HPAUMAW WA ZAU RIP HTINGWAN MA A LABAU MAUMWI

HPAUMAW WA ZAU RIP HTINGWAN MA A LABAU MAUMWI

MARU GAWNGMOI

Panggum ga kaw gahtawng 7 up ai shadip du Gatawng Tu ngu ai du ninghkring langai nga ai. Dai du wa gaw num lahkawng lu ai rai yang, num dung hpe gaw Wa Hkang shayi nguai rai nga ai. Bai hting- wan num ngu na hpe gaw Uri Mun Shawng ngu ai rai nga lu ai. Dai num lahkawng kaw la sha langai ngai kap ai. Raiyang, num dung jan nau matse ai majaw, htingwan num jan hpe shachyut kau nu ai. Dai hpang htingwan num hte kasha htingwan ma Zau Rip hkannu gaw mayu ga de bai nhtang wa nna, Tahkaw hka Hka mut gahtawng kaw num bai htawt wa sai hte maren, Zau Rip mung lani hte lani galu gaba wa sai rai. Shi ning daram na mat wa sai hpang na lani mi hta, Gatawng Tu gaw Nambup ga nna gumra lahkawng masum kaw gat rai htaw nna, Man mying gat kaw sa du yang she, ang shaa kasha mung kaidu hkap mi chywi hpai rai nna gat makau kaw wa gatut hkrum sai, raitim, kasha gaw kawa hpe n chye, kawa chyawm kasha rai nga ai hpe chye nna kasha hpe shaga let, gai gai,ngai sha Zau Zip, awa hpe ndai gumra daw naw hpai lawm rit ngu sai, shaloi kasha gaw, nang ngai na wa? ngai hpe shum sa roi, ngai na mying Zau Rip n nga ai, nye mying gaw Nchyang Gam she nga yang me ngu nha ga shai hkat wa sai.

Shaloi kawa Gatawng Tu gaw kasha hpe nem tawngban ai hte, akri akraw apawt kaw nna ndung hkren tsun hkai dan nu ai. Dai shani kaw nna kasha gaw kawa majing hpe chye la lu nu ai hta n-ga, shi a mying gaw Zau Rip ngu ai hpe mung chye la nu ai. Gatawng Tu mung dai shani kaw nna, kasha Zau Rip hpe ma ndai hpe lawan shen sa woi la kau yang gaw, ngai kawa hpe mung n chye, kaga amyu bawsang she, tai mat wa na hkyem sai ngu, nta du wa ai hpang manga kru ya du ai hte gahtawng myitsu salang ni hte bawngban la nhtawm, nga wala wuhpraw gaba langai dun rai Hka mut hkran ga de kasha hpe woi la sa wa sai. Shana de jan shang wa ai ten hta Njung ni a nta lau du wa magang, Gatawng Tu gaw kasha wa hpe ganing ngu nna bai sa tawngban na lam hpe, lam dingdung sumru bu taw nga nu ai, du shang wa ai hte nga wula hpe gaw nta npan wulawng kaw dun tawn, gahtawng na salang myitsu ni hpe shaga la rai, salang myitsu ni e, daina ngai Panggum du Gatawng Tu gaw ngai gade nja nhpra tsawra dik ai htingwan ma yan nu, kanu kawa jan myit n su nau matse, matsa mawa rai nna, jahka kau ya ai ngu yang, ngai sha Zau Rip brangtung brangla rai hkra ngai kawa hpe mung n chye mat, kanu she masha jan tai timung, ngai sha hpe gaw ngai naw woi la sana, ndai nga wula hte nba shabawn gaw shi chyu jaw kanu a matu rai u ga, bai ndai gumhpraw joi gaw mayu ni a matu rai u ga ngu nna ,hpang jahpawt jang kasha Zau Rip hpe woi wa kau sai.

