JA U
Mana maka matsan ai gumgai hte la kasha shan nu mi nga ma ai, shannu a matsan ai ngu ai gaw n -galaw nna matsan ai nrai, shan nu hkai a hkai ningrai ni wa hpa hkai yang hpa langai ngai sha si jaw nna matsan ai rai ma ai, raitim gumgai dai hte ma la kasha shannu gaw ahkai hkai yang langai ngai sha si jaw tim, salu salat shapraw nna galaw chyu galaw shakut, hkai chyu hkai shakut rai shakut sha nga ma ai. Lani mi shannu yi chye shakut an nga yang, u langai mi gaw shannu a ntsa hku pyen hkrai pyen gayin nga ai law ngu jang, jahtum e kanu a lawngta gata de pyen bang wa ra ai. U dai hpe shannu gaw nta de la wa nna, Uraw kaw atsawm sha wa rawng tawn manu ai. Du nta ni manau manau ma ai, mare masha ni gaw bu hpun palawng tsawm tsawm shakya mawn sumli lang nna manau manau sa wa mat ma masai, rai yang, gumgai dai a kasha gaw sa gaw grai sa mayu ai re she bu hpun lalawng ai re nlu nna ganing ndi nga u ai. Raitim kanu gaw kasha wa hpe sa su, ma e, buhpun palawng nlu tim, sa su, dai u hpe hkumli tsun gaang kaw ga bang gun nna sa wa su ngu sai. Shingrai, kasha wa gaw shannu a langai sha si nna di tawn ai hkumli tsun hpe gala ga la nna, u dai hpe hkumli tsun kaw bang nhtawm, nka kaw atsawm sha bang lang nna rai mat wa sai.
Rai yang hka kaba langai mi kaw du ai shaloi, masha ni gaw hka wawn hte lai mat wa ma masai. Ma la kasha dai gaw hka kau kaw gumhpraw lu nna kadai mung nkam sharap shalai ai majaw, atawm rai rai mat wa ai masha ni hpe sha hkan yu nna, ahka ndai hkran kaw nga taw nga sai. Manau manau bang wa hkyem sai, rai yang, adu nta Hkaike langai gaw, manam kaja garai nsa ai nga nna krai tsun taw nga sai da. Shaloi, shanhte gaw, gumhpraw grai lu ai masha langai hpe sa shaga wa yu yang mung, Hkaike dai gaw manam kaja garai nsa ai krai chyu sha a nga nga ai majaw, shanhte gaw mare shagu na gumpraw loi lu ai loi salang ai masha a jahpan ma hkra jep yu yang, kadai mung gaw nhprai taw nga sai da. Hpang jahtum e tam hkrai tam wa yu yang she hka waw ra hkran kaw la kasha dai chyu sha ngam taw nga sai ngu du wa hpe wa tsun dan manu ai. Du wa gaw la kasha dai wa hpe sa woi wa marit ngu shangun dat sai. Shanhte la kasha dai wa hpe sa woi wa mara ai, raitim shi hpe nau wang shinggan kaw sha wa tawn nna, nhku njashang ma ai.
Shaloi, Hkaike dai gaw manam kaja garai ndu ai, manam kaja hpang naw hkrat ai chyu sha anga nga ai majaw, shanhte ganing nchyum rai, dai nau wang shinggan kaw buhpun palawng gang chyanglang san hpun tawn ai matsan la kasha hpe nau wang gata de jashang la manu ai. Shaloi she,Hkaike gaw manam kaja du sai, manam kaja du sai nga nna nji n-gu nga shaga garu bang wa ra ai. La kasha dai wa gaw shi a hkumli tsun dai hpe shadan dan nu ai, shaloi shanhte mung shi hpe yu nna nau matsan la ai zawn re majaw, kumhpa kaja nlu shaw tim yau sai ngu ma ai. Hpa kumhpa nlu shaw nna, la kasha dai gaw dai shi a hkumli tsun hpe hpaw dat nu ai shaloi, gata na u dai gaw kra pru wa ai hte nhku ting gabrim si wa sai, gabrim ai dai gaw shinggan de nna yu dat yang gaw nhku de gabrim, tsan tsan kaw nna yu dat yang gaw nau ra ting gabrim wa rai nga ai.
Matsan ma la kasha a U dai gaw mayu na U mi nrai, ja U she rai nga ai law. Manau nau ngut nna manam ni bra mat wa na hkyem nga ai shaloi, adu wa gaw la kasha dai hpe sat kau na hkyem nga ma ai, shaloi du nta na Hkaike bai shaga garu si wa ra ai: Aja pe nmai sat ai. Shaloi adu wa gaw la kasha dai hpe nsat kau ai sha, kasha jan hpe she la kasha dai hpe jaw ya kau nna, shanhte nta na sut gan chyen mi garan ya kau nhtawm, shan hpe atsawm sha dinghku wa de sha masu ngu kau dat sai. Dai shani kaw nna la kasha dai gaw shayi dai hte nta kaw atsawm sha wa nga nna, kanu gumgai jan hte rau ngwi pyaw ai dinghku jawm de sha mat manu ai rai.
Maumwi hkai ai: DAU NI
Ka lajang ai: HTU LUNG
