai lawan sa dat u, hkying hkum 24 laman madu n pru wa jang, rai ndai kaw n mai shana tawn ai bai nhtang dat ya ra ai. Nang hkap la shabrai n lu sa ya jang bai nhtang dat na re. Ngai hku na bai tsun ai gaw: Ya ten ngai nga shara gaw matut mahkai yak ai, gumhpraw sa hkat na mahkrun masa mung n nga ai shara re. Tara shang asuya gumhpraw dum ma n nga ai, ngai gara hku n chye sa ai. Ya ten sinwawp ana a majaw hkrun lam yawng pat hkum tawn ai ten re, pru hkawm sa yak ai. Mung masa shuk, lamu marang mung grai sawng ai ten re. Nang hpe gara hku nna ya ten gumhpraw n lu sa ya ai ngu tsun dat ai. Myen num bai tsun wa ai gaw: Raitim, hkap la shabrai yawng n lu sa dat tim, kau chyen sen manga ram sa dat jang, bat mi anhte yu reng hkang zing da ya ai re. Nye myit hta Yanggung kaw na manang langai ngai hpe sa yu shangun na kun ngu myit ai. Raitim, maigan num jan gaw ndai sadek hte seng nna nang hta lai kaga gadai hpe n mai chye shangun ai nga aja awa numhtet tawn nga ai. Ngai hku na Laiza kaw na lama Myen mung gyenan matut mahkai loi ai rai yang, Yanggung de na manang langai ngai hpe sa kaichyan shangun mayu nga ai.

Matut mahkai yak taw ai majaw, Yanggung de na manang ni hpe mung n lu garum hpyi dat. Myen num jan gyenan gade matut tim ngai mung n hta jum ya mat sai. Dai rai nna ngai gaw marang hpawng na la let gumhpraw galai sha ai gat seng langai kaw sa nna, Myen num jan na gyenan nambat kaw matut chyam shangun yu yang, lam hte lam gyenan matut ra nna gyennan hkrang yak nga ai. Mabyin masa jahta dan ai shaloi, gat seng na ni mung ngai hpe sadi jaw nga ai. Raitim ngai hku na mahkrum madup hku na ganing she rai kun yu yu ga ngu myit hta dum nga ga ai. Nye shara de bai nhtang wa nna maigan num dai hpe ning ngu laika ka dat ai: Ngai kaw $ 3,500 shagun dat na dawla gumhpraw mung n lu ai. Bai nna rai hkap la shabrai Myen gumhpraw hku sen manga shi sanit jaw na mung n lu ai. Dai majaw nang kaw na mahtang $ 3,500 hpe jang shalai dat ya u, ngai gaw na sadek du wa jang atsawm hkap zing da ya na, ngai kaw na ya ten gumhpraw mi lu tim shalai hkat na grai yak ai ginra re. Miwa mung jarit de she re, Myen mung hte seng nna tara shang matut mahkai lam hpa n nga ai. Miwa mung gata de mung sinwawp ana a majaw pru shang n mai lam pat tawn ai. Gara maga hku mung chyat rawng taw ai majaw ya ten ngai gara hku gumhpraw n lu shagun jaw ai. Ngai ganing n chye di sai, nang kaw na mahtang hkap la shabrai jaw dat ya na lam sha nga sai, kaga lam n hku mat sai, ngu laika ka htang dat sai. Maigan num jan gaw: Rai yang Myen gumhpraw sen manga shawng shagun dat u, shaloi bat mi lapran nang arai shaw la shabrai lajang nga ai ten shanhte yu ya na re.

Dai laman manang ni kaw na tim gan garum hpyi hkawi la nna shagun dat u. Gumhpraw du wa jang galang ta wa ya na she re gaw, Miwa hkran rap nna asuya gumhpraw dum hku na tim sa dat u da. Yanggung de na Myen num jan mung jahkring hkring ngai hpe gyenan atet shatsang wa ai. Gade lang ngawi tim ngai mung n hta jum ya mat sai. Dai hpe Maigan num jan gaw ngai hpe pawt da nga ai, galang mi hta madat ya ai shaloi, nang hpa majaw gyenan n hta ya ai yi da. Loi hkring shanhpraw num jan kaw nna: Nang ngai hpe garum la mayu ai nga nna kumani ni gyennan shaga wa jang hpa majaw n hta ya nni? Nye ganu gawa ni shamat kau ai hpang ngai hpe garum la na masha gadai n nga ai. Nang hpe she ganu gawa zawn kam, garum manang zawn kam ai wa, nang ngai hpe n kam garum la ai she re, ya ngai chye sai. Nang ngai hpe myit shayawn na nga nna dingsa ngai hpe masu ai she re. Wadang hkye na hpawmi jan ngai hpe shana wa ai, arung arai sa ya ai kumani ni nang hpe gyenan shaga wa ai, nang n hta ya aí da le. Hpawmi jan tsun yang gaw rai hkap la na matu gumhpraw shawng shagun dat ra aí nga shana wa ai. Lachyum gaw nang ngai hpe gasup chyai shatai nga ai. Nye a hkam sha lam hpe nang gasup chyai nga ndai. Nang ngai hpe gaja wa teng sha garum mayu ai rai yang, Miwa hkran rap sa nna Miwa asuya gumhpraw dum hku tim shagun ya mai ai she re, nang gaw grai nhkru nshop ai masha she rai nga ai. Nang ngai hpe myit shayawn ai majaw grai chyeju kaba sai yaw... da.

Lagut wa she nhtang de balik ni hpe ahkre ai ngu ai hku she ga shaga nga ai. 2021 ning shata man 8 nhtoi 26 ya shani hkying 4:41 kaw matut mahkai lam jahkring kau ni ai. Mungkan a hkalem hkalau ai prat moru pahkam hta Amerigan num mung ganoi lu jat, Jinghpaw mungkan ting mying mung ganoi gumkawng mat she byin lai wa yu ni ai. Dusat dumyeng ni pyi tinang hkawm sa ai hkrun lam hta galang galau gashot la jang, dai shara hpe sadi lu nga ai. Shinggyim masha gaw gade lang galau gashot la tim, dai shara kaw sha bai gashot galau la la rai chye majaw, ndai laika hpe hti yu nna htawm hpang de gadai mung dai hku n byin hkrum u ga ngu nye a mahkrum madup mabyin masa hpe sadi jaw ai hku garan gachyan dat aí lam re. Gaja teng n teng myit yu hpa lam ni: 1.Dola $9,30,000 a matu shi pyi rai htaw shabrai $9,000 jaw kau gui yang, ngai gaw rai hkap la na matu $3,500 sha gaw hpa n re ai ngu shaw jaw dat na myit pru wa na matu rai nga ai. 2. Gaja wa tengman ai, Mungkan tara shang kumani she rai yang, galang hkringdat ka jaw dat ai hte tinang nga shara mare du shang wa ai shaloi she tinang nga shara tam sagawn la na matu sha gyenan set wa ai lam rai ra ai. 3. Gaja teng ai rai yang, ngai kaw gaja wa hkap la shabrai $ 3,500 hpe matut mahkai hkrun lam yak hkak amyu myu a majaw, n lu jaw ai hpe shi kaw nna jaw shatawng ya ra ai ngu hpang jahtum myit lu wa ni ai.

Dumsa Lot Awng