Dai hpang kaw nna, kasha hpe ntat ai shi hpa galaw yang hpa woi galaw rai u ai. Bai shawng num kaw na kasha Zau Gawng hpe gaw kanu nau maga ai majaw, hpa mung n galaw shangun, lagawn lamawn rai shani tingting yup ya shakut rai u ai. Hpang e shannau lahkawng hpe num ma la ya nna gahpu Zau Gawng hpe gaw htingbran shapru nna Jinghkang gahtawng du wa galaw shangun. Ganau Zau Rip hpe gaw shadip htingnu nta gaba sin shangun sai, gadai mung gadai rai htinggaw de wa ma yang, Zau Rip gaw shani shana nhu n-gang hpaumawn tat, ri sanat manat, jahpawt jau jau rawt nna nam de shan gyam sha, shanbaw lagaw nra ni garap rapding hpring, shakum shakap hkan mung chyat ma sai. Hkwilu hkwisha ai hta lai nna, hkauhting hkauna galaw, u wa yam nga rem rai u ai majaw, naimam malu masha ni ntaw ntsa lu u ai. Panggum ga hpaga yumga lammaw gaba mung rai nga ai majaw, Zau Rip gaw mare na shawa masha ni hpe matsan mayan n jahkrum ai hta n -ga, myithkrum mangrum let mung masha ni hpe woiawn nna lai lam atsawm tsawm woi htu, hpaga yumga sa sa wa wa rai ai ni kawsi hpang gara yang hkringsa na shara ni san da ya, dai shara hka kau mayan hta bapa, n-gu, si maw simai ni makoi lup da yang, gadain lagu sha ai, dai shara hpe daini du hkra Baren sara nga nna shamying nga ma ai. Dai htan-ga lagu lagut, damya n mya sha lu na, akyu la, lam lai kang gumhpraw loili hta sha nna, n lu n lawm ai wa hpe jahkrit shaman rai ai hkyemsa jaw ya rai u ai.

Zau Rip gaw shanhte nta kaw nga gumra rem, shat shadu, mayam ma ni hpe mung numla, numwa kun dinghku de ya rai u ai. Zau rip nawng e hpaumaw n-htun tat ai majaw, shi hpe Zau Rip nga gadai n shaga yu, yawng e Hpaumaw wa ngu shamying ya ai mying she lu mat nu ai. Shingrai shakut shaja ai majaw, Panggum ga na Hpaumaw wa ngu ai du gaw gahtawng sanit up nna, shi a prat hta sut manau sanit lang nau lai wa nu ai, du langai a prat hta sut manau hpe sanit lang manau ai ngu ai lam gaw anhte ndai buga na du labau hta n na yu nga ai, Panggum ga na Hpaumaw wa hpe sha na yu ai. Dai hpang, kawa Gatawng Tu Nambup ga kaw wa dingla si sai. Kawa a makoi mayang poi galaw ai shaloi, Hpaumaw wa gaw malu masha hpe gumra matsat hte lahkawng lang bat htaw wanna, kawa a poi hpe wa jahkik shapawng ya u ai. Bai Jinghkang gahtawng du gahpu Zau Gawng gaw wa kasha gun dang re hte n-gu sing manga gun nna wa ai nga ma ai. Gahpu Zau Gawng a lup gaw ya du hkra gara kaw re pyi n mun chye nga ai. Hpaumaw Zau Rip a lupwa gaw ya du hkra nlung lup hkrak re labau lup hpe mu nga ai. Ndai labau hpe yu maram wa ai shaloi, kanu magaw yang kawa n magaw, kawa langai a kasha lagawn n chye shaman, galaw shakut ai wa lu su na! Lagawn nna shani shana yup nga ai wa gaw matsan si na sakse hpe mu lunga sai rai.

Ndai Zau Rip Hpaumaw hte Luding Nang Bang yan kasha mali lu ai. La n gam, Nan Zau, Nmau hku hka ninghtawn sai. La n naw, Shan Lum, Panggum bum gahtawng du. La n la, Zau La, Myenmung Pungling ninghtawn de sa nga mat sai. La n tu, Zau Tu, Myenmung Inglik hyen la la sai. Daiten hta Inglik mung ni gaw, Myenmung de shanyen shang wa nna, Myenmung hpe shanhte a zaw mung shatai la mayu ai majaw, shanhte a zaw mung masa ahkaw ahkang grin lu na matu hte kaga mungdan hkan shanyen jat na matu, mayam hyen dap hpaw da nga ma ai. Shaloi ten hkan e Miwa mung jarit makau mayang hkan na Jinghpaw Wunpawng ramma ni, dai Kachin dap hta hyen la la ai grai law lai wa sai. Shing rai, Panggum Zau Tu, Bulwi Zung Bawm, Lamut Yaw Yin ndai marai masum galang ta hyen hpung dai hta rawt lawm mat wa masai. Nambat langai mungkan majan lawt lu ai Jinghpaw Wunpawng la ni Inglik mung Lundun myu mare gaba na hkawhkam ginjaw du lu nna, tinang a buga de bai nhang du wa lu ai gaw, mungdan a matu arawng satang lu ai hta n-ga nloi ai lam rai nga ai.