Amoi, dumsi hte hkan ama bau shingjawng ai shaloi, nteng nman ai ga tsun hkat ma ai da. Dumsi a gasha hpe Lahpum Sum-awn mahkawn ngu, ankan a gasha hpe gaw Mankrung Hkung Lang la ngu ai. Dumsi gaw ahkan hpe: E Hkindu Tang Lanyen e, nang a Hpraw Mai Ma Ningsut hpe nhpa wa jaw a ni? Ahkan tsun ai, ngai a gasha hpe gaw ula jahku jaw, hpaji alap naw, hpajum laika chye ni ai nga. Dumsi bai tsun ai, Hkindu Tang Lanyen e, na Hpraw Mai Ma Ningsut gaw laijum laika gaw sheng nit dai, agawng n lawng, shingyang n bawng ngu nu ai. Matut nna, dumsi bai tsun ai, ngai a Hpraw Mai Ma Ningsut Lahpum Sum-awn mahkawn gaw agawng lawng, shingyang bawng ai, shingyang ahpraw hpru, shingyang gamgu tu ai ngu sai.
Shaloi ankan gaw, e Lanyi Labam Majan e, nang a gasha hpum sau tsawm ai, nang nhpa jaw nna hpum sau tsawm wa shangun ai re ni ngu bai san jang, dumsi gaw, e nang adawt sumtu gamung na yit, rugam gamung na hpyit na ndai ngu yang, n na hpyit na nngai ngu htan nu ai. Shaloi dumsi tsun dan ai, e ndung de saga ai hpe gaw wulang saga ngu kau, apawt de lagau ai hpe kaang zupdung zupmai gaja ngu wa bau su, shaloi bawng sau wa na re ngu sai da. Dumsi tsun ai ga hpe ahkan na madat shut kau nna, apawt de anai rawng ai hpe wulang saga ngu n gabai kau, ndung de lappyi lapba saga ai dai hpe kaang zupdung zupmai wa bau yang, gasha ganoi wa bau sat kau nu ai.
Dai rai dumsi kaw bai sa wa nna, Lanyi Labam Majan nang, ngai hpe masu magaw yu mayen jagyip bawp ai ngu dangrang hkat nga yang, uhku sakse sa hkam ai da. Hkindu Tang Lanyen (Ahkan) e, nang Lanyi Labam Majan masu manaw yawp, manyen jagyip bawp ndai ngu yang, dumsi gaw, tsabawp ula hpreng uhku nang, ngai Hkindu Tang Lanyen hpe masu manaw yawp ai gaw, ganang kaw dung nna na lawm? Gara kaw lung nna madat lawm nni? Ngu jang, uhku gaw ngai sa-sing ningdung kaw dung, ngalu sa-ku lakung kaw lung nna madat lawm sangai nga sai da. Shaloi, dumsi tsun da ai gaw, tsabawp u La Hpri nang, ngai Hkindu Tang Lanyen hpe masu manaw yawp ai wa mi nang sa- sing ningdung kaw lung, ngalu sa-ku lakung kaw dung nna madat lawm sit yang, ade kaang ga ring yang, abyin chyinghtawng machyan htingra ngu ai nga na re, dai hpe hkum sha, sa-sing asi ngu la sha, ngalu sa-ku si hpe nang la janka ngu tsun kau ai da.
Dai majaw daini du hkra uhku sumpu nampu n chyu ai, mateng ya du ga malai uhku a masa si mada rai ngu ai nga ai. Ahkan hte dumsi bai tsun dara hkat nga yang, utsa ni sakse bai sa hkam sai. E Lanyi Labam Majan nang, masu manaw yawp gayup sit dai, Hkindu Tang Lanyen manyen jagyip bawp in bawp sindai ngu yang, dumsi gaw, utsa ni hpe, e nanhte tsing- yup utsa ni, ngai Lanyi Labam Majan Hkindu Tang Lanyen hpe masu manaw yawp ai gaw, gana wa dung nna na lawm mit ni ngu yang? Anhte gaw kaang ni a jinghta magam kaw lung nna na lawm ai, mashaw nchyun kaw dung nna madat lawm ai ngu sai da.
Shaloi, dumsi gaw, e tsing- yup utsa ni e, rai ya ngai Lanyi Labam Majan, Hkindu Tang Lanyen hpe masu manaw yup ai wa, kaang ni a jinghta magam kaw lung, mashaw nchyun kaw dung nna na lawm mit yang, nanhte ade kaang ga ring yang, abyin chyinghtawng machyan htingra ngu ai nga yang hkum sa, kaang ni a jinghta magam kaw lung nna na lawm ai, mashaw nchyun kaw dung nna, machyang numhkaw sha ahpre shala, kaang ni e daw ya ai adaw shingrun sha la jahka nna nga mit wa angu sai da. Ya du mateng, utsa ni hkumpu nampu n chyu ai gaw ga dai wa re da. Ami ahkan tsun ai ula jahku jaw, hpaji alap naw ai, laijum laika chye ai nga ai ga dai wa mateng ya du, hkan hkyi kaw chyaba lap masum hpam re chyaba lap majing rawng ai dai gaw, shi hkrai daw matsun la ai mi re, n-gup de sha bang ai rai yang gaw lai kau na re, tim lunghkrung hkan taw ai hkanhkyi machyen kaw chyaba lap majing re rawng ai gaw maumwi ndai a majaw re da.
Hkai ai: La-jawng Awng,
ka lajang ai: Bok Tawng
