AGA NAT AI LAM

AGA NAT AI LAM

MARU GAWNG

Jinghpaw ga malai: Ga kaw nat nang ai da! Ndai lam hpe sumru yu ai shaloi, num hte la gaw shada da grai grai tsawnra hkat nna nga wa ai rai yang, ten na wa magang nru nhpru nga nna chye matsa hkat wa nga ai, nkau kau gaw shana yupra pawng nna, hpang jahpawt du jang gali galaw matsa mawa nga nna bai jawm matsa hkat rai, dinghku gun sha ntsawm nga ma ai. Num nkau kau gaw, tinang a madu wa hpe lamu de matsa shalun, atsu ga de matsa shabawn, hkaraw nhkap akrung sinwa de matsa shabawn. Ga shadawn moi Pang- gum ga kaw byin yu ai, sa-wa, lasa si na, mu achye na nga nna makran hte krung krung nga hkra chye matsa nga ma ai. Panggum mare kaw byin yu ai, laning mi na shaning nan hpang praw lahkawng ya shani, gahtawng na la ni gaw Lawang bum de shan hkwi sha mat wa ai kaw, Ndin Naw jan gaw madu wa hpe: Daini wa du tai nna gap kau mu ga ngu nna hkan matsa dat nu ai. Teng sha dai shani Ndin Naw gaw wa du zawn rai mat nna, manang la langai e gap sat kau ai hkrum nu ai.

Bai Hpausum Naw Di jan gaw, madu wa mahkrai hkrai na matu, hpun preng tsawm ai sa yu lata da nna nta du wa yang, jan loi law mat sai. madu wa nta du wa ai shaloi kaw si hpang gara let, madu jan hpe shat ntawn da ya ai re ni ngu wa san dat nu ai, madu jan gaw madu wa jan law ai pawt mayu nna, she tawn da law, ya du hkra hkra gaw na lupba sa htu nga ai re ni, maw maw, sha jahtum la nu, ngu nna shat la jaw sai da, madu wa myit hta yawn yawn sha ngu na, makau kaw dung ai kasha hpe shaga shadun tawn nna, ma e, ningnu jaw ai jahtum shat re, jawm sha la ga, ngu woi sha la nna, sha ngut ndawt mahkrai hkrai na hpun bai kran mat wa nu ai. Mahkrai hpun hpe lahkawng masum lang sha naw gahtam dat yang, hpun dinghkra langai hkrat yu wa nna, shi a baw e nan hpawk di adup sat kau sai. La ji Lu ngu ai jan mung, madu wa hka hkran de num wa mat ai kasha hpe sa jahkrum krum re hpe nkam yu nna, lawan sa su, sa nna kum nhtang wa sa ngu nna kra kani matsa dat dat rai nu ai, galang mi shi kasha jan hpe jahkrum sa ai, kasha a nta du ai hte, baw sin ai nga nna, kasha jan tsi sara sa shaga wa nu ai, tsi sara dai bai rai jang nga gumra ni hpe htu ya ai baw tsi htu shut dat ya nna, chyahkring sha gahprup si mat sai.

Maru Gam jan shani shana madu wa hpe nsim nsa matsa chyu matsa, garai chyu shaga, mu achye chyu tsun nna sha nga nu ai. Lani mi marang kaba htu wa ra ai, dai nta npan kaw mau lam nat kungri kaw she mu sa achye dat ai she, npan kaw nna nhku de najawn hte galau ai zawn zawn, nhku gata ku shat shadu sha ai shatdi hku lai, shan a yupra hku hkren rai, sun na shanap pra kaw lup chye bang kau ya sai. ndai zawn nkaja ai g hkam hkaw ni pe koi gam let, ga gaja hkam hkaw la, ga gaja sha tsun la, akyu la, gaja ai aga sha tsun shaga, tinang krai ngwi pyaw ga hte krai hkaw la rai yang she, ngwi pyaw sut su ai dinghku byin wa lu nga ai. Bai nna gade lu su ai dunghku rai tim, numla myit nkrum, ga gaja, hkam hkaw ga ntsun, matsa mawa, goi law goi sha chyu tsun, manawn masham myit hte masha ni lu su ai chyu mu mada, htinggrum gata kaw masha ni lu su ai hpe shakawn ya, tinnag a matu gaw yawm ai de krai tsun jahpoi la, kaba ai rai lu tim tsun masen tsun kaji kau, ndai zawn madu a matu hkamhkaw ga nchye tsun ai ni gaw, shani shana ba tim nchye lu su chye nga ai, Dai majaw, ga da, ja da nga ai ga malai hpe tut e dum nga let, tinang shakut nga ai lam hpe awngdang na hku sha mahkawn mahkaw la, lu la ai rai ni pe mung mahkawn kungdawn la rai na, ga ngwi ga pyaw hte mayaw htinggaw de sha yang, ngwi pyaw sut su ai ten gaw, dai ga gaja chye tsun ai wa kaw shawng du na re, ngu nna ndau dat nngai law.